ʻOku Fēfē ʻa Hēvani?

ʻOKU fakakaukau e kakai ʻe niʻihi ʻoku faingataʻa ke ʻilo fekauʻaki mo hēvani koeʻuhí he ʻoku ʻikai ha taha kuo haʻu mei ai ke talanoa mai kia kitautolu fekauʻaki mo ia. Mahalo pē kuo ngalo ʻia kinautolu naʻe pehē ʻe Sīsū: “Kuo u ʻalu hifo mei he langi.” (Sione 6:38) Naʻá ne toe pehē ki ha kau taki lotu: “Ko kimoutolu ʻoku mou mei lalo: ko au ʻoku ou mei ʻolunga.” (Sione 8:23) Ko e hā naʻe leaʻaki ʻe Sīsū fekauʻaki mo hēvaní?

Naʻe fakapapauʻi ʻe Sīsū ko hēvani ʻa e feituʻu ʻoku ʻafio ai ʻa Sihová. Naʻá ne ui ʻa e ʻOtuá ko “ʻeku Tamai ʻoku ʻi Hevani.”—Mātiu 12:50.

Neongo kuo fakatotoloʻi ʻe he tangatá ʻa e hēvani matelié ʻaki ʻa e ngaahi meʻa fakaʻata fetuʻu mālohi pea kuo fononga ʻa e niʻihi ki he tuʻa vavaá, ʻoku kei moʻoni pē ʻa e meʻa ʻoku leaʻaki ʻe he Tohi Tapú: “Ko e meʻa ki he ʻOtua, kuo teʻeki ke mamata ki ai ʻe ha taha ʻi ha taimi.” (Sione 1:18) Naʻe fakamatalaʻi ʻe Sīsū ʻa hono ʻuhingá ʻi heʻene pehē: “Ko e ʻOtua ko e laumālie.”—Sione 4:24.

Ko e laumālié ko ha faʻunga moʻui ia ʻoku māʻolunga ange ʻi he tangatá. Ko e laumālié ʻoku ʻikai faʻuʻaki ia ha meʻa fakamatelie, hangē ko e kakanó mo e totó, ʻa ia ʻoku lava ke sio mo ala ki ai ha tangata. Ko ia ʻi he taimi naʻe pehē ai ʻe Sīsū naʻá ne nofo ʻi he tafaʻaki ʻo ʻene Tamai ʻi “Hevani,” naʻá ne ʻuhingá naʻá ne maʻu ha faʻunga moʻui naʻe lāngilangiʻia ange ia ʻi ha faʻunga moʻui fakamatelie pē. (Sione 17:5; Filipai 3:20, 21) Ko e nofoʻanga laumālie ko ení ʻa ia naʻe nofo ai ʻa Sīsū mo ʻene Tamaí ʻa ē ʻoku ui ʻe he Tohi Tapú ko “Hevani.” ʻOku fēfē ia? Ko e hā e meʻa ʻoku hoko aí?

Feituʻu ʻo e Ngāue Fiefia

ʻOku fakamatalaʻi ʻe he Tohi Tapú ko hēvaní ko ha feituʻu ia ʻoku lahi ai ʻa e ngāué. ʻOku lave ai ki he laui miliona ʻo e ngaahi meʻamoʻui laumālie ʻoku nau nofo ai. (Taniela 7:9, 10) Ko e ngaahi meʻamoʻui laumālie ko ení ʻoku makehe ʻa honau ʻulungaanga taki taha. ʻOku anga-fēfē ʻetau ʻiloʻi iá? ʻI he fakatupú ʻa ia ʻoku lava ke tau sio ki aí, ʻoku ʻikai ha ongo meʻamoʻui te na tatau tofu pē, ko ia ʻoku lava ai ke tau fakapapauʻi ʻi hēvaní, ʻoku ʻi ai foki ha ngaahi meʻamoʻui kehekehe lahi. ʻOku taau ke fakatokangaʻi, ko e ngaahi meʻamoʻui fakahēvani kotoa ko ení ʻoku nau ngāue fakataha ʻi he fāʻūtaha, ʻo ʻomai ai ha faikehekehe fakaofo ki he māmani he ʻaho ní, ʻa ia ʻoku hāhāmolofia ke ngāue fāitaha lelei ai ʻa e kakaí.

Fakatokangaʻi ʻa e anga hono fakamatalaʻi ʻe he Tohi Tapú ʻa e ngāue ʻi hēvaní. “Fakafetaʻi  kia Sihova, ʻa ʻene kau angelo na, haʻa toʻa kaukaua ʻoku fai ʻene ngaahi lea, hoʻomou fanongo tonu ʻene folofola. Fakafetaʻi kia Sihova, ʻa ʻene ngaahi hosite kotoa; ʻa ʻene kau ngaue ʻoku mou fakahoko hono finangalo na.” (Sāme 103:20, 21) Ko ia ʻoku fakahoko ha ngāue lahi ʻi hēvani. ʻOku lava ke tau fakapapauʻi ko ha ngāue fakafiemālie ia.

Ko e hisitōlia fuoloa ʻo e kau ʻāngeló ʻi heʻenau ngāue fiefiá ʻoku aʻu ia ki he taimi naʻa mo e ki muʻa ke fakatupu ʻa e māmaní. Fakatatau ki he lau ʻa e Tohi Tapú, ʻi he taimi naʻe tanupou ai ʻe Sihova ʻa e māmaní, ko e ngaahi foha ʻo e ʻOtuá naʻa nau “hiva fiefia fakataha” pea kamata ke nau “kalaga fakafiefia.” (Siope 38:4, 7, PM) Ko e taha ʻo e ngaahi foha fakahēvani ʻo e ʻOtuá naʻe aʻu ʻo ne maʻu ʻa e monū ke ngāue fakataha mo e ʻOtuá ʻi he fakatupu ʻo e ngaahi meʻa kehé kotoa. (Kolose 1:15-17) Ko e fakamatala fakamānako ko eni ki he ngāue fiefia ʻi hēvaní ʻe langaʻi hake nai ai ʻi ho ʻatamaí ʻa e ngaahi fehuʻi fekauʻaki mo hēvani pea mo e faʻahinga ʻo e tangatá.

Ne Fakataumuʻa ke Ō ʻa e Faʻahinga ʻo e Tangatá ki Hēvani?

Koeʻuhi naʻe tauhi ʻa e kau ʻāngeló ki he ʻOtuá ʻi hēvani ki muʻa ke tanupou ʻa e māmaní, ʻoku hā mahino ko e ʻuluaki tangatá mo e fefiné naʻe ʻikai fakatupú ke na fakakakai ʻa hēvani. ʻI hono kehé, naʻe folofola ʻa e ʻOtuá ki he ʻuluaki ongo meʻa fakaetangatá: “Mo fakatupu, mo fakatokolahi, mo fakafonu ʻa mamani.” (Senesi 1:28; Ngāue 17:26) Ko ʻĀtama ʻa e ʻuluaki ʻi ha faʻunga foʻou ʻo e moʻuí ʻi he māmaní, naʻe malava ke ne ʻiloʻi ʻa e ʻOtuá pea ke tauhi faitōnunga kiate ia. Naʻe pau ke ne hoko ko e tamai ʻa ha matakali ʻo e faʻahinga ʻo e tangatá ʻa ia ʻe hoko ʻa e māmaní ko honau ʻapi. “Ko e langi ko e langi ʻo Sihova, ka ko mamani kuo ne foaki ki he hakoʻi tangata.”—Sāme 115:16.

ʻOku ʻikai fakanatula ke fie mate ʻa e kakaí; ʻoku ʻikai ko ha meʻa fakanatula ʻa e maté ki he tangatá. Naʻe toki fakahaaʻi pē ʻe he ʻOtuá ʻe mate ʻa ʻĀtamá ko e tautea ia ʻo e talangataʻá. Kapau naʻe talangofua ʻa ʻĀtama, naʻe ʻikai ʻaupito ke ne mate.—Senesi 2:17; Loma 5:12.

ʻOku ʻikai leva fakaʻohovale ʻa e ʻikai folofola ʻa e ʻOtuá kia ʻĀtama ʻo fekauʻaki mo ha ʻalu ki hēvani. Ko ia ko e māmaní naʻe ʻikai pau ke hoko ia ko ha feituʻu ke ʻahiʻahiʻi ai ʻa e kakaí ke ʻiloʻi pe ʻoku nau taau ke ō ki hēvani. Naʻe fakatupu ʻa e tangatá ke moʻui taʻengata ʻi māmani, pea ko e taumuʻa ko ia ʻa e ʻOtuá ʻoku kei toe ke fakahoko. ʻOku talaʻofa ʻa e Tohi Tapú “ko haʻa fai totonu te nau maʻu ʻa e fonua, pea te nau nofo ai ʻo tuputupuʻa.” (Sāme 37:29) ʻOku hā mahino, naʻe ʻikai muʻaki fakataumuʻa ke ō ʻa e faʻahinga ʻo e tangatá ki hēvani. Ko e hā leva naʻe talaʻofa ai ʻe Sīsū ki heʻene kau ʻapositoló ha moʻui fakahēvaní? Naʻe ʻuhinga ʻa Sīsuú ʻe ō ʻa e kakai lelei kotoa pē ki hēvani?