Ua Kolinitō 6:1-18
6 ʻI he ngāue fakataha mo iá,+ ʻoku mau enginaki atu foki kiate kimoutolu ke ʻoua naʻa mou tali ʻa e ʻofa maʻataʻatā ʻa e ʻOtuá pea taʻemaʻu hono taumuʻá.+
2 He ʻokú ne folofola: “ʻI ha taimi fakahōifua naʻá ku ongona koe, pea ʻi ha ʻaho ʻo e fakamoʻuí naʻá ku tokoniʻi koe.”+ Vakai! Ko eni ʻa e taimi ʻoku mātuʻaki fakahōifuá. Vakai! Ko eni ʻa e ʻaho ʻo e fakamoʻuí.
3 ʻOku ʻikai ʻaupito te mau ʻoatu ha tūkiaʻanga ʻe taha, koeʻuhí ke ʻoua naʻa fakaangaʻi ai ʻemau ngāué;+
4 ka ʻi he tafaʻaki kotoa pē, ʻoku mau fakaongoongoleleiʻi atu ai kimautolu ʻi he tuʻunga ko e kau faifekau* ʻa e ʻOtuá,+ ʻi hono kātekina ʻa e meʻa lahi, ʻi he ngaahi mamahi, ʻi he masiva, ʻi he ngaahi faingataʻa,+
5 ʻi he ngaahi haha, ʻi he ngaahi nofo pilīsone,+ ʻi he ngaahi māveuveu, ʻi he ngāue mālohi, ʻi he ngaahi pō taʻemamohe, ʻi he ngaahi taimi ʻo e ʻikai ha meʻakai;+
6 ʻi he tuʻunga maʻa, ʻi he ʻilo, ʻi he kātaki,+ ʻi he anga-lelei,+ ʻi he laumālie māʻoniʻoni, ʻi he ʻofa ʻoku ʻikai mālualoi,+
7 ʻi he lea moʻoni, ʻi he mālohi ʻo e ʻOtuá;+ fakafou ʻi he meʻatau ʻo e māʻoniʻoní+ ʻi he nima toʻomataʻú* mo e toʻohemá,*
8 fakafou ʻi he lāngilangi mo e ʻikai ha lāngilangi, fakafou ʻi he lauʻikovi mo e lauʻilelei. ʻOku vakai mai kiate kimautolu ko e kau kākā ka neongo ia ʻoku mau lea moʻoni,
9 ko e kau taʻeʻiloa ka neongo ia ʻoku ʻiloʻi kimautolu, ko e faʻahinga ʻoku meimei mate* ka neongo ia vakai, ʻoku mau moʻui,+ ko e faʻahinga ʻoku tauteaʻi,* ka neongo ia ʻoku ʻikai tuku atu kimautolu ki he maté,+
10 ko e faʻahinga ʻoku mamahi ka ʻoku mau fiefia maʻu pē, ko e faʻahinga ʻoku masiva ka ʻoku mau ʻai ʻa e tokolahi ke nau koloaʻia, ko e faʻahinga ʻoku ʻikai te mau maʻu ha meʻa ka neongo ia ʻoku mau maʻu ʻa e meʻa kotoa pē.+
11 Kuo mau fakaava homau ngutú ke lea* atu kiate kimoutolu, kau Kolinitō, pea kuo mau mātuʻaki fakaava atu ʻa homau lotó.
12 ʻOku ʻikai te mau taʻofi* ʻemau manavaʻofa kiate kimoutolú,+ ka ʻoku mou taʻofi hoʻomou manavaʻofa loloto kiate kimautolú.
13 Ko ia ʻi he tali ki aí—ʻoku ou lea atu ʻo hangē ko ha fai ki haʻaku fānaú—mou mātuʻaki fakaava atu ʻe kimoutolu foki homou lotó.*+
14 ʻOua te mou hoko ʻo haʻi hōhoatamaki fakataha* mo e kau taʻetuí.+ He ʻe anga-fēfē ha feohi ʻa e māʻoniʻoní mo e maumau-laó?+ Pe ʻe anga-fēfē ha ʻinasi taha ʻa e māmá mo e poʻulí?+
15 ʻIkai ko ia pē, ʻe anga-fēfē ha fāitaha ʻa Kalaisi mo Pileali?*+ Pe ʻe anga-fēfē ha ʻinasi taha* ha tokotaha tui* mo ha tokotaha taʻetui?+
16 Pea ʻe faitatau ʻi he hā ʻa e temipale ʻo e ʻOtuá mo e ngaahi ʻaitolí?+ He ko kitautolú ko ha temipale ʻo ha ʻOtua moʻui;+ hangē tofu pē ko ia ko e folofola ʻa e ʻOtuá: “Te u nofo ʻi honau lotolotongá+ mo ʻaʻeva ʻi honau lotolotongá, pea te u hoko ko honau ʻOtua, pea te nau hoko ko hoku kakai.”+
17 “‘Ko ia ai, hū ki tuʻa mei honau lotolotongá, pea fakamavaheʻi kimoutolu,’ ko e folofola ia ʻa Sihová,* ‘pea tuku ʻa e ala ki he meʻa taʻemaʻá’”;+ “‘pea te u ʻomi kimoutolu kiate au.’”+
18 “‘Pea te u hoko ko ha tamai kiate kimoutolu,+ pea te mou hoko ko e ngaahi foha mo e ngaahi ʻofefine kiate au,’+ ko e folofola ia ʻa Sihova,* ko e Māfimafi-Aoniú.”
Fakamatala ‘i Lalo
^ Pe “sevāniti.”
^ Ke maluʻi ʻaki nai.
^ Ke ʻoho ʻaki nai.
^ Pe “ʻoku tuha mo e maté.”
^ Pe “ʻoku akonakiʻi.”
^ Pe “Kuo mau lea tauʻatāina.”
^ Pe “fakafihiaʻi.”
^ Pe “mou fano atu.”
^ Pe “ʻo kau.”
^ Pe “ha tokotaha faitōnunga.”
^ Pe “ha faitatau.”
^ Mei ha foʻi lea faka-Hepelū ʻoku ʻuhingá ko e “Koto Taʻeʻaonga.” Ko ha ʻuhinga kia Sētane.
^ Sio ki he Fakamatala Fakalahi A5.
^ Sio ki he Fakamatala Fakalahi A5.
