1. Kumbi sembi yaku Yesu, yichitisa kuti tisaniyi vitumbiku nivi?

SEMBI yaku Yesu Khristu yikuchitisa kuti paje vitumbiku vinandi. Sembi iyi yitovya ŵana aku Adamu wosi wo atanja urunji kuti azije mu banja laku Chiuta. Sembi yaku Yesu yititiwovya kuti tizije ndi umoyu wamuyaya kweniso walikondwa. Chinanga kuti yitovya ŵanthu akuvwiya kuti azilonde vitumbiku kunthazi, yitovya so pa vinthu vinyaki. Chifukwa chakuti Yesu wenga wakunozgeka kufwa, wangulongo kuti Yehova ngwakwenere kulamuliya ndipu nkhani yeniyi njakukhumbika ukongwa mu chilengedu chosi.—Ŵah. 1:8, 9.

2. (a) Kumbi ndi fundu zakukhumbika nizi zo zisanirika mu pempheru laku Yesu? (Wonani chithuzi cho che pachanya.) (b) Kumbi tikambisanengenji munkhani iyi?

² Kwati kwaja vyaka pafupifupi viŵi kuti Yesu wafwi ndi kupereka umoyu waki sembi, wangusambiza akusambira ŵaki kuti apempherengi kuti: “Awusefwi akuchanya, zina linu litoweseki. Ufumu winu uzi. Khumbu linu lichitiki, kuchanya kweniso pacharu chapasi.” (Mat. 6:9, 10) Kulongo kuti tiwonga sembi yaku Yesu, tiyeni  tikambisani mo sembi yeniyi yigwiriya ntchitu pa kutoweseka kwa zina laku Chiuta, kulamuliya kwa Ufumu waki ndipuso kufiskika kwa khumbu laki.

3. Kumbi zina lakuti Yehova lilongonji, nanga Satana wangulipusikiya wuli zina lakupaturika lenili?

³ Chinthu chakwamba cho Yesu wangukamba mu pempheru laki, chenga kutoweseka kwa zina laku Chiuta. Zina lakuti Yehova, lilongo ukulu wa ulamuliru waki, nthazi zaki ndipuso kuti ndi mutuŵa. Nyengu yinyaki Yesu wachipemphera wangukamba Yehova kuti, “Ada Atuŵa.” (Yoh. 17:11) Chifukwa chakuti Yehova ndi mutuŵa, fundu ndi marangu ngaki vituŵa. Chinanga kuti ve viyo, mumunda wa mu Edene, Satana wangususka mwauryarya kuti Chiuta ngwakwenere kupasa ŵanthu marangu ngakuti ayendiyengi. Satana wangupusikiya zina lakupaturika laku Chiuta chifukwa wangukamba boza lakukwaskana ndi Yehova.—Chiy. 3:1-5.

4. Kumbi Yesu wanguwovya wuli kuti zina laku Chiuta litoweseki?

⁴ Yesu waliyanjanga ukongwa zina laku Chiuta. (Yoh. 17:25, 26) Iyu wanguwovya kuti zina laku Chiuta litoweseki. (Ŵerengani Sumu 40:8-10.) Chifukwa chakuti wangugomezeka pacharu chapasi, wangulongo kuti Yehova wanguchita umampha kujalikisa marangu ngakuti ŵanthu alondongi ndipuso wenga wakwenere kuchita viyo. Yesu wangulutiriza kuja wakugomezeka kwa Awisi akuchanya chinanga kuti Satana wanguchitisa kuti wafwi nyifwa yakuŵaŵa ukongwa. Kugomezeka kwaku Yesu kungulongo kuti munthu wambula ubudi wangalutiriza kuja wakugomezeka ku fundu zaku Chiuta.

5. Kumbi tingawovya wuli kuti zina laku Chiuta litoweseki?

⁵ Kumbi tingalongo wuli kuti titanja zina laku Chiuta? Tingalongo mu vo tichita. Yehova wakhumba kuti tijengi atuŵa. (Ŵerengani 1 Petro 1:15, 16.) Ivi ving’anamuwa kuti tisopengi Yehova pe kweniso timuvwiyengi ndi mtima wosi. Chinanga mpha nyengu yo titombozgeka, tiyesesengi ndi mtima wosi kuchita vinthu mwakukoliyana ndi fundu zaki za urunji kweniso marangu ngaki. Asani tichita vinthu mwa urunji, ukweru widu uŵala ndipu venivi vichitisa kuti zina laku Chiuta likankhusiki. (Mat. 5:14-16) Nge ŵanthu a mijalidu yamampha, vo tichita vilongo kuti marangu ngaku Yehova ngamampha ndipu vo Satana wangukamba, vaboza. Chifukwa ndisi akubuda, tosi tinangisa kweni tilapa kutuliya pasi pa mtima ndipu tichita so cha vinthu vo vileka kutumbika Yehova.—Yer. 14:7.

6. Ntchifukwa wuli Yehova watitiwona nge arunji chinanga kuti te akubuda?

⁶ Ŵanthu wo ŵe ndi chivwanu, Yehova watiŵagowoke maubudi ngawu kuziya mu sembi yaku Khristu. Iyu wazomereza ŵanthu wo atijipereka kwaku iyu kuti amusopengi. Yehova wakamba Akhristu akusankhika kuti mbarunji ndipu watiŵawona nge ŵana ŵaki penipo “a mbereri zinyaki” watiŵawona nge mabwezi ngaki. (Yoh. 10:16; Ŵar. 5:1, 2; Yak. 2:21-25) Mwaviyo, chinanga ndi sonu, sembi yaku Yesu yichitisa kuti Awusefwi akuchanya atiwonengi kuti ndisi arunji kweniso yichitisa kuti tiwovyengi kutowesa zina lawu.

7. Kumbi ndi vitumbiku nivi vo tazamulonde mu Ufumu waku Chiuta chifukwa cha sembi yaku Yesu?

⁷ Chachiŵi, Yesu wangupempha Chiuta kuti: “Ufumu winu uzi.” Kumbi sembi yaku Yesu yikoliyana wuli ndi Ufumu waku Chiuta? Sembi yaku Yesu yachitisa kuti ŵanthu 144,000 akateŵete limoza ndi Khristu kuchanya nge mafumu ndipuso asembi. (Chiv. 5:9, 10; 14:1)  Yesu ndi wo wamulamuliya nawu wo apanga Ufumu waku Chiuta, azamuwovya ŵanthu akuvwiya kuti aziyanduwi ndi sembi yaku Yesu kwa vyaka 1,000. Charu chazamusintha kuja paradayisu, kamana ndi kamana ŵanthu wosi akugomezeka azamuja ambula ubudi ndipu chigaŵa cha kuchanya ndi cha pacharu chapasi cha banja laku Chiuta vazamukoliyana. (Chiv. 5:13; 20:6) Yesu wazamuphwanya mutu wa njoka ndi kumalisa masuzgu ngosi ngo ngalipu chifukwa cha kugaluka kwaku Satana.—Chiy. 3:15.

8. (a) Kumbi Yesu wanguŵawovya wuli akusambira ŵaki kuziŵa kuti Ufumu waku Chiuta ngwakukhumbika? (b) Kumbi tilongo wuli kuti titovya Ufumu mazuŵa nganu?

⁸ Yesu we pacharu chapasi, wangovya akusambira ŵaki kuziŵa kuti Ufumu waku Chiuta ngwakukhumbika. Wati wabatizika, wangupharazga “uthenga wamampha wa Ufumu waku Chiuta” muvigaŵa vinandi. (Luka 4:43) Yesu we pafupi kuluta kuchanya, wangukambiya akusambira ŵaki kuti achitiyi ukaboni zaku iyu ‘mpaka kukumaliya kwa charu.’ (Mac. 1:6-8) Kuziya mu ntchitu yakupharazga uthenga wa Ufumu, ŵanthu pacharu chosi atingi ajengi ndi mwaŵi wakuziŵa sembi yaku Yesu ndi kuzomera kuti Ufumu waku Chiuta uŵalamuliyi. Mazuŵa nganu, tilongo kuti titovya Ufumu asani tipharazga uthenga wamampha pacharu chosi ndi abali aku Yesu.—Mat. 24:14; 25:40.

9. Ntchifukwa wuli tigomeza kuti Yehova wazamufiska vo wakhumba kuchitiya ŵanthu?

⁹ Kumbi Yesu wang’anamuwanganji po wangukamba kuti: “Khumbu linu lichitiki”? Yehova ndi Mulengi ndipu asani wakamba kuti chinthu chinyaki chichitikengi, vija nge kuti chachitika kali. (Yes. 55:11) Iyu wazomerezengi cha kuti vo wakhumbanga kuchitiya ŵanthu, vitondeki chifukwa cha kugaluka kwaku Satana. Kwambiya pakwamba, Yehova wakhumbanga kuti charu chapasi chizazi ndi ŵana ambula ubudi aku Adamu ndi Eva. (Chiy. 1:28) Asani Adamu ndi Eva angufwa kwambula ŵana, khumbu laku Chiuta lakuti charu chizazi ndi ŵana ŵawu latingi lifiskikengi cha. Ndichu chifukwa chaki Yehova wanguzomereza kuti Adamu ndi Eva aje ndi ŵana chinanga kuti angubuda. Kuziya mu sembi yaku Yesu, Chiuta walayizga wosi wo ŵe ndi chivwanu kuti azamuja ambula ubudi ndipuso azamulonde umoyu wamuyaya. Yehova watanja ŵanthu ndipu wakhumba kuti ŵanthu wosi akuvwiya azije ndi umoyu nge mo iyu wakhumbiyanga pakwamba.

10. Kumbi sembi yaku Yesu yitiŵawovya wuli ŵanthu wo akufwa?

¹⁰ Ntchinthu wuli cho chazamuchitikiya ŵanthu mabiliyoni wo akufwa, wo ŵengavi mwaŵi wakuziŵa Yehova kweniso kumuteŵete? Sembi yaku Yesu yazamuchitisa kuti akufwa aziyuki. Awusefwi akuchanya azakuŵayuska ndipu azakuŵapasa mwaŵi kuti azisambiri vo Chiuta wakhumba ndi kuzija ndi umoyu wamuyaya. (Mac. 24:15) Yehova wakhumba cha kuti ŵanthu afwengi. Nge Mweneku wa umoyu, iyu waja Wisi waku weyosi yo wayuskika. (Sumu 36:9) Mwaviyo, mphakwenere kuti Yesu watisambizi kupemphera kuti: “Awusefwi akuchanya.” (Mat. 6:9) Yehova wakupasaku Yesu udindu ukulu wakuyuska akufwa. (Yoh. 6:40, 44) Muparadayisu, iyu wazamufiska udindu waki nge “chiyuka ndi umoyu.”—Yoh. 11:25.

11. Kumbi Chiuta wakhumba kuziwuchitiyanji “mzinda ukulu” wa ŵanthu?

¹¹ Yehova watiŵachitiya vinthu vamampha ŵanthu wosi. Yesu wangukamba kuti: “Weyosi yo wachita khumbu laku Chiuta, mweniyo ndiyu mubali wangu, mzichi wangu ndipuso  ama ŵangu.” (Marko 3:35) Chiuta wakhumba kuti “mzinda ukulu” wa ŵanthu ambula kuŵerengeka akutuliya mumitundu, mafuku ndi vineneru vakupambanapambana amusopengi. Wo avwana mu sembi yaku Khristu ndipuso achita khumbu laku Chiuta, angaja mugulu la ŵanthu wo adaniliza kuti: “Tasaniya utaski kutuliya kwaku Chiuta yo waja pa mpandu wa ufumu ndi kwa Mwana wa Mbereri.”—Chiv. 7:9, 10.

12. Kumbi vo Yesu wangukamba mu pempheru laki, vilongo kuti Yehova wakhumba kuŵachitiyanji ŵanthu akuvwiya?

¹² Vo Yesu wakukamba mu pempheru laki, vilongo vo Yehova wakhumba kuchitiya ŵanthu akuvwiya. Mwakukoliyana ndi pempheru lenili, tikhumbika kuyesesa kutowesa zina laku Chiuta kweniso kulitumbika. (Yes. 8:13) Zina lakuti Yesu ling’anamuwa kuti “Yehova ndi Mutaski.” Kutaskika kwidu kuziya mu sembi yaku Yesu, kuchitisa kuti zina laku Chiuta litumbikiki kweniso likankhusiki. Chiuta wazamugwirisiya ntchitu Ufumu waki kuti ŵanthu akuvwiya azilonde vitumbiku chifukwa cha sembi yaku Yesu. Mbuneneska kuti pempheru laku Yesu lititisimikiziya kuti palivi cho chingatondekesa Chiuta kufiska khumbu laki.—Sumu 135:6; Yes. 46:9, 10.

13. Kumbi asani tabatizika tilongonji?

¹³ Asani tajipatuliya kwaku Yehova ndipuso kubatizika chifukwa chakuti te ndi chivwanu mu sembi yaku Yesu, tilongo kuti tiwonga sembi yaku Yesu. Kubatizika kwidu kulongo kuti “te aku Yehova.” (Ŵar. 14:8) Asani tabatizika, tipempha Chiuta kuti watipasi njuŵi yamampha. (1 Pet. 3:21) Yehova wamuka pemphu lenili mwakugwirisiya ntchitu  ndopa zaku Khristu kuti zititowesi. Mwaviyo, tigomeza ndi mtima wosi kuti wazakutipasa vo wakutilayizga.—Ŵar. 8:32.

14. Ntchifukwa wuli Chiuta watitilamula kuti tiyanjengi ŵanthu?

¹⁴ Kumbi ndi nthowa yinyaki niyi yo tilongole kuti tiwonga sembi yaku Yesu? Yehova wachita vinthu vosi chifukwa cha chanju. Mwaviyo, wakhumba kuti wosi wo atimusopa ajengi ndi jalidu la chanju. (1 Yoh. 4:8-11) Asani titanja ŵanthu, tilongo kuti tikhumba kuja “ŵana ŵa Awusefwi akuchanya.” (Mat. 5:43-48) Dangu lakwamba ndakuti tiyanjengi Yehova ndipu lachiŵi, tiyanjengi anyidu. (Mat. 22:37-40) Nthowa yimoza yo tilongole kuti titanja ŵanthu, nkhuvwiya dangu lo Chiuta wakutipasa lakuti tiŵapharazgiyengi uthenga wamampha wa Ufumu waki. Asani titiŵayanja, tilongo unkhankhu waku Chiuta. Kukamba uneneska, asani tivwiya dangu lakuti tiyanjengi anyidu, ukongwa abali ndi azichi ndikuti titanja Chiuta ‘mwakufikapu.’—1 Yoh. 4:12, 20.

15. (a) Kumbi ndi vitumbiku wuli vo Yehova watitipasa sonu? (b) Kumbi tilindiza vitumbiku wuli kunthazi?

¹⁵ Chiuta watitigowoke maubudi ngidu asani tivwana mu sembi yaku Yesu. Mazu ngaku Chiuta ngatitisimikiziya kuti maubudi ngidu “ngangasisitika.” (Ŵerengani Machitidu 3:19-21.) Nge mo tawone kukwambiriya kwa nkhani iyi, sembi yaku Yesu yikuchitisa kuti Yehova waguli Akhristu akusankhika kuti aje ŵana ŵaki. (Ŵar. 8:15-17) Penipo kwaku isi “a mbereri zinyaki” ve nge kuti Yehova watigula ndipu we ndi kalata ya ukaboni yo pe mazina ngidu. Asani tazija ambula ubudi ndipuso tazipona pa kuyeseka kwakumaliya, tingakamba kuti Yehova wazamukondwa kusayina kalata ya mazina ngidu kuti sonu te ŵana ŵaki akwanjiŵa a pacharu chapasi. (Ŵar. 8: 20, 21; Chiv. 20:7-9) Yehova wazakuŵayanja ŵana ŵaki mpaka muyaya. Vitumbiku vo tazamulonde chifukwa cha sembi yaku Yesu, vazamuŵaku mpaka muyaya. (Ŵah. 9:12) Mphasu yeniyi yazamusukuluka cha. Palivi munthu pamwenga ulamuliru wo wazakutilonda mphasu yeniyi.

16. Kumbi sembi yaku Yesu yititifwatuwa wuli?

¹⁶ Palivi cho Satana wangachita kuti watondekesi ŵanthu wo alapa ndi mtima wosi kuti azije mu banja laku Yehova. Yesu wanguza pacharu chapasi ndipu wangufwa “kamoza pe kwa nyengu yosi.” Mwaviyo, sembi yaku Yesu yikuperekeka kwamuyaya. (Ŵah. 9:24-26) Sembi yeniyi, yifufuta maubudi ngosi ngo tikuhara kutuliya kwaku Adamu. Tiwonga sembi yaku Khristu chifukwa tikufwatulika ku ukapolu wa charu ichi cho chilamulika ndi Satana ndipu tiwopa nyifwa cha.—Ŵah. 2:14, 15.

17. Kumbi mutuvwa wuli kuziŵa kuti Yehova watikuyanjani?

¹⁷ Tikayika cha kuti Chiuta wazamufiska vo wakulayizga. Nge mo marangu ngaki nga mu chilengedu ngatondeke cha kugwira ntchitu yaki, Yehova nayu wangatondeka cha kuzitipasa vo wakutilayizga. Iyu wasintha cha. (Mal. 3:6) Yehova wakutipasa umoyu pe cha kweni wakutipasa so vinthu vinandi. Iyu watitiyanja. Bayibolu likamba kuti: “Taziŵa ndipuso tigomeza kuti Chiuta watitiyanja. Chiuta ntchanju.” (1 Yoh. 4:16) Charu chosi chazamuja paradayisu wakukondwesa ndipu weyosi wazamulongo chanju cho Chiuta wenachu. Mwaviyo, mwakukoliyana ndi ateŵeti akugomezeka aku Chiuta wo ŵe kuchanya, tiyeni tikambi kuti: “Thamiku ndi unkhankhu, zeru ndi kuwonga kweniso ulemu ndi nthazi viluti kwaku Chiuta mpaka muyaya. Ameni.”—Chiv. 7:12.