Munthukazi munyaki zina laki Brooke njumoza wa Akaboni aku Yehova yo waja ku United States. Panyengu ya mulili wa COVID-19, wapharazganga mwakuchita kulemba makalata. Ndipu sabata yeyosi, Brooke walembanga makalata nganandi. Kweni pati pajumpha chaka chimoza ndi hafu, iyu wanguguŵa ukongwa. Kutuliya po wangwambiya kulemba makalata, munthu yumoza pe ndiyu wangumumuka kweni wangumukambiya kuti wangazimulembiyanga so cha. Brooke wangwamba kuwona kuti wataya waka nyengu kulemba makalata.

 Kweni pati pajumpha nyengu, Kim, yo nayu ndi Kaboni waku Yehova ndipu wagwira ntchitu ku banki, wangukambiya Brooke nkhani yo wakambiskananga ndi kasitomala munyaki. Kasitomala uyu wangukambiya Kim nkhani yo wanguŵerenga mukalata yakuchita kulemba pamanja yo wangulonde kutuliya kwa Akaboni aku Yehova. Pavuli paki, Kim wanguziŵa kuti kalata yo kasitomala waki wangulonde njimoza mwa makalata ngo Brooke wangulemba! Sabata yakulondopu kasitomala yuwa wanguza so ku banki. Ndipu wachikambiskana ndi Kim, kasitomala yo wangumufumba asani nayu wangachiŵapu pa maunganu nga mpingu, ngo panyengu iyi ngachitikiyanga pa vidiyokoniferensi.

 Pati pajumpha nyengu yimanavi waka, David yo nayu ndi Kaboni, wangukambiya Brooke kuti munthu yo wagwira nayu ntchitu wangulonde yimoza mwa makalata ngo iyu wangulemba. Munthu uyu wangukondwa kuwona kuti kalata yo wangulonde yenga yakuchita kulemba pa manja. Iyu wangukamba kuti: “Ŵanthu anandi akhumbika kulongo anyawu kuti atiŵaŵanaŵaniya mu nthowa yeniyi.” David wangusaniriyapu mwaŵi wakumukambiya vinandi munthu mwenuyu ndipu wangumugaŵiya mabuku ngidu ndipu munthu yo wangukondwa kulonde.

 Akaboni aku Yehova aziŵa kuti ndi nyengu zosi cha po angaziŵa kuti mbewu yo angumija mu upharazgi yame. (Wakutawula 11:5, 6) Kweni chinanga kuti vingaŵa viyo, vo vingumuchitikiya Brooke vingumuwovya kuwona kukhumbika kwa kugwiraku ntchitu yakupharazga.—1 Akorinto 3:6.