Koeʻuhi ko Sihova ʻa e ʻOtuá * ko e Tokotaha-Fakatupu ia ʻo e meʻa kotoa pē pea ʻoku māfimafi-aoniu, ʻoku hehema nai ai ʻa e kakai tokolahi ke tukuakiʻi ia ki he meʻa kotoa pē ʻoku hoko ʻi he māmaní, ʻo kau ai ʻa e kovi kotoa pē. Kae kehe, fakakaukau angé ki he meʻa ʻoku leaʻaki ʻe he Tohi Tapú fekauʻaki mo e ʻOtua moʻoní:

• “Ko e fai totonu [pe māʻoniʻoni] ʻa Sihova ʻi hono ʻalunga kotoa.”—Saame 145:17.

• “Ko ʻene [ʻOtuá] ngaahi founga kotoa ʻoku fakakonisitutone: Ko e ʻOtua ʻo e Moʻoni, pea taʻe haʻane hala, ko e faitotonu [pe māʻoniʻoni] ia mo haohaoa.”—Teutalōnome 32:4.

• “Ko Sihová ʻoku manavaʻofa loloto ʻaupito mo mohu meesi.”—Sēmisi 5:11.

ʻOku ʻikai ko e ʻOtuá ʻoku tupu mei ai ʻa e ngaahi kovi ʻoku hokó. Ka ʻokú ne fakaʻaiʻai nai ʻa e niʻihi kehé ke fakahoko ʻa e ngaahi ngāue fulikivanú? ʻIkai ʻaupito. “ʻI he tofanga ʻi he ʻahiʻahí,” ʻoku pehē ʻe he Tohi Tapú, “tuku ke ʻoua naʻa pehē ʻe ha taha: ‘Kuo ʻahiʻahiʻi au ʻe he ʻOtuá.’” Ko e hā hono ʻuhingá? Koeʻuhí “ʻoku ʻikai malava ke ʻahiʻahiʻi ʻa e ʻOtuá ʻaki ʻa e ngaahi meʻa ʻoku koví pea ʻoku ʻikai te ne ʻahiʻahiʻi ʻaki ia ha taha.” (Sēmisi 1:13) ʻOku ʻikai ke ʻahiʻahiʻi pe feinga ʻa e ʻOtuá ke fakaʻaiʻai ha taha ke fai ʻa e ngaahi ʻulungaanga ʻoku koví. ʻOku ʻikai fakatupunga ʻe he ʻOtuá ʻa e ngaahi meʻa ʻoku koví ke hoko pe fakaʻaiʻai ʻa e niʻihi kehé ke fai ʻa e meʻa ʻoku koví. Ko hai leva ʻe tukuakiʻi ki he hoko ʻa e ngaahi meʻa ʻoku koví?

Ko e ʻuhinga ʻe taha ʻoku faingataʻaʻia ai ʻa e tangatá, ʻoku pehē ʻe he Tohi Tapú: “ʻOku hokonoa ki he faʻahinga kotoa pe ʻa e faingamalie mo e tuʻutamaki.” (Koheleti 9:11) ʻI he hoko ʻa e ngaahi meʻa taʻeʻamanekiná pe ngaahi fakatuʻutāmakí, tatau ai pē pe ʻoku hoko ha meʻa ki ha taha pe ʻikai, ʻe makatuʻunga ʻa e ngaahi tuʻunga lahi ʻi he feituʻu ʻokú ne ʻi aí mo e taimi ʻoku hoko aí. ʻI he meimei taʻu ʻe 2, 000 kuo hilí, naʻe lave ʻa Sīsū Kalaisi ʻo fekauʻaki mo ha fakatamaki naʻe kau ai ʻa e kakai ʻe toko hongofulu-mā-valu naʻe holo ai ʻa e taua ʻi Sailoamé, ʻo nau mate ai. (Luke 13:1-5) Naʻe ʻikai ke maʻungatāmaki kinautolu koeʻuhi ko ʻenau founga moʻuí; ka naʻa nau ʻi lalo ʻi he tauá ʻi he taimi naʻe holo aí. Ki muí ni mai, naʻe taaʻi ʻe ha mofuike fakalilifu ʻa Haiti ʻi Sanuali 2010; naʻe pehē ʻe he puleʻanga ʻo Haití naʻe laka hake ʻi he toko 300,000 ʻo e moʻui naʻe mole ai. Naʻe mole kotoa ʻa e ngaahi moʻui ko ení ʻo tatau ai pē pe ko e hā honau tuʻungá. Ko e mahamahakí foki ʻoku lava ke hoko ia ki ha taha ʻi ha faʻahinga taimi pē.

ʻE ʻeke nai ʻe ha niʻihi: ‘ʻOku ʻikai nai ke lava ʻe he ʻOtuá ʻo taʻofi ha faʻahinga fakatamaki fakatupu mate mei heʻene hokó? ʻOku ʻikai nai lava ke ne maluʻi ʻa e kakai leleí mei he fakatamakí?’ Ke tuʻu-ʻi-vahaʻa ʻa e ʻOtuá ʻi he ngaahi tuʻunga peheé, ʻoku ʻuhinga iá ʻokú ne ʻilo fekauʻaki mo e ngaahi meʻa ʻoku kovi ki muʻa ke hokó. ʻI hono maʻu tonu ʻe he ʻOtuá ʻa e malava ke ne ʻiloʻi ʻa e kahaʻú, ko e fehuʻi ʻoku fiemaʻu ke tau fakakaukau ki aí ko eni: ʻOku fili nai ʻa e ʻOtuá ke ne ngāueʻaki hono mālohi taʻefakangatangatá ke ne tōmuʻa ʻafioʻi ʻa e ngaahi meʻa ko iá?—ʻAisea 42:9.

 ʻOku pehē ʻe he veesi folofolá: “[Ko e] ʻOtua ʻoku ʻi langi: Kuo ne fai kotoa ʻa e meʻa ne ne finangalo ki ai.” (Saame 115:3) ʻOku fai ʻe Sihova ʻa e meʻa ʻokú ne finangalo ʻoku ʻaongá—kae ʻikai ko e ngaahi meʻa kotoa pē ʻokú ne malava ke faí. ʻOku tatau pē ia mo e meʻa ʻokú ne fakakaukau ke ne tōmuʻa ʻiloʻí. Ko e fakatātaá, ʻi he hili ʻa e hoko ʻo mafolalahia ʻa e fulikivanú ʻi he ongo kolo ʻi he kuonga muʻá ʻa Sōtoma mo Komola, naʻe tala ʻe he ʻOtuá ki he pēteliake ko ʻĒpalahamé: “Kau ʻalu hifo muʻa, ʻo vakaiā, pe kuo pehe fau ʻenau fai, ʻo hange ko e tangi kuo ongo mai; pea ka ʻikai, pea u ʻilo.” (Sēnesi 18:20, 21) Naʻe ʻi ai ha taimi, naʻe fili ai ʻa Sihova ke ʻoua te ne ʻafioʻi ʻa e lahi fau ʻa e fulikivanú ʻi he ongo kolo ko iá. ʻI he tuʻunga meimei tatau, ʻoku lava ʻa Sihova ke ne fili ke ʻoua te ne tōmuʻa ʻiloʻi ʻa e meʻa kotoa pē. (Sēnesi 22:12) ʻOku ʻikai ko e founga eni ke fakaʻilongaʻi ai haʻane taʻehaohaoa pe ko ha tōnounou ʻi heʻene tafaʻakí. Koeʻuhi “ʻoku haohaoa ʻene ngaue” ʻoku mafamafatatau ʻa e ʻOtuá ʻi heʻene malava ko ia ke tōmuʻa ʻafioʻi ʻa e kahaʻú mo ʻene taumuʻá; ʻoku ʻikai ʻaupito ke ne fakamālohiʻi ʻa e tangatá ke muimui ʻi ha ʻalunga pau. * (Teutalōnome 32:4) Ko e hā leva ʻe lava ke tau fakaʻosiʻakí? Ko e meʻa pē ko ení: ʻOku filifili mo fai fakapotopoto ʻe he ʻOtuá hono ngāueʻaki ʻa e tomuʻa ʻafioʻí.

ʻOku kaunga ʻa e faʻahinga ʻo e tangatá ki hono tukuakiʻi ki ai ʻa e fulikivanú. Fakatokangaʻi ʻa e anga hono fakamatalaʻi ʻe he Tohi Tapú ʻa e founga ʻe lava ke iku atu ki he ngaahi ngāue fakatupu maumaú. “ʻOku ʻahiʻahiʻi ʻa e tokotaha taki taha ʻi hono tohoakiʻi mo fakataueleʻi pē ʻe heʻene holi ʻaʻaná. Ko e holí leva, ʻi heʻene hoko ʻo tuʻituʻiá, ʻokú ne fanauʻi mai ʻa e angahala; ko e angahalá leva, ʻi he ʻosi hono fakahokó, ʻokú ne ʻomai ʻa e mate.” (Sēmisi 1:14, 15) ʻI he taimi ʻoku fai ai ʻe he faʻahinga tāutahá ha tōʻonga ʻi ha holi taʻetotonu pe fai ha ngaahi ngāue kovi, ʻoku nau iku ai ʻo faingataʻaʻia ʻi ha ngaahi nunuʻa kovi. (Loma 7:21-23) Hangē ko ia ʻoku fakahā mai ʻe he hisitōliá, ʻoku fai ʻe he tangatá ʻa e ngaahi ngāue fakalilifu pea fakatupunga ai ha faingataʻa lahi fau. ʻIkai ko ia pē, ʻoku lava ke uesia ʻe he kau tangata fulikivanú ʻa e niʻihi kehé, pea ʻoku hokohoko atu ai ʻa e koví.—Palōveepi 1:10-16.

ʻOku totonu ke tuʻu-ʻi-vahaʻa ʻa e ʻOtuá pea taʻofi ʻa e kakaí mei hono fai ʻa e ngaahi meʻa ʻoku koví? Fakakaukau ki he anga hono ngaohi ʻo e tangatá. ʻOku pehē ʻe he Folofolá naʻe ngaohi ʻa e tangatá ʻi he ʻīmisi tonu ʻo e ʻOtuá, ko e ʻuhinga ia ʻoku tau ʻi he tatau ai ʻo e ʻOtuá. Ko ia, ʻoku maʻu ʻe he tangatá ʻa e malava ke tapua atu ʻa e ngaahi ʻulungaanga ʻo e ʻOtuá. (Sēnesi 1:26) Kuo foaki ki he tangatá ʻa e meʻaʻofa ʻo e tauʻatāina ke filí pea lava ke nau fili ke ʻofa ki he ʻOtuá mo anga-tonu kiate ia ʻaki hono fai ʻa e meʻa ʻoku tonu ʻi heʻene vakaí. (Teutalōnome 30:19, 20) Kapau naʻe fakamālohiʻi ʻe he ʻOtuá ʻa e kakaí ke muimui ʻi ha ʻalunga pau, ʻikai ʻokú ne fakataʻeʻaongaʻi ai ʻa e meʻaʻofa ʻo e tauʻatāina ke filí? ʻE hangē ai ʻa e tangatá ko ha mīsini, ke nau fai pē ʻa e meʻa naʻe fakapolokalamaʻi kinautolu ki aí! ʻE tatau pē ia kapau naʻe fakatufakangaʻi ke tuʻutuʻuniʻi mai ʻa e meʻa ke tau faí mo e meʻa kotoa ʻe hoko mai kia kitautolú. He fiefia ē ko kitautolu ʻi hono fakangeingeiaʻi ʻe he ʻOtuá ʻaki hono fakaʻatā ke tau fili pē hotau ʻalungá! Neongo ia, ʻoku ʻikai ʻuhinga eni ko e maumau ʻoku fakatupunga ʻe he ngaahi fehālaaki mo e ngaahi fili kovi ʻa e tangatá te nau hoko ʻo malaʻia taʻengata ai.

Kapau te ke ʻeke ki ha tokotaha Hinitū pe lotu-Puta ʻa e fehuʻi ʻoku ʻasi ʻi he takafi ʻo e makasini ko ení, ʻe hangehangē te ke fanongo ki he tali ko ení: “ʻOku hoko ʻa e ngaahi meʻa ʻoku koví ki he kakai leleí koeʻuhí ko e lao ʻa Karma. ʻOku nau utu pē ʻa e fua ʻo e meʻa naʻa nau fai ʻi heʻenau moʻui ki muʻá.” *

ʻI he fekauʻaki mo e akonaki ʻa Karma, ʻoku lelei ke fakatokangaʻi ʻa e meʻa ʻoku leaʻaki ʻe he Tohi Tapú ʻo fekauʻaki mo e kau maté. ʻI he ngoue ʻo ʻĪtení, ʻa e muʻaki feituʻu naʻe ʻi ai ʻa e faʻahinga ʻo e tangatá, naʻe pehē ʻe he Tokotaha-Fakatupú ki he ʻuluaki tangata ko ʻĀtamá: “ʻE lelei ʻaupito hoʻo kai mei he ngahi ʻakau kehekehe ʻo e ngoue; ka ko e ʻAkau ʻo e ʻIlo-ʻo-e-lelei-mo-e-kovi ʻe ʻikai te ke kai mei ai: he ko e ʻaho te ke kai mei ai kuo pau te ke mate.” (Sēnesi 2:16, 17) Kapau naʻe ʻikai faiangahala ʻa ʻĀtama ʻi heʻene talangataʻa ki he ʻOtuá, te ne moʻui taʻengata. Naʻe hoko ʻa e maté koeʻuhí ko e tautea ia ʻo e talangataʻa ki he fekau ʻa e ʻOtuá. Pea ʻi he taimi naʻe fanauʻi ai ʻa e fānaú, naʻe “mafola ai ʻa e maté ki he tangata kotoa pē.” (Loma 5:12) Ko ia ai, ʻoku lava ke pehē “ko e totongi ʻoku ʻoatu ʻe he angahalá ko e mate.” (Loma 6:23) ʻOku toe fakamatala foki ʻa e Tohi Tapú: “Ko ia kuo maté kuo ʻatā ia mei heʻene angahalá.” (Loma 6:7) ʻI hono fakalea ʻe tahá, ʻoku ʻikai ke toe totongi ʻe he kakaí ʻenau angahalá ʻi he hili ʻa e maté.

Ko e laui miliona ʻo e kakai ʻi he ʻaho ní ʻoku nau fakamatala ko e palopalema ʻoku faingataʻaʻia ai ʻa e tangatá ʻoku kaunga ki ai ʻa Karma. ʻOku faʻa anga-maheniʻaki hono tali lelei pē ʻe ha tokotaha tui ʻa ʻene faingataʻaʻiá tonu pea pehē foki ki he niʻihi kehé ʻo ʻikai fakahohaʻasi ai ia. Ka ʻoku kei tuʻu pē ʻa e moʻoniʻi meʻa ko ia ʻoku ʻikai ke ʻi ai ha ʻamanaki hono taʻofi ʻa e ngaahi meʻa ʻoku koví mei heʻene hokó. ʻOku ʻi ai ʻa e tui ʻoku pehē, ko e haoʻanga pē taha ki ha tokotaha ko ʻene tauʻatāina mei he hokohoko ko ia ʻa e vilo ʻo e moʻuí fakafou ʻi hano toe fanauʻi foʻou ʻaki hono maʻu ha anga fakasōsiale ʻoku tali lelei mo ha ʻilo makehe. Ko e ngaahi tui peheé, ʻoku faikehekehe mamaʻo ia mei he meʻa ʻoku leaʻaki ʻe he Tohi Tapú. *

Kae kehe, ʻoku ʻikai ko e tangatá ʻa e tupuʻanga tefito ʻo e fulikivanú. Ko Sētane ko e Tēvoló, naʻe ʻuluaki hoko ia ko e ʻāngelo ʻa e ʻOtuá, “naʻe ʻikai te ne tuʻu maʻu ʻi he moʻoní” pea ʻomi ai ʻa e angahalá ki he māmaní. (Sione 8:44) Naʻá ne fakaʻaiʻai ʻa e angatuʻu ʻi he ngoue ko ʻĪtení. (Sēnesi 3:1-5) Naʻe ui ia ʻe Sīsū Kalaisi ko e “tokotaha fulikivanú” mo e “pule ʻo e māmaní.” (Mātiu 6:13; Sione 14:30) Ko e tangatá ʻi he tuʻunga fakalūkufuá ʻoku nau muimui ʻia Sētane ʻaki ʻa e muimui ki heʻene ngaahi fakaʻaiʻaí ke tukunoaʻi ʻa e ngaahi founga lelei ʻa Sihová. (1 Sione 2:15, 16) “Ko e māmaní kotoa ʻoku tokoto ia ʻi he mafai ʻo e tokotaha fulikivanú,” ko e lau ia ʻa e 1 Sione 5:19. ʻOku ʻi ai mo e ngaahi meʻamoʻui laumālie kuo nau tafoki ʻo fulikivanu pea kau mo Sētane. ʻOku fakahaaʻi ʻe he Tohi Tapú ko Sētane mo ʻene kau tēmenioó ʻoku nau “takihalaʻi ʻa e kotoa ʻo e māmani kuo nofoʻí;” ʻo fakatupunga ai ke “ʻoiauē ʻa e māmaní.” (Fakahā 12:9, 12) Ko ia ai, ko e tokotaha tefito ke tukuakiʻi ki he fulikivanú ko Sētane ko e Tēvoló.

ʻOku hā mahino ʻoku ʻikai ke ʻi ai ha kaunga ʻa e ʻOtuá ki he ngaahi kovi ʻoku hoko ki he kakaí; naʻa mo haʻane fakatupunga ha faingataʻa kiate kinautolu. Ka ʻi hono kehé, kuó ne talaʻofa ʻe toʻo ʻosi ʻa e koví, ʻo hangē ko ia ʻoku fakahaaʻi ʻi he kupu hoko maí.