Kaboni waku Yehova munyaki zina laki Virginia, watama matenda ngo ngachitiska munthu kufwa viŵalu ngo ngaziŵika kuti locked-in syndrome. Viŵalu vaki vikufwa. Iyu watuvwa ndi kuwona, wajula ndipuso kujala masu kweniso wang’anamuwa mutu waki kamanavi waka. Kweni waturya cha pamwenga kulongoro. Pakwamba wenga munthu wamamphamampha ŵaka kweniso wanthazi. Kweni zuŵa linyaki mulenji mu chaka cha 1997, wanguvwa kupweteka ukongwa kugonthu kwa munthu waki. Pavuli paki, mulumu waki wangumutole kuchipatala ndipu mazulu nga zuŵa lenili mzichi uyu wangufwa chipoyu. Angumugoneka muchipinda cha ŵanthu wo atama mwakaya kaya ndipu wangusisipuka pati pajumpha masabata ngaŵi. Panyengu iyi, viŵalu vaki vingufwa ndipu angumuŵika ku makina ngo ngatovya ŵanthu wo atama mwakayakaya. Pati pajumpha waka mazuŵa ngamanavi, palivi chechosi cho wakumbukanga, wanguluwa ndi zina laki viyo.

 Virginia wangukonkhoska vo vinguchitika. Iyu wangukamba kuti, “Kamana ndi kamana ndingwamba kukumbuka vinthu. Ndingupemphera mwakutuliya pasi pa mtima. Ndakhumbanga cha kufwa kweniso kusiya mwana wangu walivi anyina. Kuti ndije ndi chiganga, ndingwamba kukumbuka mavesi nganandi nga mu Bayibolu.

 “Pati pajumpha nyengu, madokotala ngangundituzgamu muchipinda cha ŵanthu wo atama mwakaya kaya. Ndati ndayenda mu vipatala vakupambanapambana kwa myezi 6, ndinguwere kunyumba. Viŵalu vangu vingufwiya limu ndipu ndakhumbikanga munthu munyaki kuti wandiwovyengi pa chechosi. Ndinguguŵa ukongwa ndi vo vingundichitikiya. Ndajivwanga kuti nde wambula kukhumbika ku ŵanthu kweniso kwaku Yehova. Ndafipanga mtima kuti ndiyani yo waphweriyengi mwana wangu.

 “Ndingwamba kuŵerenga nkhani za Akaboni anyaki wo akumana ndi masuzgu ngakuyanana ndi ngo ini ndakumana nangu, ndipu ndinguzizwa kuvwa vo achita pakuteŵete Yehova. Ndati ndaŵerenga nkhani zenizi, ndingwamba kuja ndi maŵanaŵanu ngakwenere ndipu ndingwamba kuŵanaŵaniya vo ndingafiska. Ndechendayambi kutama, ndaŵanga ndi nyengu yimanavi yakuchitiya vinthu vauzimu. Kweni sonu nde ndi nyengu yakukwana. Ndipu mumalu mwakuŵanaŵaniya waka suzgu yo ndenayu, ndiŵanaŵaniya vo ndingafiska pakuteŵete Yehova.

 “Ndikusambira mo ndingagwiriskiya ntchitu kompyuta. Ndigwiriskiya ntchitu pulogilamu yapa kompyuta yo yitindiwovya kuziŵa mo ndingayendese mutu wangu. Chinanga kuti kugwiriskiya ntchitu kompyuta kuvukisa, kweni kutindiwovya kusambira Bayibolu ndi ŵanthu kweniso kuŵakambiyaku va chilindizga cha munthazi. Ndichita venivi mwakulemba mauthenga kweniso makalata. Kuti ndikambiskanengi ndi ŵanthu wo ndenawu pafupi, nde ndi bolodi lo le ndi alifabeti. Munthu yo we nani pafupi watindilongo chilembu chimoza chimoza. Asani wandilongo chilembu chaboza, ndithwanuwa ukongwa masu kweni asani wandilongo chilembu chauneneska ndijala masu. Kuti tipangi chiganizu, munthu yo watindilongo vilembu vo mwakuwerezawereza. Chifukwa chakuti azichi anyaki aja nani pafupi kwanyengu yitali, yiwu mbakaswiri pakuloŵeza vo ndikhumba kukamba. Kweni tiseka asani akamba vaboza.

 “Ndikondwa kuchitiya limoza vinthu ndi abali ndi azichi mumpingu. Nyengu zosi ndiwungana kuziya pa vidiyokonferensi. Ndilembe limu ndemanga yangu ndipu asani nyengu ya mafumbu yakwana munthu munyaki watindiŵerenge. Ndipu asani pulogilamu ya JW Broadcasting yatuwa ndiwonere limoza ndi kagulu kidu ka uteŵeti. a

 “Ndaja ndichitama matenda yanga kwa vyaka 23 sonu. Nyengu zinyaki ndidandaula ukongwa. Kweni pempheru, kucheza ndi abali ndi azichi kweniso kutangwanika pakuteŵete Yehova ndivu vitindiwovya kukunthiyapu suzgu yangu. Chifukwa chakuti abali ndi azichi mu mpingu atindiwovya, ndifiska kuchita upayiniya wakovya wo ndawuchita kwa vyaka vakujumpha 6. Ndayesesa kuja chakuwoniyapu chamampha ku mwana wangu Alessandro, yo pasonu panu wakuto ndipu wateŵete nge mura mu mpingu kweniso nge mpayiniya wanyengu zosi pamoza ndi muwolu waki.

 “Kanandi ndiŵanaŵaniya vinthu vo ndazamuchita mu paradayisu. Chinthu chakwamba cho ndikhumba kuzichita nkhuzilongoro vakukwaskana ndi Yehova ndi mulomu wangu wo pasonu panu ndifiska cha kulongoro. Chinthu chachiŵi ntchakuti ndikhumba kuzitembeya kuziwona malu ngakutowa. Ndipu chifukwa chakuti kwa vyaka 20 vo vajumpha ndaja ndichirya vakurya va majimaji kuziya mu chubu, mucharu chifya ndikhumbisiska kuzipontho ndija chipasu ndikurya. Pakuŵa munthu waku Italy ndilindizga nyengu yo ndazamukurya chakurya cho titanja kusazgapu pizza!

 “‘Chilindizga cha utaski’ chivikiliya maŵanaŵanu ngangu. (1 Atesalonika 5:8) Kujiyeruzgiya kuti nde mucharu chifya kutindiwovya kuti ndikondwengi chinanga kuti ndisuzgika pasonu panu. Ndipu ndigomezga ndi mtima wosi kuti pambula kuswera yapa matenda ngangu ngamalengi. Kukamba uneneska, ndikhumbisiska kuzikondwa ndi ‘umoyu weneku’ wo Yehova wakutilayizga kuti wazakutipasa kuziya mu Ufumu waki.”—1 Timote 6:19; Mateyu 6:9, 10.