Siope 2:1-13
2 ʻI he hili iá, naʻe hoko mai ʻa e ʻaho naʻe hū atu ai ʻa e ngaahi foha ʻo e ʻOtua moʻoní*+ ke nau tuʻu ʻi he ʻao ʻo Sihová,+ pea naʻe hū atu foki ʻi honau lotolotongá ʻa Sētane ke ne tuʻu ʻi he ʻao ʻo Sihová.+
2 Pea naʻe folofola ange ʻa Sihova kia Sētane: “Ko hoʻo haʻu ena mei fē?” Naʻe tali ange ʻe Sētane kia Sihova: “Mei heʻeku takamilo holo ʻi he māmaní mo feʻaluʻaki holo ai.”+
3 Pea naʻe folofola ange ʻa Sihova kia Sētane: “Kuó ke fakatokangaʻi atu ʻa ʻeku* sevāniti ko Siopé? ʻOku ʻikai ha taha ʻe hangē ko iá ʻi he māmaní. Ko ha tangata faitotonu mo anga-tonu ia,*+ pea manavahē ki he ʻOtuá mo fakamamaʻo mei he meʻa ʻoku koví. ʻOkú ne kei puke maʻu pē ʻene anga-tonú,+ neongo hoʻo feinga ke ueʻi au ke u fai ha meʻa kiate ia+ ke fakaʻauha* ia taʻeʻiai hano ʻuhingá.”
4 Ka naʻe tali ange ʻe Sētane kia Sihova: “Ko e kili pē ki he kili. ʻE tuku atu ʻe ha tangata ʻa e meʻa kotoa ʻokú ne maʻú koeʻuhí ko ʻene moʻuí.
5 Ka ko eni, mafao atu muʻa ho nimá peá ke taaʻi ʻa hono huí mo hono kakanó, pea te ne laukovi moʻoni kiate koe ʻi ho fofongá tonu.”+
6 Naʻe folofola ange leva ʻa Sihova kia Sētane: “Vakai! ʻOkú ne ʻi ho nimá!* Ko e meʻá pē ke ʻoua te ke toʻo ʻene moʻuí!”
7 Ko ia naʻe hū ʻa Sētane ki tuʻa mei he ʻao* ʻo Sihová ʻo ne taaʻi ʻa Siope ʻaki ʻa e ngaahi hangatāmaki langa lahi*+ mei hono ʻaofivaʻé ki hono tumuʻakí.
8 Pea naʻe toʻo ʻe Siope ha mapakiʻi ipu ʻumea ke ne vaku ʻaki ia, pea naʻá ne tangutu ʻi he loto efuefú.+
9 Faifai atu pē naʻe pehē ange ʻe hono uaifí kiate ia: “ʻOkú ke kei puke maʻu pē koā ʻa hoʻo anga-tonú? Laukovi ki he ʻOtuá ka ke mate!”
10 Ka naʻá ne pehē ange kiate ia: “ʻOku hangē hoʻo leá ko e taha ʻo e kau fefine taʻeʻatamaí. Te tau tali pē koā ʻa e meʻa ʻoku leleí mei he ʻOtua moʻoní pea ʻikai tali mo e meʻa ʻoku koví?”+ ʻI he kotoa ʻo e meʻá ni, naʻe ʻikai fai ʻe Siope ha angahala ʻaki hono loungutú.+
11 Naʻe fanongo ʻa e ngaahi kaungāmeʻa* ʻe toko tolu ʻo Siopé ʻo fekauʻaki mo e kotoa ʻo e ngaahi tuʻutāmaki kuo hoko kiate iá, pea naʻe haʻu ʻa e tokotaha taki taha mei hono feituʻu ʻoʻona—ko ʻElifasi+ mei Tīmani, Pilitati+ mei Suaʻa,+ mo Sofaʻā+ mei Naʻamá. Ko ia naʻa nau loto ke nau fakataha ke nau ō ʻo fakahāhā ha kaungāongoʻi kia Siope mo fakafiemālie kiate ia.
12 ʻI heʻenau sio kiate ia mei he mamaʻó, naʻe ʻikai te nau mei ʻiloʻi ia. Naʻe kamata ke nau tangi leʻo-lahi mo hae honau ngaahi kofú, pea naʻa nau tolo ʻa e efú ki he ʻataá pea ki honau ʻulú.+
13 Naʻa nau tangutu fakataha leva mo ia ʻi he kelekelé ʻi he ʻaho ʻe fitu mo e pō ʻe fitu. Naʻe ʻikai leaʻaki ʻe ha taha ha foʻi lea ʻe taha mātē kiate ia, he naʻa nau sio naʻá ne fuʻu langa mamahi ʻaupito.+
Fakamatala ‘i Lalo
^ Ko ha ʻitiome faka-Hepelū ʻoku ʻuhinga ki he ngaahi foha ʻāngelo ʻo e ʻOtuá.
^ Fakafoʻilea, “tokanga ʻi ho lotó ki heʻeku.”
^ Pe “tangata taʻemele mo faitotonu ia.”
^ Fakafoʻilea, “folo.”
^ Pe “ʻi ho mafaí.”
^ Fakafoʻilea, “fofonga.”
^ Pe “ngaahi pala fakatuʻutāmaki.”
^ Pe “ngaahi maheni.”
