1, 2. (a) Kumbi ‘mphasu yawezi yaku Chiuta yambula makambika’ yisazgapu vinthu wuli? (b) Kumbi tikambiskanengi mafumbu nanga mu nkhani iyi?

YEHOVA wakulongo chanju chikulu pakutumiza Mwana waki wapade pacharu chapasi. Iyi ndi mphasu yikulu ukongwa kuluska mphasu yeyosi. (Yoh. 3:16; 1 Yoh. 4:9, 10) Wakutumika Paulo wanguyikamba kuti ndi ‘mphasu yawezi yaku Chiuta yambula makambika.’ (2 Ŵakor. 9:15) Nchifukwa wuli Paulo wangukamba viyo?

² Paulo wanguziŵa kuti vosi vo Chiuta wakukamba vazamuchitika chifukwa cha sembi yo Yesu wakupereka. (Ŵerengani 2 Ŵakorinte 1:20.) Mwaviyo, ‘mphasu yawezi yambula makambika’ yisazgapu vinthu vosi vamampha vo Yehova wazakutichitiya kunthazi kuziya mwaku Yesu. Kukamba uneneska, mphasu iyi njapade ukongwa mwakuti taŵanthu tingafiska cha kukonkhoska. Kumbi mphasu iyi yitenere kutikwasa wuli? Kumbi yitenere  kutichiska wuli po tinozgeke Chikumbusu cho chazamuchitika pa Chitatu, pa 23 March, 2016?

3, 4. (a) Kumbi mutuvwa wuli asani mwalonde mphasu? (b) Kumbi umoyu winu ungasintha wuli asani munthu munyaki wangakupasani mphasu yapade?

³ Asani munthu walonde mphasu, wakondwa ukongwa. Kweni mphasu zinyaki zija zapade ukongwa mwakuti zingasintha umoyu wa munthu. Tiyeruzgiyi kuti akhumba kukubayani chifukwa cha mulandu wo mwapalamula. Kweni mwamabuchibuchi munthu munyaki yo muleka kumuziŵa watiti iyu ndiyu wabayiki m’malu mwinu. Kumbi mungakwaskika wuli asani munthu wangakuchitiyani viyo?

⁴ Chanju chaviyo chingakuchiskani kuti muŵanaŵaniyi vakuchita vinu ndi kusintha umoyu winu. Chingakuchiskani so kuti muje ndi mtima wakupasa, muyanjengi anyinu kweniso kuti mugowokiyengi weyosi yo wakunangiyani. Munthu waviyo mungamuluwa cha umoyu winu wosi.

5. Kumbi mphasu yaku Chiuta ya sembi yaku Yesu yiphara wuli mphasu zinyaki zosi?

⁵ Kweni mphasu yo Yehova watipasa kuziya mwaku Khristu njikulu ukongwa kuruska mphasu yo tayikamba pachanya yapa. (1 Pet. 3:18) Chifukwa wuli tikamba viyo? Tosi titufwa chifukwa tikutole ubudi kwaku Adamu. (Ŵar. 5:12) Pakuti watitiyanja, Yehova wangutuma Yesu kuti “walaŵi nyifwa mumalu mwa munthu weyosi.” (Ŵah. 2:9) Chifukwa cha sembi yaku Yesu, Yehova wazamutuzapu nyifwa kwamuyaya. (Yes. 25:7, 8; 1 Ŵakor. 15:22, 26) Wo agomezga Yesu azamulonde umoyu wamuyaya panu pasi. Yiwu azamuja mwachimangu ndipuso mwakukondwa mu Ufumu waku Chiuta wo wazamuwusika ndi Khristu. Kweni Akhristu akusankhika amuwusiya limoza ndi Yesu kuchanya. (Ŵar. 6:23; Chiv. 5:9, 10) Kumbi ndi vitumbiku wuli vinyaki vo Yehova wazakutipasa chifukwa cha sembi yaku Yesu?

6. (a) Kumbi ndi vitumbiku wuli vo mukhumbisiska kuzilonde? (b) Kambani vinthu vitatu vo tichiskika kuchita chifukwa cha mphasu yaku Chiuta.

⁶ Mphasu yaku Chiuta yisazgapu kuchiza matenda ngosi, kusintha charu kuti chije paradayisu ndi kuyuska akufwa. (Yes. 33:24; 35:5, 6; Yoh. 5:28, 29) Titimuyanja ukongwa Yehova ndi Mwana waki chifukwa chakutipasa ‘mphasu yawezi yambula makambika.’ Kweni fumbu ndakuti, Kumbi mphasu yaku Chiuta yititichiska kuti tichitengenji? Sonu tikambiskanengi mo mphasu yaku Chiuta yititichiskiya (1) kuti tichitengi vo Yesu Khristu wachitanga, (2) kuti tiyanjengi abali ŵidu, ndipuso (3) kuti tigowokiyengi anyidu kutuliya pasi pa mtima.

7, 8. Kumbi chanju cho Khristu wakutilongo chitenere kutichiska kuti tichitengenji?

⁷ Chakwamba, titenere kukondweska Yesu Khristu mu vakuchita vidu vosi. Wakutumika Paulo wangukamba kuti: “Chanju cho Khristu wenachu chititichiska.” (Ŵerengani 2 Ŵakorinte 5:14, 15.) Paulo wanguziŵa kuti asani munthu wakhumba kuti Yesu wamuyanjengi, watenere kuchita vinthu vo vitimukondwesa. Asani tiziŵa kukhumbika kwa vo Yehova wakutichitiya, tikhumbisiskengi kukondwesa Yesu Khristu. Kumbi tingalongo wuli kuti tikhumbisiska kukondwesa Yesu?

⁸ Wo atanja Yehova achiskika kuchita vo  Yesu wachitanga. (1 Pet. 2:21; 1 Yoh. 2:6) Tilongo kuti titanja Chiuta ndi Khristu asani titiŵavwiya. Yesu wangukamba kuti: “Mweniyo we ndi marangu ngangu ndipu watingasunga ndiyu watindiyanja. Ndipu yo watindiyanja wayanjikengi ndi Ada, ndipu nani ndimuyanjengi, ndipu ndazakujirongo umampha kwaku iyu.”​—Yoh. 14:21; 1 Yoh. 5:3.

9. Kumbi tiyeseka kuti tichitenji?

⁹ Pa nyengu ya Chikumbusu titenere kuŵanaŵaniya vakuchita vidu. Jifumbeni kuti: ‘Kumbi ndi vinthu nivi vo ndichita umampha pa nkhani yakulondo Yesu Khristu? Kumbi ndi vinthu nivi vo ndikhumbika kusintha?’ Kujifufuza kwaviyo nkhwakukhumbika ukongwa chifukwa tiyeseka kuti tichitengi vinthu va mu charu. (Ŵar. 12:2) Asani tingaleka kuphwere, tingayamba kutole zeru za ŵanthu a mu charu ichi pamwenga kulondo ŵanthu akutchuka. (Ŵakol. 2:8; 1 Yoh. 2:15-17) Kumbi tingachita wuli kuti tikhwechi vinthu ivi?

10. Kumbi ndi mafumbu nanga ngo titenere kujifumba pa nyengu ya Chikumbusu, ndipu vo tingamuka vitenere kutichiska kuti tichitenji? (Wonani chithuzi cho che papeji 12.)

¹⁰ Tingagwiriskiya ntchitu nyengu ya Chikumbusu kuti tiwoni malaya ngo tenangu. Tingawona so mafilimu, sumu, vinthu vo tikuŵika mu kompyuta ndi mu foni yidu. Asani tiwona mo tiŵika malaya, tijifumbi kuti: ‘Asani ndingaluta ko Yesu wamusanilika, kumbi ndingafwatuka kuvwala malaya yanga?’ (Ŵerengani 1 Timote 2:9, 10.) ‘Asani ndingavwala malaya ngenanga, kumbi ŵanthu angandiziŵa kuti nde wakusambira waku Yesu?’ Pa nkhani ya mafilimu ndi sumu tijifumbi kuti: ‘Kumbi Yesu wangawonere filimu iyi? Kumbi wangavwisiya sumu iyi? Asani wangabwereka foni yangu, kumbi ndingachita sonu ndi vo wangawona?’ Pa nkhani ya magemu ngapafoni pamwenga vidya vinyaki, jifumbeni kuti: ‘Kumbi ndingamukonkhoske Yesu chifukwa cho nditanjiya kuseŵe gemu iyi?’ Kwanja Yehova kutenere kutichiska kuti titayi vinthu vosi vambula kwenere kwa mu Khristu, kaya vinthu vo tingugula ndalama zinandi wuli. (Mac. 19:19, 20) Pa nyengu yo tabatizikiyanga, tingulayizga kuti tijikondwesengi tija cha kweni tikondwesengi Yesu. Mwaviyo, titenere cha kusunga chinthu chechosi cho chingatitondekesa kukondwesa Yesu.​—Mat. 5:29, 30; Ŵaf. 4:8.

11. (a) Kumbi kwanja Yehova ndi Yesu kutitichiska kuti tichitengenji? (b) Kumbi chanju chingatichiska wuli kuti tiwovyi anyidu mumpingu?

¹¹ Kwanja Yesu kutitichiska so kuti tipharazgengi mwaphamphu. (Mat. 28:19, 20; Luka 4:43) Pa nyengu ya Chikumbusu tazamukuŵa ndi mwaŵi wakuchita upayiniya wakovya wa maola 30 pamwenga 50. Kumbi mungasintha vinthu vinyaki kuti muzichiteku upayiniya? M’bali munyaki wa vyaka 84, yo muwolu waki wakutayika, wawonanga kuti wangafiska cha kuchita upayiniya wakovya chifukwa chakukota kweniso kutama. Kweni apayiniya anyaki angumuwovya. Yiwu amutonga pa galimotu ndipuso angusankha chigaŵa cho wangafiska kupharazgaku kuti wafiski maola 30. Kumbi mungawovyaku munthu munyaki mumpingu winu kuti wachiteku upayiniya wakovya pa nyengu ya Chikumbusu? Mbuneneska kuti tanyaki tingafiska cha kuchita upayiniya wakovya. Kweni tingagwiriskiya ntchitu nyengu ndi nthazi zidu kuti tisazgiyeku uteŵeti widu. Asani tingachita viyo, tingalongo kuti tichiskika ndi chanju chaku Khristu nge mo Paulo wanguchitiya. Kumbi chanju chaku Chiuta chititichiska so kuchitanji?

12. Kumbi chanju chaku Chiuta chititichiska kuti tichitengenji?

¹² Chachiŵi, chanju chaku Chiuta chingatichiska kuti tiyanjengi abali. Wakutumika Yohane wanguziŵa fundu iyi. Iyu wangulemba kuti: “Akwanjiwa, asani Chiuta wakutiyanja viyo, ndikwesa nasi titenere kwanjana.” (1 Yoh. 4:7-11) Asani tikhumba kuti Chiuta watiyanjengi, titenere kwanja abali. (1 Yoh. 3:16) Kumbi tingalongo wuli kuti titiŵayanja?

13. Kumbi vo Yesu wachitanga vingatiwovya wuli kuti tiyanjengi abali?

¹³ Vo Yesu wachitanga vingatiwovya kuti nasi tiyanjengi abali. Pa nyengu yo wachitanga uteŵeti waki pacharu chapasi, waŵanaŵaniyanga ŵanthu akusika. Iyu wachizanga ŵanthu akupunduka, ambula kuwona, ambula kuvwa ndi ambula kulongoro. (Mat. 11:4, 5) Yesu wasambizanga ŵanthu wo akhumbanga kuziŵa Chiuta. Alongozgi avisopa akambanga kuti ŵanthu yaŵa ŵenga ‘akutembeka.’ (Yoh. 7:49) Iyu wayanjanga ŵanthu akusika ndipu wayesesanga kuŵateŵete.​—Mat. 20:28.

14. Kumbi imwi mungachitanji kuti mulongo kuti mutanja abali?

¹⁴ Nyengu ya Chikumbusu yititipaska mwaŵi wakuŵanaŵaniya abali ndi azichi mumpingu widu nge mo Yesu wachitiyanga. Asani mwazamuchita viyo, ŵanthu anyaki azamuyanduwa ndi chanju chinu. Panyaki mumpingu winu mwe abali ndi azichi akukota wo akhumbika kuŵawovya. Kumbi mungaluta kunyumba kwawu kuti mukachezi nawu? Kumbi mungaŵapasaku chakurya, kuŵagwiriya ntchitu za pakhomu, kuŵapingaku pakuluta ku mawunganu pamwenga kwenda nawu mu uteŵeti? (Ŵerengani Luka 14:12-14.) Chanju chaku Chiuta chitenere kutichiska kuti tiyanjengi abali.

15. Kumbi weyosi watenere kuziŵanji?

¹⁵ Chachitatu, chanju chaku Yehova chitenere kutichiska kugowoke abali ndi azichi. Pakuti te ŵana aku Adamu, tosi te akubuda kweniso titufwa. Palivi yo wangakamba kuti, “Ini ndikhumbika sembi cha.” Chinanga wangaŵa muteŵeti wakugomezgeka ukongwa waku Chiuta, nayu wathemba lisungu  laku Yehova kuziya mwaku Khristu. Weyosi watenere kuziŵa kuti Chiuta wakumugowoke ngongoli yikulu ukongwa. Nchifukwa wuli kuziŵa fundu iyi nkhwakukhumbika? Ntharika yinyaki yo Yesu wangukamba yimuka fumbu lenili.

16, 17. Kumbi tisambiranji pa ntharika yaku Yesu ya fumu ndi akapolu ŵaki?

¹⁶ Yesu wangukonkhoska mo fumu yinyaki yingugowoke kapolu waki matalente 10,000 pamwenga kuti madinari 60,000,000. Kweni kapolu uyu wangukana kugowoke kapolu munyaki yo wangumukongola madinari 100 pe. Fumu yingukwiya ukongwa yati yavwa vo kapolu yo yingumugowoke wanguchita. Vo wanguchita kapolu uyu vingulongo kuti wenga ndi mtima uheni ukongwa. Fumu yingumukambiya kuti: “Kapolu wabwekabweka iwi, ini ndingukugowoke ngongoli yaku yosi wati wandiŵeyere. Sonu watondekiyanji kumulenge lisungu kapolu munyaku nge mo ini ndingukulenge lisungu?” (Mat. 18:23-35) Lisungu likulu lo fumu yingulongo latingi lichiskengi kapolu mwenuyu kuti wagowoke kapolu munyaki. Mwakuyanana waka, kumbi chanju chaku Yehova ndi lisungu laki vitenere kutichiska kuti tichitengenji?

¹⁷ Nyengu ya Chikumbusu yititipaska mwaŵi wakuwona asani tisungiya abali ndi azichi chakukhosi. Asani ndivu tichita, mbwenu iyi ndi nyengu yamampha kutole Yehova yo ‘ngwakunozgeka kugowoka.’ (Neh. 9:17; Sumu 86:5) Asani tiziŵa kuti Yehova wakutigowoke ngongoli yikulu, mbwenu nasi tigowokiyengi anyidu kutuliya pasi pa mtima. Chiuta wangatigowoke cha ndipuso kutiyanja asani isi tigowoke anyidu cha. (Mat. 6:14, 15) Asani tigowoke anyidu, vitiwovyengi kuti tikondwengi.

18. Kumbi chanju chaku Chiuta chingumuwovya wuli Lily kukunthiyapu vo Carol wachitanga?

¹⁸ Nyengu zinyaki vija vakusuzga kukunthiyapu vo abali ndi azichi atitinangiya. (Ŵerengani Ŵakolose 3:13, 14; Ŵaefesu 4:32.) Mwakuyeruzgiyapu, mzichi Lily ngwambula kuyirwa. Iyu wawovyanga Carol yo wenga choko. ^[1] Lily wamupinganga mu galimotu yaki, wamuguliyanga vinthu vakukhumbika kweniso wamuwovyanga mu nthowa zinandi. Chinanga kuti Lily wamuchitiyanga vosi ivi, Carol wenga wakusuzga ukongwa ndipu wasuskanga chechosi cho wachitanga. Kweni Lily wawonanga vamampha vo Carol wachitanga. Iyu wangulutirizga kumuwovya mpaka po wangufwiya. Lily wangukamba kuti: “Chinanga kuti Carol wandichitiyanga vosi ivi, kweni ndikhumbisisa kuzimuwona asani wayuka. Ndikhumba kuti ndizimuwoni asani wazija murunji.” Kukamba uneneska, chanju chaku Chiuta chingatichiska kuti tikunthiyengepu vo abali ndi azichi atitinangiya. Kweniso chingatichiska kuŵanaŵaniya nyengu yo ubudi wazamuŵaku so cha.

19. Kumbi ‘mphasu yawezi yambula makambika’ yitenere kutichiska wuli?

¹⁹ Nge mo tawone mu nkhani iyi, tikulonde nadi ‘mphasu yawezi yambula makambika’ kutuwa kwaku Yehova. Mphasu iyi tingayitoliyanga mwasaza cha. M’malu mwaki, pa nyengu ya Chikumbusu, tikhumbika kuŵanaŵaniya vo Yehova ndi Yesu akutichitiya. Mwaviyo, chanju chawu chitenere kutichiska kuti tichitengi vo Yesu wachitanga, tiyanjengi abali ndipuso tiŵagowokiyengi kutuliya pasi pa mtima.