Siope 38:1-41
38 Pea naʻe tali ʻe Sihova kia Siope mei he loto taufá:+
2 “Ko hai eni ʻokú ne fakaʻuliʻulilātaiʻi ʻa ʻeku tuʻutuʻuníPea lea ʻi he taʻeʻiló?+
3 Ke ke tuʻu mateuteu muʻa ke ngali tangata;Te u fehuʻi atu, peá ke fakamatala mai kiate au.
4 Naʻá ke ʻi fē ʻi he taimi naʻá ku tanupou ai ʻa e māmaní?+
Tala mai, kapau kuó ke pehē ʻokú ke mahinoʻi.
5 Ko hai naʻá ne fokotuʻu ʻa hono ngaahi fuá, kapau ʻokú ke ʻilo,Pe ko hai naʻá ne falō ki ai ha afo fuá?
6 ʻOku ʻalu hifo ʻa hono ngaahi poú ʻo tuʻu ʻi he hā,Pe ko hai naʻá ne fakatoka ʻa hono maka-tulikí,+
7 ʻI he taimi naʻe kalanga fiefia fakataha ai ʻa e ngaahi fetuʻu pongipongí,+Pea kamata kaila fakahīkihiki ai ʻa e ngaahi foha kotoa ʻo e ʻOtuá?*+
8 Pea ko hai naʻá ne ʻai ʻa e ngaahi matapā ke taʻofi ʻaki ʻa e tahí+ʻI heʻene pā mai mei he manavá,
9 ʻI he taimi naʻá ku fakakofu ai ia ʻaki ʻa e ngaahi ʻaóPea takatakai ia* ʻi he poʻuli lōloó,
10 ʻI he taimi naʻá ku fokotuʻu ai ʻa ʻeku fakangatangatá ki aíPea ʻai ʻa hono ngaahi fakamaʻú mo hono ngaahi matapaá,+
11 Peá u pehē, ‘Te ke haʻu pē ʻo ngata hē, ʻo ʻoua ʻe toe fakalaka atu ai;Ko eni ʻe ngata ai ʻa hoʻo ngaahi fuʻu peau lalahí’?+
12 Kuo faifai ange peá ke* faituʻutuʻuni ki he pongipongíPe ʻai ke ʻilo ʻe he mafoa ʻa e atá ʻa hono feituʻú,+
13 Ke puketuʻu ʻa e ngaahi ngataʻanga ʻo e māmaníPea tupeʻi mei ai ʻa e kau fulikivanú?+
14 ʻOku liliu leva ia ʻo hangē ha ʻumea ʻoku ʻai ki ai ha silá,Pea eʻa mai hono ngaahi tafaʻakí ʻo hangē ha ngaahi teuteu ʻo ha kofú.
15 Ka ko e maama ʻa e kau fulikivanú ʻoku taʻofituʻu ia meiate kinautolu,Pea ko honau nima ne hikí kuo fesiʻi.
16 Kuó ke ʻalu hifo ki he ngaahi matavai ʻo e tahíPe fakatotoloʻi ʻa e moana lolotó?+
17 Kuo fakahaaʻi atu kiate koe ʻa e ngaahi matapā ʻo maté,+Pe kuó ke mamata ʻi he ngaahi matapā ʻo e fakapoʻuli matolú?*+
18 Kuó ke mahinoʻi ʻa e māukupu kotoa ʻo e māmaní?+
Tala mai, kapau ʻokú ke ʻiloʻi ʻa e kotoa ʻo e meʻá ni.
19 Ko fē ʻa e hala ki he nofoʻanga ʻo e māmá?+
Pea ko fē ʻa e feituʻu ʻo e fakapoʻulí,
20 Ke ke ʻave ai ia ki hono feituʻúPea mahinoʻi ʻa e ngaahi hala ki hono ʻapí?
21 ʻOkú ke ʻilo ení koeʻuhi ne ʻosi fanauʻi koePea ko ho ngaahi taʻú* ʻoku lahi?
22 Kuó ke hū ki he ngaahi feleoko ʻo e sinoú,+Pe kuó ke sio ʻi he ngaahi feleoko ʻo e ʻuha-ʻaisí,*+
23 ʻA ia kuó u tuku tauhi ki he taimi ʻo e faingataʻá,Ki he ʻaho ʻo e fepakí mo e taú?+
24 Ko fē ʻa e halanga ʻoku mafola mei ai ʻa e māmá,*Pea ʻoku angi mei fē ʻa e matangi hahaké ki he māmaní?+
25 Ko hai kuó ne foa ha tafenga ki he lōvaíPea ngaohi ha hala ki he afā lōvai mo mana fatulisí,+
26 Ke ʻai ke ʻuha ki he feituʻu ʻoku ʻikai nofo ai ha tahá,Ki he toafa ʻoku ʻikai ʻi ai ha tangatá,+
27 Ke fakafiemālieʻi ʻa e ngaahi konga fonua kuo ʻauháPea ʻai ke tupu ʻa e mohukú?+
28 ʻOku ʻi ai ha tamai ʻa e ʻuhá,+Pe ko hai ʻa e tamai ʻa e ngaahi tulutā hahaú?+
29 Ko e manava ʻo hai naʻe tupu mei ai ʻa e ʻaisí,Pea ko hai naʻá ne fanauʻi ʻa e hahau ʻaisi ʻo e langí+
30 ʻI he taimi ʻoku ʻufiʻufi ai ʻa e ngaahi vaí ʻo hangē ʻoku ʻufiʻufiʻaki ha maká,Pea hoko ko e konga ʻaisi ʻa e fukahi moana lolotó?+
31 ʻE lava ke ke haʻihaʻi ʻa e ngaahi maea ʻo e pupunga fetuʻu ko Kimaá*Pe vete ʻa e ngaahi afo ʻo e pupunga fetuʻu ko Kēsilí?*+
32 ʻE lava ke ke taki mai ha pupunga fetuʻu* ʻi hono faʻahitaʻúPe tataki ʻa e pupunga fetuʻu ko ʻAsá* fakataha mo ʻene fānaú?
33 ʻOkú ke ʻiloʻi ʻa e ngaahi lao ʻokú ne puleʻi ʻa e langí,+Pe ʻe lava ke ke ʻai honau* mafaí ki he māmaní?
34 ʻE lava ke ke hiki hake ho leʻó ki he ngaahi ʻaóKe fakatupunga ha lōvai ke ʻufiʻufiʻaki koe?+
35 ʻE lava ke ke fekauʻi atu ʻa e tapa ʻa e ʻuhilá?
Te nau haʻu pea nau pehē atu kiate koe, ‘Ko kimautolu eni!’
36 Ko hai naʻá ne fokotuʻu ʻa e potó ki he ngaahi ʻaó*+Pe ʻoange ʻa e mahinó ki he ngaahi meʻa fakaofo ʻi he langí?*+
37 Ko hai ʻoku poto feʻunga ke ne lau ʻa e ngaahi ʻaó,Pe ko hai ʻe lava ke ne huaʻi hifo ʻa e ngaahi siā vai ʻo e langí+
38 ʻI he hoko ʻa e efú ko ha fokotuʻungáPea fepikipikiʻi fakataha ʻa e ngaahi konga kelekelé?
39 ʻE lava ke ke kumi ha kai ʻa ha laionePe fakalato ʻa e uʻa ʻo e fanga laione muí+
40 ʻI heʻenau tākoto ʻi honau ngaahi toitoiʻangáPe tākoto ʻo talitali ʻoho mei honau ngaahi ʻaná?
41 Ko hai ʻokú ne teu ha meʻakai ki he lēvení+ʻI he tangi ʻa hono ʻuhikí ki he ʻOtuá ki ha tokoníMo hē holo ko e ʻikai ha meʻa ke kaí?
Fakamatala ‘i Lalo
^ Ko ha ʻitiome faka-Hepelū ʻoku ʻuhinga ki he ngaahi foha ʻāngelo ʻo e ʻOtuá.
^ Pe “pulupulu ia hangē ha kiʻi valevalé.”
^ Fakafoʻilea, “ʻI ho ngaahi ʻahó kuó ke.”
^ Pe “ʻata ʻo maté.”
^ Fakafoʻilea, “ngaahi ʻahó.”
^ Pe “ʻuha-maká.”
^ Pe ngalingali, “ʻuhilá.”
^ Ngalingali ko e ngaahi fetuʻu ko Pelaiatisí ʻi he pupunga fetuʻu ko Taulusí.
^ Ngalingali ko e pupunga fetuʻu ko ʻOlioní.
^ Fakafoʻilea, “Masaloti.” ʻI he 2Tu 23:5, ko e foʻi lea pulula fēlaveʻi mo ení ʻoku ʻuhinga ki he ngaahi pupunga fetuʻu ʻo e sōtiaká.
^ Ngalingali ko e pupunga fetuʻu ko Fuʻu Peá (ʻEsa Lahi).
^ Pe ngalingali, “Hono.”
^ Pe ngalingali, “ʻi he tangatá.”
^ Pe ngalingali, “ki he ʻatamaí.”
