ʻI he taʻu 33 T.S., naʻe pekia ʻa Sīsū, fokotuʻu hake mei he maté, pea ʻalu hake leva ki hēvani. ʻI ha ngaahi taimi fuoloa ki mui ai, naʻe foaki kia Sīsū ʻa e mafai ke hoko ʻo pule ko ha Tuʻi. (Taniela 7:13, 14) ʻI he kahaʻú, ʻe ngāue ʻa Sīsū ʻi hono tuʻunga ko e Tuʻi ke ʻomai ʻa e melino ki he māmaní pea toʻo ʻosi atu ʻa e masivá.​—Lau ʻa e Saame 72:7, 8, 13.

ʻE fakahoko ʻe Sīsū ha ngaahi meʻa fakaofo ʻi hono tuʻunga ko e Pule ki he faʻahinga ʻo e tangatá. Te ne ngāueʻaki ʻa e mālohi kuo foaki ange ʻe heʻene Tamaí kiate iá ke fakafoki ʻa e kakaí ki he tuʻunga haohaoa. Te nau fiefia ʻi he moʻui he māmaní ʻo ʻikai ʻaupito toe tupu ʻo motuʻa pea mate.​—Lau ʻa e Sione 5:26-29; 1 Kolinitō 15:25, 26.

ʻOku tataki ʻe Sīsū he taimí ni ʻa e ngāue fakamalanga ʻene kau muimui moʻoní ʻi māmani lahi. ʻOku nau ʻaʻahi ki he kakaí ke fakahaaʻi kiate kinautolu ʻa e meʻa ʻoku leaʻaki ʻe he Tohi Tapú fekauʻaki mo e Puleʻanga ʻo e ʻOtuá. Naʻe pehē ʻe Sīsū te ne hokohoko atu ke poupouʻi ʻa e ngāue ʻene kau ākongá, kae ʻoua ke fakangata ʻe he Puleʻanga ʻo e ʻOtuá ʻa e ngaahi founga-pule fakaetangatá.​—Lau ʻa e Mātiu 24:14; 28:19, 20.

ʻOku tataki ʻe Sīsū ʻa e kakaí ki ha founga moʻui ʻoku lelei angé, fakafou ʻi he fakatahaʻanga Kalisitiane moʻoní. Te ne hokohoko atu ke tataki kinautolu ʻo aʻu ki hono fakaʻauha ʻa e fokotuʻutuʻu ʻo e ngaahi meʻa lolotongá pea hū atu ki he māmani foʻou kuo talaʻofa ʻe he ʻOtuá.​—Lau ʻa e 2 Pita 3:7, 13; Fakahā 7:17.