Saame 69:1-36
Ki he pule hivá; fakatonutonu ki he “Ngaahi Lilé.” Saame ʻa Tēvita.
69 Fakahaofi muʻa au, ʻe ʻOtua, he ʻoku fakamanamana ʻa e ngaahi vaí ki heʻeku moʻuí.+
2 Kuó u ngoto hifo ʻi he pelepela lolotó, ʻa ia ʻoku ʻikai ke ʻi ai ha kelekele fefeka.+
Kuó u haʻu ki he ngaahi vai lolotó,Pea kuo tafiʻi au ʻe he vai ʻoku tafe mālohí.+
3 ʻOku ou ongosia ʻi he ui atú;+Kuo fā ʻa hoku leʻó.
Kuo vaivai ʻa ʻeku sió lolotonga ʻa ʻeku tatali ki hoku ʻOtuá.+
4 Ko e faʻahinga ʻoku nau fehiʻa taʻeʻuhinga+ mai kiate aúʻOku nau tokolahi ange ʻi hoku fulufuluʻiʻulú.
Ko e faʻahinga te nau tāmateʻi aú,ʻA hoku ngaahi fili anga-lavakí,* kuo nau hoko ʻo tokolahi.
Naʻe fakamālohiʻi au ke ʻoange ʻa e meʻa naʻe ʻikai te u kaihaʻasi.
5 ʻE ʻOtua, ʻokú ke ʻafioʻi ʻa ʻeku valé,Pea ʻoku ʻikai puli meiate koe ʻa ʻeku halaiá.
6 ʻOfa ke ʻoua naʻa fakamaaʻi ʻa e faʻahinga ʻoku nau ʻamanaki kiate koé koeʻuhí ko au,ʻE ʻEiki Hau, ʻe Sihova ʻo e ngaahi kau tau.
ʻOfa ke ʻoua naʻa fakahāeaʻi ʻa e faʻahinga ʻoku nau kumi kiate koé koeʻuhí ko au,ʻE ʻOtua ʻo ʻIsileli.
7 ʻOku ou tofanga ʻi he luma koeʻuhí ko koe;+ʻOku ou mātuʻaki mā.+
8 Kuó u hoko ko ha sola ki hoku fanga tokouá,Ko ha muli ki he fānau ʻa ʻeku faʻeé.+
9 Ko e mamahiʻi ʻo ho falé kuó ne keina au,+Pea ko e luma ʻa e faʻahinga ʻoku nau lumaʻi koé kuo tō mai ia kiate au.+
10 ʻI heʻeku fakavaivaiʻi au ʻaki ʻa e ʻaukaí,*Naʻe lumaʻi ai au.
11 ʻI heʻeku tui tauangaʻá,Naʻá ku hoko ai ko ha lumaʻanga* kiate kinautolu.
12 ʻOku talanoaʻi au ʻe he faʻahinga ʻoku nau tangutu ʻi he matapā ʻo e koló,Pea ʻoku hivaʻaki au ʻe he kau konaá.
13 Kae ʻofa ke aʻu atu ʻeku lotú kiate koe,ʻE Sihova, ʻi ha taimi fakahōifua.+
ʻI he lahi hoʻo ʻofa mateakí, ʻe ʻOtua,Ke ke fai mai ha tali kiate au ʻaki hoʻo faifakamoʻui moʻoní.+
14 Fakahaofi au mei he pelepelá;ʻOua naʻa tuku ke u ngoto hifo.
Fakahaofi au mei he faʻahinga ʻoku nau fehiʻa ʻiate aúPea mei he ngaahi vai lolotó.+
15 ʻOua naʻa tuku ʻa e lōmaki vai ʻoku vave ʻene tafé ke ne tafiʻi au,+Pe tuku ke folofua au ʻe he lolotó,Pe tuku ke tāpuni hifo ʻa e ngutu ʻo e luó* ʻiate au.+
16 Fai mai ha tali kiate au, ʻe Sihova, he ʻoku lelei ʻa hoʻo ʻofa mateakí.+
ʻO fakatatau ki he lahi hoʻo meesi kiate aú,+
17 Pea ʻoua naʻa fufū ho fofongá mei hoʻo sevānití.+
Fai mai muʻa ha tali vave kiate au, he ʻoku ou faingataʻaʻia.+
18 Ke ke hāʻele mai ke ofi ʻo fakahaofi au;Huhuʻi au telia ʻa hoku ngaahi filí.
19 ʻOkú ke ʻafioʻi ʻa hoku lumaʻí mo hoku fakamāʻí pea mo hoku fakahāeaʻí.+
ʻOkú ke vakai mai ki he kotoa ʻo hoku ngaahi filí.
20 Kuo fakalaveaʻi hoku lotó ʻe he lumá, pea ko e kafó ʻoku ʻikai ala faitoʻo.*
Naʻá ku ʻamanaki ki ha kaungāongoʻi, ka naʻe halaʻatā,+Pea ki ha kau fakafiemālie, ka naʻe ʻikai te u maʻu ha taha.+
21 Ka ko e meʻakai naʻa nau ʻomai kiate aú ko e meʻa kona,*+Pea ʻi heʻeku fieinuá naʻa nau ʻomi kiate au ʻa e uaine mahi ke u inu.+
22 Tuku ke hoko ʻenau tēpilé ko ha tauhele puna kiate kinautolu,Pea ko ʻenau tuʻumālié, ko ha tauhele.+
23 Tuku ke hoko honau matá ʻo fakapoʻuli ke ʻoua te nau lava ʻo sio,Pea ʻai ke tete maʻu pē ʻa honau alangá.
24 Huaʻi kiate kinautolu ʻa hoʻo houhaú,Pea ʻofa ke maʻu kinautolu ʻe hoʻo houhau kakahá.+
25 Tuku ke maomaonganoa ʻa honau ʻapitangá;*Tuku ke ʻoua ʻe nofo ha taha ʻi honau ngaahi tēnití.+
26 He ʻoku nau tuli ki he tokotaha naʻá ke tāʻí,Pea ʻoku nau hanganaki fakalau ʻa e ngaahi mamahi ʻa e faʻahinga naʻá ke fakalaveaʻí.
27 Tuku ke hoko mai kiate kinautolu ʻa e tautea kakato ki heʻenau halaiá,Pea ʻofa ke ʻoua naʻa nau maʻu ʻinasi ʻi hoʻo māʻoniʻoní.
28 Tuku ke tāmateʻi kinautolu mei he tohi ʻo e kau moʻuí,*+Pea ʻofa ke ʻoua naʻa fakakau kinautolu ʻi he haʻohaʻonga ʻo e māʻoniʻoní.+
29 Ka ko aú ʻoku ou faingataʻaʻia mo mamahi.+
ʻOfa ke maluʻi au ʻe ho mālohi faifakahaofí, ʻe ʻOtua.
30 Te u hiva fakahīkihiki ki he huafa ʻo e ʻOtuá,Pea te u fakavīkivikiʻi ia ʻaki ʻa e fakafetaʻi.
31 ʻE fakahōifuaʻi ʻe he meʻá ni ʻa Sihova ʻo laka ange ia ʻi ha pulu tangata,ʻO laka ange ia ʻi ha kiʻi pulu tangata ʻoku meʻatui mo topuvaʻe.+
32 ʻE sio ki ai ʻa e anga-vaivaí peá ne fiefia.
Ko kimoutolu ʻoku kumi ki he ʻOtuá, ʻofa ke fakaivimālohiʻi homou lotó.
33 He ʻoku fanongo ʻa Sihova ki he masivá,+Pea ʻe ʻikai te ne taʻetokaʻi ʻa ʻene kakai pōpulá.+
34 Tuku ke fakahīkihikiʻi ia ʻe he langí mo e māmaní,+ʻA e tahí mo e meʻa kotoa ʻoku ngaue ʻi aí.
35 He ko e ʻOtuá te ne fakahaofi ʻa Saione+Pea te ne toe langa ʻa e ngaahi kolo ʻo Siutá,Pea te nau nofo ai pea maʻu ia.*
36 Ko e hako ʻo ʻene kau sevānití te nau maʻu ia,+Pea ko e faʻahinga ʻoku ʻofa ki hono huafá+ te nau nofo ai.
Fakamatala ‘i Lalo
^ Pe “ngaahi fili taʻeʻuhingá.”
^ Pe ngalingali, “ʻI heʻeku tangi mo ʻaukaí.”
^ Fakafoʻilea, “ko ha palōveepi.”
^ ʻOku hā ngali ko e ʻuhinga eni ki he faʻitoká.
^ Pe “pea ʻoku ou aʻu ki he tuʻunga ko e ʻamanaki-tōnoa.”
^ Pe “ko ha ʻakau kona.”
^ Pe “ʻapitanga ʻāʻí.”
^ Pe “tohi ʻo e moʻuí.”
^ ʻA ia, ko e fonuá.
