ʻUnuʻunu Ofi ki he ʻOtuá

Ko ha Tauhi-Sipi Tokanga

Mātiu 18:12-14

‘ʻOKU tokanga mai ʻa e ʻOtuá kiate au?’ Kapau kuo faifai ange peá ke ʻeke kiate koe ʻa e foʻi fehuʻi ko iá, ʻoku ʻikai ko koe pē kuó ke ʻeke iá. Kuo fehangahangai ʻa e tokolahi ʻiate kitautolu mo e ngaahi faingataʻa mo e palopalema, pea ʻoku tau fifili nai he taimi ʻe niʻihi pe ʻoku tokanga mai kiate kitautolu ʻa e Tokotaha-Fakatupu ʻo e ʻuniveesi kāfakafa ko ení. ʻOku fiemaʻu ke tau ʻiloʻi eni, ʻOku tokanga mai ʻa e ʻOtua ko Sihová kiate kitautolu tāutaha? ʻI heʻene ʻi māmaní, ko Sīsū, ʻa ia ʻokú ne ʻiloʻi lelei taha ʻa Sihová, naʻá ne fai ha talanoa fakatātā ʻoku fakahaaʻi ai ʻa e tali fakalotomāfana.

ʻI hono fakatātāʻaki ʻa e moʻui moʻoni ʻa ha tauhi-sipí, naʻe pehē ʻe Sīsū: “Ka ne maʻu ʻe ha tangata ha sipi ʻe teau, pea hē hanau taha, ʻikai te ne tuku ʻa e toko hivangofulu ma hiva ʻi he moʻunga, ka ka ʻalu ke kumi ʻa ia kuo he? Pea kapau ʻe faifai pea ne ʻilo ia, ko au e, ʻoku ou tala atu, ʻoku ʻangeʻange ʻene fiefia ʻi he hivangofulu ma hiva naʻe ʻikai hē ʻi he foʻi sipi ko ia. Pehe, ʻoku ʻikai ko e tuʻutuʻuni ʻa hoʻomou Tamai ʻoku ʻi Hevani ke mole ha toko taha ʻi he fanga kiʻi sipi ni.” (Mātiu 18:12-14) Tau sio angé ki he anga hono fakamatalaʻi ʻe Sīsū ʻa e tokanga ʻofa ʻa Sihova ki Heʻene kau lotú tāutaha.

Naʻe ongoʻi ʻe he tauhi-sipí ʻoku ʻi ai hono fatongia ki heʻene sipi taki taha. Kapau naʻe hē ha sipi, naʻá ne ʻiloʻi ʻa e sipi naʻe molé. Naʻá ne ʻiloʻi ʻa e sipi taki taha ʻi honau hingoa naʻá ne uiʻakí. (Sione 10:3) Ko e tauhi-sipi tokangá heʻikai te ne mālōlō kae ʻoua kuo foki ʻa e sipi naʻe heé ki he tākangá. ʻI he ʻalu ʻo kumi ki he sipi heé, naʻe ʻikai te ne tuku ke hoko ha fakatuʻutāmaki ki he sipi ʻe 99 naʻe toé. Naʻe faʻa nofo fakataha ʻa e kau tauhi-sipí, ʻo lava ke fio ai ʻa e fanga sipi heʻenau ngaahi tākangá. a Ko ia ko e tauhi-sipi ʻoku mavahe ʻo kumi ha sipi heé naʻe lava ke ne tuku fakataimi ʻa e toenga ʻo ʻene fanga sipí ke tokangaʻi ʻe hono kaungā tauhi-sipí. ʻI hono maʻu ʻa e sipi heé ʻoku ʻikai laveá, ʻe fiefia ai ʻa e tauhi-sipí. ʻI hono fua ʻi hono umá ʻa e sipi ʻoku manavaheé, ʻokú ne fakafoki ia ki he tuʻunga malu mo hao ʻo e tākangá.—Luke 15:5, 6.

ʻI hono ngāueʻaki ʻo e talanoa fakatātaá, naʻe pehē ai ʻe Sīsū, ko e ʻOtuá ʻoku ʻikai te ne finangalo ke “mole ha toko taha ʻi he fanga kiʻi sipi ni.” Ki muʻa ange, naʻe fakatokanga ai ʻa Sīsū ki heʻene kau ākongá fekauʻaki mo hono fakatūkiaʻi “ha taha ʻi siʻi tamaiki ni ʻoku tui kiate [iá].” (Mātiu 18:6) Ko e hā leva ʻoku akoʻi mai kiate kitautolu ʻe he talanoa fakatātā ʻa Sīsū fekauʻaki mo Sihová? Ko ha Tauhi-Sipi ia ʻoku tokanga lahi fekauʻaki mo ʻene sipi taki taha ʻo kau ai ʻa e “fanga kiʻi sipi”—ʻa e faʻahinga ʻoku hā ngali siʻi honau mahuʻingá ʻi he vakai ʻa e māmaní. ʻIo, ʻi he vakai mai ʻa e ʻOtuá ko ʻene kau lotú taki taha ʻoku nau makehe mo mahuʻinga.

Kapau ʻokú ke fakaʻamu ke fakapapauʻi ʻokú ke mahuʻinga ki he ʻOtuá, fēfē ke ke ako lahi ange fekauʻaki mo e Tauhi-Sipi Lahí, ʻa Sihova ko e ʻOtuá, mo e founga ʻe lava ke ke ʻunuʻunu ofi ange ai kiate iá? ʻI he fai peheé, te ke hoko leva ai ʻo falala pau hangē ko e ʻapositolo ko Pitá, ʻa ia ʻoku ʻikai ha veiveiua naʻá ne fanongo tonu ki he talanoa fakatātā ʻa Sīsū fekauʻaki mo e sipi naʻe molé. Naʻe tohi ʻa Pita ki mui: “Mou li atu ā hono kotoa ʻo hoʻomou lotomoʻua ki he ʻEne ʻAfio; he ʻoku ne mamahiʻi kimoutolu.”—1 Pita 5:7.

[Fakamatala ʻi lalo]