Apapi, mabwezi kweniso mabwana ku ntchitu ngatiŵagomezga ukongwa ŵanthu wo mbakuthembeka. Ŵanthu wo athembeka, avwiya marangu, afiska vo alayizga kweniso nyengu zosi akamba uneneska.

Kanandi, asani mwe akuthembeka ukongwa, mupaskika so wanangwa ukulu ndipu asani mwe ambula kuthembeka, mupaskika so wanangwa umana.

“Kuti apapi akuthembeningi, mukhumbika kuchita vinthu vakulongo kuti mwakuwa kweniso kuti mungafiska kuchita vinthu pakumwija. Mutenere kuchita viyo chinanga mphanyengu yo apapi ŵinu palivi.”—Sarahi.

FUNDU YA M’BAYIBOLU: “Lutirizgani kusimikiza kuti ndimwi munthu wamtundu wuli.”—2 Akorinto 13:5.

Asani mukhumba kuti ŵanthu akuthembeningi ukongwa pamwenga asani mukhumba kuti ayambi so kukuthembani, fundu izi zingakuwovyani.

Muchitengi vinthu mwauneneska. Ŵanthu angaleka kukuthembani asani mukamba boza. Kweni asani muchita vinthu mwauneneska kweniso mubisa cha vo mwanangisa, vingachitiska kuti ŵanthu akuthembeningi.

“Munthu wasuzgika cha kuchita vinthu mwauneneska asani vinthu vitenda umampha. Kweni kuchita vinthu mwauneneska asani wanangisa vinthu vinyaki kungachitiska kuti ŵanthu akuthembeningi ukongwa.”—Caiman.

FUNDU YA M’BAYIBOLU: “Tikhumba kuchita vinthu vosi mwauneneska.”—Aheberi 13:18 .

Jani akuthembeka. Kafukufuku munyaki yo wanguchitika ku United States, wangulongo kuti ŵanthu 78 pa 100 wo alemba ŵanthu ntchitu, angukamba kuti kuthembeka “ndimoza mwa mijalidu yitatu yakukhumbika ukongwa yo yitovya kuti munthu walembeki ntchitu.” Mwaviyo, kuja akuthembeka sonu, kungazikuwovyani asani mwakuwa.

“Apapi ŵangu aziŵa asani ndichita vinthu vinyaki pakundija kweniso asani ndigwira ntchitu zangu kwambula yiwu kundikumbusa. Kuchita viyo, kuchitiska kuti yiwu andithembengi ukongwa.”—Sarah.

FUNDU YA M’BAYIBOLU: “Nde ndi chigomezgu kuti uchitengi mwakukoliyana ndi venivi, . . . chifukwa ndiziŵa kuti uchitengi vakuluska vo ndikamba.”—Filimoni 21.

Muzizipizgengi. Ŵanthu asuzgika cha kuziŵa asani mwana wakuwa. Kweni pakhumbika nyengu yakukwana kuti aziŵi asani wachita vinthu vakulongo kuti ndi mura kweniso asani wangafiska kuchita vinthu pakuyija.

“Kuchita vinthu pakumwija kamoza pe ndiku cha kungachitiska kuti apapi ŵinu kweniso ŵanthu anyaki ayambi kukuthembani. Kweni asani pajumpha nyengu, yiwu angayamba kukuthembani asani nyengu zosi mulongo kuti mungafiska kuchita vinthu pakumwija.”—Brandon.

FUNDU YA M’BAYIBOLU: “Vwalani . . . kuzizipizga.”—Akolose 3:12.