Kalata Yakuluta kwa Aefeso 4:1-32
4 Mwaviyo, ini mukayidi+ mwa Ambuya, nditikupemphani kuti muyendengi mwakukoliyana+ ndi kudanika ko mukudanika.
2 Muchitengi venivi mwakujiyuyuwa ukongwa+ kweniso mwakufwasa, mwakuzikira+ ndipuso muzizipizgiyanengepu mwachanju.+
3 Muyesesengi kusunga umoza wa mzimu, mwakuja ndi chimangu cho chimanga pamoza.+
4 Pe liŵavu limoza+ ndi mzimu umoza,+ nge mo mukudanikiya ku chilindizga chimoza+ cha kudanika kwinu;
5 Mbuya yumoza,+ chivwanu chimoza, ubatizu umoza;
6 Chiuta yumoza mweniyo ndi Wusewu waku wosi, yo we pachanya paku wosi, waporote mwaku wosi ndipuso we mwaku wosi.
7 Sonu wezi ukulu ukuperekeka kwaku weyosi waku isi mwakukoliyana ndi mo Khristu wakupimiya mphasu yawezi.+
8 Pakuti Malemba ngakamba kuti: “Pa nyengu yo wangukwera kuchanya, wanguko ŵanthu ukapolu; wangupereka anthulumi kuja nge mphasu.”+
9 Kumbi mazu ngakuti “wangukwera” ngang’anamuwanji? Ngang’anamuwa kuti pakwamba wangusikiya pamalu ngapasi, kung’anamuwa charu chapasi.
10 Mweniyo wangusikiya pasi, ndiyu so wangukwera+ kuchanya kwakujumpha kuchanya,+ kuti wapereki vinthu vakuzaza ku vinthu vosi.
11 Ndipu wangupereka anyaki nge akutumika,+ anyaki nge achimi,+ anyaki nge apharazgi,*+ anyaki nge aliska kweniso asambizi,+
12 kuti anyolo* akupaturika, kuti achiti ntchitu ya uteŵeti, azengi liŵavu laku Khristu,+
13 mpaka po tosi tafikiya pa umoza* mu chivwanu ndi kumuziŵa umampha Mwana waku Chiuta, mpaka po tajaliya munthu wakukhwima+ ndipuso mpaka po tafikiya pa msinkhu wakufikapu nge Khristu.
14 Mwaviyo, tingajanga so ŵana cha, akututuzgikatutuzgika ŵaka nge kuti titutuzgika ndi mayiŵa, akupingikiya uku ndi uku ndi mphepu yeyosi ya chisambizu,+ mwa uryarya wa ŵanthu ndipuso mwakugwiriskiya ntchitu nthowa zachinyengu.
15 Kweni mwakukamba uneneska, tiyeni tosi tikuwi mwa chanju mu vinthu vosi mwakukoliyana ndi Khristu yo ndi mutu.+
16 Mwaku iyu, liŵavu losi+ likoliyana pamoza ndipu ligwira ntchitu mwakukoliyana kuporote mu chiŵalu chechosi cho chigwira ntchitu yo yikhumbika. Asani chiŵalu chechosi chigwira umampha ntchitu, vitovya kuti liŵavu likuwi lichijizenga lija mu chanju.+
17 Mwaviyo, venivi ndivu ndikamba ndi kuvichitiya ukaboni mwa Ambuya, kuti muleki kulutirizga kwenda nge mo ŵanthu amitundu yinyaki atende+ mumaŵanaŵanu ngawu ngaŵakaŵaka.+
18 Maŵanaŵanu ngawu nge mu mdima, ndipu ŵe kutali ndi umoyu waku Chiuta, pakuti aziŵa kanthu cha, chifukwa cha kunonopa kwa* mitima yawu.
19 Chifukwa chakuti akuleka kuziŵa mijalidu yamampha, yiwu akujipereka ŵija kuchita jalidu liheni mwambula soni,*+ kuti awunukiyengi ukazuzi wamtundu wewosi.
20 Kweni yimwi mukusambirapu cha kuti Khristu ngwaviyo,
21 asani mukumuvwa nadi ndipu mungusambira kwaku iyu nge mo uneneska uliri mwaku Yesu.
22 Mungusambizika kuti muzuwi umunthu wakali+ wo ukoliyana ndi mijalidu yinu yakali, wo unangika mwakukoliyana ndi makhumbiru ngaki ngakulandizga.+
23 Ndipu mulutirizgi kuja ŵafya mu nthazi yo yitendesa maŵanaŵanu nginu,*+
24 ndi kuvwala umunthu wufya+ wakulengeka mwakukoliyana ndi khumbu laku Chiuta mu urunji weneku kweniso kugomezgeka.
25 Sonu pakuti mwataya boza, weyosi waku yimwi walongorongi uneneska ndi munyaki,+ chifukwa te viŵalu va liŵavu limoza.+
26 Kwiyani kweni mungabudanga cha,+ mungalutirizganga cha kukwiya mpaka lumwi kusere;+
27 mungamupaskanga mpata* cha Dyaboli.+
28 Yo watuba, wangabanga so cha; kweni wagwiri ntchitu mwaphamphu, wagwiri ntchitu yamampha ndi manja ngaki+ kuti wasaniyi chakupaskaku mukavu.+
29 Mazu ngakuvunda, ngangatuwanga cha pamulomu pinu,+ kweni mazu ngamampha ndingu, kuti muzengengi nge mo kukhumbikiya, kuti ngawovyi wo atingavwa.+
30 Kweniso, mungawuchitiskanga chitima cha mzimu wakupaturika waku Chiuta,+ weniwo mwadindika nawu+ kuti muzifwatuliki ndi sembi yakuwombole pa zuŵa la utaski.+
31 Tayani kutali kufinga kwamtundu wewosi,+ kukwiya, ukali, kugazamuka, mazu ngaheni+ limoza ndi viheni vinyaki vosi.+
32 Kweni muchitiyanengi lisungu, muvwiyanengi chitima,+ mugowokiyanengi ndi mtima wosi nge mo Chiuta wakukugowokiyani ndi mtima wosi kuporote mwaku Khristu.+
Mazu Ngam'mphata
^ Pamwenga kuti, “Apharazgi a uthenga wamampha.”
^ Pamwenga kuti, “asambizi.”
^ Pamwenga kuti, “pa kukoliyana.”
^ Mazu ngaki chayingu, “chifukwa cha ubulu wa.”
^ Mu Chigiriki, a·sel′gei·a. Wonani Mazu ngo Ngakonkhoskeka.
^ Mazu ngaki chayingu, “mu mzimu wa maŵanaŵanu nginu.”
^ Pamwenga kuti, “malu.”
