Ngāue ʻa e Kau ʻApositolo 3:1-26
3 Pea naʻe ʻalu hake ʻa Pita mo Sione ki he temipalé ki he houa lotú, ʻa e houa hono hivá,*
2 pea naʻe fata mai ha tangata ʻa ia naʻe heke talu mei hono fanauʻí. ʻI he ʻaho kotoa pē naʻa nau tuku ia ʻo ofi ki he matapā ʻo e temipalé naʻe ui ko Masani, koeʻuhi ke ne kole ki ha ngaahi foaki ʻofa mei he faʻahinga ko ia ʻoku hū ki he temipalé.
3 ʻI heʻene fakatokangaʻi atu ʻa Pita mo Sione ʻoku teu ke na hū ki he temipalé, naʻá ne kamata kole atu ki ha ngaahi foaki ʻofa.
4 Ka ko Pita, fakataha mo Sione, naʻá na sio hangatonu atu kiate ia mo pehē: “Sio mai kiate kimaua.”
5 Ko ia naʻá ne tuku taha ʻene tokangá kiate kinaua, ʻo ʻamanekina te ne maʻu ha meʻa meiate kinaua.
6 Kae kehe, naʻe pehē ʻe Pita: “Ko e silivá mo e koulá ʻoku ʻikai te u maʻu, ka ko e meʻa ʻoku ou maʻú ko e meʻa ia te u foaki atu kiate koé. ʻI he huafa ʻo Sīsū Kalaisi ko e Nāsaletí, tuʻu hake ʻo luelue!”+
7 Ko ia naʻe ala atu ʻa Pita ki hono nima toʻomataʻú ʻo ne fokotuʻu hake ia.+ Tuai-e-kemo naʻe mālohi hono ongo vaʻé mo hono ongo tungaʻivaʻé;+
8 pea ʻi heʻene puna hake ʻo tuʻu ʻaki hono vaʻé,+ naʻá ne kamata luelue peá ne hū fakataha mo kinaua ki he temipalé, ʻo ne luelue mo hopohopo pea mo fakahīkihikiʻi ʻa e ʻOtuá.
9 Pea ko e kotoa ʻo e kakaí naʻa nau sio kiate ia ʻokú ne luelue mo fakahīkihikiʻi ʻa e ʻOtuá.
10 Pea naʻe kamata ke nau ʻiloʻi atu ia, ko e tangata eni naʻe faʻa tangutu ʻi he Matapā Masani ʻo e temipalé+ ʻo tatali ke maʻu mai ha ngaahi foaki ʻofá, pea naʻa nau mātuʻaki ofoofo mo fakatumutumu ʻi he meʻa kuo hoko kiate iá.
11 Lolotonga ʻa e kei piki ʻa e tangatá kia Pita mo Sioné, naʻe lele fakataha mai ʻa e kakaí kotoa kiate kinautolu ʻi he feituʻu naʻe ui ko e Hala Fakafale ʻo Solomoné,+ ʻoku nau mātuʻaki ʻohovale.
12 ʻI he sio ʻa Pita ki he meʻá ni, naʻá ne pehē ki he kakaí: “ʻA e kau tangata ʻo ʻIsileli, ko e hā ʻoku mou fuʻu ofoofo ai ʻi he meʻá ni, pea ko e hā ʻoku mou sio fakamamaʻu mai ai kiate kimaua ʻo hangē ia ko ha mālohi pē ʻo kimaua pe ko haʻama anga-līʻoa fakaʻotua kuó ma ʻai ai ia ke ne luelué?
13 Ko e ʻOtua ʻo ʻĒpalahame mo ʻAisake mo Sēkopé,+ ʻa e ʻOtua ʻo ʻetau fanga kuí, kuó ne fakalāngilangiʻi ʻene Sevānití,+ ʻa Sīsū,+ ʻa ia naʻa mou tuku atu+ mo siʻaki atu ʻi he ʻao ʻo Pailató, neongo naʻe fili ʻa Pailato ke tuku ange ia.
14 ʻIo, naʻa mou siʻaki ʻa e tokotaha tapu mo māʻoniʻoni ko iá, pea naʻa mou kole ke tuku mai kiate kimoutolu ha tangata ʻa ia ko ha tokotaha fakapō,+
15 ka mou tāmateʻi ʻe kimoutolu ʻa e Fakafofonga Tefito ʻo e moʻuí.+ Ka naʻe fokotuʻu hake ia ʻe he ʻOtuá mei he maté, ʻa ia ko hono moʻoní ko e ongo fakamoʻoni kimaua ki he meʻa ko iá.+
16 Pea fakafou ʻi hono huafá, pea ʻi heʻema tui ki hono huafá, kuo ʻai ai ʻa e tangatá ni ʻo mālohi ʻa ia ʻoku mou sio mai ki ai mo ʻiloʻí. Ko e tui ʻoku fakafou ʻiate iá kuó ne ʻai ʻa e tangatá ni ke moʻui lelei fakaʻaufuli ʻi he ʻao ʻo kimoutolú kotoa.
17 Pea ko eni, fanga tokoua, ʻoku ou ʻilo naʻa mou fai ia ʻi he taʻeʻilo,+ ʻo hangē tofu pē ko ia naʻe fai ʻe homou kau pulé.+
18 Ka ʻi he foungá ni kuo fakahoko ai ʻe he ʻOtuá ʻa e ngaahi meʻa naʻá ne talaki ki muʻa fakafou ʻi he ngutu ʻo e kau palōfitá kotoa, ʻo pehē ʻe faingataʻaʻia ʻa ʻene Kalaisí.+
19 “Ko ia ai, mou fakatomala+ pea tafoki+ koeʻuhi ke tāmateʻi hoʻomou ngaahi angahalá,+ koeʻuhi kae hoko mai ʻa e ngaahi taimi ʻo e fakaivifoʻoú meia Sihova tonu*
20 pea ke ne fekau mai ʻa e Kalaisi kuo fakanofo maʻamoutolú, ʻa Sīsū.
21 Kuo pau ke kei nofo ai pē ʻa e tokotahá ni ʻi hēvani kae ʻoua ke aʻu ki he ngaahi taimi ʻo e toe fakafoki ʻo e ngaahi meʻa kotoa pē ʻa ia naʻe folofolaʻaki ʻe he ʻOtuá fakafou ʻi he ngutu ʻo ʻene kau palōfita māʻoniʻoni ʻo e kuonga muʻá.
22 Ko hono moʻoní, naʻe pehē ʻe Mōsese: ‘Ko Sihova* ko homou ʻOtuá te ne fokotuʻu maʻamoutolu mei he lotolotonga homou fanga tokouá ha palōfita hangē ko aú.+ Kuo pau ke mou fanongo ki ha meʻa pē te ne tala atu kiate kimoutolu.+
23 Ko e moʻoni, ko ha taha pē ʻoku ʻikai te ne fanongo ki he Palōfita ko iá ʻe fakaʻauha fakaʻaufuli ia mei he lotolotonga ʻo e kakaí.’+
24 Pea ko e kau palōfitá kotoa meia Sāmiuela pea mo e faʻahinga naʻe hoko atu aí, ʻa e faʻahinga ko ia naʻe kikité, kuo nau fakamatala mahino foki ki he ngaahi ʻaho ko ení.+
25 Ko kimoutolú ko e ngaahi foha ʻo e kau palōfitá pea ko e ngaahi foha ʻo e fuakava ʻa ia naʻe fai ʻe he ʻOtuá mo hoʻomou fanga kuí,+ ʻi heʻene pehē kia ʻĒpalahame: ‘Pea fakafou ʻi ho hakó ʻe faitāpuekina ai ʻa e ngaahi fāmili kotoa pē ʻo e māmaní.’+
26 Ko e ʻOtuá, ʻi he hili ʻene fokotuʻu hake ʻene Sevānití, naʻá ne ʻuluaki fekau atu ia+ kiate kimoutolu ke tāpuakiʻi kimoutolu ʻaki hono tokoniʻi ʻa e tokotaha taki taha ke tafoki mei heʻene ngaahi ngāue koví.”
Fakamatala ‘i Lalo
^ ʻA ia, ko e 3 efiafi nai.
^ Fakafoʻilea, “mei he fofonga ʻo Sihová.” Sio ki he Fakamatala Fakalahi A5.
^ Sio ki he Fakamatala Fakalahi A5.
