Siope 1:1-22
1 Naʻe ʻi ai ha tangata ʻi he fonua ko ʻUsá ko hono hingoá ko Siope.*+ Ko ha tangata faitotonu mo anga-tonu ia;*+ naʻá ne manavahē ki he ʻOtuá mo fakamamaʻo mei he meʻa naʻe koví.+
2 Naʻe fanauʻi kiate ia ha foha ʻe toko fitu mo ha ʻofefine ʻe toko tolu.
3 Ko ʻene fanga monumanú naʻe feʻunga mo e sipi ʻe 7,000, kāmeli ʻe 3,000, pulu ʻe 1,000,* mo e ʻasi* ʻe 500, fakataha mo ha fuʻu kau sevāniti tokolahi, ko ia naʻá ne hoko ko e tokotaha lahi taha ia ʻi he kotoa ʻo e kakai ʻo e Hahaké.
4 Naʻe fai ʻe hono foha taki taha ha kātoanga ʻi hono falé ʻi hono ʻaho naʻe vaheʻi ki aí.* Naʻa nau fakaafeʻi honau fanga tuofāfine ʻe toko tolú ke nau kai mo inu fakataha mo kinautolu.
5 ʻI he kakato ʻa e ngaahi ʻaho hokohoko ʻo ʻenau kātoangá, naʻe fekau atu ʻe Siope ke nau haʻu koeʻuhí ke fakamāʻoniʻoniʻi kinautolu. Naʻá ne tuʻu pongipongia hake leva ʻo ne ʻoatu ha ngaahi feilaulau tutu+ maʻá e tokotaha taki taha ʻo kinautolu. He naʻe pehē ʻe Siope: “Kuo faiangahala mo laukovi nai ʻa hoku ngaahi fohá ki he ʻOtuá ʻi honau lotó.” Ko e meʻa ia naʻe fai maʻu pē ʻe Siopé.+
6 Pea naʻe hoko leva ʻa e ʻaho naʻe hū atu ai ʻa e ngaahi foha ʻo e ʻOtua moʻoní*+ ke nau tuʻu ʻi he ʻao ʻo Sihová,+ pea naʻe hū atu foki ʻi honau lotolotongá+ ʻa Sētane.+
7 Pea naʻe folofola ange ʻa Sihova kia Sētane: “Ko hoʻo haʻu ena mei fē?” Naʻe tali ange ʻe Sētane kia Sihova: “Mei heʻeku takamilo holo ʻi he māmaní mo feʻaluʻaki holo ai.”+
8 Pea naʻe folofola ange ʻa Sihova kia Sētane: “Kuó ke fakatokangaʻi atu ʻa ʻeku* sevāniti ko Siopé? ʻOku ʻikai ha taha ʻe hangē ko iá ʻi he māmaní. Ko ha tangata faitotonu mo anga-tonu ia,*+ pea manavahē ki he ʻOtuá mo fakamamaʻo mei he meʻa ʻoku koví.”
9 Naʻe tali ange ai ʻe Sētane kia Sihova: “ʻOku manavahē tuʻungaʻa pē koā ʻa Siope ki he ʻOtuá?+
10 ʻIkai kuó ke ʻaaʻi malu takai ia mo hono falé+ mo e meʻa kotoa pē kuó ne maʻú? Kuó ke tāpuakiʻi ʻa e ngāue ʻa hono nimá+ pea kuo mafola atu ʻene fanga monumanú ʻi he fonuá.
11 Ka ko eni, mafao atu muʻa ho nimá peá ke taaʻi ʻa e meʻa kotoa pē ʻokú ne maʻú, pea te ne laukovi moʻoni kiate koe ʻi ho fofongá tonu.”
12 Naʻe folofola ange leva ʻa Sihova kia Sētane: “Vakai! Ko e meʻa kotoa pē ʻokú ne maʻú ʻoku ʻi ho nimá ia.* Ko e meʻá pē ke ʻoua ʻe ala ho nimá kiate ia!” Ko ia naʻe hū ʻa Sētane ki tuʻa mei he ʻao* ʻo Sihová.+
13 Pea ʻi he ʻaho naʻe kai ai mo inu uaine ʻa hono ngaahi fohá mo hono ngaahi ʻofefiné ʻi he fale ʻo e foha lahi tahá,+
14 naʻe haʻu ha talafekau kia Siope ʻo ne pehē: “Naʻe fai ʻa e palau ʻa e fanga pulú pea naʻe kaikai ʻa e fanga ʻasí ʻi honau tafaʻakí
15 ʻi he taimi naʻe haʻu ai ʻa e kau Sepeaní ʻo ʻohofi pea ʻave kinautolú, pea naʻa nau tāmateʻi ʻa e kau sevānití ʻaki ʻa e heletā. Ko au toko taha pē naʻe hao mai ke tala atu ia kiate koé.”
16 Lolotonga ʻene kei leá, naʻe toe haʻu ha tokotaha ʻo ne pehē: “Naʻe tō hifo mei hēvani ha afi mei he ʻOtuá* ki he fanga sipí mo e kau sevānití ʻo ne keina kinautolu! Ko au toko taha pē naʻe hao mai ke tala atu ia kiate koé.”
17 Lolotonga ʻene kei leá, naʻe toe haʻu ha tokotaha ʻo ne pehē: “Naʻe haʻu ʻa e kau Kalitiá+ ʻi he kongakau ʻe tolu ʻo nau ʻohofi ʻa e fanga kāmelí ʻo ʻave kinautolu, pea nau tāmateʻi ʻa e kau sevānití ʻaki ʻa e heletā. Ko au toko taha pē naʻe hao mai ke tala atu ia kiate koé.”
18 Lolotonga ʻene kei leá, naʻe toe haʻu ha tokotaha ʻo ne pehē: “Naʻe fai ʻa e kai mo e inu uaine ʻa ho ngaahi fohá mo ho ngaahi ʻofefiné ʻi he fale ʻo e foha lahi tahá.
19 Fakafokifā naʻe haʻu ha fuʻu matangi mei he toafá, ʻo ne faʻaki ki he tuliki ʻe fā ʻo e falé, ko ia naʻe holo hifo ia ʻi hoʻo fānaú pea nau mate ai. Ko au toko taha pē naʻe hao mai ke tala atu ia kiate koé.”
20 Naʻe tuʻu hake ai ʻa Siope ʻo ne hae ʻa hono kofú pea kosi hono ʻulú; naʻá ne tō hifo leva ki he kelekelé ʻo ne punou
21 peá ne pehē:
“Naʻá ku haʻu telefua mei he manava ʻo ʻeku faʻeé,Pea te u foki telefua pē.+
Ko Sihova kuó ne foakí,+ pea ko Sihova kuó ne toʻó.
Tuku ke fakahīkihikiʻi ai pē ʻa e huafa ʻo Sihová.”
22 ʻI he kotoa ʻo e meʻá ni, naʻe ʻikai fai ʻe Siope ha angahala pe tukuakiʻi ʻa e ʻOtuá ki hono fai ha meʻa ʻoku hala.*
Fakamatala ‘i Lalo
^ Pe “tangata taʻemele mo faitotonu ia.”
^ Ngalingali ʻoku ʻuhingá ko e “Faiʻanga ʻo e Fakafili.”
^ Fakafoʻilea, “hoaʻi pulu ʻe 500.”
^ Fakafoʻilea, “fanga ʻasi fefine.”
^ Pe “ʻi he fale ʻo e tokotaha taki taha ʻi hono taimi ʻoʻoná.”
^ Ko ha ʻitiome faka-Hepelū ʻoku ʻuhinga ki he ngaahi foha ʻāngelo ʻo e ʻOtuá.
^ Fakafoʻilea, “tokanga ʻi ho lotó ki heʻeku.”
^ Pe “tangata taʻemele mo faitotonu ia.”
^ Pe “ʻi ho mafaí ia.”
^ Fakafoʻilea, “fofonga.”
^ Pe ngalingali, “ha fatulisi.”
^ Pe “tuku ha meʻa taʻetotonu ki he ʻOtuá.”
