Gulu la Akaboni aku Yehova lo muwona mazuŵa nganu, lingwamba kukumaliya kwa vyaka va m’ma 1800. Pa nyengu iyi, kagulu ka Akusambira Bayibolo, wo ajanga kufupi ndi ku Pittsburgh, Pennsylvania, m’charu cha United States angwamba kufufuza fundu za Bayibolo mwaphamphu. Yiwu ayeruzgiyanga vo matchalitchi ngasambizanga ndi vo Bayibolo likamba. Angwamba kupharazga vo asambiranga mwakugwiriskiya nchitu mabuku, manyuzipepala kweniso Chigongwi cha Alinda—Chakupharazga Ufumu Waku Yehova.

 Pa gulu la akusambira Bayibolo ŵenaŵa, penga Charles Taze Russell. Chinanga kuti Russell ndiyu walongozganga pa nchitu yakusambiza ŵanthu Bayibolo ndipuso ndiyu wenga wakwamba kulemba Chigongwi cha Alinda, kweni ndiyu cha wangwambisa mpingu wasonu wa Akaboni aku Yehova. Chilatu chaku Russell ndipuso Akusambira Bayibolo anyaki, chenga chakuti alutiski panthazi vo Yesu Khristu wasambizanga ndipuso kulondo vo mpingu wachikhristu wa m’nyengu ya akutumika wachitanga. Isi tiwona kuti Yesu ndiyu wakwambisa gulu lidu chifukwa chakuti iyu ndiyu wakwambisa Chikhristu.—Ŵakolose 1:18-20.