Ngāue ʻa e Kau ʻApositolo 17:1-34
17 Naʻa nau fāifononga leva ʻo fou atu ʻi ʻAmifipoli mo ʻApolonia ʻo nau aʻu ai ki Tesalonaika,+ ʻa ia naʻe ʻi ai ha sinakoke ʻo e kau Siú.
2 Ko ia fakatatau ki he meʻa naʻe angaʻaki ʻe Paulá+ naʻá ne hū atu kiate kinautolu, pea ʻi he Sāpate ʻe tolu naʻá ne fakaʻuhinga ai mo kinautolu mei he Folofolá,+
3 ʻo fakamatala mo fakamoʻoniʻi ʻaki ʻa e ngaahi maʻuʻanga fakamatala ʻo pehē naʻe pau ke faingataʻaʻia ʻa e Kalaisí+ pea mo fokotuʻu hake mei he maté,+ ʻo ne pehē: “Ko e Kalaisí ʻeni, ʻa e Sīsū ko ʻeni ʻa ia ʻoku ou talaki atu kiate kimoutolú.”
4 Ko hono olá, naʻe hoko ai ʻa e niʻihi ʻo kinautolu ko e kau tui pea nau kau kia Paula mo Sailosi,+ pea pehē ki ha fuʻu kakai tokolahi ʻo e kau Kalisí ʻa ia naʻa nau lotu ki he ʻOtuá, fakataha mo e kakai fefine tuʻu-ki-muʻa tokotokolahi.
5 Ka ko e kau Siú, ʻi heʻenau meheká,+ naʻa nau fakatahatahaʻi mai ha kau tangata fulikivanu ʻa ia naʻa nau nofo noaʻia holo ʻi he feituʻu faiʻanga fakataú ʻo nau maʻu ai ha fuʻu kakai pea nau hoko atu leva ʻo fakatupu ha fuʻu moveuveu ʻi he koló. Naʻa nau ʻohofi ʻa e ʻapi ʻo Sēsoní ʻo nau kumi ʻa Paula mo Sailosi ke ʻomi ki tuʻa ki he fuʻu kakaí.
6 ʻI he ʻikai ke nau maʻu kinauá, naʻa nau fusi atu ʻa Sēsoni mo ha fanga tokoua ʻe niʻihi ki he kau pule ʻo e koló, ʻo nau kaila atu: “Ko e ongo tangata ko eni ʻa ia kuó na fulihi ʻa e* māmani kuo nofoʻí ʻokú na ʻi heni foki,+
7 pea kuo talitali kinaua ʻe Sēsoni ko ʻene ongo ʻaʻahi. Ko e kau tangatá ni kotoa ʻoku nau fakafepaki ki he ngaahi tuʻutuʻuni ʻa Sisá, ʻo nau pehē ʻoku toe ʻi ai ha tuʻi ia ʻe taha, ko Sīsū.”+
8 ʻI heʻenau fanongo ki he ngaahi meʻá ni, naʻe tuʻuteki ai ʻa e fuʻu kakaí pea mo e kau pule ʻo e koló;
9 pea ʻi he hili ʻenau maʻu ha totongi maluʻi feʻungamālie meia Sēsoni pea mo e niʻihi ko ē, naʻa nau tuku ange leva kinautolu.
10 ʻI heʻene poʻulí leva naʻe tuku atu ʻe he fanga tokouá ʻa Paula mo Sailosi fakatouʻosi ke na ō ki Pēlea. ʻI heʻena aʻu atú, naʻá na hū ki he sinakoke ʻo e kau Siú.
11 Pea ko e faʻahinga ʻi he feituʻú ni naʻa nau anga-fakaʻeiʻeiki ange kinautolu ʻi he faʻahinga ko ia ʻi Tesalonaiká, he naʻa nau tali mātuʻaki loto-vēkeveke ʻa e folofola ʻa e ʻOtuá, ʻo nau vakaiʻi fakalelei fakaʻaho ʻa e Folofolá pe naʻe moʻoni koā ʻa e ngaahi meʻa naʻa nau fanongo aí.
12 Ko ia ai, naʻe hoko ai ʻa e tokolahi ʻo kinautolu ko e kau tui, pea pehē foki ki ha kau fefine tokotokolahi ʻa ia naʻe tokaʻi pea pehē ki he kau tangata Kalisi ʻe niʻihi.
13 Ka ʻi he ʻiloʻi ʻe he kau Siu mei Tesalonaiká naʻe toe talaki ʻe Paula ʻa e folofola ʻa e ʻOtuá ʻi Pēleá, naʻa nau omi ki ai ke fakaʻaiʻai mo fakatupunga ke ʻita ʻa e fuʻu kakaí.+
14 Pea naʻe tuku atu leva ʻe he fanga tokouá ʻa Paula ke ne ʻalu ki tahi,+ kae nofo pē ai ʻa Sailosi mo Tīmote.
15 Kae kehe, ko e faʻahinga ko ia naʻa nau ō mo Paulá naʻa nau ō mo ia ʻo aʻu ki ʻAtenisi, pea naʻa nau mavahe ʻi he hili ʻenau maʻu ha fakahinohino ke haʻu ʻa Sailosi mo Tīmote+ kia Paula ʻi he vave taha ʻe ala lavá.
16 ʻI he lolotonga ko ʻeni ʻa e talitali ʻa Paula kiate kinaua ʻi ʻAtenisí, naʻá ne hoko ʻo ʻita* ʻi he sio atu ki he koló ʻoku fonu ʻi he ngaahi ʻaitolí.
17 Ko ia naʻe kamata ke ne fakaʻuhinga ʻi he sinakoké mo e kau Siú mo e kakai kehe naʻa nau lotu ki he ʻOtuá, pea ʻi he ʻaho kotoa ʻi he feituʻu faiʻanga fakataú mo e faʻahinga naʻe ʻi ai ʻi he taimi ko iá.
18 Ka ko e niʻihi ʻo e kau filōsefa ʻEpikulioó mo e Sitoikó naʻe kamata ke nau fakakikihi mo ia, pea naʻe pehē ai ʻe he niʻihi: “Ko e hā ʻa e meʻa ʻoku fie tala mai ʻe he siana valelau noaʻiá ni?” Pea pehē ʻe he niʻihi: “ʻOku ngalingali pē ko ha tokotaha talaki ia ʻo e ngaahi ʻotua kehé.” He ko hono ʻuhingá naʻá ne talaki ʻa e ongoongo lelei fekauʻaki mo Sīsū pea mo e toetuʻú.+
19 Ko ia naʻa nau puke ia ʻo taki atu ki he ʻAleopeikó,* ʻo nau pehē: “ʻE lava nai ke mau ʻilo pe ko e hā ʻa e akonaki foʻou ko ʻeni ʻa ia ʻokú ke lea ʻo kau ki aí?
20 He ʻokú ke ʻomai ha ngaahi meʻa ʻoku faikehe ia ki homau telingá, pea ʻoku mau loto ke ʻiloʻi ʻa e ʻuhinga ʻo e ngaahi meʻá ni.”
21 Ko hono moʻoní, ko e kotoa ʻo e kau ʻAtenisi mo e kau muli naʻa nau nofo aí* naʻa nau faʻa fakamoleki honau taimi ʻataá ʻo ʻikai ki ha toe meʻa ka ko e fakamatala pē pe fanongo ki ha meʻa foʻou.
22 Naʻe tuʻu leva ʻa Paula ʻi he lotolotonga ʻo e ʻAleopeikó+ ʻo ne pehē:
“Kau tangata ʻo ʻAtenisi, ʻoku ou sio ʻoku ha ngali ʻoku mou anga-fakalotu ʻaupito ʻi he meʻa kotoa pē. ʻI hono fakahoa ki he kakai kehé, ʻoku mou manavahē ange kimoutolu ki he ngaahi ʻotuá.+
23 Hangē ko ʻení, lolotonga ʻeku lue mai peá u siofi fakalelei ʻa e ngaahi meʻa ʻoku mou fakalāngilangiʻí,* naʻá ku fakatokangaʻi foki ai ha ʻōlita ʻa ia kuo tongi ai ‘Ki ha ʻOtua Taʻeʻiloa.’ Ko ia ai, ko e meʻa ko ia ʻoku mou lotu taʻeʻilo ki aí, ko eni ia ʻoku ou talaki atu kiate kimoutolú.
24 Ko e ʻOtua ko ia naʻá ne ngaohi ʻa e māmaní mo e ngaahi meʻa kotoa ʻi aí, ʻi hono tuʻunga ko ia ko e ʻEiki ʻo langi mo māmaní,+ ʻoku ʻikai ke ne ʻafio ʻi ha ngaahi temipale kuo ngaohi ʻe he nimá;+
25 pea ʻoku ʻikai ke tokangaʻi ia ʻe he nima ʻo e tangatá ʻo hangē ia ʻokú ne fiemaʻu ha meʻá,+ koeʻuhi ko ia ia ʻokú ne ʻoange ki he kakai kotoa pē ʻa e moʻui mo e mānava+ pea mo e meʻa kotoa pē.
26 Pea naʻá ne ngaohi mei he tangata pē taha+ ʻa e puleʻanga kotoa pē ʻo e tangatá ke nau nofo ʻi he funga kotoa ʻo e māmaní,+ pea naʻá ne tuʻutuʻuni ʻa e ngaahi taimi kotofa pea fokotuʻu ʻa e ngaahi fakangatangata ki he feituʻu ʻe nofo ai ʻa e tangatá,+
27 koeʻuhi ke nau kumi ki he ʻOtuá, heiʻilo te nau tautaufā kiate ia ʻo maʻu moʻoni ia,+ neongo ko hono moʻoní, ʻoku ʻikai te ne mamaʻo mei ha taha ʻo kitautolu.
28 He fakafou ʻiate ia, ʻoku tau maʻu ai ʻa e moʻuí mo ngaue holo ai mo tau ʻi aí ni, ʻo hangē foki ko ia kuo leaʻaki ʻe he niʻihi ʻo hoʻomou kau faʻu māú ʻo pehē, ‘He ko ʻene fānau* foki mo kitautolu.’
29 “Ko ia ai, koeʻuhi ko e fānau kitautolu ʻa e* ʻOtuá,+ ʻoku ʻikai totonu ke tau fakakaukau ʻoku hangē ʻa ʻEne ʻAfió, ʻa e ʻOtuá, ko ha koula pe siliva pe maka, ʻo hangē ko ha meʻa kuo tongi ʻe he poto mo e filioʻi ʻa e tangatá.+
30 Ko e moʻoni, kuo fakaʻatā pē ʻe he ʻOtuá ʻa e ngaahi taimi ʻo e taʻeʻilo peheé;+ ka ʻi he taimí ni ʻokú ne talaki ki he kakai ʻi he feituʻu kotoa pē ke nau fakatomala.
31 Koeʻuhí kuó ne ʻosi fokotuʻu ha ʻaho ʻa ia ʻokú ne fakataumuʻa ke fakamāuʻi+ ai ʻi he māʻoniʻoni ʻe ha tangata kuó ne ʻosi fakanofo ʻa e māmani kuo nofoʻí, pea kuó ne ʻomi ha fakapapauʻiʻanga ki he tangata kotoa pē ʻaki hono fokotuʻu hake ia mei he maté.”+
32 Pea ʻi heʻenau fanongo ko ia ʻo fekauʻaki mo ha toetuʻu ʻa e maté, naʻe kamata ke fakaʻaluma ʻa e niʻihi,+ kae pehē ʻe he niʻihi ia: “Te mau toe fanongo pē kiate koe ʻo fekauʻaki mo e meʻá ni.”
33 Ko ia naʻe mavahe ʻa Paula meiate kinautolu,
34 ka ko e kau tangata ʻe niʻihi naʻa nau kau mo ia ʻo nau hoko ko e kau tui. Naʻe kau ʻiate kinautolu ʻa Taionisio, ʻa ia ko ha fakamaau ʻi he fakamaauʻanga ʻo e ʻAleopeikó, pea mo ha fefine ko hono hingoá ko Temalisi, pea mo e niʻihi kehe tuku kehe kinaua.
Fakamatala ‘i Lalo
^ Pe “fakatupu ha palopalema ʻi he.”
^ Fakafoʻilea, “naʻe ʻita hono laumālié.”
^ Ko ha foʻi tafunga ʻi ʻAtenisi ʻo e kuonga muʻá, pe ko e fakamaauʻanga lahi ʻa ia naʻe uiʻaki pē ʻa e hingoa tatau.
^ Pe “ʻaʻahi ki aí.”
^ Pe “lotu ki aí.”
^ Pe “ko hono hako.”
^ Pe “hako kitautolu ʻo e.”
