Tangata Malanga 9:1-18
9 Ko ia naʻe tokanga hoku lotó ki he ngaahi meʻá ni kotoa peá u fakaʻosiʻaki, ko e kau māʻoniʻoní mo e kau potó, pea pehē ki heʻenau ngaahi ngāué, ʻoku ʻi he ʻaofinima ia ʻo e ʻOtua moʻoní.+ ʻOku ʻikai lāuʻilo ʻa e tangatá ki he ʻofa mo e tāufehiʻa naʻe hoko ki muʻa ʻiate kinautolú.
2 ʻOku hoko ʻa e ikuʻanga pē taha ki he tokotaha kotoa,+ ki he māʻoniʻoní mo e fulikivanú,+ ki he tokotaha leleí mo e tokotaha ʻoku maʻá pea mo e tokotaha ʻoku taʻemaʻá, ki he faʻahinga ʻoku nau fai ha feilaulaú mo e faʻahinga ʻoku ʻikai ke nau fai ha feilaulaú. Ko e tokotaha leleí ʻoku tatau pē ia mo e tokotaha faiangahalá; ko e tokotaha ʻokú ne fai ha fuakavá ʻoku tatau pē ia mo e tokotaha ʻoku fakaalaala ʻi he fekauʻaki mo hono fai ha fuakavá.
3 Ko ha meʻa fakamamahi eni ʻoku hoko ʻi he lalo laʻaá: Koeʻuhí ko hono maʻu ʻe he tokotaha kotoa ʻa e ikuʻanga tataú,+ ʻoku fonu ai ʻa e loto ʻo e tangatá ʻi he koví; pea ʻoku ʻi ai ʻa e vale ʻi honau lotó lolotonga ʻenau moʻuí, pea nau toki mate leva!*
4 ʻOku ʻi ai ha ʻamanaki ki ha taha pē ʻi he faʻahinga ʻoku moʻuí, koeʻuhí ko ha kulī moʻui ʻoku lelei ange ia ʻi ha laione mate.+
5 He ko e kau moʻuí ʻoku nau ʻiloʻi te nau mate,+ ka ko e kau maté ʻoku ʻikai te nau ʻiloʻi ha momoʻi meʻa,+ pea ʻoku ʻikai ke nau kei maʻu ha totongi,* koeʻuhí kuo ngalo ʻa e manatu kotoa pē kiate kinautolú.+
6 Pehē foki, ko ʻenau ʻofá mo ʻenau fehiʻá mo ʻenau meheká kuo ʻosi mole atu ia, pea ʻoku ʻikai te nau kei kau ʻi ha meʻa ʻoku fai ʻi he lalo laʻaá.+
7 ʻAlu koe ʻo kai hoʻo meʻakaí ʻi he fiefia, mo inu hoʻo uainé ʻi he loto-fiefia,+ he ko e ʻOtua moʻoní kuó ne leleiʻia ʻi hoʻo ngaahi ngāué.+
8 ʻOfa ke hinehina maʻu ai pē ho kofú,* pea ʻoua naʻa ngalo ke pani ʻaki ha lolo ho ʻulú.+
9 Fiefia ʻi hoʻo moʻuí fakataha mo ho uaifi ʻofaʻangá+ ʻi he kotoa ʻo e ngaahi ʻaho ʻo hoʻo moʻui muná, ʻa ia kuó Ne foaki kiate koe ʻi he lalo laʻaá, ʻi he kotoa ʻo ho ngaahi ʻaho muná, he ko ho tofiʻa* ia ʻi he moʻuí pea ʻi hoʻo ngāue mālohi ʻa ia ʻokú ke fakaongosia ai ʻi he lalo laʻaá.+
10 ʻIlonga ha meʻa ʻoku ʻilo ʻe ho nimá ke faí, faiʻaki ia ʻa e kotoa ho mālohí, he ʻoku ʻikai ha ngāue pe ha palani pe ha ʻilo pe ha poto ʻi he Faʻitoká,*+ ʻa e feituʻu ʻokú ke ʻalu ki aí.
11 Kuó u vakai ki ha meʻa ʻe taha ʻi he lalo laʻaá, ko e veʻe-vavé ʻoku ʻikai te ne ikuna maʻu pē ʻa e lová, pe ko e toʻá pē ʻokú ne ikuna ʻa e taú,+ pe ko e potó pē ʻokú ne maʻu maʻu pē ʻa e meʻakaí, pe ko e tokotaha ʻatamaiʻiá pē ʻokú ne maʻu maʻu pē ʻa e koloá,+ pe ko e faʻahinga pē ʻoku nau maʻu ʻa e ʻiló te nau lavameʻa maʻu pē,+ koeʻuhí ʻoku hoko kiate kinautolu kotoa ʻa e ngaahi taimi faingataʻa mo e ngaahi meʻa ʻoku hoko taʻeʻamanekina.*
12 He ʻoku ʻikai ʻilo ʻe he tangatá ʻa hono taimi ʻoʻoná.+ Hangē tofu pē ko hono maʻukovia ʻa e iká ʻi ha kupengá mo e fihia ʻa e manupuná ʻi ha tauhelé, ʻoku pehē ʻa e fihia ʻa e ngaahi foha ʻo e tangatá ʻi he taimi ʻo e fakatamakí,* ʻi he fakafokifā ʻene hoko kiate kinautolú.
13 Naʻá ku toe fakatokangaʻi ʻa e meʻá ni ʻo fekauʻaki mo e potó ʻi he lalo laʻaá—pea naʻe maongo ia kiate au:
14 Naʻe ʻi ai ha kiʻi kolo naʻe tokosiʻi pē ʻa e kau tangata naʻe ʻi aí; pea naʻe ʻalu atu ha tuʻi mālohi ke tauʻi ia ʻo ne ʻātakaiʻi ia peá ne ʻākoloʻi fakakolotau ia.
15 Naʻe maʻu ʻi he koló ha tangata masiva ka naʻe poto, pea naʻá ne fakahaofi ʻa e koló ʻaki hono potó. Ka naʻe ʻikai ha taha te ne manatuʻi ʻa e tangata masiva ko iá.+
16 Pea naʻá ku pehē kiate au: ‘Ko e potó ʻoku lelei ange ia ʻi he mālohí;+ ka neongo ia ko e poto ʻa ha tangata masiva ʻoku ʻikai tokaʻi ia, pea ko ʻene ngaahi leá ʻoku ʻikai fai ha tokanga ki ai.’+
17 ʻOku lelei ange ke tokanga ki he ngaahi lea mokomoko ʻa e potó ʻi he ngaahi kaikaila ʻa e tokotaha ʻoku pule ʻi he lotolotonga ʻo e kau valé.
18 ʻOku lelei ange ʻa e potó ʻi he ngaahi meʻataú, ka ko ha tokotaha angahala pē ʻe toko taha ʻe lava ke ne fakaʻauha ha ngaahi lelei lahi.+
Fakamatala ‘i Lalo
^ Fakafoʻilea, “pea ʻi he hili iá—ʻoku nau ʻalu ki he faʻahinga kuo maté!”
^ Pe “vāhenga.”
^ ʻA ia, ko ha kofu ʻoku lanu maʻa ʻokú ne tapua mai ha loto ʻoku fiefia, kae ʻikai ko ha teunga ʻo e fakamamahi.
^ Pe “ʻinasi.”
^ Pe “ʻi Seoli,” ʻa ia, ko e faʻitoka anga-maheni ʻo e faʻahinga ʻo e tangatá. Sio ki he Lea mo Hono ʻUhinga.
^ Pe “ʻoku hoko ʻo ʻikai tomuʻa ʻilo ki ai.”
^ Pe “faingataʻá.”
