Ngāue ʻa e Kau ʻApositolo 11:1-30
11 Pea naʻe fanongo ʻa e kau ʻapositoló mo e fanga tokoua naʻe ʻi Siuteá kuo tali foki ʻe he kakai ʻo e ngaahi puleʻangá ʻa e folofola ʻa e ʻOtuá.
2 Ko ia ʻi he ʻalu hake ʻa Pita ki Selusalemá, naʻe kamata ʻa e kau poupou ki he kamú+ ke nau fakaangaʻi* ia,
3 ʻo pehē: “Naʻá ke hū ki he fale ʻo e kau tangata naʻe ʻikai kamu peá ke kai fakataha mo kinautolu.”
4 ʻI he meʻá ni naʻe fakamatalaʻi fakaikiiki ai ʻe Pita ʻa e meʻá kiate kinautolu, ʻo pehē:
5 “Naʻá ku ʻi he kolo ko Siopá ʻo lotu, pea ʻi he lolotonga ʻeku sio ki ha vīsone naʻá ku mamata ai ki ha meʻa* ʻoku ʻalu hifo hangē ha fuʻu tupenu līnení ʻoku tukutuku hifo mei he langí ʻi hono ngaahi tulikí ʻe fā, pea naʻe aʻu tonu hifo kiate au.+
6 ʻI heʻeku sio fakamamaʻu ki aí, naʻá ku mamata ai ki he fanga monumanu veʻe-fā ʻo e māmaní, mo e fanga manu kaivao, mo e fanga manu ʻoku totolo mo ngaolo, pea mo e fanga manupuna ʻo e langí.
7 Naʻá ku fanongo foki ki ha leʻo ʻoku pehē mai kiate au, ‘Pita, tuʻu hake ʻo tāmateʻi pea kai!’
8 Ka naʻá ku pehē, ‘ʻIkai ʻaupito, ʻEiki, koeʻuhi kuo teʻeki ai ʻaupito ke hū ki hoku ngutú ha meʻa ʻoku ʻuli pe taʻemaʻa.’
9 Naʻe tali mai ʻe he leʻo mei he langí, ko hono tuʻo uá ia: ‘Tuku hoʻo lau ʻoku ʻuli ʻa e ngaahi meʻa kuo fakamaʻa ʻe he ʻOtuá.’
10 Naʻe hoko ʻa e meʻá ni ko hono tuʻo tolú ia, pea naʻe toe fusi hake ʻa e meʻá kotoa ki he langí.
11 Pehē foki, ʻi he mōmeniti pē ko iá, naʻe tuʻu ai ha kau tangata ʻe toko tolu ʻi he fale ʻa ia naʻa mau nofo aí, ko e fekauʻi mai kiate au mei Sesalia.+
12 Naʻe tala mai leva ʻe he laumālié kiate au ke u ʻalu mo kinautolu, ʻo ʻoua ʻaupito ʻe tālaʻa. Ka ko e fanga tokoua ko eni ʻe toko onó naʻa nau ʻalu foki mo au, pea naʻa mau hū ki he fale ʻo e tangatá.
13 “Naʻá ne fakamatala mai kiate kimautolu ʻa ʻene sio ki he tuʻu ʻa e ʻāngeló ʻi hono falé ʻo ne pehē: ‘Fekauʻi atu ha kau tangata ki Siopa ke ui mai ʻa Saimone ʻa ia ʻoku ui ko Pitá,+
14 pea te ne tala atu kiate koe ʻa e ngaahi meʻa ʻa ia ʻe lava ke ke hao ai mo e kotoa ʻo ho falé.’
15 Ka ʻi he kamata ke u leá, naʻe ʻalu hifo ʻa e laumālie māʻoniʻoní kiate kinautolu ʻo hangē tofu pē ko ʻene ʻalu hifo kiate kitautolu ʻi he kamataʻangá.+
16 ʻI he meʻá ni naʻá ku manatu ai ki he lea ʻa e ʻEikí, ʻa ʻene faʻa pehē: ‘Ko Sione naʻá ne faipapitaiso ʻaki ʻa e vaí,+ ka ʻe papitaiso kimoutolu ia ʻaki ʻa e laumālie māʻoniʻoní.’+
17 Ko ia ai, kapau naʻe foaki ʻe he ʻOtuá ʻa e meʻaʻofa taʻetotongi tatau kiate kinautolu mo ia naʻá ne foaki kiate kitautolu kuo tau tui ki he ʻEiki ko Sīsū Kalaisí, ko hai leva au ke u malava ke taʻofi ʻa e ʻOtuá?”*+
18 ʻI heʻenau fanongo ki he ngaahi meʻá ni, naʻe tuku ʻenau fakakikihí,* pea nau fakalāngilangiʻi ʻa e ʻOtuá, ʻo pehē: “Tā kuo tuku atu foki ʻe he ʻOtuá ki he kakai ʻo e ngaahi puleʻangá ʻa e faingamālie ke fakatomala koeʻuhi ke nau maʻu ai ʻa e moʻuí.”+
19 Pea ko e faʻahinga ko ia naʻe movete atu+ tupu mei he fakatanga naʻe malanga hake ʻi he fekauʻaki mo Sitīvení naʻa nau ʻalu atu ʻo aʻu ki Finisia, Saipalo, mo ʻAniteoke, ka naʻa nau leaʻaki ʻa e folofolá ki he kau Siú pē.+
20 Kae kehe, naʻe omi ha kau tangata ʻe niʻihi mei honau lotolotongá mei Saipalo mo Sailine ki ʻAniteoke pea nau kamata lea ki he kakai lea faka-Kalisí, ʻo talaki ʻa e ongoongo lelei ʻo e ʻEiki ko Sīsuú.
21 ʻIkai ngata aí, ko e toʻukupu ʻo Sihová* naʻe ʻiate kinautolu, pea naʻe hoko ha fuʻu tokolahi ko e kau tui ʻo nau tafoki ki he ʻEikí.+
22 Ko e fakamatala fekauʻaki mo kinautolú naʻe aʻu ia ki he fakatahaʻanga ʻi Selusalemá, pea naʻa nau fekauʻi atu ʻa Panepasa+ ki ʻAniteoke.
23 ʻI heʻene aʻu atu ʻo ne sio ki he ʻofa maʻataʻatā ʻa e ʻOtuá, naʻá ne fiefia pea kamata ke ne fakalototoʻaʻi kinautolu kotoa ke nau nofoʻaki mateaki ai pē ki he ʻEikí mo e loto papau;+
24 he ko ha tangata lelei ia mo fonu ʻi he laumālie māʻoniʻoní mo e tuí. Pea naʻe tui ai ha fuʻu kakai tokolahi ki he ʻEikí.+
25 Ko ia naʻá ne ʻalu ki Tāsusi ke fai ha kumi fakaʻāuliliki kia Saula.+
26 ʻI he hili ʻene maʻu iá, naʻá ne ʻomai ia ki ʻAniteoke. Ko ia, ʻi he taʻu kakato ʻe taha naʻá na fakatahataha ai mo kinautolu naʻe ʻi he fakatahaʻangá pea akoʻi ai ha fuʻu tokolahi, pea ʻi he tataki fakaʻotuá naʻe fuofua ui ai ʻi ʻAniteoke ʻa e kau ākongá ko e kau Kalisitiane.+
27 ʻI he ngaahi ʻaho ko iá naʻe ʻalu hifo ai ha kau palōfita+ mei Selusalema ki ʻAniteoke.
28 Ko e taha ʻo kinautolu ko hono hingoá ko ʻAkapusi+ naʻá ne tuʻu hake ʻo ne tomuʻa tala fakafou ʻi he laumālié ha fuʻu honge lahi naʻe teu ke hoko mai ki he kotoa ʻo e māmani kuo nofoʻí,+ ʻa ia, ko hono moʻoní, naʻe hoko ia ʻi he taimi ʻo Kalautiasí.
29 Ko ia naʻe fakapapauʻi ʻe he kau ākongá, ko e tokotaha taki taha te ne fai ha tokoni+ ʻo fakatatau ki he meʻa te ne malavá+ ki he fanga tokoua ʻoku nofo ʻi Siuteá;
30 pea naʻa nau fai ʻa e meʻá ni, ʻo ʻoatu ia ki he kau mātuʻá ʻi he nima ʻo Panepasa mo Saulá.+
Fakamatala ‘i Lalo
^ Pe “fakakikihi mo.”
^ Fakafoʻilea, “faʻahinga ʻaiʻanga meʻa.”
^ Pe “tuʻu ʻo fakafepaki ki he ʻOtuá?”
^ Fakafoʻilea, “naʻa nau fakalongolongo.”
^ Sio ki he Fakamatala Fakalahi A5.
