1. Koeʻuhi naʻe fakatupu kitautolu ʻi he ʻīmisi ʻo e ʻOtuá, ko e hā ʻa e malava ʻoku tau maʻú?

 “ʻOKÚ KE hangē tofu pē ko hoʻo tamaí,” ko e meʻa ia ʻoku leaʻaki ʻe he kakai tokolahi fekauʻaki mo e fānau ʻoku nau meimei tatau mo ʻenau mātuʻá. He ko ē, ʻoku maʻu ʻe he kiʻi tama kotoa ʻa e ngaahi ʻulungaanga mei heʻene tamaí pea mei heʻene faʻeé. Ko Sihova, ʻa ʻetau Tamai fakahēvaní, ko e Tokotaha-Foaki moʻuí ia. (Saame 36:9) ʻI he tuʻunga ko ʻene fānau fakaetangatá, ʻoku tau meimei tatau mo ia ʻi he ngaahi founga lahi. Koeʻuhi naʻe fakatupu kitautolu ʻi hono “imisi,” ʻoku tau maʻu ai ʻa e malava ke fakaʻuhinga, fai ʻa e ngaahi fili pea mo fakatupulekina ha ngaahi vahaʻangatae vāofi.—Sēn. 1:26.

2. ʻE lava fēfē ke hoko ʻa Sihova ko hotau Kaumeʻa lelei tahá?

² ʻE lava ke hoko ʻa Sihova ko hotau Kaumeʻa lelei tahá. ʻOku malava ʻa e vahaʻangatae peheé koeʻuhí ko e ʻofa ʻa e ʻOtuá ʻia kitautolú mo ʻetau tui kiate ia mo hono ʻAló. Naʻe pehē ʻe Sīsū: “Naʻe ʻofa lahi ʻaupito ʻa e ʻOtuá ki he māmaní ʻo ne foaki ai hono ʻAlo tofu-pē-taha-ne-fakatupú, koeʻuhi ko e tokotaha kotoa pē ʻokú ne ngāueʻi ʻa e tui kiate iá ke ʻoua naʻa ʻauha ka ne maʻu ʻa e moʻui taʻengatá.” (Sione 3:16) Naʻe ʻi ai ʻa e kakai tokolahi naʻa nau maʻu ha vahaʻangatae vāofi mo Sihova. Tau lāulea angé ki ha toko ua ʻo kinautolu.

3, 4. Ko e hā naʻá ne ʻai ke kehe ʻa e vahaʻangatae ʻo ʻĒpalahame mo Sihová mei he vahaʻangatae ʻo ʻIsileli mo Iá?

³ Naʻe fakamatalaʻi ʻe Sihova ʻa e tamai ʻa e kau ʻIsilelí ko  “Epalahame ko hoku takanga.” (ʻAi. 41:8) ʻOku toe ui ʻe he 2 Kalonikali 20:7 ʻa ʻĒpalahame ko ha kaumeʻa ʻo e ʻOtuá. Ko e hā naʻá ne ʻai ke malava kia ʻĒpalahame ke ne maʻu ha vahaʻangatae vāofi pehē mo hono Tokotaha-Fakatupú? Ko e tui mālohi ʻa ʻĒpalahamé.—Sēn. 15:6; lau ʻa e Sēmisi 2:21-23.

⁴ Ko e ngaahi hako ʻo ʻĒpalahame ʻa ia naʻa nau hoko ko e puleʻanga ʻo ʻIsileli ʻo e kuonga muʻá naʻa nau toe ʻai ʻa Sihova ko ʻenau Tamai mo e Kaumeʻa. Ko e meʻa fakamamahí, ʻi he faai atu e taimí naʻe mole honau vahaʻangatae mo e ʻOtuá. Ko e hā hono ʻuhingá? Koeʻuhi naʻe mole ʻenau tui ki he ngaahi talaʻofa ʻa Sihová.

5, 6. (a) Kuo anga-fēfē hoko ʻa Sihova ko ho Kaumeʻá? (e) Ko e hā ʻa e ongo fehuʻi ʻoku totonu ke tau ʻeke hifo kia kitautolú?

⁵ Ko e lahi ange hoʻo ako fekauʻaki mo Sihová, ko e mālohi ange ia hoʻo tui kiate iá, mo e loloto ange hoʻo ʻofa kiate iá. Fakakaukau atu ki he taimi naʻá ke ʻuluaki ako ai ko e ʻOtuá ko ha Tokotaha moʻoni pea ʻe lava ke ke hoko ko hono kaumeʻa ofí. Naʻá ke ako ko kitautolu kotoa kuo tau maʻu tukufakaholo ʻa e angahalá koeʻuhi ko e talangataʻa ʻa ʻĀtamá. Naʻá ke toe mahinoʻi ko e faʻahinga ʻo e tangatá ʻi he tuʻunga fakalūkufuá ʻoku ʻikai ke nau melino mo e ʻOtuá. (Kol. 1:21) Peá ke ʻiloʻi leva ko ʻetau Tamai fakahēvani ʻofá ʻoku ʻikai ko ha tokotaha ia ʻoku mamaʻo mo ʻikai mahuʻingaʻia ʻia kitautolu. ʻI he taimi naʻa tau ako ai naʻe feilaulauʻi ʻe Sihova hono ʻAló pea kamata ke tau tui ki he feilaulau huhuʻí, naʻa tau kamata ai ke fakatupulekina ha vahaʻangatae mo e ʻOtuá.

⁶ ʻI he taimi ʻoku tau fakakaukau ai fekauʻaki mo e founga naʻa tau haʻu ai ke ʻiloʻi ʻa Sihová, ʻoku totonu ke tau ʻeke hifo: ‘ʻOku ou feinga ke fakalakalaka hoku vahaʻangatae mo e ʻOtuá? ʻOku mālohi ʻeku falala kia Sihová, pea tupulaki ʻeku ʻofa kiate iá ʻi he ʻaho taki taha?’ Ko e taha ʻo e ngaahi kaumeʻa ofi ʻo e ʻOtuá ko Kitione. Tau lāulea he taimí ni fekauʻaki mo ia koeʻuhi ke tau lava ʻo muimui ʻi heʻene faʻifaʻitakiʻangá.

7-9. (a) Ko e hā ʻa e hokosia fakaofo naʻe maʻu ʻe Kitioné, pea ko e hā ʻa e olá? (Sio ki he ʻuluaki fakatātā ʻi he kupú ni.) (e) ʻE lava fēfē ke tau hoko ko e kaumeʻa ʻo e ʻOtuá?

⁷ Naʻe tauhi kia Sihova ʻa Fakamaau Kitione lolotonga ha taimi faingataʻa hili e hū ʻa e kau ʻIsilelí ki he Fonua ʻo e Talaʻofá. Naʻe hoko ʻa e kau Mitianí ko ha fakamanamana ki ʻIsileli pea naʻa nau toutou ʻohofi honau fonuá. ʻI he ʻuhinga ko iá, naʻe haha uite ʻa Kitione ʻi ha tataʻoʻanga uaine kae ʻikai ʻi ha loto ʻataʻatā koeʻuhí ke lava ke ne fūfuuʻi fakavave ʻa e ngaahi uite leleí. ʻOku pehē ʻe he Fakamaau vahe 6 naʻe ʻaʻahi ʻa e ʻāngelo ʻa Sihová kia Kitione ʻi ʻŌfila. Naʻe ʻohovale ʻa Kitione ʻi he hā ange ʻa e ʻāngeló pea ui ia ko ha “toʻa.” Neongo naʻe fakahaofi ʻe Sihova ʻa e kau ʻIsilelí mei ʻIsipite, naʻe veiveiua ʻa Kitione pe te Ne tokoniʻi kinautolu he taimi ko ení. ʻI he lea maʻa Sihová, naʻe talaʻofa ʻe he ʻāngeló ʻe tokoniʻi ʻe he ʻOtuá ʻa Kitione.

⁸ Naʻe fifili ʻa Kitione pe ʻe malava fēfē ke ne “fakahaofi ʻa Isileli mei he ʻaofinima ʻo Mitiani.” Naʻe ʻoange ʻe Sihova kiate ia ha tali mātuʻaki mahino: “Ka te u ʻiate koe pe, pea te ke taaʻi ʻa Mitiani ʻo hange ko e toko taha pe.” (Fkm. 6:11-16) ʻI he fifili nai ki he founga ʻe hoko ai ʻa e meʻá ni, naʻe ʻeke ʻe Kitione ha fakaʻilonga mei he ʻOtuá. Fakatokangaʻi ʻi he fetalanoaʻaki ko ení naʻe ʻikai ʻaupito veiveiua ʻa Kitione pe ko e ʻOtuá ko ha Tokotaha moʻoni pe ʻikai.

⁹ Ko e meʻa naʻe hoko hili iá naʻe fakaivimālohiʻi ai ʻa e tui ʻa Kitioné mo ʻai ke ne ofi ange ki he ʻOtuá. Naʻe teuteu ʻe Kitione ha meʻakai pea ʻoange ia ki he ʻāngeló. Naʻe tutu fakaemana leva ʻe he ʻāngeló ʻa e meʻakaí ʻaki hono tokotokó. ʻI he taimi naʻe ʻiloʻi ai ʻe Kitione naʻe fekauʻi tonu mai ʻe he ʻOtuá ʻa e ʻāngeló ni, naʻá ne ilifia. Naʻe kalanga ʻa Kitione: “ʻOiaue, Atonai Sihova! he ko e pehe koā ke u mamata ki he Angelo ʻa Sihova ʻo matuʻaki femataʻaki!” (Fkm. 6:17-22) Naʻe uesia ʻe he hokosia ko iá ʻa e vahaʻangatae ʻo Kitione mo Sihová? ʻIkai ʻaupito! Naʻe ongoʻi melino ʻa Kitione mo e ʻOtuá. ʻOku  tau ʻiloʻi eni koeʻuhí ko e ʻōlita naʻe langa ai ʻe Kitioné naʻe ui ko “Sihova-salome,” ʻoku ʻuhingá “ko Sihova-ko e-melino.” (Lau ʻa e Fakamaau 6:23, 24.) Kapau te tau fakalaulauloto ki he meʻa ʻoku fai ʻe Sihova maʻa kitautolu he ʻaho taki taha, te tau ʻiloʻi ko ha Kaumeʻa moʻoni ia. ʻI heʻetau lotu maʻu pē kia Sihová, ʻoku tau ongoʻi melino lahi ange ai mo ia pea hoko ʻo mālohi ange hotau vahaʻangatae mo iá.

10. Fakatatau ki he Saame 15:3, 5, ko e hā ʻa e fiemaʻu ʻa Sihova ki he faʻahinga ʻoku loto ke hoko ko hono ngaahi kaumeʻá?

¹⁰ Kuo ʻi ai ʻa e ngaahi fiemaʻu pau ʻa Sihova ki ha taha pē ʻoku loto ke hoko ko hono kaumeʻa. ʻI he Saame 15, naʻe hiva ai ʻa Tēvita fekauʻaki mo e meʻa kuo pau ke tau fai ke hoko ai ʻo ʻāunofo ʻi he tēniti ʻo Sihová, ʻa ia, ke hoko ko ha kaumeʻa ʻo e ʻOtuá. (Saame 15:1) Tau tokangataha he taimí ni ki he ua ʻo e ngaahi fiemaʻú ni: ko e fakaʻehiʻehi mei he lauʻikovi loí pea hoko ʻo faitotonu. Naʻe leaʻaki eni ʻe Tēvita fekauʻaki mo ha taha pē ʻoku tali ʻe Sihova ko hano kaumeʻa: “ʻOku ʻikai ʻi hono ʻelelo ʻa e lauʻikovi.” Naʻe tānaki mai ʻe Tēvita: ‘ʻOku ʻikai ke ne tali ha koloa ke fakahalaiaʻi ʻa siʻi ʻataʻataá.’—Saame 15:3, 5.

11. Ko e hā kuo pau ai ke tau fakaʻehiʻehi mei he lauʻikovi loí?

¹¹ ʻI ha saame ʻe taha, naʻe fakatokanga ai ʻa Tēvita: “Lama ho ʻelelo mei he kovi.” (Saame 34:13) Kapau te tau tukunoaʻi ʻa e akonaki ko ení, ʻe uesia ai hotau vahaʻangatae mo ʻetau Tamai fakahēvaní. Ko hono moʻoní, ko e lauʻikovi loí ko ha fakaʻilonga ia ʻo e fili lahi ʻo Sihová, ʻa Sētane ko e Tēvoló. Ko e foʻi lea “Tēvolo” ʻoku haʻu ia mei he foʻi lea faka-Kalisi ʻoku ʻuhingá ko e “tokotaha lauʻikovi loi.” ʻI he taimi ʻoku tau tokanga ai fekauʻaki mo e meʻa ʻoku tau leaʻaki ki he niʻihi kehé mo e meʻa ʻoku tau leaʻaki fekauʻaki mo kinautolú, ʻe tokoniʻi heni kitautolu ke nofo ofi kia Sihova. ʻOku totonu ke tautefito ʻetau tokangá fekauʻaki mo ʻetau tōʻonga ki he faʻahinga kuo fakanofo ʻe he ʻOtuá ke takimuʻa ʻi he fakatahaʻangá.—Lau ʻa e Hepelū 13:17; Sute 8.

12, 13. (a) Ko e hā ʻoku totonu ai ke tau faitotonu ʻi he ngaahi meʻa kotoa pē? (e) ʻI he taimi ʻoku tau faitotonu aí, ko e hā ʻa e olá?

¹² ʻOku ʻiloa ʻa e kau sevāniti ʻa Sihová ko e kakai faitotonu. Naʻe tohi ʻe he ʻapositolo ko Paulá: “Hokohoko atu ʻa e lotu mai maʻamautolú, he ʻoku mau falala ʻoku mau maʻu ha konisēnisi faitotonu, he ko ʻemau fakaʻamú ia ke mau faitotonu ʻi he ngaahi meʻa kotoa pē.” (Hep. 13:18) Koeʻuhí ʻoku tau fakapapauʻi ke “faitotonu ʻi he ngaahi meʻa kotoa pē,” ʻoku tau fakaʻehiʻehi mei hono kākaaʻi hotau fanga tokoua Kalisitiané. Ko e fakatātaá, kapau ʻoku nau ngāue kia kitautolu, ʻoku tau fakapapauʻi ʻoku tau fakafeangai totonu kia kinautolu pea totongi ʻa e paʻanga naʻa tau ʻosi alea ki aí. ʻI he tuʻunga ko e kau Kalisitiané, ʻoku tau faitotonu ki heʻetau kau ngāué mo ha toe taha pē. Pea kapau ʻoku tau ngāue ki ha kaungā-Kalisitiane, ʻoku totonu ke ʻoua te tau filifilimānako pea ʻamanekina ha fakafeangai makehe.

¹³ Ko e kakai ʻi he māmaní ʻoku nau faʻa fakaongoongoleleiʻi ʻa e Kau Fakamoʻoni ʻa Sihová ko ʻenau faitotonú. Ko e fakatātaá, ko e talēkita ʻo ha kautaha lahi naʻá ne fakatokangaʻi ko e Kau Fakamoʻoni ʻa Sihová ʻoku nau fai ki heʻenau palōmesí. Naʻá ne pehē, “ʻOkú ke fai maʻu pē ki hoʻo fuakavá.” (Saame 15:4) Ko e faitotonu ko ení ʻokú ne tokoniʻi kitautolu ke tau tauhi ʻa Sihova ko hotau Kaumeʻa pea ʻoatu ʻa e fakahīkihiki ki heʻetau Tamai fakahēvani anga-ʻofá.

14, 15. ʻI heʻetau ngāue fakafaifekaú, ʻe lava fēfē ke tau tokoniʻi ʻa e niʻihi kehé ke nau hoko ko e ngaahi kaumeʻa ʻo Sihova?

¹⁴ Neongo ko e kakai ʻoku tau fetaulaki ʻi heʻetau ngāue fakafaifekaú ʻoku nau tui nai ʻoku ʻi ai ʻa e ʻOtua, ʻoku ʻikai ke vakai ʻa e tokolahi ki he ʻOtuá ko honau Kaumeʻa lelei taha. ʻE lava fēfē ke tau tokoniʻi kinautolu? Fakatokangaʻi ʻa e ngaahi fakahinohino naʻe ʻoange ʻe Sīsū ki he toko 70 ʻo ʻene kau ākongá ʻi he taimi naʻá ne fekauʻi atu ai kinautolu ke malangá: “ʻIlonga ha feituʻu te mou hū ai ki ha fale, mou ʻuluaki pehē: ‘Fakatauange ke ʻi he falé ni ʻa e melinó.’ Pea kapau ʻe ʻi ai  ha kaumeʻa ʻo e melinó ai, ʻe toka hoʻomou melinó ʻiate ia. Ka ʻo kapau ʻe ʻikai, ʻe toe foki mai ia kiate kimoutolu.” (Luke 10:5, 6) ʻOku loto nai ʻa e kakaí ke ako lahi ange fekauʻaki mo e moʻoní kapau te tau anga-fakakaumeʻa kia kinautolu. Kapau ʻoku tau anga-lelei ki he faʻahinga ʻoku nau fakafepakiʻi kakaha kitautolú, ʻe tokoni nai eni ke nau mokomoko hifo, pea te nau loto-lelei nai ke fanongo ki he moʻoní ʻi ha taimi kehe.

¹⁵ ʻI he taimi ʻoku tau fetaulaki ai mo e kakai ʻoku nau mamahiʻi lotú pe ʻoku nau muimui ʻi he ngaahi talatukufakaholo fakalotu loí, ʻoku tau hokohoko atu ke anga-fakakaumeʻa mo fakamelino. ʻOku tau talitali māfana ʻa e tokotaha kotoa ki heʻetau ngaahi fakatahá, tautautefito ki he kakai ʻoku nau taʻefiemālie ki he tuʻunga ʻoku ʻi ai ʻa e māmani ʻo e ʻaho ní pea ʻoku nau loto ke ako lahi ange fekauʻaki mo e ʻOtua ʻoku tau lotu ki aí. Ko e ngaahi kupu hokohoko ko e “Liliu ʻe he Tohi Tapú ʻa e Moʻuí” ʻoku ʻomai ai kia kitautolu ʻa e ngaahi faʻifaʻitakiʻanga lahi fekauʻaki mo e kakai hangē ko ení.

16. ʻE lava fēfē ke tau hoko ʻo ʻikai ko e ngaahi kaumeʻa pē ʻo Sihova ka ko hono “kaungāngāue” foki?

¹⁶ Ko e kakai ʻoku nau ngāue fakatahá ʻoku nau faʻa hoko ko e ngaahi kaumeʻa ofi. Ko kinautolu kotoa ʻoku fakatapui kia Sihová ʻoku ʻikai ko hono ngaahi kaumeʻa pē ka ko hono “kaungāngāue” foki. (Lau ʻa e 1 Kolinitō 3:9.) ʻI heʻetau malanga mo ngaohi ākongá, ʻoku tau ako lahi ange ai fekauʻaki mo e ngaahi ʻulungaanga fakaofo ʻetau Tamai fakahēvaní. ʻOku tau sio ai ki hono tokoniʻi kitautolu ʻe hono laumālie māʻoniʻoní ke malangaʻi ʻa e ongoongo leleí.

17. ʻOku anga-fēfē hono fakahaaʻi mai kia kitautolu ʻe heʻetau ngaahi ʻasemipilií mo e ngaahi fakataha-lahí ko Sihova hotau Kaumeʻá?

¹⁷ Ko e lahi ange ʻo e taimi ʻoku tau fakamoleki ʻi he ngāue fakamalangá, ko ʻetau ongoʻi ofi ange ia kia Sihová. ʻOku tau sio ai ki hono taʻofi ʻe Sihova ʻa e kau fakafepakí mei hono taʻofi ʻa e ngāue fakamalangá. Kuo hā mahino ʻene tataki kitautolu, pea ʻoku tau ofo ʻi he founga ʻokú ne hokohoko atu ke akoʻi kitautolu fakafou ʻi heʻetau ngaahi fakatahá mo e ʻū tohí. ʻI heʻetau ngaahi fakataha-lahí mo e ngaahi ʻasemipilií, ʻoku tau sio ai ki hono mahinoʻi anga-ʻofa ʻe Sihova ʻetau ngaahi palopalemá mo ʻetau ngaahi fiemaʻú. Hili ʻa e taha ʻo ʻetau ngaahi fakataha-lahí, naʻe tohi ʻe ha fāmili: “Naʻe maongo moʻoni ki homau lotó ʻa e polokalamá. Naʻa mau ongoʻi ʻa e lahi ʻo e ʻofa ʻa Sihova ki he tokotaha taki taha ʻo kimautolu pea loto ke mau lavameʻa.” Hili hano maʻu ha fakataha-lahi makehe ʻi ʻAilani, ko ha ongo meʻa mali mei Siamane naʻá na houngaʻia ʻi he founga naʻe talitali māfana ai mo tokangaʻi kinauá. Naʻá na toe pehē: “Ka ko ʻema houngaʻia lahi tahá ʻoku ʻave ia kia Sihova mo ʻene Tuʻi ko Sīsū Kalaisí. Kuó na fakaafeʻi kimaua ke hoko ko e konga ʻo e puleʻanga fāʻūtaha moʻoni ko ení. ʻOku ʻikai ke ma talanoa pē fekauʻaki mo e fāʻūtahá ka ʻokú ma fiefia ai ʻi he ʻaho  kotoa pē. Ko ʻema ngaahi hokosia fekauʻaki mo e fakataha-lahi makehe ʻi Dublin te ne fakamanatu maʻu pē kia kimaua ʻa e ngaahi monū maʻongoʻonga kuó ma maʻu ke ngāue ai ki homa ʻOtua lahí fakataha mo e kotoa ʻo kimoutolú.”

18. Ko e hā ʻoku totonu ke tau ʻeke hifo kia kitautolu fekauʻaki mo ʻetau fetuʻutaki mo Sihová?

¹⁸ ʻOku hoko ʻo ofi ange ʻa e ngaahi kaumeʻá ʻi he taimi ʻoku nau fetuʻutaki lelei aí. ʻI he ʻahó ni, ʻoku ngāueʻaki maʻu pē ʻe he kakaí ʻa e ʻInitanetí mo e feʻaveʻaki pōpoakí. Ka ʻoku anga-fēfē hono fakahoa ia ki heʻetau fetuʻutaki mo hotau Kaumeʻa lelei tahá, ʻa Sihova? Ko ia ʻa e “tali lotu.” (Saame 65:2) Ko e hā e lahi ʻo e taimi kuo tau vaheʻi ke lea ai kiate iá?

19. Kapau ʻoku faingataʻa ke tau fakahaaʻi ʻetau ngaahi ongoʻí ʻi he lotu kia Sihová, ko e hā ʻe lava ke tokoní?

¹⁹ Ki he niʻihi ʻo e kau sevāniti ʻa e ʻOtuá, ʻoku ʻikai faingofua ke fakahaaʻi ʻenau ngaahi ongoʻi lolotó. Ka, ko e meʻa ia ʻoku loto ʻa Sihova ke tau fai ʻi he taimi ʻoku tau lotu aí. (Saame 119:145; Tangi. 3:41) Kapau ʻoku faingataʻa ke tau fakamatalaʻi ʻetau ngaahi ongoʻí, ʻoku tau maʻu ha tokoni. Naʻe tohi ʻe Paula ki he kau Kalisitiane ʻi Lomá: “Ko e palopalemá ko e ʻikai ke tau ʻilo ʻa e meʻa ko ia ʻoku totonu ke tau lotu fekauʻaki mo iá ʻo hangē ko ia ʻoku fiemaʻu ke tau faí, ka ko e laumālié tonu ʻokú ne tautapa maʻa kitautolu ʻi he ngaahi toʻe ʻoku ʻikai leaʻaki. Neongo ia, ko ia ʻokú ne hakule ʻa e lotó ʻokú ne ʻafioʻi ʻa e ʻuhinga ʻa e laumālié, koeʻuhi he ʻokú ne tautapa ʻo fehoanaki mo e finangalo ʻo e ʻOtuá maʻá e kakai tapú.” (Loma 8:26, 27) ʻI heʻetau lau ʻa e ngaahi tohi Fakatohitapu hangē ko e Siope, Saame mo e Palōvēpí, ʻe lava ke tau maʻu ai ʻa e ngaahi fakakaukau fekauʻaki mo e founga ke fakahaaʻi ai ʻetau ngaahi ongoʻí kia Sihova.

20, 21. Ko e hā ʻa e fakafiemālie ʻoku ʻomai kia kitautolu ʻe he ngaahi lea ʻa Paula ʻi he Filipai 4:6, 7?

²⁰ ʻI heʻetau fehangahangai mo e ngaahi palopalema faingataʻá, tau manatuʻi ʻa e ngaahi lea ʻa Paula ki he kau Filipaí: “ʻOua ʻe hoko ʻo loto-moʻua ʻi ha faʻahinga meʻa, ka ʻi he meʻa kotoa pē fakafou ʻi he lotu mo e hū tōtōaki fakataha mo e fakafetaʻi, mou ʻai ke ʻilo ai hoʻomou ngaahi kolé ʻe he ʻOtuá.” ʻI heʻetau lotu kia Sihova ʻi he founga ko ení, ʻe lava ke tau ongoʻi fiemālie moʻoni. Naʻe tohi ʻe Paula: “Ko e nonga ʻa e ʻOtuá ʻa ia ʻoku fakalaka atu ʻi he mahino kotoa pē te ne maluʻi homou lotó pea mo homou ngaahi mafai fakaefakakaukaú fakafou ʻia Kalaisi Sīsū.” (Fil. 4:6, 7) ʻOku totonu ke tau houngaʻia maʻu pē ʻi he makehe atu ʻa e “nonga ʻa e ʻOtuá” ʻa ia ʻokú ne maluʻi moʻoni hotau lotó mo e ʻatamaí.

²¹ ʻOku tokoniʻi kitautolu ʻe he lotú ke fakatupulekina hotau vahaʻangatae mo Sihová. Ko ia ai, tau “lotu maʻu pē.” (1 Tes. 5:17) ʻOku totonu ke tau hanganaki fakaivimālohiʻi hotau vahaʻangatae mo e ʻOtuá pea fai ʻa e meʻa ʻokú ne fiemaʻu meiate kitautolú. Pea tau vaheʻi ha taimi ke fakakaukau ai fekauʻaki mo e ngaahi tāpuaki ʻoku tau maʻú koeʻuhí he ko Sihova moʻoni ʻetau Tamaí, ko hotau ʻOtua mo hotau Kaumeʻa.