Yobu 33:1-33
33 “Kweni sonu yimwi a Yobu, chondi vwisiyani mazu ngangu;Vwisiyani chechosi cho ndikambengi.
2 Chondi, awonani! Nditenere kujula mulomu wangu;Lilimi langu litenere* kulongoro.
3 Mazu ngangu ngapharazga kunyoloka kwa mtima wangu,+Milomu yangu yikamba mwauneneska vo ndiziŵa.
4 Mzimu waku Chiuta ndiwu ukundipanga,+Ndipu mvuchi wa Wanthazizosi ndiwu ukundipaska umoyu.+
5 Mundimuki asani mungafiska;Ndikambiyeni fundu zinu; ndipu mani pamalu nginu.
6 Awonani! Ini nde nge yimwi pa masu paku Chiuta wauneneska;Nani ndikupangika kutuliya ku dongu.+
7 Mwaviyo, yimwi mungatenthemanga cha chifukwa cha kopa ini,Kweniso mungatimbanyizgikanga maŵanaŵanu cha chifukwa chaku ini.
8 Kweni yimwi mwakamba mazu ini ndichivwa,Hinya, ini ndavwisiyanga yimwi muchikamba kuti,
9 ‘Ini nde wakutowa ndipu ndilivi mphulupulu;+Ini nde wakutowa, ndilivi ubudi.+
10 Kweni Chiuta wasaniya vifukwa vakundisuskiya;Ndipu ini watindiwona nge murwani waki.+
11 Maphazi ngangu wangaŵika mumatangaza;Walereseska nthowa zangu zosi.’+
12 Kweni muneneska cha pakukamba venivi, sonu ndikumukeningi:
Chiuta ndi mukulu ukongwa kuluska munthu.+
13 Ntchifukwa wuli mutumba mulandu Chiuta?+
Kumbi ntchifukwa chakuti wakumukani cha?+
14 Pakuti Chiuta walongoro kamoza pamwenga kaŵi,Kweni palivi yo watimuvwisiya,
15 Mu malotu, mu chiwona cha usiku,+Asani ŵanthu akoleka ndi tulu tikulu,Yiwu achigona pamabedi ngawu.
16 Iyu wabenuwa makutu ngawu+Ndipu wadidimizga* ulongozgi waki paku yiwu.
17 Kuti wawezi munthu ku vinthu viheni+Kweniso kuti wavikiliyi munthu ndi chilatu chakuti waleki kujikuzga.+
18 Chiuta wataska umoyu waki kuti uleki kuwona zenji,*+Wataska umoyu waki kuti uleki kunangika ndi lipanga.*
19 Munthu wachenyeka so ndi urwirwi pabedi lakiKweniso kuŵaŵa kwa viwanga vaki,
20 Mwakuti umoyu waki utichitinkha chiŵandi,Ndipu wakana chinanga ntchakurya chamampha.+
21 Mnofu waki umala ndipu uwoneka so cha,Viwanga vaki vo kali vabisikanga, sonu vitumphuka.*
22 Umoyu waki undere kufupi ndi zenji;*Umoyu waki undere kufupi ndi ŵanthu akubaya.
23 Asani iyu we ndi munthu yo watimupingiya uthenga,*Munthu yumoza yo watimulongolore pa ŵanthu 1,000,Kuti wamukambiyi cho ntchakunyoloka,
24 Mbwenu Chiuta wamuchitiyengi lisungu ndi kukamba kuti,‘Mutaskeni kuti waleki kusikiya muzenji!*+
Pakuti ini ndasaniya chakumuwombole!+
25 Liŵavu laki lisiliriki ukongwa* kuluska po wenga mnyamata;+Iyu wawere ku mazuŵa nga unyamata waki po wenga ndi nthazi.’+
26 Waŵeyeriyengi Chiuta+ ndipu wamuvwisiyengi,Iyu wawonengi chisku Chaki ndi likondwa likulu,Kweniso Iyu waweziyengi urunji Waki ku munthu.
27 Munthu mwenuyu wakambiyengi* ŵanthu kuti,‘Ndabuda+ ndi kugombetesa cho ntchakunyoloka,Kweni ndalonde cha vo ndakhumbikanga kupaskika.*
28 Iyu wawombo umoyu wangu kuti uleki kuluta muzenji,*+Ndipu umoyu wangu uwonengi ukweru.’
29 Hinya, Chiuta wachita nadi vinthu vosi ivi,Wachitiya munthu kaŵi pamwenga katatu,
30 Kuti wamuwezeku kuzenji,*Kuti waŵali ndi ukweru wa umoyu.+
31 Vwisiyani yimwi a Yobu! Andivweni!
Jani cheti, ini ndilutirizgengi kulongoro.
32 Asani mwe ndi mazu, ndimukeni.
Longoroni, pakuti ndikhumba kukulongoni kuti mwe arunji.
33 Asani mulivi chakukamba, mbwenu muvwi vo ndikambengi;Jani cheti, ndipu ini ndikusambizeningi zeru.”
Mazu Ngam'mphata
^ Mazu ngaki chayingu, “Lilimi langu limoza ndi chavu changu vitenere.”
^ Mazu ngaki chayingu, “wadinda chidindu pa.”
^ Pamwenga kuti, “chidya cha nkhondu.”
^ Pamwenga kuti, “dindi.”
^ Pamwenga kuti, “viwoneke pakweru.”
^ Pamwenga kuti, “dindi.”
^ Pamwenga kuti, “we ndi mungelu.”
^ Pamwenga kuti, “dindi.”
^ Pamwenga kuti, “uŵi wamampha ukongwa.”
^ Mazu ngaki chayingu, “wambiyengi.”
^ Yapa pangafwatulikiya so kuti, “Ndipu palivi cho ndayanduwapu.”
^ Pamwenga kuti, “dindi.”
^ Pamwenga kuti, “dindi.”
