ʻI HE ʻULUAKI Kosilio Vatikano ʻi he 1870 naʻa nau fokotuʻu eni ko ha tuʻutuʻuni ia pe ko ha tokāteline pau ki he laui miliona ʻo e siasi Katolika he māmaní. Kae kehe, ko e fehuʻí ʻoku Fakatohitapu ʻa e akonaki ko ení? Tānaki atu ki aí, ko Tuʻitapu Francis ko e fetongi moʻoni ia ʻo e ʻapositolo ko Pitá? Pea ko Pita ʻa e ʻuluaki tuʻitapú?

Ko e lao ʻi he Kosilio ʻa e Vatikanó ʻi he 1870, naʻe makatuʻunga ia ʻi he fakaʻuhinga ʻo e tohi Mātiu 16:16-19 mo e Sione 21:15-17. ʻI heʻetau lau ʻa e fakamatala Fakatohitapu ko eni ʻi he fetalanoaʻaki ʻi he vahaʻa ʻo Sīsū mo Pitá ʻoku fakahaaʻi ai naʻe maʻu ʻe he ʻapositolo ko Pitá ha ngafa mahuʻinga ʻi he hisitōlia ʻo e muʻaki kau Kalisitiané. Ko hono moʻoní, ʻi he ʻuluaki taimi naʻá na fetaulaki aí, naʻe tomuʻa fakahaaʻi ʻe Sīsū ko Pita te ne fakahāhā ʻa e ʻulungaanga hangē ha maká ʻi heʻene moʻuí. (Sione 1:42) Ka naʻe ʻoange ʻe Kalaisi kia Pita ha mafai?

ʻI he Mātiu 16:17, 18, ʻoku tau sio ai ki he ngaahi lea ʻa Sīsū kia Pitá: “Bea oku ou tala atu foki kiate koe, Ko Bita koe, bea teu laga hoku jiaji ki he maka ni.” a Naʻe ʻuhinga ʻa Sīsū ko hono “jiaji” pe fakatahaʻangá ʻe langa ʻia Pita, ko ha tangata? Ko Pita naʻe teu ke taki ʻi he kotoa ʻo e kau muimui ʻo Sīsuú? Naʻe anga-fēfē hono mahinoʻi ʻe he toenga ʻo e kau ʻapositolo naʻa nau ʻi he fetalanoaʻaki ko ení ʻa e ngaahi lea ʻa Sīsuú? ʻOku fakahaaʻi ki mui ai ʻi he ngaahi Kōsipelí, naʻe tuʻo lahi ʻa e taimi naʻa nau fakakikihi pe ko hai ʻoku lahi taha ʻia kinautolú. (Mātiu 20:20-27; Maʻake 9:33-35; Luke 22:24-26) Kapau naʻe ʻoange ʻe Sīsū kia Pita ʻa e mafaí, pe tuʻunga māʻolunga tahá ʻe toe fakafehuʻi pe ko hai ʻoku lahi taha ʻi he kau ʻapositoló?

Naʻe anga-fēfē ʻa e mahino kia Pita ʻa e lea ʻa Sīsuú? ʻI he tupu hake ko ha ʻIsilelí, naʻe pau pē naʻe maheni ʻa Pita mo e ngaahi kikite faka-Hepelū ʻoku fekauʻaki mo e “maka” pe “maka tuliki.”  (ʻAisea 8:13, 14; 28:16; Sākalaia 3:9) ʻI he taimi naʻá ne toʻo lea ai mei he taha ʻo e kikite ko iá ʻi heʻene tohi ki hono kaungātuí, naʻá ne fakamatalaʻi ko e kikite ʻo kau ki he “maka tuliki” ko e ʻEiki ia ko Sīsū Kalaisí, ʻa e Mīsaiá. Naʻe ngāueʻaki ʻe Pita ʻa e foʻilea faka-Kalisi ko e pe’tra (ʻo tatau mo ia ʻoku hā ʻi he lea ʻa Sīsū ʻi he Mātiu 16:18) ko Kalaisi pē ia.—1 Pita 2:4-8.

Ko e ʻapositolo ko Paulá ko e toe tokotaha muimui faitōnunga ia ʻo Sīsū. Naʻe tui ʻa Paula naʻe ʻoange ʻe Sīsū ʻa e mafaí kia Pitá? ʻI hono ʻiloʻi ʻa e tuʻunga ʻo Pita ʻi he muʻaki fakatahaʻanga ʻo e kau Kalisitiané, naʻe tohi ʻe Paula ko Pita ʻa e tokotaha ʻi he haʻohaʻonga naʻe “hage koe gaahi bou.” (Kalētia 2:9) ʻIkai ko ia pē, kapau naʻe fakanofo ʻa Pita ʻe Sīsū ko e ʻulu ʻo e fakatahaʻangá, ʻe lava fēfē ke lau ʻe hono kaungātuí ko e taha ia ʻo e ngaahi poú?

ʻI heʻene tohi ʻo fekauʻaki mo e tōnounou pau ʻi he founga fakafeangai ʻa Pita ki he kakaí, naʻe fakafeangai ʻa Paula ʻi he fakaʻapaʻapa kae hangatonu: “naaku tuu hake o valoki ia, koeuhi nae totonu hono valokiʻi.” (Kalētia 2:11-14) Naʻe ʻikai ke fakakaukau ʻa Paula naʻe langa ʻe Kalaisi hono siasí pe fakatahaʻangá ʻia Pita pe ko ha toe tangata taʻehaohaoa. ʻI hono kehé, naʻá ne tui naʻe langa ʻia Sīsū Kalaisi, ko e fakavaʻe ia ʻo e fakatahaʻangá. Kia Paula, “koe Maka koia ko Kalaisi.”—1 Kolinitō 3:9-11; 10:4.

Ko ia, ʻe fēfē haʻatau mahinoʻi ʻa e ngaahi lea ko ení: “Ko Pita . . . koe; pea ʻi he fuga maka ni te u langa ai hoku Siasi”? Ke mahinoʻi e lea ko ení, ʻoku fiemaʻu ke tau lau kakato ʻa e fakamatalá. Ko e hā naʻe talanoa ki ai ʻa Sīsū mo Pitá? Naʻe toki ʻosi ʻeke ʻe Sīsū ki he kau ākongá: “ko hai au ʻi he lau ʻamoutolu?” ʻI he ʻikai toe tatalí, naʻe tali ʻe Pita: “Ko koe koe Kalaisi, koe Alo oe Otua moui.” ʻI hení, naʻe fakaongoongoleleiʻi ʻe Sīsū ʻa Pita peá ne toki tala ange te ne langa hono “jiaji” pe fakatahaʻangá ʻi ha “maka” ʻoku fefeka ange, ʻa e tokotaha naʻe toki fakahaaʻi ʻe Pita ʻene tui ki aí—ʻa Sīsū tonu.—Mātiu 16:15-18.

 ʻI he faitatau mo e meʻá ni, ko e tokolahi ʻi he “Ngaahi Tamai ʻa e Siasí” naʻa nau tohi ko e maka ʻi he Mātiu 16:18 ko Kalaisi. Ko e fakatātaá, ko ʻAokositaine ʻi he senituli hono nimá naʻá ne tohi: “Naʻe pehē ʻe he ʻEikí: ‘ʻI he fuʻu maká ni te u langa ai hoku Siasí,’ koeʻuhí naʻe tala ange ʻe Pita kiate ia: ‘Ko koe ʻa e Kalaisí ko e ʻAlo ʻo e ʻOtua moʻuí.’ Ko ia ai, ko e fuʻu maká ni ʻa ē naʻá ke kofesio aí te u langa ai hoku Siasí.” Naʻe toutou leaʻaki ʻe ʻAokositaine “ko e Maka (Petra) ko Kalaisi ia.”

Ko ʻAokositaine mo e tokolahi naʻe mei vakai kia kinautolu ko e kau angatuʻu, kapau naʻe fakamāuʻi ʻo fakatatau ki he tokāteline Katolika ʻo e taimi ko iá. Ko e moʻoni, fakatatau ki he teolosia Suisalani ko Ulrich Luz, ko e felotoi ʻa e kau mataotao Tohi Tapu ʻi he ʻaho ní ki he kaveinga ko ení, naʻe fakahalaiaʻi ia ʻe he Fakataha Kosilio ʻi he 1870, ko ha angatuʻu.

Ko e hingoa fakalakanga “tuʻitapu” naʻe ʻikai ʻiloʻi ia ʻe he ʻapositolo ko Pitá. Ko e moʻoni, talu mei he senituli hono hivá, ko e tokolahi ʻo e kau ʻepikopō ʻikai ko ha kau Lomá naʻa nau ngāueʻaki tonu ʻa e hingoa fakalakanga ko ení. Neongo ia, ko e hingoa fakalakanga ko ení naʻe tātaitaha hono ngāueʻakí ka ʻi he konga ki mui ʻo e senituli hono 11 naʻe fakaʻofisiale ʻa e hingoa fakalakanga ko ení. ʻIkai ko ia pē, naʻe ʻikai ke fakakaukau ʻa e muʻaki kau Kalisitiané ko e mafai naʻe ʻoange kia Pitá kuo foaki ia ki ha faʻahinga tokotaha pē ko hano fetongi. Ko ia ai, ko ha mataotao Siamane ko Martin Hengel naʻá ne fakaʻosiʻaki “naʻe teʻeki ke ʻi ai ha fakahāhā fakahisitōlia pe ko ha founga fakateolosia kuo fai ki muʻa pea toki maʻu ha ‘mafai’ fakatuʻitapu.”

Ke fakaʻosiʻakí: Ko Pita ʻa e ʻuluaki tuʻitapú? Naʻe ʻi ai hano fetongi? Ko e tokāteline ʻa e Katoliká fekauʻaki mo e mafai ʻo e tuʻitapú ʻoku tonu Fakatohitapu? Ko e tali mahino ki he ongo fehuʻi ko ení ko e ʻikai. ʻIkai ko ia pē, ko e moʻoniʻi meʻa ʻo kau ki hono taʻetoefehuʻia hono langa ʻe Sīsū hono siasí, ʻa ʻene fakatahaʻanga moʻoní, naʻe langa ʻiate ia tonu. (ʻEfesō 2:20) Ko e fehuʻi mahuʻinga leva kiate kitautolu taki tahá ko e, Kuó u maʻu ʻa e fakatahaʻanga moʻoni ko iá?