KUMBI muŵanaŵana kuti nchinthu wuli cho chazamuchitika pa Zuŵa la Cheruzgu? Ŵanthu anandi aŵanaŵana kuti mabiliyoni nga ŵanthu ngazamuzanga yumoza ndi yumoza ku mpandu wachifumu waku Chiuta. Ndipu weyosi wazamuyeruzgikanga pakuyija. Anyaki azamuluta ku paradayisu wakuchanya, ndipu anyaki cheruzgu chawu nchakuti azamusuzgika kwa umoyu wawu wosi. Kweni Bayibolo likamba vakupambana ukongwa pa nkhani ya zuŵa la cheruzgu. Mazu ngaku Chiuta ngakamba kuti nyengu iyi njakofya cha, kweni njakutipaska chilindizga ndipuso njakunozge vinthu.

Pa lemba la Chivumbuzi 20:11, 12 tiŵerenga vo wakutumika Yohane wangukonkhoska vakukwaskana ndi Zuŵa la Cheruzgu kuti: “Ndinguwona chitengu-chaufumu chikuru ndi chituŵa, ndi mweniyo wajanga paku cho, ku chisku chaku mweniyo vinguthaŵaku pasi ndi kuchanya; ndipu kuti malu ngangusanirikiya ivu so cha. Ndinguŵawona ŵakufwa, ŵara ndi ŵamana, ŵamanga paurongo pa chitengu-chaufumu cho; ndipu mabuku ngangujurika: Ndipu lingujurika buku linyaki so, lenilo ndi buku la umoyu. Ndipu ŵakufwa ŵangweruzgikiya paku venivo vingulembeka mu mabuku ngo,  kwakulingana ndi nchitu zawu.” Kumbi Mweruzgi yo wakambika yapa ndiyani?

Yehova Chiuta ndiyu Mweruzgi mura wa mtundu wa ŵanthu. Kweni iyu wapereka nchitu yakweruzga iyi ku munthu munyaki. Malingana ndi lemba la Machitidu 17:31, wakutumika Paulo wangukamba kuti Chiuta “watema zuŵa, mwaku lo wakhaza kweruzgiya charu mu urunji mu munthu yo wamumika.” Mweruzgi wakusankhika uyu ndi Yesu yo wakuyuskika. (Yohane 5: 22) Kweni, kumbi Zuŵa la Cheruzgu lazamukwamba zukwanji? Kumbi lazamuto utali wuli?

Buku la Chivumbuzi, lilongo kuti Zuŵa la Cheruzgu lazamukwamba asani nkhondu ya Aramagedoni yapitapu, penipo Satana ndi wosi wo ŵe pasi pa muwusu waki azamunangika. * (Chivumbuzi 16:14, 16; 19:19–20:3) Pavuli pa Aramagedoni, Satana ndi viŵanda vaki azamumangika ndi kuponyeka mu chizenji kwa vyaka 1,000. Panyengu iyi, a 144,000 akuhara ufumu wakuchanya azamuwusa ‘nge mafumu ndi Khristu virimika 1,000.’ (Chivumbuzi 14:1-3; 20:1-4; Ŵaroma 8:17) Mwaviyo Zuŵa la Cheruzgu ndi zuŵa la maora 24 chayingu cha. Kweni lazamuto vyaka 1,000.

Panyengu ya vyaka 1,000, Yesu Khristu ‘wazamweruzga ŵamoyu ndi ŵakufwa.’ (2 Timote 4:1) “Ŵamoyu” azamuja “mzinda ukuru” wo wazamupozomoka pa Aramagedoni. (Chivumbuzi 7:9-17) Wakutumika Yohane wanguwona so “ŵakufwa . . . ŵamanga paurongo pa chitengu-chaufumu” cha cheruzgu. Nge mo Yesu wakulayizgiya, “wosi ŵa mu miunda [yachikumbusku] ŵakavwanga liu laki [laku Khristu] ndipu ŵakatuwangamu” mwa kuyuskika. (Yohane 5:28, 29; Machitidu 24:15) Kumbi azamweruzgika pa vifukwa nivi?

Malinga ndi chiwona cho wakutumika Yohane wanguwona, “mabuku ngangujurika,” ndipu “ŵakufwa ŵangweruzgikiya paku venivo vingulembeka mu mabuku ngo, kwakulingana ndi nchitu zawu.” Kumbi mabuku yanga, nga mbiri ya vo ŵanthu yaŵa achitanga kali? Awa, yiwu azamweruzgika chifukwa cha vinthu vo achitanga kali cha. Kumbi tiziŵa wuli venivi? Bayibolo likamba kuti: “Pakuti yo wafwa warunjiskika ku ulakwi.” (Ŵaroma 6:7) Pa chifukwa ichi, tikhoza kukamba kuti ŵanthu yaŵa azamuyuskika kwambula ubudi wewosi. Mwaviyo, mabuku ngang’anamuwa vinthu vinyaki so vo Chiuta  wazamukhumba kuti ŵanthu achitengi. Kuti azije ndi umoyu wamuyaya, ŵanthu wo azamupozomoka pa Aramagedoni ndipuso wo azamuyuskika akhumbika kuzivwiya marangu ngaku Chiuta kweniso marangu ngasonu ngosi ngo Yehova wazamujalikiska mu nyengu ya vyaka 1,000. Munthu weyosi wazamweruzgika chifukwa cha vinthu vo wazamuchita mnyengu ya Zuŵa la Cheruzgu.

Pa Zuŵa la Cheruzgu ŵanthu mabiliyoni nganandi azamuja ndi mwaŵi wakwamba wakusambira vakukwaskana ndi khumbu laku Chiuta ndi kulichita. Ivi ving’anamuwa kuti pazamuja nchitu yikulu yakusambiza. Kukamba uneneska “ŵakuja mu charu ŵazamusambira urunji.” (Yesaya 26:9) Kweni mbanthu wosi cha wo azamukhumba kuchita khumbu laku Chiuta. Lemba la Yesaya 26:10 likamba kuti: “Asani mwaŵi upaskika ku muheni kuti wasambira urunji cha, mu charu cha ŵakutowa mu mtima iyu wachita utimbanizi ndipu kuti watiuwona cha unkhankhu wa Ambuya [Yehova].” Ŵanthu aheni yaŵa, azamubayika pa Zuŵa la Cheruzgu ndipu azamumaliya penipo.—Yesaya 65:20.

Pakumaliya pa Zuŵa la Cheruzgu, ŵanthu wo azamupozomoka ‘azamuja ndi umoyu’ nge ŵanthu akufikapu. (Chivumbuzi 20:5) Pa Zuŵa la Cheruzgu mtundu wa ŵanthu wazamuwere pa umoyu wakufikapu wo Chiuta wakhumbanga pakwamba. (1 Ŵakorinte 15:24-28) Pavuli paki mtundu wa ŵanthu wazamuyeseka kakumaliya. Satana wazamufwatulika kutuwa ku jeri ndi kupaskika so mwaŵi wakuti walandizgi mtundu wa ŵanthu kakumaliya. (Chivumbuzi 20:3, 7-10) Ŵanthu wo azakumukana azamukondwa ndi kufiskika kwa layizgu la m’Bayibolo lakuti: “Ŵakurunjika ŵaharengi charu, ndipu ŵakajanga paku cho muyaya.” (Sumu 37:29) Zuŵa la Cheruzgu lazamuja zuŵa lavitumbiku nadi ku ŵanthu wosi akugomezgeka.