Saame 106:1-48
-
ʻIkai ke mahinoʻi ʻe ʻIsileli
106 Mou fakahīkihikiʻi ʻa Iā!*
Fakamālō kia Sihova, he ʻoku lelei ia;+Ko ʻene ʻofa mateakí ʻoku tolonga ʻo taʻengata.+
2 Ko hai ʻe lava ke ne talaki kakato ʻa e fuʻu ngāue ʻa SihováPe fanongonongo ʻa ʻene ngaahi ngāue kotoa ʻoku taau ke fakahīkihikí?+
3 Fiefia ē ko e faʻahinga ʻoku nau ngāueʻaki ʻa e fakamaau totonú,ʻA ia ʻoku nau fai maʻu pē ʻa e meʻa ʻoku totonú.+
4 Ke ke manatua muʻa au, ʻe Sihova, ʻi hoʻo fakahāhā ʻa e hōifua ki ho kakaí.+
Tokangaʻi au ʻaki hoʻo ngaahi faifakamoʻuí,
5 Koeʻuhí ke u fiefia ai ʻi he lelei ʻokú ke fakahāhā ki hoʻo faʻahinga kuo filí,+Ke u fiefia fakataha ai mo ho kakaí,Ke u laukau* ai ʻi hono fakahīkihikiʻi koe fakataha mo ho tofiʻá.
6 Kuo mau faiangahala ʻo hangē tofu pē ko ia naʻe fai ʻe heʻemau fanga kuí;+Kuo mau faihala; kuo mau fai ʻa e tōʻonga fulikivanu.+
7 Ko ʻemau fanga kuí ʻi ʻIsipite naʻe ʻikai te nau mahinoʻi* hoʻo ngaahi ngāue fakaofó.
Naʻe ʻikai te nau manatu ki he lahi fau ʻa hoʻo ʻofa mateakí,Ka naʻa nau angatuʻu ʻi he tahí, ʻi he veʻe Tahi Kulokulá.+
8 Ka naʻá ne fakahaofi kinautolu koeʻuhí ko hono huafá,+Ke ʻai ai ke ʻiloa ʻa hono mālohí.+
9 Naʻá ne lea mālohi ki he* Tahi Kulokulá, pea naʻe mōmoa;Naʻá ne taki atu kinautolu ʻi hono lolotó ʻo hangē ko haʻane taki atu ʻi ha toafá;*+
10 Naʻá ne fakahaofi kinautolu mei he nima ʻo honau filí+Pea toe maʻu mai kinautolu mei he nima ʻo e filí.+
11 Naʻe ʻufiʻufi ʻe he ngaahi vaí ʻa honau ngaahi filí;Naʻe ʻikai ha taha ʻo kinautolu ʻe hao.*+
12 Naʻa nau tui leva ai ki heʻene talaʻofá;+Naʻe kamata ke nau hivaʻi ʻa hono fakahīkihikí.+
13 Ka naʻe vave ʻenau fakangaloʻi ʻa e meʻa naʻá ne faí;+Naʻe ʻikai te nau tatali ki heʻene akonakí.
14 Naʻa nau fai ki heʻenau ngaahi holi siokita ʻi he toafá;+Naʻa nau ʻahiʻahiʻi ʻa e ʻOtuá ʻi he potu lalá.+
15 Naʻá ne ʻoange kiate kinautolu ʻa e meʻa naʻa nau kolé,Ka naʻá ne toe taaʻi kinautolu ʻaki ha mahaki ʻa ia naʻá ne ʻai ke nau fakaʻauʻausino.+
16 ʻI he ʻapitangá naʻe kamata ke nau meheka ai kia Mōsese,Pea mo ʻĒlone,+ ʻa e tokotaha māʻoniʻoni ʻa Sihová.+
17 Naʻe fakamanga hake leva ʻa e kelekelé ʻo folo ʻa TētaniPea ʻufiʻufi ʻa e faʻahinga naʻe fakatahataha mo ʻApilamí.+
18 Naʻe puho mai ha afi ki he lotolotonga ʻo e kulupu ʻanautolú;Naʻe keina ʻe ha uloʻi afi ʻa e kau fulikivanú.+
19 Naʻa nau ngaohi ha ʻuhikiʻi pulu ʻi HōlepiPea punou ki ha ʻīmisi mētale;*+
20 Naʻa nau fakafetongi ʻa hoku lāngilangíKe fakafofongaʻi ʻe ha pulu kai musie.+
21 Naʻe ngalo ʻiate kinautolu ʻa e ʻOtua+ ko honau Fakamoʻuí,ʻA ia naʻá ne fai ʻa e ngaahi meʻa fakaofo ʻi ʻIsipité,+
22 ʻA e ngaahi ngāue fakaofo ʻi he fonua ʻo Hamí,+ʻA e ngaahi ngāue fakamanavahē ʻi he Tahi Kulokulá.+
23 Naʻe teu ke ne ʻoatu ʻa e tuʻutuʻuni ki honau fakaʻauha ʻosí,Ka ko Mōsese ʻa e tokotaha kuó ne filí naʻá ne kōlenga kiate ia*Ke taʻofi ʻa ʻene houhau fakaefakaʻauhá.+
24 Pea naʻa nau taʻetokaʻi ʻa e fonua matamataleleí;+Naʻe ʻikai te nau tui ki heʻene talaʻofá.+
25 Naʻa nau ngulungulu ai pē ʻi honau ngaahi tēnití;+Naʻe ʻikai te nau fanongo ki he leʻo ʻo Sihová.+
26 Ko ia naʻá ne hiki hake hono nimá ʻi ha fuakava fekauʻaki mo kinautoluTe ne ʻai kinautolu ke nau tō ʻi he toafá;+
27 Te ne ʻai honau hakó ke nau tō ʻi he lotolotonga ʻo e ngaahi puleʻangá,Pea te ne fakamovetevete kinautolu ʻi he ngaahi fonuá kotoa.+
28 Pea naʻa nau kau ʻi he lotu* kia Pēali ʻo Peolí,+Pea nau kai ʻa e ngaahi feilaulau naʻe fai ki he kau maté.*
29 Naʻa nau fakahouhauʻi Ia ʻaki ʻenau ngaahi tōʻongá,+Pea naʻe hoko ha mala ʻi honau lotolotongá.+
30 Ka ʻi he tuʻu hake ʻa Fineasi ʻo fai ha meʻa ki aí,Naʻe tuʻu ʻa e malá.+
31 Pea naʻe lau ai ia ʻokú ne māʻoniʻoniʻI he kotoa ʻo e ngaahi toʻutangatá ʻo taʻengata.+
32 Naʻa nau fakahouhauʻi Ia ʻi he vai ʻo Mēlipá,*Pea naʻe hoko ai ha kovi kia Mōsese koeʻuhí ko kinautolu.+
33 Naʻa nau fakaʻitaʻi hono laumālié,Pea naʻá ne lea taʻefakakaukau ʻaki hono loungutú.+
34 Naʻe ʻikai te nau fakaʻauha ʻosi ʻa e ngaahi kakaí,+ʻO hangē ko ia naʻe tuʻutuʻuni ʻe Sihova kiate kinautolú.+
35 Ka naʻa nau feohi mo e ngaahi puleʻangá+Pea ohi* ʻa ʻenau ngaahi foungá.+
36 Naʻa nau hanganaki tauhi ʻenau ngaahi ʻaitolí,+Pea naʻe hoko ʻa e ngaahi meʻá ni ko ha tauhele kiate kinautolu.+
37 Naʻa nau feilaulauʻaki honau ngaahi foháPea mo honau ngaahi ʻofefiné ki he fanga tēmenioó.+
38 Naʻa nau hanganaki lilingi ʻa e toto taʻehalaiá,+ʻA e toto ʻo honau ngaahi fohá mo honau ngaahi ʻofefinéʻA ia naʻa nau feilaulauʻaki ki he ngaahi ʻaitoli ʻo Kēnaní;+Pea naʻe ʻuliʻi ʻa e fonuá ʻi he lingitotó.
39 Naʻa nau hoko ʻo taʻemaʻa ʻi heʻenau ngaahi ngāué;Naʻa nau fakahoko ʻa e feʻauaki fakalaumālie ʻi heʻenau ngaahi ngāué.+
40 Ko ia naʻe kakaha ai ʻa e houhau ʻa Sihová ki hono kakaí,Pea naʻá ne hoko ʻo fakaliliʻa ʻi hono tofiʻá.
41 Naʻá ne toutou tuku atu kinautolu ki he ngaahi puleʻangá,+Koeʻuhí ke puleʻi kinautolu ʻe he faʻahinga naʻe fehiʻa kiate kinautolú.+
42 Naʻe lōmekina kinautolu ʻe honau ngaahi filí,Pea naʻa nau moʻulaloa ki honau mafaí.*
43 Naʻe tuʻo lahi ʻene fakahaofi kinautolú,+Ka naʻa nau angatuʻu mo talangataʻa,+Pea naʻe fakamāʻulaloʻi kinautolu koeʻuhi ko ʻenau faihalá.+
44 Ka naʻá ne vakai ki heʻenau mamahí+Pea fanongo ki heʻenau tangi ki ha tokoní.+
45 Naʻá ne manatu ki heʻene fuakavá koeʻuhi ko kinautolu,Pea naʻá ne ongoʻi fakaʻofaʻia,* ʻi hono ueʻi ʻe he lahi* ʻo ʻene ʻofa mateakí.+
46 Naʻá ne ʻai ke fakaʻofaʻia ʻiate kinautoluʻA e faʻahinga kotoa naʻa nau puke pōpula kinautolú.+
47 Fakahaofi kimautolu, ʻe Sihova ko homau ʻOtua,+Pea fakatahatahaʻi kimautolu mei he ngaahi puleʻangá+Koeʻuhi ke mau ʻoatu ʻa e fakamālō ki ho huafa māʻoniʻoníPea hākahaka ʻi hono fakahīkihikiʻi koé.*+
48 Fakatauange ke fakahīkihikiʻi ʻa Sihova ko e ʻOtua ʻo ʻIsilelí,ʻI he kotoa ʻo ʻitānití.*+
Pea tuku ke pehē ʻe he kakai kotoa pē, “ʻĒmeni!”*
Mou fakahīkihikiʻi ʻa Iā!*
Fakamatala ‘i Lalo
^ Pe “Haleluia!” Ko e “Iā” ko ha faʻunga fakanounou ia ʻo e huafa Sihová.
^ Pe “pōlepole.”
^ Pe “maʻu ʻa e ʻuhinga ʻo.”
^ Fakafoʻilea, “valokiʻi ʻa e.”
^ Pe “potu lalá.”
^ Pe “toe.”
^ Pe “ʻīmisi mētale kuo haka.”
^ Fakafoʻilea, “tuʻu ʻi he foʻi ʻatā ʻi hono ʻaó.”
^ Pe “fakafepikitaki kinautolu.”
^ ʻA ia, ko e ngaahi feilaulau naʻe fai ki he kakai maté pe ki he ngaahi ʻotua ʻikai moʻuí.
^ ʻOku ʻuhingá ko e “Fakakē.”
^ Pe “ako.”
^ Fakafoʻilea, “nimá.”
^ Pe “ongoʻi fakaʻiseʻisa.”
^ Pe “hulu fau.”
^ Pe “hākahaka ʻi ho fakahīkihikiʻí.”
^ Pe “Mei ʻitāniti ki ʻitāniti.”
^ Pe “Ke hoko ʻo pehē!”
^ Pe “Haleluia!” Ko e “Iā” ko ha faʻunga fakanounou ia ʻo e huafa Sihová.
