Tangata Malanga 2:1-26
2 Pea naʻá ku pehē ʻi hoku lotó: “Haʻu pea tuku ke u ʻahiʻahiʻi angé ʻa e mālié* pea sio pe ko e hā ʻa e lelei ʻe maʻu aí.” Kae vakai, ko e muna mo ia foki.
2 Naʻá ku pehē fekauʻaki mo e katá, “Ko e fakasesele ia!”
Pea fekauʻaki mo e mālié,* “Ko e hā hono ʻaonga?”
3 Naʻá ku fakatotolo ʻaki hoku lotó ʻi heʻeku nōfoʻi ʻi he inu uainé,+ lolotonga iá naʻá ku kei tauhi maʻu pē ʻa ʻeku potó; naʻe aʻu ʻo u fakahoko ha meʻa fakavalevale ke ʻilo pe ko e hā ʻa e meʻa lelei taha ke fai ʻe he faʻahinga ʻo e tangatá ʻi he lolotonga ʻa e ngaahi ʻaho siʻi ʻo ʻenau moʻui ʻi he lalo langí.
4 Naʻá ku fakahoko ha ngaahi ngāue lalahi.+ Naʻá ku langa ha ngaahi fale moʻoku;+ naʻá ku tō ha ngaahi ngoue kālepi maʻaku.+
5 Naʻá ku ngaohi ha ngaahi ngoue mo ha ngaahi paʻake maʻaku, pea naʻá ku tō ai ʻa e ʻuluʻakau fua kotoa pē.
6 Naʻá ku ngaohi ha ngaahi vai maʻaku, ke fakaviviku mei ai ʻa e ʻuluʻakau* tupu ʻāfaʻafá.
7 Naʻá ku maʻu ʻa e kau tamaioʻeiki mo e kau kaunanga,+ pea naʻe ʻi ai mo ʻeku kau sevāniti naʻe fanauʻi ʻi hoku falé.* Naʻá ku maʻu foki ʻa e fanga manu tokolahi—ko e fanga pulu mo e fanga sipi+—ʻo lahi ange ia ʻi ha taha pē ʻi he faʻahinga naʻe ʻi muʻa ʻiate au ʻi Selusalemá.
8 Naʻá ku tānaki siliva mo e koula maʻaku,+ ko e ngaahi koloa ʻa e* ngaahi tuʻí mo e ngaahi vahefonuá.+ Naʻá ku fakatahatahaʻi ha kau tangata hiva mo e kau fefine hiva maʻaku, pea pehē ki ha meʻa pē naʻá ne ʻomi ʻa e fiefia lahi ki he ngaahi foha ʻo e tangatá—ha fefine, ʻio, ha kau fefine tokolahi.*
9 Ko ia naʻá ku hoko ko e tokotaha lahi peá u lakasi ha taha pē naʻe ʻi muʻa ʻiate au ʻi Selusalema.+ Pea naʻe kei ʻiate au pē ʻa hoku potó.
10 Naʻe ʻikai te u fakafisingaʻi meiate au ha meʻa naʻá ku holi ki ai.*+ Naʻe ʻikai te u taʻofi mei hoku lotó ha faʻahinga mālie pē,* he naʻe fiefia hoku lotó koeʻuhi ko e kotoa ʻo ʻeku ngāue mālohí, pea ko hoku pale* eni ʻi he kotoa ʻo ʻeku ngāue mālohí.+
11 Ka ʻi heʻeku fakakaukau atu ki he kotoa ʻo e ngaahi ngāue kuo fai ʻe hoku nimá tonu pea ki he kotoa ʻo e ngāue mālohi ʻa ia naʻá ku fakaongosia ke fakahokó,+ naʻá ku ʻilo ai ko e muna ʻa e meʻa kotoa pē, ko ha tuli pē ki he matangí;+ naʻe ʻikai ha meʻa ʻe ʻi ai hano mahuʻinga moʻoni* ʻi he lalo laʻaá.+
12 Naʻá ku fakahanga leva ʻeku tokangá ki he potó mo e valé mo e seselé.+ (He ko e hā ʻe lava ke fai ʻe he tangata ʻe hoko mai ʻi he hili ʻa e tuʻí? Ko e ngaahi meʻa pē ko ia kuo ʻosi fai ʻe he kakaí.)
13 Pea naʻá ku sio ʻoku lelei ange ʻa e potó ʻi he seselé,+ ʻo hangē pē ko e lelei ange ʻa e māmá ʻi he fakapoʻulí.
14 Ko e tokotaha potó ʻokú ne sio lelei ki hono halá;*+ ka ko e tokotaha valé ʻokú ne laka atu ʻi he fakapoʻulí.+ Naʻá ku toe ʻiloʻi foki ko e ikuʻanga pē taha ʻoku tō kiate kinautolú kotoa.+
15 Naʻá ku pehē leva ʻi hoku lotó: “Ko e meʻa ʻoku hoko ki he tokotaha valé ʻe hoko foki mo ia kiate au.”+ Ko e hā leva naʻá ku maʻu ʻi he tōtuʻa ʻa hoku potó? Ko ia naʻá ku pehē ʻi hoku lotó: “Ko e muna mo eni foki.”
16 He ʻoku ʻikai ha manatu tuʻuloa ki he tokotaha potó pe ki he tokotaha valé.+ ʻI he ngaahi ʻaho ka hoko maí, ʻe ngalo ʻa e tokotaha kotoa. Pea ʻe anga-fēfē ʻa e mate ʻa e tokotaha potó? ʻE hangē pē ko e tokotaha valé.+
17 Ko ia naʻá ku hoko ai ʻo fehiʻa ʻi he moʻuí,+ koeʻuhi ko e meʻa kotoa pē kuo fai ʻi he lalo laʻaá naʻe hā ngali fakamamahi ia kiate au, he ko e muna ʻa e meʻa kotoa pē,+ ko ha tuli pē ki he matangí.+
18 Naʻá ku hoko ʻo fehiʻa ki he meʻa kotoa naʻá ku ngāue mātuʻaki mālohi ki ai ʻi he lalo laʻaá,+ koeʻuhi kuo pau ke u tuku atu ia maʻá e tangata ʻe hoko mai ʻi he hili aú.+
19 Pea ko hai ʻokú ne ʻilo pe te ne hoko koā ʻo poto pe vale?+ Neongo ia, te ne pule ki he meʻa kotoa naʻá ku fakamoleki ʻa e ivi lahi mo e poto ke u maʻu mai ʻi he lalo laʻaá. Ko e muna mo eni foki.
20 Ko ia naʻe kamata ke siva ʻa ʻeku ʻamanakí ʻi hoku lotó ki he kotoa ʻo e ngāue mālohi naʻá ku fakaongosia ai ʻi he lalo laʻaá.
21 He ʻoku ngāue mālohi nai ha tangata ʻo faiʻaki ʻa e poto mo e ʻilo mo e pōtoʻi, ka kuo pau ke ne tuku atu ʻa hono ʻinasí* ki ha tangata naʻe ʻikai te ne ngāueʻi ia.+ Ko e muna mo eni foki pea ko ha meʻa mātuʻaki fakamamahi ia.*
22 Ko e hā ʻoku maʻu moʻoni ʻe ha tangata mei he kotoa ʻo ʻene ngāue mālohi mo e holi ʻokú ne ueʻi ia* ke ne ngāue mālohi ai ʻi he lalo laʻaá?+
23 He ʻi he lolotonga ʻa e kotoa ʻo hono ngaahi ʻahó, ʻoku ʻomi ai ʻe heʻene ngāué ʻa e mamahi mo e ongoʻi feifeitamaki,+ pea naʻa mo e poʻulí ʻoku ʻikai ke maʻu ʻe hono lotó ha mālōlō.+ Ko e muna mo eni foki.
24 ʻOku ʻikai ha meʻa ʻe lelei ange ki ha tangata ka ke ne kai mo inu mo maʻu ha fiefia ʻi heʻene ngāue mālohí.+ Ko e meʻá ni foki, kuó u fakatokangaʻi, ʻoku mei he nima ia ʻo e ʻOtua moʻoní,+
25 he ko hai ia ʻoku kai pea ko hai ia ʻoku inu ʻo lelei ange ʻiate au?+
26 Ko e tangata ʻoku fakahōifua kiate iá ʻokú ne foaki ki ai ʻa e poto mo e ʻilo mo e fiefia,+ ka ko e tokotaha angahalá ʻokú ne ʻoange kiate ia ʻa e ngāue ko hono fakatahatahaʻi mo fai pē ha tānaki ke foaki ki he tokotaha ʻoku fakahōifua ki he ʻOtua moʻoní.+ Ko e muna mo eni foki, ko ha tuli pē ki he matangí.
Fakamatala ‘i Lalo
^ Pe “fakafiefiá.”
^ Pe “fakafiefiá.”
^ Pe “vaotā.”
^ Fakafoʻilea, “mo hoku ngaahi foha ʻi he falé.”
^ Pe “ha taʻahine, ʻio, ha kau taʻahine.”
^ Pe “koloa naʻe maʻu pē ʻe he.”
^ Fakafoʻilea, “naʻe kole ki ai ʻa hoku matá.”
^ Pe “faʻahinga fakafiefia pē.”
^ Pe “ʻinasi.”
^ Pe “ʻaonga.”
^ Fakafoʻilea, “ʻoku ʻi hono ʻulú ʻa hono ongo matá.”
^ Pe “tuku atu ʻa e meʻa kotoa.”
^ Pe “kovi ia.”
^ Fakafoʻilea, “mo e feinga ʻa hono lotó.”
