ʻOku Ō ʻa e Kakai Lelei Kotoa Pē ki Hēvani?

HILI e kai fakaʻosi ʻa Sīsū mo ʻene kau ʻapositoló ʻi he efiafi ki muʻa ʻi hono tāmateʻí, naʻe talaʻofa ai ʻa Sīsū te ne fakapaleʻi kinautolu ʻaki ha nofoʻanga ʻi hēvani. Naʻá ne pehē: “ʻI he ʻapi o ʻeku Tamai ʻoku lahi ʻa e ngaahi nofoʻanga: ka ne ʻikai, pehē kuo u tala kiate kimoutolu, he ko ʻeku ʻalu ʻeni ke teuteu ha potu moʻomoutolu.” (Sione 14:2) Ko e hā ʻe ʻoange ai ʻe Sīsū ha nofoʻanga maʻanautolu ʻi hēvaní? Ko e hā te nau fai ʻi aí?

Naʻe ʻi he fakakaukau ʻa Sīsuú ha ngāue makehe maʻa ʻene kau ākongá. Lolotonga ʻa e efiafi tatau, naʻá ne pehē ai: “Ko kimoutolu ia kuo nofoʻi maʻu mo au ʻi hoku ngaahi ʻahiʻahi. Pea ko au ʻoku ou tuʻutuʻuni ha puleʻanga moʻomoutolu, ʻo hange ko e tuʻutuʻuni ha puleʻanga moʻoku ʻe heʻeku ʻEiki.” (Luke 22:28, 29) Naʻe talaʻofa ʻa e ʻOtuá kia Sīsū te ne hoko ko e Tuʻi ʻa ia te ne tokonaki mai ʻa e taha ʻo e ngaahi fiemaʻu lahi taha ʻa e faʻahinga ʻo e tangatá—ko e founga-pule lelei. ʻE fakahaofi ʻe Sīsū ʻa e kakaí mei he faingataʻá pea te ne laiki ʻa e faʻahinga ʻoku nau kākaaʻi kinautolú. Neongo ʻe maʻu ʻe Sīsū ʻa e faʻahinga ke pule ki ai ʻo aʻu “ki he ngataʻanga ʻo mamani,” ko hono taloní ʻe ʻi hēvani.—Sāme 72:4, 8; Taniela 7:13, 14.

Kae kehe, heʻikai ke pule toko taha ʻa Sīsū. Ko ia ai, naʻá ne talaʻofa ki heʻene kau ʻapositoló ha nofoʻanga ʻi hēvani. Ko kinautolu ʻa e ʻuluaki faʻahinga naʻe fili ke nau “Hau ʻi mamani” pe pule ko e ngaahi tuʻi ki he māmaní.—Fakahā 5:10.

Ko e toko fiha ʻe ō ki hēvaní? Hangē ko ia ʻi ha founga-pule pē, ko e kau pule ʻi he Puleʻanga fakahēvani ʻo e ʻOtuá ʻoku nau tokosiʻi ʻi hono fakahoa atu ki he kakai kotoa ʻoku nofo ʻi he malumalu ʻo hono mafaí. Naʻe pehē ʻe Sīsū ki he faʻahinga te nau pule fakataha mo iá: “Naʻi fanga sipi toko siʻi, ʻoua ʻe manavahe; he kuo finangalo ʻe hoʻomou Tamai ke ʻatu kiate kimoutolu ʻa e puleanga.” (Luke 12:32) Ko e “fanga sipi toko siʻi” ko iá ʻe faifai pē ʻo aʻu ʻa honau tokolahí ki he toko 144,000. (Fakahā 14:1) Ko e fika ko iá ʻoku siʻisiʻi ia ʻi hono fakahoa atu ki he laui miliona ʻa ia te nau maʻu ʻa e moʻui taʻengata ʻi he māmaní ʻi he tuʻunga ko e faʻahinga mateaki ʻe pule mai ki ai ʻa e Puleʻangá.—Fakahā 21:4.

Ko ia ai, ʻoku ʻikai ō ki hēvani ʻa e kakai lelei kotoa pē. ʻI he fekauʻaki mo e tuʻi lelei ko Tēvitá, naʻe leaʻaki mahino ʻe he ʻapositolo ko Pitá: “Talaʻehai ne ʻalu hake ʻa Tēvita ki he langi.” (Ngāue 2:34) Ko Sione Papitaisó ko ha tangata lelei. Neongo ia, naʻe fakahaaʻi ʻe Sīsū heʻikai hakeakiʻi ia ke ne pule ko ha tuʻi ʻi hēvani. “Iate kinautolu kuo fanauʻi e he fefine,” naʻe pehē ʻe Sīsū, “oku ikai tubu ha toko taha lahi hake ia Jone koe Babitaiso: . . . ka ko ia oku jii taha be i he buleaga oe lagi oku lahi ia iate ia.”—Mātiu 11:11, PM.

Te Ke Maʻu ʻa e Pale ʻo e Kakai Leleí?

Ke maʻu ʻa e pale ʻo e moʻui taʻengata ʻi he māmaní, ko e hā kuo pau ke fai ʻe ha taha? Naʻe pehē ʻe Sīsū: “He naʻe ʻofa pehe ʻa e ʻOtua ki māmāni, ko ia naʻa ne foaki hono ʻAlo tofu-pe-taha-ne-fakatupu, koeʻuhi ko ia kotoa pe ʻoku tui pikitai kiate ia ke ʻoua naʻa ʻauha, kae maʻu ʻa e moʻui taʻengata.” (Sione 3:16) Fakatokangaʻi ange ko e ʻofa ʻa e ʻOtuá ki he māmaní naʻe tataki ai ia ke ne ʻai ke ala maʻu ʻa e moʻui taʻengatá ʻe he tokotaha kotoa, ka ko e faʻahinga pē ʻoku nau “tui pikitai” te nau maʻu moʻoni ʻa e pale ko iá.

ʻOku fiemaʻu ke makatuʻunga ʻa e tuí ʻi he ʻilo totonu. (Sione 17:3) ʻE lava ke ke fakahāhaaʻi ko ha tokotaha lelei koe ʻaki hono ako ʻa e meʻa lahi ange fekauʻaki mo e taumuʻa ʻa Sihova ki he tangatá. ʻAi ke ueʻi koe ʻe he tuí ke ke fai ha meʻa. Pea fakapapauʻi ko e faingamālie ʻo e moʻui taʻengatá ʻoku ʻatā moʻoni atu ia kiate koe.

 [Puha ʻi he peesi 7]

Ko e Hā e Lau ʻa e Tohi Tapú?

Fehuʻi:

Ko e hā ʻoku hoko ki he kakai leleí ʻi heʻenau maté?

Tali:

“Ka ko e kau pekia ʻoku ʻikai te nau ʻilo ha momoʻi meʻa.”—KOHELETI 9:5.

Fehuʻi:

Ko e hā ʻa e ʻamanaki ʻoku maʻu ʻe he kakai leleí ki he kahaʻú?

Tali:

“ʻOku ʻunu mai ha taimi, ʻa ia ʻe fanongo ai ki hono leʻo [ʻo Sīsuú] ʻe he kakai kotoa pe ʻoku ʻi he ngaahi faʻitoka, pea te nau ʻalu atu mei ai.”—SIONE 5:28, 29.

Fehuʻi:

ʻE nofo ʻi fē ʻa e tokolahi taha ʻo e kakai leleí?

Tali:

“Ko haʻa fai totonu te nau maʻu ʻa e fonua, pea te nau nofo ai ʻo tuputupuʻa.”—SĀME 37:29.