SAMBIRU 40
Vo Tingachita Kuti Chiuta Watiwonengi Kuti te Akutowa
Yeruzgiyani kuti ama anozgekeresa mwana wawu kuti wakengi kusukulu. Yiwu awonesesa kuti wasamba kweniso kuti wavwala malaya ngakutowa. Venivi vitovya kuti mwana yo waje ndi liŵavu lamampha ndipuso vilongo kuti apapi ŵaki atimuphwere ukongwa. Mwakuyanana waka, Ada ŵidu achanju a Yehova, nawu akhumba kuti tijengi akutowa mwakuliŵavu kweniso kuti mijalidu yidu nayu yijengi yakutowa. Asani nyengu zosi tija akutowa muvigaŵa venivi, vinthu vititiyende umampha kweniso titumbika Yehova.
1. Kumbi tingachita wuli kuti tije akutowa mwakuliŵavu?
Yehova watitikambiya kuti: “Muje atuŵa.” (1 Peturo 1:16) Kuti tije atuŵa, tikhumbika kuja akutowa mwakuliŵavu ndipuso titenere kuja ndi mijalidu yamampha. Tingaja akutowa mwakuliŵavu asani tisamba nyengu zosi, tichapa ndi kusita vakuvwala vidu, tiphwere panyumba, ndipuso asani tisuka galimotu ndi njinga zidu. Tingawovya so pa ntchitu yakutowesa Nyumba ya Ufumu. Yehova watumbikika ukongwa asani tiyesesa kuja akutowa mwakuliŵavu.—2 Akorinto 6:3, 4.
2. Kumbi tikhumbika kukana mijalidu niyi kuti tije akutowa?
Bayibolu lititichiska kuti “tijitowesi ku chinthu chechosi chakukazuza liŵavu ndi mzimu.” (2 Akorinto 7:1) Mwaviyo, tikhumbika kuyesesa kukana chinthu chechosi cho chingananga liŵavu ndi maŵanaŵanu ngidu. Nyengu zosi tiŵanaŵanengi vo vingakondwesa Yehova. Mwaviyo, titenere kukana maŵanaŵanu ngosi ngabwekabweka. (Salimo 104:34) Kweniso titenere kuyesesa kukamba vinthu vamampha.—Ŵerengani Akolose 3:8.
Kumbi ndi vinthu wuli vinyaki vo tingachita kuti tije akutowa mwakuliŵavu kweniso kuti tije ndi mijalidu yamampha? Pe vinthu vinyaki vo vingananga liŵavu lidu. Mwaviyo, tikhumbika kukana vinthu venivi, nge kukweŵa foja ndipuso kugwiriskiya ntchitu minkhwala yakupambanapambana yakutimbanyizga wongu. Asani tikana vinthu venivi, liŵavu lidu lijengi lamampha kweniso tilongongi kuti titumbika mphasu ya umoyu. Tingaja so akutowa asani tiyesesa kukana mijalidu yiheni nge kujiseŵeresa viŵalu vakubisika ndipuso kuwonere vinthu vakusikuwa. (Salimo 119:37; Aefeso 5:5) Vingaja vakusuzga nadi kuti tileki mijalidu yeniyi, kweni Yehova wangatiwovya kuti tilimbani ndi mijalidu yeniyi.—Ŵerengani Yesaya 41:13.
SAMBIRANI VINANDI
Wonani mo Yehova wangatumbikikiya asani muyesesa kuja akutowa mwakuliŵavu, kweniso wonani mo mungakaniya vinthu viheni vo vingafipiska liŵavu linu.
3. Yehova watumbikika asani tiyesesa kuja akutowa mwakuliŵavu
Tingavwisa mo Yehova wawone nkhani ya uchanda asani tingawona marangu ngo wangupaska Ayisirayeli. Ŵerengani Ekisodo 19:10 ndipuso 30:17-19, pavuli paki kambiskanani mafumbu yanga:
-
Kumbi mavesi yanga ngalongo kuti Yehova watiyiwona wuli nkhani yakuja akutowa mwakuliŵavu?
-
Kumbi ndi vinthu nivi vo mukhumbika kuchita nyengu zosi kuti muje akutowa mwakuliŵavu?
Pato nyengu ndipuso pakhumbika kuyesesa ukongwa kuti munthu waje wakutowa mwakuliŵavu. Kweni tingafiska kuchita venivi kwekosi ko tingaŵa kweniso kaya tisaniya ndalama zimana pamwenga cha. Woneriyani VIDIYO, pavuli paki kambiskanani fumbu lo le mumphata.
-
Kumbi kuphwere vinthu vo tenavu kuti viwonekengi vakutowa kutumbika wuli ntchitu yidu yakupharazga?
4. Lekani kuchita vinthu viheni
Yehova ndiyu wangatiwovya kuti tileki jalidu liheni
Asani mukweŵa foja pamwenga mugwiriskiya ntchitu munkhwala wewosi wakutimbanyizga wongu, mutenere kuti muziŵa umampha mo visuzgiya kuti munthu waleki jalidu lenili. Kweni kumbi ndi vinthu wuli vo vingawovya? Wonani chifukwa cho mukhumbikiya kuleka jalidu lenilo. Ŵerengani Mateyu 22:37-39, pavuli paki kambiskanani mo foja ndipuso kugwiriskiya ntchitu munkhwala wakutimbanyizga wongu vikwaskiya . . .
-
ubwezi wa munthu ndi Yehova.
-
ŵanthu a mubanja laki ndipuso ŵanthu anyaki.
Chitanipu kanthu kuti muleki mijalidu yiheni. a Woneriyani VIDIYO.
Ŵerengani Afilipi 4:13, pavuli paki kambiskanani fumbu ili:
-
Kumbi kupemphera nyengu zosi, kusambira Bayibolu kweniso kusanirika pa maunganu nga mpingu kungamuwovya wuli munthu kuti wamalani ndi jalidu liheni?
5. Limbanani ndi maŵanaŵanu ngaheni kweniso mijalidu yiheni
Ŵerengani Akolose 3:5, pavuli paki kambiskanani mafumbu yanga:
-
Kumbi tiziŵa wuli kuti kutumiziyana vinthu vakusikuwa kweniso kujiseŵeresa viŵalu vakubisika ndi mijalidu ya ukazuzi pamasu paku Yehova?
-
Kumbi muwona kuti mphakwenere kuti Yehova wakhumba kuti tije ndi mijalidu yakutowa? Ntchifukwa wuli muwona viyo?
Wonani mo mungamalisiya maŵanaŵanu ngaukazuzi mumtima winu. Woneriyani VIDIYO.
Yesu wangukamba chakuyeruzgiyapu chakulongo kuti tikhumbika kuchita vinthu mwazeru kuti tilutirizgi kuja akutowa. Ŵerengani Mateyu 5:29, 30, pavuli paki kambiskanani fumbu ili:
-
Yapa Yesu wang’anamuwanga kuti tichitengi kujipweteka liŵavu cha, mumalu mwaki iyu wang’anamuwanga kuti tichitengepu kanthu. Kweni kumbi munthu wangachita wuli vinthu mwazeru kuti waleki kuja ndi maŵanaŵanu ngaukazuzi? b
Asani muyesesa kuti muleki maŵanaŵanu ngaheni, Yehova nayu wakondwa ukongwa chifukwa cha phamphu linu. Ŵerengani Salimo 103:13, 14, pavuli paki kambiskanani fumbu ili:
-
Asani musuzgika kuleka jalidu linyaki liheni, kumbi lemba ili lingakuwovyani wuli kuti mulutirizgi kulimbana ndi jalidu lenilo?
Kutaya mtima cha!
Nkhwambula kusuzga kuŵanaŵana kuti, ‘Po vanditonde yapa, mbwenu ndileke waka limu.’ Kweni kumbukani fundu iyi: Tingakamba cha kuti munthu yo wachita maphara ngakutchimbiya watondeke limu maphara chifukwa chakuti waguŵa ndi kuwa, kweniso tingamukambiya cha kuti wakayambiyi so pakwamba maphara ngo. Mwakuyanana waka, kutondeka kamoza ndiku kungang’anamuwa kuti mwatondeke limu cha kuleka jalidu liheni. Kweniso kutondeka kamoza kungasisita cha vosi vamampha vo mwayesesa kuchita kuti muleki jalidu liheni. Mwaviyo, kugongowa cha, chifukwa ndimu umoyu ujaliya. Yehova ndiyu wangakuwovyani kuti muleke limu jalidu liheni lo mungaŵa nalu.
ŴANTHU ANYAKI AKAMBA KUTI: “Liŵavu langu likuziŵiriya kali, ndingafiska cha kuleka.”
-
Kumbi ndi lemba nili lo mungagwiriskiya ntchitu kuti mumulongo munthu kuti Yehova ndiyu wangamuwovya kuti waleki jalidu liheni?
KUMBI MWASAMBIRANJI?
Yehova wakondwa asani liŵavu lidu ndakutowa kweniso asani tiyesesa kuti maŵanaŵanu ngidu ndipuso vakuchita vidu vijengi vakutowa.
Kuweriyamu
-
Ntchifukwa wuli tikhumbika kuja akutowa?
-
Kumbi mungachita wuli kuti muje akutowa mwakuliŵavu?
-
Kumbi mungachita wuli kuti muje akutowa mu maŵanaŵanu ndipuso mu vakuchita?
FUFUZANI
Kumbi ndi vinthu vambula kusuzga nivi vo mungachita kuti mulutirizgi kuja akutowa chinanga kuti panyaki musaniya ndalama zimana?
Wonani nthowa zinyaki zo zingakuwovyani kuti muleki kukweŵa foja.
“Vo Mungachita Kuti Muleki Kukweŵa Foja” (Jani Masu!, May 2010)
Wonani masuzgu ngo munthu wakumana nangu asani wawonere vinthu vakusikuwa.
“Kumbi Kuwonere Vinthu Vakusikuwa Nkhwamampha?” (Chigongwi cha Alinda, August 1, 2013)
Wonani mo munthu munyaki wanguyesese kuti waleki chiziŵirizga chaki chakuwonere vinthu vakusikuwa.
“Ndinguyesa Kanandi Waka Kuti Ndisinthi Mijalidu Yiheni” (Chigongwi cha Alinda Na. 4 2016)
a Nkhani yakuti “Vo Vingakuwovyani Kuti Muleki Kukweŵa Foja,” yo yaŵikika pachigaŵa chakuti Fufuzani, yikonkhoska vinthu vo vingakuwovyani kuti muleki chiziŵirizga chakukweŵa foja.
b Kuti muziŵi vo vingakuwovyani kuti muleki jalidu lakujiseŵeresa viŵalu vakubisika, wonani nkhani yamutu wakuti “Vo Mungachita Kuti Mumalani ndi Chiziŵirizga Chakujiseŵeresa Viŵalu Vakubisika” mubuku lakuti Kwamuka Kwa Mafumbu ngo Achinyamata Afumba—Buku Lakwamba, mutu 25.
Mungayanja Kuŵerenga so Nkhani Izi
MAFUMBU NGO ŴANTHU AFUMBA KAŴIKAŴI
Kumbi Sambiru la Bayibolu lo Akaboni aku Yehova Achitiska Ntchinthu Wuli?
Kuziya mu pulogilamu yawezi ya kusambira Bayibolu ndi Akaboni aku Yehova, mungagwiriskiya ntchitu Bayibolu lelosi. Mungadaniyaku banja linu losi pamwenga mabwezi nginu pa sambiru.
