Yesu wati wachizga munthu pa zuŵa la Sabata, Ayuda anyaki angumumba mulandu wakuti waswa Sabata. Pakuŵamuka, Yesu wangukamba kuti: “Ada ŵeche kugwira ntchitu mpaka sonu, ndipu ini nani ndilutirizga kugwira ntchitu.”—Yohane 5:17.

Dangu laku Chiuta lakanizganga cha kuchita vo Yesu wanguchita pa zuŵa la Sabata. Iyu wachizganga ŵanthu kweniso wapharazganga chifukwa wayezganga ntchitu zamampha zaku Chiuta. Mwaviyo, Yesu wangulutirizga kuchita ntchitu zamampha zuŵa lelosi. Kweni vo wangumuka ŵanthu wo amumbanga mlandu, vinguchitisa kuti yiwu akwiyi ukongwa ndipu akhumbanga kumubaya. Ntchifukwa wuli akhumbanga kumubaya?

Kusazgiyapu pa vo Yesu wanguchita pakuchizga munthu pa zuŵa la Sabata, Ayuda angukwiya so ukongwa ŵati ŵavwa Yesu wachikamba kuti ndi Mwana waku Chiuta. Yiwu awonanga kuti Yesu wanyoza Yehova Chiuta pakukamba kuti ndiwu Awisi, chifukwa aŵanaŵananga kuti Yesu wang’anamuwa kuti iyu wayanana ndi Chiuta. Chinanga kuti venga viyo, Yesu wanguchita mantha cha ndipu wangulutirizga kuŵakonkhoske ubali wo we pakati paku iyu ndi Chiuta. Iyu wangukamba kuti: “Ada atanja Mwana, ndipu atimulongo vinthu vosi vo yiwu achita.”—Yohane 5:20.

Ada ndiwu apereka umoyu, ndipu yiwu angulongo venivi mu nyengu yakali po angupaska nthazi ŵanthu kuti ayuski ŵanthu wo angufwa. Yesu wangulutirizga kukamba kuti: “Nge mo Ada ayuskiya akufwa ndi kuŵapaska umoyu, Mwana nayu wapereka umoyu ku munthu weyosi yo iyu wakhumba.” (Yohane 5:21) Fundu yeniyi yo Yesu wangukamba njakuchiska ukongwa asani tiŵanaŵaniya vo vazamuchitika kunthazi. Chinanga ndi sonu, Mwana mwenuyu wayuska ŵanthu wo mbakufwa mwauzimu. Yesu wangukamba kuti: “Weyosi yo watuvwa mazu ngangu ndi kugomezga Yo wakundituma, we ndi umoyu wamuyaya. Iyu wayeruzgika cha, kweni wajumpha nyifwa ndipu wayambukiya ku umoyu wamuyaya.”—Yohane 5:24.

Pa nyengu iyi ndipu Yesu wechendayuskepu munthu weyosi, kweni wangukambiya ŵanthu wo amumbanga mlandu kuti ŵanthu wo akufwa azamuyuskika. Iyu wangukamba kuti: “Nyengu yituza yeniyo ŵanthu wosi wo ŵe mumiwunda yachikumbusu, azamukuvwa mazu ngaki ndipu azamutuwamu.”—Yohane 5:28, 29.

Chinanga kuti Yesu we ndi udindu ukulu, kweni wangukamba mwakuvwika umampha kuti iyu wavwiya Chiuta, ndipu wanguti: “Ndingachita cha kanthu kekosi pakundija. . . . Ndichita khumbu langu cha, kweni laku yo wakundituma.” (Yohane 5:30) Chinanga kuti venga viyo, Yesu wangukonkhoska udindu wo we nawu pakufiska khumbu laku Chiuta, wo pa nyengu iyi wenga wechendawulongopu pa gulu la ŵanthu. Kweni ŵanthu anyaki wo amumbanga mlandu aziŵanga kali vinthu vinandi vakukwaskana ndi iyu. Ndipu wanguŵakumbusa kuti: “Mungutuma ŵanthu kwaku Yohane [Mubatizi] ndipu iyu wangupereka ukaboni wauneneska.”—Yohane 5:33.

Ŵanthu wo ambanga mlandu Yesu atenere kuti anguvwapu vinthu vo vinguchitika vyaka viŵi kuvuli. Pa nyengu yo, Yohane wangukambiya alongozgi achisopa Achiyuda vakukwaskana ndi Munthu munyaki yo wazanga kuvuli kwaki, yo waziŵikanga ndi zina lakuti “Mchimi” ndipuso “Khristu.” (Yohane 1:20-25) Yesu wangulutirizga kukumbusa ŵanthu wo amumbanga mulandu wakukwaskana ndi mo yiwu awoniyanga Yohane yo pa nyengu iyi wenga mujeri. Iyu wangukamba kuti: “Kwa nyengu yimanavi, mwakhumbisiskanga kukondwa ukongwa ndi ukweru waki.” (Yohane 5:35) Kweni pa nyengu iyi, Yesu wanguŵalongo ukaboni ukulu kuphara wo Yohane Mubatizi wanguŵalongo.

Pavuli paki, Yesu wanguŵakambiya kuti: “Ntchitu zenizi zo ndichita [kusazgiyapu kuchizga munthu ko iyu wanguchita pa nyengu yeniyi] ndizu zipereka ukaboni wakuti Ada ndiwu akundituma.” Yesu wangukamba so kuti: “Ada wo akundituma, akupereka ukaboni wakukwaskana ndi ini.” (Yohane 5:36, 37) Mwakuyeruzgiyapu, Chiuta wangupereka ukaboni wakukwaskana ndi Yesu pa nyengu yo wabatizikanga.—Mateyu 3:17.

Mwaviyo, ŵanthu ŵenaŵa ŵengavi chifukwa chakukaniya Yesu, chifukwa Malemba ngo afufuzanga ngalongonga ukaboni wakukwaskana ndi Yesu. Pakumaliya, Yesu wanguŵakambiya kuti: “Asani Mozesi mungumugomezga, nani mwatingi mundigomezgengi, chifukwa iyu wakulemba vakukwaskana ndi ini. Kweni asani muleka kugomezga vo wakulemba, mungagomezga wuli vo ini ndikamba?”—Yohane 5:46, 47.