Anguwona Kuti Abali ndi Azichi Aŵayanjanga
YOMARA ndi azichi ŵaki, Marcelo ndi Hiver aja mumuzi unyaki ku Guatemala. Yomara wangwamba kusambira Bayibolu ndi Akaboni ndipu pavuli paki azichi ŵaki nawu angwamba kusambira. Kweni penga suzgu linyaki. Wosi atatu awona cha ndipu ŵenga ajila kuŵerenga mabuku nga ŵanthu ambula kuwona. Mwaviyo, munthu yo waŵasambizanga Bayibolu wachitanga kuŵaŵerenge ndimi kweniso mavesi nga mu Bayibolu pakuŵasambiza.
Suzgu linyaki lenga lakuti venga vakusuzga kuti alutengi ku maunganu nga mpingu. Yiwu atingi afiskengi cha kwenda mtunda wa maminiti 40 kuluta ku Nyumba ya Ufumu yakufupi. Kweni abali ndi azichi a mpingu wenuwu achiŵatonga ndi kuluta nawu ku maunganu. Ndipu yiwu ŵati ayamba kukamba nkhani pa unganu wa mkati mwa sabata, abali ndi azichi aŵawovyanga kuloŵeza vigaŵa vo apaskika.
Mu May 2019, maunganu nga mpingu ngangwamba kuchitikiya mumuzi wawu. Pa nyengu yeniyi, banja lo lachitanga upayiniya wa nyengu zosi lingusamiya kwenuku. Yiwu angunozga vakuti wosi atatu aŵasambizi kuŵerenga kweniso kulemba vilembu va ŵanthu ambula kuwona, chinanga kuti banja lenili laziŵanga cha kuŵerenga kweniso kulemba vilembu venivi. Mwaviyo, yiwu anguluta ku layibulare kuchito mabuku nga ŵanthu ambula kuwona kuti asambiri mo angasambiziya anyawu kuti avigwiriskiyengi ntchitu.
Marcelo wapereka ndemanga pa unganu wa mpingu
Pati pajumpha myezi yimanavi, Yomara, Marcelo ndi Hiver angwamba kuŵerenga vilembu va ŵanthu ambula kuwona mwambula kusuzga ndipu venivi vinguŵawovya kuti aluti panthazi mwauzimu. a Sonu Yomara, Marcelo ndi Hiver ateŵete nge apayiniya a nyengu zosi. Ndipu Marcelo ndi mteŵeti wakovya. Yiwu atangwanika ndi kuteŵete Yehova zuŵa lelosi. Phamphu lawu lawovya so ŵanthu anyaki kuti nawu achitengi viyo.
Yomara, Marcelo ndi Hiver awonga chifukwa cha mo abali ndi azichi atiŵawovye mwachanju. Yomara wanguti: “Kutuliya pa zuŵa lo tingukumana ndi Akaboni, yiwu aja achitilongo chanju chayichu cha Chikhristu.” Marcelo nayu wangukamba kuti: “Te ndi mabwezi ngamampha ukongwa mumpingu widu kweniso te mu banja la pacharu chosi lo ndakukoliyana.” Yomara ndi azichi ŵaki akhumbisiska kuziwona mo Yehova wazamusinthiya charu kuja paradayisu.—Salimo 37:10, 11; Yesa. 35:5.
a Kabuku kakuti Learn to Read Braille kakupangika kuti kawovyengi ŵanthu ambula kuwona pamwenga wo asuzgika kuwona kuti asambiri mo angaŵerenge kweniso kulemba vilembu va ŵanthu ambula kuwona.
Mungayanja Kuŵerenga so Nkhani Izi
KUMBI NDALAMA ZO MUPEREKA ZIGWIRA NTCHITU WULI?
Vilembu va Ŵanthu Ambula Kuwona Vasintha Umoyu wa Ŵanthu
Tipanga mabuku nga ŵanthu ambula kuwona kweniso kusambiza ŵanthu mo angangaŵerenge.
