Ma yo walera yija ŵana zina laki Desicar wakhumbanga kusazgiyaku uteŵeti waki mwakuchita upayiniya wa nyengu zosi. Iyu waja mucharu cho che ndi masuzgu nga vachuma cha Venezuela. Kweni wakhumbisiskanga kwamba upayiniya, ndipu wangwamba nadi. Iyu wakondwanga ukongwa ndi upayiniya, kweni pavuli kungwamba mulili wa COVID-19.

 Kukwambiriya kwa nyengu ya mulili wa COVID-19, Desicar wasuzgikanga kuti waziŵiriyi kupharazga mwakugwiriskiya ntchitu nthowa zasonu. Mwakuyeruzgiyapu, iyu wasuzgikanga kulemba makalata. Kweniso watingi wafiskengi cha kugwiriskiya ntchitu vidiyokoniferensi pakupharazga chifukwa madata nga Intaneti ngakudula ukongwa muchigaŵa chawu. Iyu wangukamba kuti: “Ndinguguŵa ukongwa, ndipu mwamabuchibuchi ndinguleka kupharazga nge mo ndachitiyanga pakwamba. Ndingwamba kuŵanaŵana kuti palivi cho ndichitapu nge mpayiniya wa nyengu zosi.”

 Pavuli paki, mu January 2021, ofesi ya nthambi ya Akaboni aku Yehova ku Venezuela yinguzomereza ntchitu yapade yakupharazga. Angunozga ndondomeku yakuti kukumaliya kwekosi kwa sabata pa masabata ngankhondi nga mu mwezi wenuwu, mumasiteshoni nga wayilesi zakukwana 60 kweniso pa matchanelu 7 nga TV, pakambikengi nkhani za mu Bayibolu. Akaboni anguchiskika kuti akambiyengi ŵanthu wo akhumba kuvwa vinandi kuti avwisiyengi ndi kuwonere nkhani zenizi. Ofesi yingupereka so mafumbu kweniso malemba pa nkhani yeyosi ya mu Bayibolu kwa abali ndi azichi, ngakuti angagwiriskiyengi ntchitu pakuchita upharazgi wa makalata kweniso wapafoni. Kusazgiyapu yapa, ofesi ya nthambi yinguchiska abali ndi azichi kuti alembiyengi ŵanthu mameseji ndipu yeniyi yenga nthowa yasonu yakupharazgiya ku Venezuela.

 Desicar wangukondwa ukongwa kuchitaku upharazgi wapade wenuwu. Chinanga kuti wenga wechendapharazgepu mwakugwiriskiya ntchitu mameseji kweni wanguwona kuti nayu wayeseku. Chinanga kuti venga viyo, iyu wakhumbikanga mbwenu chovyu. Iyu wangukamba kuti: “Nditiviŵanika umampha cha ini vipangizu vamazuŵa nganu.” Mwaviyo wangupempha mwana waki munthukazi kuti wamusambizi, ndipu wati wasambira waka vinthu vimanavi, Desicar wenga wakunozgeka kugwiraku ntchitu yeniyi.

 Mwakugwiriskiya ntchitu mamesiji, Desicar wangufiska kudaniya ŵanthu anandi kuti avwisiyengi nkhani zakuchita kujambulika zo zakambikanga pa wayilesi ndi pa TV. Pakumaliya paki, iyu wanguzizwa ukongwa kuwona vo vinguchitika. Anandi mwa ŵanthu wanguŵatumiziya mameseji anguvwisiyanga nkhani kweniso afumbanga mafumbu. Anyaki atondekanga kuvwisiya kweni afumbanga Desicar kuti waŵakonkhoske vo vakambika mu nkhani. Iyu wangukamba kuti: “Fundu zo ndalembanga pa unganu wadera ndizu ndaŵakambiyangaku asani andifumba kuti ndiŵakonkhoske vo vakambika mu nkhani. Ndikujapu cha ndi maulendu ngakuweriyaku ngakujumpha 5 pa mwezi, kweni pakumaliya pa ntchitu yapade iyi ndenga ndi maulendu ngakuweriyaku ngakukwana 112!” a

 Desicar wangupempha so mku waki yo wajanga nyumba yo yenga pafupi ndi yaki kuti nayu wavwisiyi nkhani pa wayilesi. Desicar wangukamba kuti: “Ndinguzizwa ukongwa kuwona kuti mku wangu wazomera kuvwisiya nkhani pa wayilesi. Pasabata peposi nyengu ya 8:00 mlenji, ndalutanga kunyumba kwaki ndipu tavwisiyanga limoza nkhani. Iyu wafumbanga mafumbu nganandi pulogilamu ye mkati kweniso asani yamala.” Mku waki waku Desicar wangusanirika so pa Chikumbusu cha nyifwa yaku Yesu, ndipu mwambu wenuwu unguchitikiya pa vidiyokoniferensi. Chakukondwesa so ntchakuti wangumuzomereza mvurwa waki Desicar kuti wagwiriskiyengeku ntchitu madata ngaki nga Intaneti mu uteŵeti.

 Desicar wangukamba kuti: “Nditimuwonga ukongwa Yehova. Ndiwonga so ŵara mu mpingu wangu chifukwa cha kundichiska. Yiwu andiwovya ukongwa kuti ndiyambi so kukondwa ndi uteŵeti.” (Yeremiya 15:16) Desicar walutirizga kuchita upayiniya kweniso kuweriyaku ku ŵanthu wo akhumba kuziŵa vinandi wo wangusaniya pa nyengu yo watumizanga mameseji.