Saame 71:1-24
71 Ko koe, ʻe Sihova, kuó u hūfanga ki aí.
ʻOfa ke ʻoua ʻaupito naʻa fakamaaʻi au.+
2 Ke ke fakamoʻui mo fakahaofi au ʻi hoʻo māʻoniʻoní.
Fokotuʻu telinga* mai muʻa pea fakahaofi au.+
3 Ke ke hoko ko ha fuʻu maka fakakolotau kiate auʻA ia ʻe lava maʻu pē ke u hū ki ai.
ʻOatu ha tuʻutuʻuni ke fakahaofi au,He ko koe ʻa hoku makatuʻu mo hoku toitoiʻangá.+
4 ʻE hoku ʻOtua, fakahaofi muʻa au mei he nima ʻo e tokotaha fulikivanú,+Mei hono puke ʻe he tokotaha fakafeʻātungia taʻefaitotonú.
5 He ko koe ʻa hoku ʻamanakiʻangá, ʻe ʻEiki Hau Sihova;Kuó u falala kiate koe* talu mei heʻeku kei talavoú.+
6 Kuó u fakafalala kiate koe talu mei hoku fanauʻí;Ko koe ia naʻá ke toʻo au mei he manava ʻo ʻeku faʻeé.+
ʻOku ou fakahīkihikiʻi maʻu ai pē koe.
7 Kuó u hoko ʻo hangē ko ha maná ki he tokolahi,Ka ko koe ʻa hoku hūfangaʻanga mālohí.
8 ʻOku fonu ʻa hoku ngutú ʻi ho fakahīkihikí;+ʻOku ou talanoa ʻi he ʻahó kotoa ʻo fekauʻaki mo ho ngeiá.
9 ʻOua naʻá ke liʻaki au ʻi heʻeku taʻumotuʻá;+ʻOua naʻá ke liʻekina au ʻi he holo ʻa hoku mālohí.+
10 ʻOku lea fakafepaki ʻa hoku ngaahi filí kiate au,Pea ko e faʻahinga ʻoku nau feinga ke toʻo ʻa ʻeku moʻuí ʻoku nau faʻufaʻufono fakataha,+
11 ʻO nau pehē: “Kuo liʻaki ia ʻe he ʻOtuá.
Tulimui kiate ia ʻo puke ia, he ʻoku ʻikai ha taha ke ne fakahaofi ia.”+
12 ʻE ʻOtua, ʻoua naʻá ke fakamamaʻo ai pē meiate au.
ʻE hoku ʻOtua, fakavave mai muʻa ʻo tokoniʻi au.+
13 ʻOfa ke hoko ʻa e faʻahinga ʻoku nau talitekeʻi aúʻO mā mo ʻauha.+
ʻOfa ke hoko ʻa e faʻahinga ʻoku feinga ke fakamamahiʻi aúʻO ʻufiʻufi ʻe he maá mo e matahoá.+
14 Ka ko e meʻa kiate aú, te u hokohoko tatali atu;Te u fakalahi ho fakahīkihikiʻí.
15 ʻE fakalau ʻe hoku ngutú ʻa hoʻo māʻoniʻoní,+ʻA hoʻo faifakamoʻuí ʻi he ʻahó kotoa,Neongo ʻoku fuʻu lahi ia kiate au ke u makupusi.*+
16 Te u ʻalu ʻo talanoa fekauʻaki mo hoʻo ngaahi fuʻu ngāué,ʻE ʻEiki Hau Sihova;Te u lave ki hoʻo māʻoniʻoní, ʻaʻaú pē toko taha.
17 ʻE ʻOtua, kuó ke akoʻi au talu mei heʻeku talavoú,+Pea ʻoku ou talaki ai pē ʻo aʻu mai ki he taimí ni ʻa hoʻo ngaahi ngāue fakaofó.+
18 Naʻa mo e taimi ʻo ʻeku motuʻa mo ʻulu hinaá, ʻe ʻOtua, ʻoua naʻá ke liʻaki au.+
Tuku ke u talanoa ki he toʻutangata hoko maí ʻo fekauʻaki mo ho mālohí*Pea fekauʻaki mo ho māfimafí ki he faʻahinga kotoa ka hoko maí.+
19 Ko hoʻo māʻoniʻoní, ʻe ʻOtua, ʻoku aʻu ki he taukakapá;+Kuó ke fai ʻa e ngaahi meʻa kāfakafa;ʻE ʻOtua, ko hai ia ʻoku tatau mo koé?+
20 Neongo kuó ke ʻai ke u hokosia ʻa e mamahi mo e faingataʻaʻia lahi,+Toe fakaake muʻa au;Ke ke ʻohake au mei he ngaahi loloto* ʻo e māmaní.+
21 ʻOfa ke ke fakalahi ʻa hoku ngeiáPea maluʻi mo fakafiemālieʻi au.
22 Pea te u fakahīkihikiʻi koe ʻaki ha meʻalea filoKoeʻuhi ko hoʻo faitōnungá, ʻe hoku ʻOtua.+
Te u hiva fakahīkihikiʻi koe* ʻaki ʻa e haʻapé,ʻA e Tokotaha Māʻoniʻoni ʻo ʻIsilelí.
23 ʻE kaila fiefia ʻa hoku loungutú ʻi heʻeku hiva fakahīkihiki kiate koé,+He kuó ke fakahaofi ʻa ʻeku moʻuí.*+
24 ʻE lea* ʻa hoku ʻeleló ʻo fekauʻaki mo hoʻo māʻoniʻoní ʻi he ʻahó kotoa,+He ko e faʻahinga ʻoku feinga ke fakaʻauha aú te nau mā mo ngalivale.+
Fakamatala ‘i Lalo
^ Pe “Punou hifo ʻo fanongo.”
^ Pe “Ko koe ʻa hoku falalaʻangá.”
^ Pe “lau.”
^ Fakafoʻilea, “nimá.”
^ Pe “vai loloto.”
^ Pe “tā fasi kiate koe.”
^ Pe “huhuʻi ʻa ʻeku moʻuí.”
^ Pe “fakalaulauloto.”
