BUKU la Chivumbuzi le ndi mazu ngo ngamiya vinthu vinyaki. (Chivumbuzi 1:1) Mwakuyeruzgiyapu, lizumbuwa munthukazi munyaki ndi zina lo lingulembeka pa chisku chaki lakuti ‘Babiloni Mukuru.’ Munthukazi uyu wakambika kuti waja pa “mizinda ndi mitundu.” (Chivumbuzi 17:1, 5, 15) Pakuti palivi munthukazi chayiyu yo wangachita ivi, Babiloni Mukuru watenere kuti wamiya chinthu chinyaki. Nanga kumbi munthukazi mureŵi uyu wamiyanji?

Pa lemba la Chivumbuzi 17:18, munthukazi mwenuyu wazumbulika kuti ndi “msumba ukuru wo, weniwo we ndi muwusu pa ŵakaronga ŵa charu chapasi.” Mazu ngakuti “msumba,” ngamiya gulu la ŵanthu lo lawunganiskika pamoza. Pakuti  “msumba ukuru” ndiwu ulongozga “ŵakaronga ŵa charu,” munthukazi yo wadanika kuti Babiloni Mukuru watenere kuja gulu la ŵanthu lo le ndi mazaza ndipuso lisanirika mu vyaru vakupambanapambana. Ndichu chifukwa chaki udanika kuti ufumu wa pacharu chosi. Kumbi ndi ufumu wa mtundu wuli? Ufumu uwu ngwachisopa. Wonani mo nkhani zinyaki za m’buku la Chivumbuzi zititiwovye kusaniya fundu izi.

Ufumu ungachitika ndi andali, amalonda pamwenga so achisopa. Munthukazi yo wadanika kuti Babiloni Mukuru ndi ufumu wandali cha chifukwa chakuti Mazu ngaku Chiuta ngakamba kuti “ŵakaronga ŵa charu,” pamwenga kuti magulu nga ndali nga charu ichi, “ŵareŵana nayu.” Urewi waki, umiya kukolerana ndi mafumu nga charu ichi, ndichu chifukwa chaki wadanika kuti“munthukazi mureŵi mukuru.”—Chivumbuzi 17:1, 2; Yakobe 4:4.

Babiloni Mukuru wangaja wamalonda mukuru cha, chifukwa chakuti “ŵamaronda ŵa pasi,” wo amiya akuchita maronda, azakumuliya pa nyengu yo wazamuparanyikiya. Mafumu kweni so amaronda akonkhoskeka kuti alereska Babiloni Mukuru ŵama “kutari.” (Chivumbuzi 18:3, 9, 10, 15-17) Mwaviyo, nchakuvwika kukamba kuti Babiloni Mukuru, ndi ufumu wa ndali pamwenga wamalonda cha, kweni wachisopa.

Fundu yakuti Babiloni Mukuru wamiya chisopa, yisimikizgirika ndi mazu ngo walandizgiya mitundu yosi mwakugwiriskiya nchitu ‘vakuchita vaki va mizimu.’ (Chivumbuzi 18:23) Chifukwa chakuti vakuchitika vosi va mizimu vituliya ku viŵanda, nchambula kuziziswa kuti Bayibolo lidana Babiloni Mukuru kuti ndi ‘malu ngakujamu ŵademone.’ (Chivumbuzi 18:2; Marangu 18:10-12) Ufumu uwu ukambika kuti umikana ukongwa ndi chisopa chauneneska, ndipu utombozga “ŵamchimi” ndipuso “ŵakupaturika.” (Chivumbuzi 18:24) Babiloni Mukuru uyu watinkha ukongwa chisopa chauneneska mwakuti watombozga mwankhazga ndipuso chinanga nkhubaya “ŵakaboni ŵaku Yesu.” (Chivumbuzi 17:6) Ndichu chifukwa chaki munthukazi uyu, yo wadanika kuti Babiloni Mukuru wamiya nadi ufumu wapacharu chosi wachisopa chaboza, vo visazgapu visopa vosi vo vimikana ndi Yehova Chiuta.