1, 2. Ko e hā naʻe fai ʻe he ʻOtuá ʻi he taimi ʻo e Tohi Tapú, pea ko e ha nai ʻoku fifili ki ai ʻa e niʻihi ʻi he taimi ʻoku nau puke aí?

 KAPAU ʻe faifai ange peá ke puke lahi ʻaupito, te ke ʻeke nai: “Te u toe sai koā? Pe mahalo ʻoku puke ha mēmipa ʻi he fāmilí pe ko ha kaumeʻa pea ʻokú ke fifili pe te ne toe sai koā. ʻOkú ke loto maʻu pē ke ke moʻui lelei mo e kakai ʻokú ke ʻofa aí. ʻI he Tohi Tapú, ʻoku tau lau ai ʻo fekauʻaki mo e niʻihi naʻa nau puke pea nau loto ke ʻilo pe te nau toe sai koā. Ko e fakatātaá, ko Tuʻi ʻAhasaia foha ʻo ʻĒhapi mo Sisipelí, naʻá ne fifili pe ʻe toe sai hono puké. Pea ki mui ai, naʻe puke ʻa Tuʻi Peni-hetati ʻo Sīliá peá ne ʻeke pe te ne toe sai koā.—2 Tuʻi 1:2; 8:7, 8.

² ʻOku toe tala mai ʻe he Tohi Tapú ʻi he kuohilí naʻe fakamoʻui fakaemana ʻe Sihova ʻi he taimi ʻe niʻihi ha kakai pea aʻu ʻo ngāueʻaki ʻene kau palōfitá ke fokotuʻu ha niʻihi mei he maté. (1 Tuʻi 17:17-24; 2 Tuʻi 4:17-20, 32-35) ʻI he ʻahó ni, ʻoku fifili ʻa e kakai ʻe niʻihi ʻoku puké pe ʻe toe fai ʻe he ʻOtuá ha meʻa ke nau sai ai.

3-5. Ko e hā ʻe lava ke fai ʻe Sihova mo Sīsuú, pea ko e hā ʻa e ongo fehuʻi te tau lāulea ki aí?

³ ʻOku kaunga ʻa e mālohi ʻo Sihová ki he moʻui ʻa e kakaí. Naʻá ne  tauteaʻi ʻa e niʻihi ʻaki ʻa e mahaki, ʻo hangē ko Felo ʻi he taimi ʻo ʻĒpalahamé pea ki mui ai ko Meliame, ʻa e tuofefine ʻo Mōsesé. (Sēn. 12:17; Nōm. 12:9, 10; 2 Sām. 24:15) Pea naʻá ne tauteaʻi ʻa e kau ʻIsilelí ʻaki ʻa e ‘gaahi mahaki moe gaahi tautea’ ʻi he taimi naʻa nau taʻefaitōnunga ai kiate iá. (Teu. 28:58-61, PM) ʻI he taimi ʻe taha, naʻe maluʻi ʻe Sihova hono kakaí mei he puké. (ʻEki. 23:25; Teu. 7:15) Naʻe aʻu ʻo ne fakamoʻui ha niʻihi ʻo kinautolu. Ko e fakatātaá, naʻá ne fakamoʻui ʻa Siope ʻi he taimi naʻá ne puke lahi ai peá ne loto ke maté.—Siope 2:7; 3:11-13; 42:10, 16.

⁴ ʻOku tau fakapapauʻi ai ʻoku maʻu ʻe Sihova ʻa e mālohi ke ne fakamoʻui ʻa e faʻahinga ʻoku puké. Ko Sīsū foki ʻoku lava ke ne fakamoʻui ʻa e kau puké. ʻI he taimi naʻá ne ʻi māmani aí, naʻá ne fakamoʻui ʻa e faʻahinga naʻe kilia pe mahakimoá. Naʻá ne fakaʻā ʻa e kakai naʻe kuí mo fakamoʻui ʻa e faʻahinga naʻe mamateá. (Lau ʻa e Mātiu 4:23, 24; Sione 9:1-7) ʻOku tokoniʻi kitautolu ʻe he ngaahi mana ko ení ke tau fakatuʻotuʻa atu ki he ngaahi meʻa fakaofo ʻe fai ʻe Sīsū ʻi he māmani foʻoú. ʻI he taimi ko iá, heʻikai “ha nofo ai te ne pehe, ʻOku ou mahaki.”—ʻAi. 33:24.

⁵ Ka ʻo kapau te tau puke lahi, te tau ʻamanekina ke fakamoʻui fakaemana kitautolu he taimí ni ʻe Sihova pe Sīsū? Pea ko e hā ʻoku totonu ke tau fakakaukau ki ai fekauʻaki mo hono fili ha faitoʻó?

6. Ko e hā ʻoku fakahaaʻi ʻe he Tohi Tapú ʻo fekauʻaki mo e ngaahi mana naʻe fakahoko ʻe he kau Kalisitiane ʻi he ʻuluaki senitulí?

⁶ ʻI he ʻuluaki senitulí, naʻe pani ai ʻe Sihova ʻa e kau Kalisitiané ʻaki ʻa e laumālie māʻoniʻoní pea ʻoange ki he niʻihi ʻo kinautolu ʻa e malava ke fakahoko ha ngaahi mana. (Ngā. 3:2-7; 9:36-42) Ko e fakatātaá, naʻe lava ke nau fakamoʻui ʻa e kakaí mo nau lea ʻi he ngaahi lea kehekehe. (1 Kol. 12:4-11) Ka ki mui ai naʻe ngata ʻa e ngaahi mana ko ení, ʻo hangē ko ia naʻe fakahaaʻi ʻe he Tohi Tapú. (1 Kol. 13:8) Ko ia, ʻi he ʻahó ni ʻoku ʻikai lava ke tau ʻamanekina ʻe fakamoʻui fakaemana kitautolu ʻe he ʻOtuá pe ko hotau ngaahi ʻofaʻangá.

7. ʻOku anga-fēfē hono fakalototoʻaʻi kitautolu ʻe he Saame 41:3?

⁷ Ka ʻo kapau ʻokú ke puke, ʻe fakafiemālieʻi mo poupouʻi koe ʻe Sihova ʻo hangē ko ia naʻá ne fai ki heʻene kau sevāniti ʻi he kuohilí. Naʻe tohi ʻe Tuʻi Tēvita: “Monuʻiaa ka ko ia ʻoku ne tokaʻi ʻa e tuʻutamaki: Ka hoko ʻa e ʻaho kovi ʻe fakahaofi ia ʻe he ʻEiki. ʻE tauhi ʻe Sihova mo fakamoʻui.” (Saame 41:1, 2) Ko e moʻoni, naʻe ʻikai ʻuhinga ʻa Tēvita ia heʻikai ʻaupito mate ha tokotaha lelei naʻá ne tokaʻi ʻa e tuʻutāmakí, ʻa ia naʻe moʻui ʻi he taimi ko iá. Ko ia, ʻe anga-fēfē hono tokoniʻi ʻe Sihova ʻa e tokotaha lelei ko iá? Naʻe fakamatalaʻi ʻe Tēvita: “Ko Sihova te ne poupou ia ʻi he tokaʻanga, heʻene ngaluvai: ʻOku ke fakalelei hono mohenga kotoa heʻene mahaki.” (Saame 41:3) ʻOku ʻiloʻi lelei ʻe Sihova ʻa e meʻa ʻoku faingataʻaʻia ai ʻene kau sevānití, pea ʻoku ʻikai ke ngalo kinautolu ʻiate ia. ʻOku lava ke ne ʻoange kia kinautolu ʻa e loto-toʻa mo e poto. Kuo ngaohi foki ʻe Sihova ʻa e sino ʻo e tangatá ʻi ha founga ʻe lava ke moʻui pē ʻiate ia.

8. Fakatatau ki he Saame 41:4, ko e hā naʻe kole ʻe Tēvita kia Sihova ʻi he taimi naʻá ne puke lahi aí?

⁸ ʻI he Saame 41, ʻoku toe fakahaaʻi mai ai ʻe Tēvita ʻa e taimi naʻá ne puke lahi aí peá ne ongoʻi vaivai mo loto-moʻuá. ʻOku hā ngali ko e taimi ko iá, naʻe feinga hono foha ko ʻApisalomé ke ne hoko ko e tuʻi kae ʻikai ko ia. Naʻe puke lahi ʻa Tēvita ʻo ʻikai lava ke ne taʻofi ʻa ʻApisalome. Naʻá ne ʻiloʻi ko ʻene ngaahi palopalema fakafāmilí ko e nunuʻa ia ʻo ʻene faiangahala mo Patisepá. (2 Sām. 12:7-14) Ko ia, ko e hā naʻá ne faí? Naʻá ne lotu: “Aloʻofa mai, ʻe  Sihova: Faitoʻo hoku laumalie, he kuo u angahala ki he ʻAfiona.” (Saame 41:4) Naʻe ʻilo ʻe Tēvita kuo fakamolemoleʻi ʻe Sihova ʻene angahalá, pea naʻá ne falala ki he ʻOtuá ki ha tokoni lolotonga ʻene puké. Ka naʻe ʻamanekina ʻe Tēvita ha mana meia Sihova?

9. (a) Ko e hā naʻe fai ʻe Sihova maʻa Tuʻi Hesekaiá? (e) Ko e hā naʻe ʻamanekina ʻe Tēvita meia Sihová?

⁹ Ko e moʻoni, ʻi he taimi ʻe niʻihi naʻe fili ʻe he ʻOtuá ke ne fakamoʻui ha kakai. Ko e fakatātaá, ʻi he taimi naʻe mei mate ai ʻa Tuʻi Hesekaiá, naʻe fakamoʻui ia ʻe Sihova. Naʻe moʻui atu ʻa Hesekaia ʻi ha toe taʻu ʻe 15. (2 Tuʻi 20:1-6) Ka naʻe ʻikai ʻamanekina ʻe Tēvita ha mana. ʻI hono kehé, naʻá ne ʻamanekina ke tokoniʻi ia ʻe he ʻOtuá ʻi he founga tatau ʻoku tokoniʻi ai ʻe he ʻOtuá ha taha “ʻoku ne tokaʻi ʻa e tuʻutamaki.” Naʻe maʻu ʻe Tēvita ʻa e vahaʻangatae lelei mo Sihova, ko ia naʻe malava ai ke ne kole kia Sihova ke fakafiemālieʻi mo tokangaʻi ia lolotonga ʻene puké. Naʻá ne toe kole ke vave ha taimi ke moʻui lelei ange ai. ʻE lava ke tau kole kia Sihova ke ne tokoniʻi kitautolu ʻi he founga tatau.—Saame 103:3.

10. Ko e hā naʻe hoko kia Talofima mo ʻEpafalotaitó, pea ko e hā ʻoku akoʻi mai heni kia kitautolú?

¹⁰ ʻI he ʻuluaki senitulí, naʻe ʻikai ke fakamoʻui fakaemana ʻa e kau Kalisitiane kotoa pē neongo naʻe malava ʻe he ʻapositolo ko Paulá mo e niʻihi kehé ke fakamoʻui ʻa e puké. (Lau ʻa e Ngāue 14:8-10.) Naʻe fakamoʻui ʻe he ʻapositolo ko Paulá ʻa e tamai ʻa Pōpilioó ʻa ia naʻe puke lahi ʻaupito ʻo kau ai mo e mofí. Naʻe fai ʻe Paula ha “lotu, pea hilifaki hono ongo nimá kiate ia ʻo fakamoʻui ia.” (Ngā. 28:8) Ka naʻe ʻikai ke fakamoʻui ʻe Paula ʻa e tokotaha kotoa pē naʻá ne ʻiloʻí. Ko e taha ʻi hono ngaahi kaumeʻá, ko Talofima ʻa ia naʻá ne fononga fakataha mo Paula ʻi he ngāue fakamisinalé. (Ngā. 20:3-5, 22; 21:29) ʻI he taimi naʻe puke ai ʻa Talofimá, naʻe ʻikai ke fakamoʻui ia ʻe Paula. Ko ia, naʻe pau ke nofo ʻa Talofima ʻi Mīleto kae ʻoua ke ne sai ange, ʻo ʻikai ai toe fononga mo Paula. (2 Tīm. 4:20) Ko ha toe kaumeʻa ʻe taha ʻo Paula ko ʻEpafalotaito ʻa ia naʻá ne puke ʻo mei mate. Ka ʻoku ʻikai fakahaaʻi ʻe he Tohi Tapú pe naʻe fakamoʻui ia ʻe Paula.—Fil. 2:25-27, 30.

11, 12. Ko e hā ʻoku tau ʻilo fekauʻaki mo Luké, pea naʻe anga-fēfē nai ʻene tokoni kia Paulá?

¹¹ Ko Luké ko ha toketā, pea naʻá ne fononga holo mo Paula. (Ngā. 16:10-12; 20:5, 6; Kol. 4:14) Ngalingali naʻá ne tokoni kia Paula mo e niʻihi kehé ʻi he taimi naʻa nau puke ai lolotonga ʻenau fononga fakamisinalé. (Kal. 4:13) Hangē ko ia naʻe leaʻaki ʻe Sīsuú, ko e “faʻahinga ʻoku puké” ʻoku fiemaʻu ki ai ha toketā.—Luke 5:31.

¹² Naʻe ʻikai ko ha tokotaha ʻa Luke naʻe saiʻia pē ke ne ʻoatu ʻa e faleʻi fekauʻaki mo e moʻui leleí. Naʻá ne ako ke hoko ko ha toketā. ʻOku ʻikai fakahaaʻi mai ʻi he Tohi Tapú pe ko fē ʻa e feituʻu pe taimi naʻá ne ako toketā aí. Ka ʻoku fakahaaʻi mai ai naʻe ʻave ʻe Paula ʻa e ʻofa ʻa Luke ki he kau Kolosé. Ko ia, ʻoku pau pē naʻe ako ʻa Luke ʻi he ʻapiako fakafaitoʻo ʻi Leotisia, ko ha kolo ofi ki Kolose. Pehē foki, ʻi he taimi naʻe tohi ai ʻe Luke ʻene Kōsipelí mo e tohi ʻa Ngāué, naʻá ne ngāueʻaki ʻa e ngaahi foʻi lea fakafaitoʻo ʻe niʻihi. Koeʻuhí ko ha toketā ia, naʻá ne fakakau ʻa e ngaahi talanoa fekauʻaki mo e taimi naʻe fakamoʻui ai ʻe Sīsū ʻa e kakaí.

13. Ko e hā kuo pau ke tau manatuʻi ki muʻa ke tau ʻoatu pe tali ha faleʻi fekauʻaki mo e moʻui leleí?

¹³ ʻI he ʻahó ni, ʻoku ʻikai lava ʻe ha taha ʻi hotau fanga tokouá ke fakahoko ha ngaahi mana mo fakamoʻui kitautolu. Ka koeʻuhí ko ʻenau loto ke tokoniʻi kitautolú, ʻoku ʻomai ai ʻe he niʻihi ha ngaahi faleʻi neongo ʻoku ʻikai ke tau kole ia. Ko hono moʻoní, ʻoku ʻikai ke hala ʻa e ngaahi fokotuʻu ʻe niʻihi. Ko e fakatātaá, naʻe fokotuʻu ange ʻe Paula kia Tīmote ke ne inu ha meʻi uaine. Naʻe mahaki kete ʻa Tīmote,  mahalo naʻá ne inu ha vai naʻe ʻikai maʻa. a (Lau ʻa e 1 Tīmote 5:23.) Ka ʻoku fiemaʻu ke tau tokanga. ʻE feinga nai ha tokoua ke fakatuipauʻi kitautolu ke ngāueʻaki ha faitoʻo pau pe ʻakau faitoʻo pe ko hono kai pe fakaʻehiʻehi mei ha meʻakai pau. Te ne tala mai nai kia kitautolu naʻe sai ha tokotaha ʻi hono fāmilí naʻá ne maʻu ʻa e palopalema tatau. Ka ʻoku ʻikai ʻuhinga ai hení te tau sai ai mo kitautolu. Kuo pau ke tau manatuʻi naʻa mo hono ngāueʻaki ʻe he kakai tokolahi ha faitoʻo, ʻe kei malava nai ke ne fakatupunga ha palopalema lahi.—Lau ʻa e Palōveepi 27:12.

14, 15. (a) Ko e hā ʻoku totonu ai ke tau tokanga fekauʻaki mo hakakai ʻe niʻihi? (e) Ko e hā ʻe lava ke tau ako mei he Palōveepi 14:15?

¹⁴ ʻOku tau fiemaʻu kotoa ke tau hoko ʻo moʻui lelei koeʻuhí ke tau lava ʻo fiefia ʻi he moʻuí pea ngāue mālohi ai kia Sihova. Ka ʻoku tau taʻehaohaoa, ko ia heʻikai lava ke tau fakaʻehiʻehi ai mei he mahaki kotoa pē. ʻI he taimi ʻoku tau puke aí, ʻoku lahi ʻa e ngaahi faitoʻo kehekehe pea kuo tau maʻu ai ʻa e totonu ki he meʻa ke tau talí. Ko e meʻa pangó, ʻoku pehē ʻe he kakai ʻe niʻihi mo e ngaahi kautahá kuo nau maʻu ʻa e faitoʻo te ne fakamoʻui hotau ngaahi mahakí. ʻOku nau fai iá koeʻuhí ko ʻenau fiemaʻu ha paʻanga lahi. ʻOku nau pehē nai naʻe ngāueʻaki ʻe he kakai tokolahi ʻa e faitoʻo ko iá pea naʻa nau sai ai. Pea kapau te tau puke, te tau loto nai ke ʻahiʻahiʻi ha meʻa pē te ne lava ke tokoniʻi kitautolu ke tau moʻui lelei ange mo moʻui fuoloa ange. Ka kuo pau ke ʻoua ʻaupito naʻa ngalo ʻa e faleʻi ʻi he Folofola ʻa e ʻOtuá: “Ko e hehemangofua ʻoku ne tui ki he lea kotoa: Ka ko e fakapotopoto ʻoku ne fakakaukau ʻene laka.”—Pal. 14:15.

¹⁵ Kapau te tau fakapotopoto, te tau tokanga fekauʻaki mo e meʻa ʻoku tau tui ki aí tautefito kapau ko e tokotaha ʻokú ne ʻomai ʻa e faleʻí naʻe ʻikai akoʻi totonu ia ki ai. ʻE lava ke tau ʻeke hifo: ‘ʻOkú ne pehē naʻe tokoniʻi ʻa e kakaí ʻe ha vaitamini, ʻakau faitoʻo, pe kai fakaholo ko ení, ka ʻoku ou ʻiloʻi papau naʻe tokoniʻi moʻoni kinautolu? Neongo kapau kuó ne tokoniʻi ʻa e niʻihi kehé, anga-fēfē ʻeku ʻiloʻi ʻe tokoni ia kiate au? ʻOku totonu ke u fai ha fekumi lahi ange pea talanoa ki he niʻihi ko ia kuo akoʻi lelei ki he tafaʻaki ko iá ke nau tokoni ki hoku puké?’—Teu. 17:6.

16. Ko e hā ʻoku totonu ke tau fakakaukau ki ai ʻi he taimi ʻoku tau fai ai ha fili fekauʻaki mo ʻetau moʻui leleí?

¹⁶ ʻI he taimi ʻoku tau fai ai ha fili pe ko e hā ʻa e sivi pe faitoʻo ke tau talí, ʻoku fiemaʻu ke tau maʻu ʻa e “fakakaukau leleí” pe ngāueʻaki ʻa e fakafuofua lelei. (Tai. 2:12) ʻOku mātuʻaki mahuʻinga eni koeʻuhí kapau ʻoku hā foʻou ʻaupito ʻa e siví pe faitoʻó. ʻOku lava ʻe he tokotaha ʻoku tau talatala ki aí ʻo fakamatalaʻi ʻa e anga ʻo e ngāue ʻa e siví pe faitoʻó? ʻOku ngalikehe ʻa e fakamatalá? ʻOku loto-tatau ʻa e kau toketā tokolahi ʻe lava ʻe he sivi pe faitoʻo ko ení ʻo fakamoʻui ʻa e kakaí? (Pal. 22:29) Mahalo ʻe tala mai ʻe ha taha kuo ʻiloʻi ʻa e ʻaonga ʻo e faitoʻo foʻoú ʻi ha feituʻu mamaʻo pea ʻoku teʻeki ke ʻiloʻi ia ʻe he kau toketā ko iá. Ka kuo ʻi ai ha fakamoʻoni pau kuo moʻui ai ha taha? ʻOku aʻu ʻo ʻoatu ʻe he niʻihi ha ngaahi faitoʻo ʻoku fakapulipuli ʻa e meʻa naʻe ngaohiʻakí pe mei ha mālohi taʻehāmai. ʻE lava ke mātuʻaki fakatuʻutāmaki eni. Manatuʻi, ʻoku fakatokanga mai ʻa e ʻOtuá ke ʻoua te tau ngāueʻaki ʻa e ngaahi mālohi mahulu hake ʻi natulá pe faimaná.—Teu. 18:10-12; ʻAi. 1:13.

17. Ko e hā ʻa e holi fakanatula ʻoku tau maʻú?

¹⁷ Naʻe ʻoatu ʻe he kulupu pule ʻi he ʻuluaki senitulí ha tohi ki he fanga tokoua ʻi he ngaahi  fakatahaʻangá, ke fakahaaʻi kia kinautolu ʻa e ngaahi meʻa ʻe niʻihi kuo pau ke nau fakaʻehiʻehi mei aí. ʻI he ngataʻanga ʻo e tohí, naʻe tohi ai ʻe he kulupu pulé: “Kapau te mou mātuʻaki tauhi kimoutolu mei he ngaahi meʻá ni, te mou lakalakaimonū. ʻOfa atu kiate kimoutolu!” (Ngā. 15:29) ʻI he ngaahi lea ʻe niʻihi, ko e kupuʻi lea fakaʻosi ʻi he veesi ko ení kuo liliu ia ʻo ngāueʻaki ko e “ʻOfa atu kiate kimoutolu,” pea ʻe toe lava ke ʻuhinga ia ke “mou mālohi.” ʻOku tau loto moʻoni ke lakalakaimonū ʻi he “moʻui lelei” pea mālohi ʻi heʻetau tauhi ki hotau ʻOtuá.

18, 19. Ko e hā ʻe lava ke tau fakatuʻotuʻa atu ki ai ʻi he māmani foʻoú?

¹⁸ Koeʻuhí ko ʻetau taʻehaohaoá, heʻikai lava ke tau fakaʻehiʻehi mei he mahamahaki kotoa pē. Pea ʻi he taimi ʻoku tau puke aí, ʻoku ʻikai te tau ʻamanekina ke fakamoʻui fakaemana kitautolu ʻe Sihova. Ka ʻoku lava ke tau fakatuʻotuʻa atu ki he kahaʻú ʻi he taimi ʻe fakamoʻui kakato ai kitautolu ʻe he ʻOtuá. ʻI he Fakahā 22:1, 2, naʻe fakamatala ai ʻa e ʻapositolo ko Sioné ʻo fekauʻaki mo e “vai ʻo e moʻuí” mo e “ngaahi ʻuluʻakau ʻo e moʻuí” ʻa ia ʻe fakamoʻui ai ʻa e tokotaha kotoa. ʻOku ʻikai ʻuhinga eni ia ki ha ʻakau faitoʻo ʻe lava ke tau ngāueʻaki ke fakamoʻui kitautolu ʻi he ʻahó ni pe ʻi he māmani foʻoú. Ka ʻoku ʻuhinga ia ki he meʻa ʻe fakahoko kotoa ʻe Sihova mo Sīsū koeʻuhí ke tau lava ai ʻo moʻui taʻengata.—ʻAi. 35:5, 6.

¹⁹ ʻOku tau fakatuʻotuʻa atu ki he taimi fakaofo ko iá. Ka ʻi he taimí ni, ʻoku tau fakapapauʻi ʻa e ʻofa ʻa Sihova ʻiate kitautolu taki taha pea ʻokú ne mahinoʻi ʻa e anga ʻo ʻetau ongoʻí ʻi he taimi ʻoku tau faingataʻaʻia aí. Hangē ko Tēvitá, ʻoku tau tuipau kapau te tau puke heʻikai liʻaki kitautolu ʻe Sihova. Te ne tokangaʻi maʻu pē ʻa e faʻahinga ʻoku faitōnunga kiate iá.—Saame 41:12.