MO MUNGAYAMBIYA KUKAMBISKANA NDI ŴANTHU
SAMBIRU 2
Mukambiskanengi ndi Ŵanthu nge mo Mulongolore Nyengu Zosi
Fundu ya mu Bayibolu: “Mazu ngakukambika pa nyengu yakwenere ngamampha ukongwa!”—Nthanthi 15:23.
Vo Filipu Wanguchita
1. Woneriyani VIDIYO, pamwenga ŵerengani Machitidu 8: 30, 31. Pavuli paki ŵanaŵaniyani mafumbu yanga:
Kumbi Tisambiranji Kwaku Filipu?
2. Asani tikambiskana ndi ŵanthu mu nthowa yakwenere, viwovyengi kuti afwatuki ndipu ajengi ndi mtima wakukhumba kuvwisiya uthenga widu.
Muyezgengi Filipu
3. Mujengi masu. Mungaziŵa vinandi va munthu yo mukambiskana nayu asani muwona mo wawoneke pachisku kweniso mo wachitiya vinthu panyengu yo. Kumbi munthu yo walongo kuti wakhumbisiska kukambiskana namwi? Mungayamba kukambiskana nayu nkhani yinyaki ya mu Bayibolu mwakumufumba kuti, “Kumbi muziŵa kuti . . . ?” Mungamuchichizganga cha asani wakhumba cha kukambiskana namwi.
4. Muzikirengi. Mungafikiyanga waka pakukambiskana nayu nkhani ya mu Bayibolu cha. Lindizganipu dankha mpaka po muwona kuti mphakwenere, venivi vikuwovyeningi kuti mukambiskani nayu umampha. Kweni nyengu zinyaki, mungakhumbika kutuwapu waka kwambula kukambiskana nayu fundu yeyosi ya mu Bayibolu mpaka pa ulendu wasonu.
5. Mujengi akunozgeka kusintha. Munthu wangayambisa nkhani yinyaki yo mwayiŵanaŵaniyangaku cha. Mwaviyo, mungakambiskana nayu fundu zo zingamuwovya mwakukoliyana ndi nkhani yo wayambisa, chinanga kuti ndiyu mungunozgeke cha.
