Dotoronome 4:1-49
4 “Sonu yimwi Ayisirayeli, vwisiyani marangu ndi vyeruzgu vo nditikusambizani kuti muvisungengi, kuti muje ndi umoyu+ kweniso kuti musere ndi kuhara charu cho Yehova Chiuta wa awusemwi watikupaskani.
2 Mungasazgiyangapu chechosi cha pa mazu ngo nditikulamulani msanawale pamwenga kutuzgiyapu chechosi,+ kuti musungengi marangu ngaku Yehova Chiuta winu, ngo nditikukambiyani.
3 “Masu nginu nganguwona vo Yehova wanguchita pa nkhani yakukwaskana ndi Bala wa ku Piyori. Yehova Chiuta winu wangubaya munthu weyosi pakati pinu yo wangulondo Bala wa ku Piyori.+
4 Kweni mosi yimwi mudemetere kwaku Yehova Chiuta winu mweche amoyu mpaka msanawale.
5 Awonani, ndakusambizani marangu ndi vyeruzgu,+ nge mo Yehova Chiuta wangu wandilamuliya, kuti mukavisungengi mucharu cho mwamuhara.
6 Mutenere kuvilondo mwakuphwere,+ chifukwa asani muchitengi viyo mulongongi kuti mwe azeru+ kweniso muvwisa vinthu+ pa masu pa ŵanthu wo amukuvwa vakukwaskana ndi marangu ngosi ngenanga, ndipu amukamba kuti, ‘Mtundu ukulu uwu, ngwa ŵanthu azeru kweniso akuvwisa vinthu nadi.’+
7 Pakuti ndi mtundu ukulu nuwu wo we ndi achiuta wo ŵe pafupi nawu nge mo Yehova Chiuta widu waŵiya pafupi ndi isi nyengu yeyosi yo tidaniya paku iyu?+
8 Ndipu ndi mtundu ukulu nuwu wo we ndi marangu kweniso vyeruzgu vaurunji nge Dangu losi ili lo ndiŵika pa masu pinu msanawale?+
9 “Phweriyani ukongwa ndipuso jani masu, kuti muleki kuluwa vinthu vo masu nginu ngawona kweniso kuti vileki kutuwamu mumitima yinu mazuŵa ngosi nga umoyu winu. Mutenere so kukambiya ŵana ŵinu ndi azuku ŵinu.+
10 Pa zuŵa lo munguma pa masu paku Yehova Chiuta winu ku Horebu, Yehova wangundikambiya kuti, ‘Wunganisa ŵanthu kwaku ini kuti avwi mazu ngangu,+ ndi chilatu chakuti asambiri kundiwopa+ mazuŵa ngosi ngo ajaliyengi ndi umoyu pacharu ndipuso kuti asambizengi ŵana ŵawu.’+
11 “Mwaviyo, mungundere pafupi ndipu munguma musina mwa phiri. Phiri lo lakoliyanga motu mpaka kuchanya; ndipu penga mdima, mtambu kweniso mdima ukulu.+
12 Ndipu Yehova wangwamba kulongoro namwi kutuliya mumotu.+ Munguvwa ŵaka mazu kweni munguwonapu weyosi cha,+ penga ŵaka mazu pe.+
13 Ndipu wangukupharazgiyani phanganu laki,+ lo wangukulamulani kuti mulisungengi, lo ndi Marangu 10.*+ Pavuli paki, wangungalemba pamya yiŵi.+
14 Pa nyengu yeniyo, Yehova wangundilamula kuti ndikusambizeni marangu ndipuso vyeruzgu, vo mutenere kuchisunga mucharu cho mwamusere kuti mukachito kuja chinu.
15 “Mwaviyo, phweriyani ukongwa, pakuti munguwona weyosi cha pa zuŵa lo Yehova wangulongoro namwi ku Horebu kutuliya pakati pa motu,
16 kuti muleki kuchita vinthu vo vingachitiska kuti munangiki mwakujipangiya chikozgu chakusema cha chinthu chechosi, chikozgu cha munthulumi pamwenga munthukazi,+
17 chikozgu cha nyama yeyosi pacharu chapasi, chikozgu cha chiyuni chechosi cho chiphululuka mude,+
18 chikozgu cha chinthu chechosi cho chikwaŵa pacharu chapasi pamwenga chikozgu cha somba yeyosi ya mumaji pacharu chapasi.+
19 Ndipu asani mwakweza masu nginu kuchanya ndi kuwona lumwi ndi nyenyezi, mizinda yosi yakuchanya, munganyengekanga cha kuti muvisindamiyi pamwenga kuviteŵete.+ Yehova Chiuta winu wavipereka ku ŵanthu wosi pacharu chapasi.
20 Kweni yimwi ndimwi Yehova wakukutoni ndi kukutuzgani mung’anju yakusongonoliyamu visulu, mucharu cha Ijipiti, kuti muje ŵanthu ŵaki,*+ nge mo muliri sonu.
21 “Yehova wangundikwiyiya chifukwa chaku yimwi,+ ndipu wangulapizga kuti ndiyambukengi cha Yorodani pamwenga kusere mucharu chamampha cho Yehova Chiuta winu watikupaskani nge chihara.+
22 Pakuti ini ndifwiyengi mucharu chenichinu; ndiyambukengi cha Yorodani,+ kweni yimwi muyambukengi ndipu mwamuhara charu chamampha chiya.
23 Phweriyani kuti muleki kuluwa phanganu lo Yehova Chiuta winu wakuchita namwi,+ ndipuso kuti muleki kujipangiya chikozgu chakusema cha chinthu chechosi cho Yehova Chiuta winu wakukukanizani.+
24 Pakuti Yehova Chiuta winu ndi motu wakupiriza,+ iyu ndi Chiuta yo wakhumba kuti ŵanthu ajiperekengi kwaku iyu pe.+
25 “Asani mwazibala ŵana ndi kuja ndi azuku kweniso mwazija nyengu yitali mucharu cho, ndipu mwazichita vinthu vo vingachitiska kuti munangiki ndipuso mwazipanga chikozgu chakusema+ cha mtundu wewosi, kweniso asani mwazichita vinthu viheni pa masu paku Yehova Chiuta winu kuti mumukwiyisi,+
26 msanawale ndito kuchanya ndi charu chapasi kuja akaboni, kuti mwazamumala kwambula kutondeka kweniso mwaliŵi mucharu cho mwamuhara asani mwayambuka Yorodani. Mwamuja nyengu yitali cha mucharu cho, kweni mwamumaliya limu.+
27 Yehova wazakukumbininiskiyani pakati pa ŵanthu amitundu yinyaki+ ndipu mbanthu amanavi ŵaka pakati pinu wo azamupona+ pakati pa mitundu yo Yehova wazakukudikisiyaniku.
28 Kweniko, mwamuteŵetiyanga achiuta avimiti ndipuso amya akupangika ndi manja nga ŵanthu,+ achiuta wo angawona cha, kuvwa, kurya pamwenga kunuska.
29 “Asani mwamufufuza Yehova Chiuta winu mwe kweniko, mwakumusaniya nadi+ asani mwakumupenja ndi mtima winu wosi kweniso ndi umoyu winu wosi.+
30 Asani mwazija ndi chitima chikulu ndipuso asani vinthu vosi ivi vazikuchitikiyani kunthazi, mwazamuwere kwaku Yehova Chiuta winu ndipu mwazamuvwiya mazu ngaki.+
31 Pakuti Yehova Chiuta winu ndi Chiuta walisungu.+ Iyu wazakukulekani cha pamwenga kukunangani pamwenga kuluwa phanganu lo wangulapizga kwa awusemwi.+
32 “Sonu fumbani vakukwaskana ndi mazuŵa ngakali yimwi mwechendaweku, kutuliya pa zuŵa lo Chiuta wangulenge munthu pacharu; fufuzani kwambiya kuchigoti cha kuchanya mpaka kuchigoti chinyaki cha kuchanya. Kumbi chinthu chikulu viyo chikuchitikapu kali pamwenga kumbi chinthu chikulu viyo chikuvwikapu kali?+
33 Kumbi alipu ŵanthu anyaki wo akuvwapu mazu ngaku Chiuta wachilongoro kutuliya mumotu, nge mo yimwi munguvwiya ndi kulutirizga kuja ndi umoyu?+
34 Pamwenga kumbi Chiuta wakutopu mtundu wa ŵanthu pakati pa mtundu unyaki mwakugwiriskiya ntchitu vyeruzgu, visimikizu, vakuziziswa,+ nkhondu,+ janja lanthazi,+ janja lakutambasuka kweniso ntchitu zakofya,+ nge mo Yehova Chiuta winu wanguchitiya namwi mucharu cha Ijipiti, yimwi muchiwona ndi masu nginu?
35 Yimwi mungulongoreka vinthu venivi kuti muziŵi kuti Yehova ndi Chiuta wauneneska,+ palivi munyaki kupatuwaku iyu.+
36 Iyu wanguchitiska kuti muvwi mazu ngaki kutuliya kuchanya kuti wakusambizeni ndipu pacharu chapasi wanguchitiska kuti muwoni motu waki ukulu. Munguvwa mazu ngaki kutuliya mumotu.+
37 “Chifukwa chakuti wangwanja apapi ŵinu ndipu wasankha mphapu* yawu,+ wakukutuzgani mucharu cha Ijipiti ndi nthazi zaki zikulu ndipu wenga namwi.
38 Iyu wangudikisa mitundu yikulu kweniso yanthazi kuluska yimwi, kuti wakuserezeni ndi kukupaskani charu chawu kuti chije chihara chinu, nge mo viliri msanawale.+
39 Mwaviyo, msanawale ziŵani kweniso sungani mumtima kuti Yehova ndi Chiuta wauneneska kuchanya ndipuso pacharu chapasi.+ Kulivi munyaki.+
40 Musungengi fundu zaki ndi marangu ngaki ngo nditikukambiyani msanawale, kuti yimwi ndi ŵana ŵinu vikuyendiyeni umampha, ndipuso kuti muje kwa nyengu yitali mucharu cho Yehova Chiuta winu watikupaskani.”+
41 Pa nyengu yeniyo, Mozesi wangupatuwa matawuni ngatatu kuvuma* kwa Yorodani.+
42 Asani munthu wabaya munyaki mwangozi, kweni wamutinkhanga cha,+ wathaŵiyengi ku yimoza mwa matawuni ngenanga, kuti waje ndi umoyu.+
43 Matawuni ngaki ndi yanga, Bezeri+ muchipululu pachanya pa phiri kuti kuthaŵiyengi fuku laku Rubeni, Ramoti+ ku Giliyadi kuti kuthaŵiyengi fuku laku Gadi ndipuso Golani+ ku Bashani kuti kuthaŵiyengi fuku laku Manasi.+
44 Sonu ili ndi Dangu lo Mozesi+ wanguŵika pa masu pa Ayisirayeli.
45 Ivi ndi vikumbusu, marangu kweniso vyeruzgu vo Mozesi wangupaska Ayisirayeli ŵati atuwa mucharu cha Ijipiti,+
46 muchigaŵa cha Yorodani, mudambu lo lilereskana ndi Beti-peyori,+ mucharu chaku Sihoni, fumu ya Aamori, yo wajanga ku Heshiboni,+ yo Mozesi ndi Ayisirayeli anguthereska ŵati atuwa mucharu cha Ijipiti.+
47 Ndipu anguto charu chaki ndipuso charu chaku Ogi,+ fumu ya ku Bashani, mafumu ngaŵi nga Aamori ngo ngajanga kuchigaŵa cha kuvuma kwa Yorodani,
48 kwambiya ku Aroweri,+ tawuni yo ye mumphepeti mwa Dambu* la Arinoni, mpaka ku Phiri la Siyoni, lo ndi Phiri la Herimoni,+
49 ndipuso Araba yosi muchigaŵa cha kuvuma kwa Yorodani, mpaka ku Nyanja ya ku Araba,* musina mwa malu ngakusendemuka nga Pisiga.+
Mazu Ngam'mphata
^ Mazu ngaki chayingu, “Mazu 10.”
^ Pamwenga kuti, “kuti muje chihara chaki.”
^ Mazu ngaki chayingu, “mbewu.”
^ Pamwenga kuti, “kwakutuliya lumwi.”
^ Ili ndi dambu lo lija ndi maji mu nyengu ya vuwa pe.
^ Kung’anamuwa Nyanja ya Mche, pamwenga kuti Nyanja Yakufwa.
