Saame 144:1-15
Saame ʻa Tēvita.
144 ʻOfa ke fakahīkihikiʻi ʻa Sihova, ko hoku Makatuʻú,+ʻA ia ʻokú ne akoʻi ʻa hoku nimá ki he fepakí,ʻA hoku louhiʻinimá ki he taú.+
2 Ko ia ʻokú ne fakahaaʻi mai ʻa e ʻofa mateakí pea ko hoku maluʻangá ia,Ko hoku hūfangaʻanga malu* mo hoku faifakahaofi,Ko ʻeku pā pea ko e Tokotaha ʻa ia ʻoku ou fakaū ki aí,+Ko e Tokotaha ʻokú ne fakamoʻulaloaʻi ʻa e ngaahi kakaí ʻi hoku malumalú.+
3 ʻE Sihova, ko e hā ʻa e tangatá ke ke fakatokangaʻi ai ia,ʻA e foha ʻo e tangata ko e meʻa noa peé ke ke tokanga ai kiate ia?+
4 ʻOku hangē ʻa e tangatá ko ha koto mānava pē;+Ko hono ngaahi ʻahó ʻoku hangē ko ha ʻata+ ʻoku fakaʻaʻau ke molé.
5 ʻE Sihova, tuku* hifo ʻa e langí peá ke hāʻele mai;+Ala atu ki he ngaahi moʻungá pea ʻai ke nau kohu.+
6 ʻAi ke tapa ʻa e ʻuhilá pea fakamovete ʻa e filí;+Fanaʻi hoʻo ngaahi ngahaú pea ʻai kinautolu ke nau puputuʻu.+
7 Mafao hifo ho nimá mei ʻolunga;Fakahaofi au pea fakamoʻui au mei he ngaahi vai ʻoku āké,Mei he nima ʻo e* kau mulí,+
8 ʻA ia ʻoku leaʻaki ʻe honau ngutú ʻa e loíPea ʻoku nau hiki honau nima toʻomataʻú ke fai ha fakapapau ki he loí.*
9 ʻE ʻOtua, te u hiva kiate koe ha hiva foʻou.+
Te u hiva fakahīkihiki* kiate koe, fakataha mo ha meʻalea filo hongofulu,
10 Ki he Tokotaha ʻokú ne ʻoange ʻa e ikuna* ki he ngaahi tuʻí,+ʻA e Tokotaha ʻokú ne fakahaofi ʻa ʻene sevāniti ko Tēvitá mei he heletā fakatupu maté.+
11 Fakahaofi au pea fakamoʻui au mei he nima ʻo e kau mulí,ʻA ia ʻoku leaʻaki ʻe honau ngutú ʻa e loíPea ʻoku nau hiki ʻa honau nima toʻomataʻú ke fai ha fakapapau ki he loí.
12 Pea ʻe hangē homau ngaahi fohá ko ha fanga kiʻi ʻakau ʻoku tupu vave haké,Ko homau ngaahi ʻofefiné ʻe hangē ha ngaahi pou tuliki kuo tongi ki ha palasí.
13 Ko homau ngaahi feleokó ʻe fonu mahuohua ʻi he fua kehekehe;Ko ʻemau ngaahi tākanga ʻi heʻemau ngaahi ngoué ʻe tokolahi ʻo laui afe, mo laui mano.
14 Ko ʻemau fanga pulú, ʻi heʻenau feitamá, ʻe ʻikai te nau tō ki ha fakatamaki pe tamatō;ʻE ʻikai ke ʻi ai ha tangi mamahi ʻi homau ngaahi malaʻe fakakoló.*
15 Fiefia ē ko e kakai ʻa ia ʻoku hoko ki ai ʻa e meʻá ni!
Fiefia ē ko e kakai ʻa ia ko honau ʻOtuá ʻa Sihová!+
Fakamatala ‘i Lalo
^ Pe “feituʻu malu māʻolunga.”
^ Pe “ofeʻi.”
^ Pe “Mei hono puke ʻe he.”
^ Fakafoʻilea, “Pea ko honau nima toʻomataʻú ko ha nima toʻomataʻu ʻo e loí.”
^ Pe “tā fasi.”
^ Pe “fakamoʻui.”
^ ʻA ia, ko ha feituʻu faiʻanga meʻa tefito ia ʻo e koló ki he kakaí.
