“Hili ha taimi nounou mei he mate ʻeku tangataʻeikí naʻe tala mai ʻe hoku husepānití ʻoku saiʻia ia ʻi ha fefine kehe,” ko e lau ia ʻa Janet. “Taimi nounou mei ai, ʻi he ʻikai fai ha fakatokanga pe fakalea māvaé, naʻá ne fakamaau kotoa hono valá pea mavahe ʻo liʻaki au mo ʻema tamaiki ʻe toko ua.” Naʻe maʻu ʻe Janet ha ngāue, ka naʻe ʻikai feʻunga ʻene vahé ke tāʻaki ʻa e falé. Pea naʻá ne toe fehangahangai mo ha ngaahi loto-moʻua kehe ʻo ʻikai ko e meʻa fakapaʻangá pē. “Ko e loto-moʻua tōtuʻa ki he kotoa ʻo e fatongia foʻou naʻá ku fua toko tahá naʻe taulōfuʻu,” ko ʻene laú ia. “Naʻá ku ongoʻi halaia ʻi he ʻikai ke u lava ʻo tokonaki ha meʻa lahi ange ki heʻeku fānaú ʻo hangē ko e ngaahi mātuʻa kehé. Pea naʻa mo e taimí ni, ʻoku ou hohaʻa ki he anga ʻo e vakai mai ʻa e kakaí kiate au mo ʻeku fānaú. ʻOku nau fifili nai pe naʻá ku fai ʻa e meʻa kotoa naʻe totonú ke haofakiʻi ʻeku nofo malí?”

Ko e lotú ʻokú ne tokoniʻi ʻa Janet ke fakanonga ʻene ngaahi ongoʻí pea fakatupulekina hono vahaʻangatae mo e ʻOtuá. “Ko e faingataʻa tahá ʻa e taimi poʻulí, ʻi he taimi ʻoku lōngonoa ai ʻa e ngaahi meʻá pea ʻikai lava ke u taʻofi ʻeku loto-moʻuá. Ko e lotú mo e lau Tohi Tapú naʻá ne tokoniʻi au ke u lava ʻo mohe. Ko e konga tohi ʻoku ou manako aí ko e Filipai 4:6, 7: ‘ʻOua ʻe hoko ʻo loto-moʻua ʻi ha faʻahinga meʻa, ka ʻi he meʻa kotoa pē fakafou ʻi he lotu mo e hū tōtōaki fakataha mo e fakafetaʻi, mou ʻai ke ʻilo ai hoʻomou ngaahi kolé ʻe he ʻOtuá; pea ko e nonga ʻa e ʻOtuá ʻa ia ʻoku fakalaka atu ʻi he mahino kotoa pē te ne maluʻi homou lotó pea mo homou ngaahi mafai fakaefakakaukaú.’ Naʻá ku fakamoleki ha ngaahi pō ke lotu ai pea naʻá ku maʻu ʻa e nonga meia Sihova.”

Ko e ngaahi lea fakafiemālie ʻa Sīsū ʻo fekauʻaki mo e lotú ʻi heʻene Malanga ʻi he Moʻungá ʻoku ngāueʻaki ia ki he loto-moʻua kotoa: “Ko hoʻomou Tamaí ʻokú ne ʻafioʻi ʻa e ngaahi meʻa ʻoku mou fiemaʻú ki muʻa noa pē ke mou kole ia kiate iá.” (Mātiu 6:8) Pea ʻoku fiemaʻu ke tau kole kiate ia. Ko e lotú  ko e founga tefito ia ʻoku lava ke tau “ʻunuʻunu ofi ki he ʻOtuá.” Ko e hā hono olá? “Te ne ʻunuʻunu ofi mai kiate kimoutolu.”—Sēmisi 4:8.

ʻIo, ko e lotú ʻokú ne fai ʻa e meʻa lahi ange ʻi hono ʻai pē kitautolu ke ongoʻi lelei ange ʻi hono fakahaaʻi ʻetau loto-moʻuá. Ko Sihova ko e “tali lotu,” ʻokú ne toe tali ʻa e faʻahinga ʻoku nau kumi kiate ia ʻi he tuí. (Saame 65:2) Ko e ʻuhinga ia naʻe akoʻi ai ʻe Sīsū hono kau muimuí ke “lotu maʻu pē ʻo ʻoua ʻe fiu.” (Luke 18:1) Kuo pau ke tau hanganaki kole ki he tataki mo e tokoni ʻa e ʻOtuá ʻo fiemālie te ne tāpuakiʻi ʻetau tuí. ʻOku fiemaʻu ke ʻoua ʻaupito te tau fehuʻia ʻene malava mo ʻene finangalo ke tali lotú. Ke “lotu maʻu pē” ko e founga eni ʻoku fakahaaʻi ai ʻoku tau maʻu ʻa e tui moʻoní.—1 Tesalonaika 5:17.

Ka ko e hā koā ʻa e tui? Ko e tuí ʻoku kau ki ai ʻa e “hoko ʻo ʻiloʻi” ʻa e ʻOtuá ko e tokotaha. (Sione 17:3) ʻUluakí ʻoku tau fai eni ʻaki hono maʻu ʻa e ngaahi fakakaukau ʻa e ʻOtuá fakafou ʻi he Tohi Tapú. ʻOku tau ʻiloʻi ʻokú ne ʻafioʻi kitautolu taki taha pea loto ke tokoniʻi kitautolu. Neongo ia, ko e tui moʻoní ʻoku kau ki ai ʻa e meʻa lahi ange ʻi hono ʻiloʻi pē ha meʻa fekauʻaki mo e ʻOtuá. ʻOku toe ʻuhinga ia ki hono maʻu ha kaumeʻa fekoekoeʻi mo ia. ʻOku moʻoni eni ʻi ha kaumeʻa fakaetangata, ʻoku ʻikai lava ke tau faʻu ha kaumeʻa ʻi ha pō pē ʻe taha. ʻI he faai atu ʻa e taimí ko ʻetau tuí ʻoku ‘hokohoko atu ke tupu’ ʻi heʻetau ako lahi ange fekauʻaki mo ia, ʻi heʻetau “fai maʻu pē ʻa e ngaahi meʻa ʻoku fakahōifua kiate iá,” pea mo ʻetau aʻusia ʻene tokoni lahí. (2 Kolinitō 10:15; Sione 8:29) Ko e faʻahinga tui ia naʻá ne tokoniʻi ʻa Janet ke fekuki mo e ngaahi loto-moʻuá.

“Ko e meʻa naʻá ne tokoniʻi moʻoni au ke langa hake ʻeku tuí ko e sio ki he tokoni ʻa Sihová ʻi he taimi kotoa pē,” ko e lau ia ʻa Janet. “ʻI he taimi lahi ʻoku tau fehangahangai ai mo e ngaahi fakamaau taʻetotonu ʻoku hā ngali taʻemalava ke fekuki mo ia. ʻI hono fai ha ngaahi lotu, ʻoku ʻomai maʻu pē ʻe Sihova ʻa e founga ke tau hao ai ʻa ia naʻe ʻikai ʻaupito ke u fakakaukau ki ai. ʻI he taimi ʻoku ou fakamālō ai kiate iá, ʻoku fakamanatu mai ai kiate au ʻa e lahi kuó ne fai maʻakú. Kuó ne faʻa tokoniʻi kitautolu ʻi he taimi totonú. Pea kuó ne foaki mai ha ngaahi kaungāmeʻa moʻoni ʻa ia ko e kau tangata mo e kau fefine Kalisitiane moʻoni. ʻOku nau faʻa tuʻu maʻu pē ʻi hoku tafaʻakí pea ko e kau faʻifaʻitakiʻanga lelei ki heʻeku fānaú.” *

“ʻOku ou ʻilo ʻa e ʻuhinga ʻoku pehē ai ʻe Sihova ʻi he Malakai 2:16: ‘ʻOku ou fehiʻa ʻi he veté.’ Ki ha hoa tonuhia, ko ha lavaki lahi ia kiate ia. Kuo mahili atu ʻa e ngaahi taʻu mei he mavahe hoku husepānití, ka ʻi he taimi ʻe niʻihi ʻoku ou kei ongoʻi tuēnoa ʻi loto. ʻI heʻeku ongoʻi peheé, ʻoku ou feinga ke tokoni ki ha taha kehe pea ʻoku faʻa tokoni maʻu pē ia kiate au.” ʻI hono ngāueʻaki ʻa e tefitoʻi moʻoni Fakatohitapu ke fakaʻehiʻehi mei he fakamavaheʻi-kitá, naʻe siʻisiʻi ai ʻa e loto-moʻua ʻa Janet.—Palōveepi 18:1.

“Ko ʻeku fiemālie lahi tahá,” ko e lea ia ʻa Janet, “ko e hoko ʻo ʻiloʻi ko e ʻOtuá ‘ko e tamai ki he tamai mate, mo e fakamāu ʻoku tokanga ki he fefine uitou.’ Heʻikai ʻaupito ke ne liʻaki kimautolu ʻo hangē ko ia naʻe fai ʻe hoku husepānití.” (Saame 68:5) ʻOku ʻiloʻi ʻe Janet ko e ʻOtuá ʻoku ʻikai ke ne ʻahiʻahiʻi kitautolu “ʻaki ʻa e ngaahi meʻa ʻoku koví.” ʻI hono kehé, ʻokú ne “foaki nima-homo” ʻa e potó ki he faʻahinga kotoa pea foaki mai mo e “mālohi ʻoku mahulu atu ia ʻi he tuʻunga anga-mahení” ke tokoniʻi kitautolu ke fekuki mo ʻetau loto-moʻuá.—Sēmisi 1:5, 13; 2 Kolinitō 4:7.

Kae fēfē kapau ʻoku tau loto-moʻua koeʻuhí ko ʻetau moʻuí ʻoku ʻi he tuʻunga fakatuʻutāmaki?