“Ko e Fua ʻo e Laumalie” ʻOku Fakalāngilangiʻi Ai ʻa e ʻOtuá

‘Kuo fakalangilangiʻi ʻa ʻeku Tamaí, koeʻuhi ke iku ki hoʻomou fua lahi.’—SIONE 15:8.

1, 2. (a) Ko e hā e ngaahi faingamālie ʻoku tau maʻu ke fakalototoʻaʻi ai ʻa e niʻihi kehé? (e) Ko e hā e meʻaʻofa meia Sihova ʻokú ne fakaleleiʻi ʻetau malava ke tauhi kiate iá?

 FAKAKAUKAU ATU ki ha meʻa ʻe ua naʻe hoko: ʻOku fakatokangaʻi ʻe ha fefine Kalisitiane ha tuofefine kei siʻi ange ʻoku hā ngali hohaʻa. ʻOkú ne fai ha ngaahi fokotuʻutuʻu ke ngāue mo ia ʻi he ngāue fakamalangá. ʻI heʻena fetalanoaʻaki ʻi he vahaʻa ʻo e ngaahi falé, ʻoku kamata ke talanoa ange ʻe he tuofefine kei siʻi angé ʻa e meʻa ʻokú ne fakahohaʻasi iá. ʻI heʻene lotu ki mui ʻi he ʻaho ko iá, ʻoku fakamālō ai ʻa e tuofefine kei siʻi angé kia Sihova ʻi he mahuʻingaʻia anga-ʻofa ʻa e tuofefine matuʻotuʻá ʻiate iá; ko e meʻa tofu pē ia naʻá ne fiemaʻú. ʻI ha toe feituʻu ʻe taha, ko e toki foki mai pē ia ʻa ha ongo meʻa mei haʻana malanga ʻi ha fonua muli. ʻI heʻena talanoa māfana ki he ngaahi hokosiá ʻi ha fakatahataha naʻe fai, ʻoku fanongo fakalongolongo atu ki ai ha kiʻi talavou. ʻI ha ngaahi taʻu ki mui ai, ʻi heʻene teuteu ke mavahe ki hono vāhenga-ngāue mulí, ʻokú ne fakakaukau ai ki he ongo meʻa ko iá mo e fetalanoaʻaki naʻá ne ʻai ia ke ne loto ke hoko ko ha misinalé.

² Mahalo pē ko e ngaahi tuʻunga ko iá ʻoku fakamanatu atu ai kiate koe ha taha naʻá ne ʻai ke liliu ʻa hoʻo moʻuí pe ko ha taha ʻa ia naʻe maongo kiate koe ʻa ʻene founga moʻuí. Ko e moʻoni, ʻoku tātātaha pē ke liliu ʻe ha fetalanoaʻaki tuʻo taha ha moʻui ʻa ha taha, ka ʻi he ʻaho taki taha, ʻoku tau maʻu ai ʻa e ngaahi faingamālie ke fakalototoʻaʻi mo fakaivimālohiʻi ʻa e niʻihi kehé. Sioloto atu naʻe ʻi ai ha meʻa naʻá ne fakaleleiʻi hoʻo ngaahi malavá mo ho ʻulungaangá, ʻo ʻai ai ke maʻu ʻaonga lahi ange mei ai ʻa ho fanga tokouá pea nau hoko ai ʻo ʻaonga lahi ange ki he ʻOtuá. ʻIkai naʻe mei hoko ia ko ha meʻa fisifisimuʻa? Ko hono moʻoní, ʻoku ʻomai kia kitautolu ʻe Sihova ha meʻaʻofa pehē tofu pē—ko hono laumālie māʻoniʻoní. (Luke 11:13) ʻI he ngāue ʻa e laumālie ʻo e ʻOtuá ʻi heʻetau moʻuí, ʻokú ne fakatupu ʻia kitautolu ʻa e ngaahi ʻulungaanga fakaʻofoʻofa ʻa ia ʻokú ne fakaleleiʻi ʻa e tafaʻaki kotoa pē ʻo ʻetau ngāue ki he ʻOtuá. Ko ha meʻaʻofa fakaofo moʻoni ia!—Lau ʻa e Kaletia 5:22, 23.

3. (a) ʻOku anga-fēfē hono fakalāngilangiʻi ʻa e ʻOtuá ʻi heʻetau fakatupulekina ʻa e “fua ʻo e Laumalie”? (e) Ko e hā e ngaahi fehuʻi te tau lāulea ki aí?

³ Ko e ngaahi ʻulungaanga ʻoku fakatupu ʻe he laumālie māʻoniʻoní ko ha tapua atu ia ʻa e ʻulungaanga tonu ʻo e Matavai ʻo e laumālie ko iá, ʻa Sihova ko e ʻOtuá. (Kol. 3:9, 10) Naʻe fakahaaʻi ʻe Sīsū ʻa e ʻuhinga tuʻu-ki-muʻa ʻoku totonu ke feinga mālohi ai ʻa e kau Kalisitiané ke faʻifaʻitaki ki he ʻOtuá ʻi heʻene tala ki heʻene kau ʻapositoló: “Ko e meʻa ko ia kuo fakalangilangiʻi ai ʻa ʻeku Tamai, koeʻuhi ke iku ki hoʻomou fua lahi.” * (Sione 15:8) ʻI heʻetau fakatupulekina ʻa e “fua ʻo e Laumalie,” ʻoku hā mahino ʻa e ngaahi olá ʻi he founga ʻo ʻetau leá mo e ngāué; ko e meʻá ni, ʻi he tafaʻaki ʻe tahá, ʻoku ʻoatu ai ʻa e fakahīkihiki ki hotau ʻOtuá. (Mt. 5:16) ʻI he ngaahi founga fē ʻoku kehe ai ʻa e fua ʻo e laumālié mei he ngaahi anga ʻo e māmani ʻo Sētané? ʻE lava fēfē ke tau fakatupulekina ʻa e fua ʻo e laumālié? Ko e hā nai te tau ʻiloʻi ai ko ha pole ia ke fai peheé? Te tau vakai ki he ngaahi fehuʻi ko ení ʻi heʻetau lāulea ki he ʻuluaki tafaʻaki ʻe tolu ʻo e fua ʻo e laumālié—ko e ʻofa, fiefia, mo e melino.

ʻOfa Makatuʻunga ʻi ha Tefitoʻi Moʻoni Māʻolunga Ange

4. Ko e hā e faʻahinga ʻofa naʻe akoʻi ʻe Sīsū ʻa hono kau muimuí ke nau tōʻongaʻakí?

⁴ Ko e ʻofa ʻoku fakatupu ʻe he laumālie māʻoniʻoní ʻoku ʻilonga ʻaupito ʻene kehe mei he faʻahinga ʻofa ko ia ʻoku anga-maheniʻaki ʻi he  māmaní. ʻO anga-fēfē? ʻOku makatuʻunga ia ʻi ha tefitoʻi moʻoni māʻolunga ange. Naʻe fakamamafaʻi ʻe Sīsū ʻa e kehe ko ení ʻi he Malanga ʻi he Moʻungá. (Lau ʻa e Mātiu 5:43-48.) Naʻá ne fakahaaʻi naʻa mo e kau angahalá te nau muimui ʻi ha lao ʻo e meʻa tatau ki he meʻa tatau, ʻo tōʻongafai ki he niʻihi kehé ʻo hangē ko e tōʻongafai ʻa e niʻihi kehé kia kinautolú. Ko e “ʻofa” ko iá ʻoku ʻikai kau ki ai ha feilaulau moʻoni ka ʻoku iku ia ki ha fefaiʻaki ʻo ha ngaahi meʻa lelei. Kapau ʻoku tau loto ke ‘hokosi ʻetau Tamai ʻoku ʻi Hevaní,’ kuo pau ke tau kehe. ʻI he ʻikai tōʻongafai ki he niʻihi kehé ʻo hangē ko ʻenau tōʻongafai kia kitautolú, kuo pau ke tau vakai mo tōʻongafai ki he niʻihi kehé ʻo hangē ko e vakai mo e tōʻongafai ʻa Sihova kia kinautolú. Kae kehe, ʻoku anga-fēfē malava ke tau ʻofa ki hotau ngaahi filí, ʻo hangē ko ia naʻe fekauʻi ʻe Sīsuú?

5. ʻE lava fēfē ke tau fakahāhā ʻa e ʻofa ki he faʻahinga ʻoku nau fakatangaʻi kitautolú?

⁵ Fakakaukau angé ki ha fakatātā Fakatohitapu ʻe taha. Lolotonga ʻa e malanga ʻi Filipaí, naʻe puke ai ʻa Paula mo Sailosi, ʻo haha lahi, pea lī ki he loto pilīsoné, ʻa ia naʻe fakamaʻu ai hona vaʻé ki he ʻakau kiiʻi. ʻI he meʻa naʻe hokó, ʻoku pau pē nai naʻe ngaohikoviʻi foki kinaua ʻe he selá. ʻI hona tukuange taʻeʻamanekina ko e tupu mei ha mofuiké, naʻá na fiefia ʻi he ʻamanaki atu ke na fai ha sāuni ki he tangata ko iá? ʻIkai. Ko ʻena tokanga moʻoni ki heʻene leleí—ko ʻena ʻofa feilaulauʻi-kitá—naʻe ueʻi ai kinaua ke na ngāue fakavave maʻana, ʻo fakaʻatā ai ʻa e selá mo hono fāmilí kotoa ke nau hoko ko e kau tui. (Ng. 16:19-34) Ko e tokolahi ʻo hotau fanga tokoua ʻi onopōní kuo nau muimui tatau ʻi ha ʻalunga ʻo hono ‘tapuakiʻi ʻa kinautolu ʻoku fakatangaʻi kinautolú.’—Loma 12:14.

6. ʻI he ngaahi founga fē ʻe lava ke tau fakahāhā ai ʻa e ʻofa feilaulauʻi-kita ki hotau fanga tokouá? (Sio ki he puha ʻi he peesi 21.)

⁶ Ko ʻetau ʻofa ki hotau kaungātuí ʻoku toe lahi ange ai. “ʻOku totonu ke tau liʻaki ʻetau moʻui koeʻuhi ko e kainga” pe fanga tokouá. (Lau ʻa e 1 Sione 3:16-18.) Neongo ia, ʻoku faʻa hoko ʻo lava ke tau fakahāhā ʻa e ʻofá ʻi he ngaahi founga iiki ange. Ko e fakatātaá, kapau ʻoku tau leaʻaki pe fai ha meʻa ʻoku fakalotomamahi ki ha tokoua, ʻe lava ke tau fakahāhā ʻa e ʻofá ʻaki ʻa e tamuʻomuʻa ke toe fai ha fakamelino. (Mt. 5:23, 24) Fēfē kapau ʻoku fakalotomamahiʻi kitautolu ʻe ha taha? ʻOku tau “faʻa fakamolemole,” pe ʻoku tau hehema ʻi he taimi ʻe niʻihi ke tukulotoʻi ha ʻita? (Sāme 86:5) Ko e ʻofa lahi ʻoku fakatupu ʻe he laumālie māʻoniʻoní ʻe lava ke ne tokoniʻi kitautolu ke tau ʻufiʻufi ʻa e fanga kiʻi fehālākí, ʻo fakamolemoleʻi ʻa e niʻihi kehé ‘ʻo hange foki ne fakamolemoleʻi kitautolu ʻe Sihová.’—Kol. 3:13, 14; 1 Pita 4:8.

7, 8. (a) ʻOku anga-fēfē ʻa e fehokotaki ʻa e ʻofa ki he kakaí mo e ʻofa ki he ʻOtuá? (e) ʻE lava fēfē ke tau ʻai ke loloto ʻetau ʻofa kia Sihová? (Sio ki he fakatātā ʻi laló.)

⁷ ʻE lava fēfē ke tau fakatupulekina ʻa e ʻofa feilaulauʻi-kita ki hotau fanga tokouá? ʻAki hono ʻai ke loloto ʻa ʻetau ʻofa ki he ʻOtuá. (Ef. 4:32, 33 [ʻEf 5:1, 2, PM]; 1 Sione 4:9-11, 20, 21) Ko e ngaahi mōmeniti fekoekoeʻi ʻoku tau fakamoleki mo  Sihova ʻi hono lau ʻa e Tohi Tapú, fakalaulaulotó, mo e lotú ʻoku poupouʻi ai hotau lotó pea fakalahi ai ʻetau ʻofa ki heʻetau Tamai fakahēvaní. Kae kehe, ʻoku fiemaʻu ke tau fakatau mai ʻa e taimi ke ʻunuʻunu ofi ai ki he ʻOtuá.

⁸ Ke fakatātaaʻi: Sioloto atu naʻe malava ke lau ʻa e Folofola ʻa e ʻOtuá, fakalaulauloto ki ai, pea lotu kia Sihova ʻi he lolotonga pē ʻo ha houa pau ʻi he ʻaho taki taha. ʻIkai te ke tokanga ʻo maluʻi ʻa e vahaʻa taimi ko iá koeʻuhi ke ʻoua naʻa fakaleluʻi ʻe ha meʻa ʻa ho taimi fakafoʻituitui mo Sihová? Ko e moʻoni heʻikai lava ke taʻofi kitautolu ʻe ha taha mei heʻetau lotu ki he ʻOtuá, pea ko e tokolahi taha ʻo kitautolú ʻe lava ke tau lau ʻa e Tohi Tapú ʻi ha taimi pē ʻoku tau fie lau ai. Neongo ia, ʻe fiemaʻu nai ke tau tokanga ke taʻofi ʻa hono fakaleluʻi ʻe he fokoleta ʻo e ngaahi ngāue fakaʻahó ʻa hotau taimi fakafoʻituitui mo e ʻOtuá. ʻOkú ke fakatau mai ʻa e taimi lahi taha ʻe ala lavá ʻi he ʻaho taki taha ke ʻunuʻunu ofi ai kia Sihova?

“Fiefia i he Laumalie Maonioni”

9. Ko e hā ʻa e anga ʻo e fiefia kuo fakatupu ʻe he laumālie māʻoniʻoní?

⁹ Ko ha anga tuʻu-ki-muʻa ʻo e fua ʻo e laumālié ko ʻene tuʻu maʻú. Ko e fiefiá, ʻa e tafaʻaki hono ua te tau lāulea ki aí, ʻokú ne fakatātaaʻi ʻa e tuʻu maʻu ko ení. Ko e fiefiá ʻoku hangē ia ko ha fuʻu ʻakau matengataʻa ʻa ia ʻoku lava ke tupu ʻāfaʻafa naʻa mo e ʻi ha ʻātakai ʻoku ʻikai lelei. ʻI he kotoa ʻo e māmaní, ko e tokolahi ʻo e kau sevāniti ʻa e ʻOtuá kuo nau “maʻu ae folofola i he mamahi lahi, moe fiefia i he Laumalie Maonioni.” (1 Tes. 1:6, PM) Ko e niʻihi ʻoku nau fehangahangai mo e ngaahi tuʻunga faingataʻa mo e masiva ʻangoʻango. Neongo ia, ʻoku fakaivia kinautolu ʻe Sihova fakafou ʻi hono laumālié ke nau “faa kataki kotoabe moe kataki fuoloa i he fiefia.” (Kol. 1:11, PM) Ko e hā ʻa e matavai ʻo e fiefia ko ení?

10. Ko e hā ʻa e tupuʻanga ʻo ʻetau fiefiá?

¹⁰ ʻI he ʻikai hangē ko e ‘koloa ʻoku mole ngofua’ ʻo e māmani ʻo Sētané, ko e ngaahi koloa fakalaumālie kuo tau maʻu meia Sihová ʻoku mahuʻinga tuʻuloa. (1 Tim. 6:17, Ko e Taulua; Mt. 6:19, 20) ʻOkú ne tuku mai ʻi hotau ʻaó ʻa e ʻamanaki fiefia ki ha kahaʻu taʻehanongataʻanga. ʻOku tau maʻu ʻa e fiefia ʻi he hoko ko ha konga ʻo ha fetokouaʻaki faka-Kalisitiane ʻi māmani lahi. Hiliō he meʻa kotoa, ko ʻetau fiefiá ʻoku makatuʻunga ia ʻi hotau vahaʻangatae mo e ʻOtuá. ʻOku tau kau fakataha mo e ngaahi ongoʻi naʻe fakahaaʻi ʻe Tēvitá, ʻa ia neongo naʻe fakamālohiʻi ia ke ne moʻui ko ha tokotaha hola holo, naʻá ne fakahīkihikiʻi ʻa Sihova ʻi he hiva, ʻo pehē: “ʻOku mahuʻinga ange hoʻo ʻofa ʻi he moʻui ni, ko ia ai ʻe fakamālō ki he ʻAfiona ʻe hoku ngutu ni. Pehe ʻeku fakafetaʻi atu lolotonga ʻeku moʻui.” (Sāme 63:3, 4) Naʻa mo e taimi ʻoku tau hokosia ai ʻa e ngaahi faingataʻá, ʻoku ʻalu hake ʻi hotau lotó ʻa e fakahīkihiki fiefia ki he ʻOtuá.

11. Ko e hā ʻoku mahuʻinga ai ke tau tauhi kia Sihova ʻi he fiefiá?

¹¹ Naʻe ekinaki ʻa e ʻapositolo ko Paulá ki he kau Kalisitiané: “Mou fiefia ʻi he ʻEiki maʻu ai pe: ʻio, kau toe ʻai atu, Mou fiefia”! (Fili. 4:4) Ko e hā ʻoku mahuʻinga ai ki he kau Kalisitiané ke nau fakahoko ʻenau ngāue kia Sihová ʻi he fiefiá? Koeʻuhi ko e ʻīsiu naʻe langaʻi hake ʻe Sētane fekauʻaki mo e tuʻunga-hau ʻo Sihová. ʻOku taukaveʻi ʻe Sētane ʻoku ʻikai tauhi loto-lelei ha taha ki he ʻOtuá. (Siope 1:9-11) Kapau naʻa tau tauhi fakafatongia kae ʻikai fiefia kia Sihova, ko ʻetau feilaulau ʻo e fakahīkihikí naʻe mei taʻekakato. Ko ia ʻoku tau feinga mālohi ai ke talangofua ki he ekinaki ʻa e tokotaha-tohi-sāmé: “Tauhi ʻa Sihova ʻaki ʻa e fiefia: Hu ki hono ʻao mo e kaikaila.” (Sāme 100:2) Ko e ngāue ʻoku fai mei ha loto-fiefia mo loto-leleí ʻoku fakalāngilangiʻi ai ʻa e ʻOtuá.

12, 13. Ko e hā ʻe lava ke tau fai ke faitau ai mo e ngaahi ongoʻi ʻikai leleí?

¹² Kae kehe, ko hono moʻoní, naʻa mo e kau sevāniti līʻoa ʻa Sihová ʻe ʻi ai e ngaahi taimi ʻa ia te nau hoko ai ʻo loto-siʻi mo fāinga ke tauhi maʻu ha fakakaukau lelei. (Fili. 2:25-30) Ko e hā ʻe lava ke ne tokoniʻi kitautolu lolotonga ʻa e ngaahi taimi peheé? ʻOku pehē ʻi he Efeso 5:18, 19: “Ke fakafonu kimoutolu ʻaki ʻa e Laumalie: ʻo mou fealēleaʻaki ʻaki ʻa e ngaahi same, mo e himi, mo e hiva fakalaumalie, mo mou hiva mo ta ʻi homou loto ki he ʻEiki.” ʻE lava fēfē ke tau ngāueʻaki ʻa e akonaki ko iá?

¹³ ʻI he toloto ʻi he ngaahi ongoʻi ʻikai leleí, ʻe lava ke tau kōlenga kia Sihova ʻi he lotu pea feinga mālohi ke fakalaulauloto ki he ngaahi meʻa ke fakamālōʻiá. (Lau ʻa e Filipai 4:6-9.) ʻOku ʻiloʻi ʻe he niʻihi ko e ngūngū leʻo-siʻi ʻi he ngaahi hiva  ʻo e Puleʻangá kuo hikí ʻoku ʻai ai ke nau fiefia pea tokoni ia ke toe fakafokifoki mai ʻenau fakakaukaú. Ko ha tokoua ʻa ia naʻe fehangahangai mo ha ʻahiʻahi faingataʻa ʻa ia naʻá ne faʻa hoko ai ʻo ongoʻi feifeitamaki mo loto-siʻi ʻokú ne manatu: “ʻI he tānaki atu ki he lotu maʻu pē mei he lotó, naʻá ku ako maʻuloto ha ngaahi hiva ʻe niʻihi ʻo e Puleʻangá. Naʻe ʻomai ai ʻa e nonga ki hoku lotó ʻi he hiva ʻa e ngaahi fakahīkihiki fakaʻofoʻofa ko ení kia Sihova ʻo hiva leʻo-lahi pe leʻo-siʻi pē kiate au. Pehē foki, ko e tohi ʻUnuʻunu Ofi kia Sihova naʻe tukuange mai ia ʻi he taimi nai ko iá. Naʻá ku lau tuʻo ua ia lolotonga ʻa e taʻu hono hokó. Naʻe hangē ia ko ha faitoʻo fakanonga ki hoku lotó. ʻOku ou ʻiloʻi naʻe tāpuakiʻi ʻe Sihova ʻa ʻeku ngaahi feingá.”

‘Haʻi Fāʻūtaha oe Melinó’

14. Ko e hā ha tafaʻaki mahuʻinga ʻo e melinó kuo fakatupu ʻe he laumālie māʻoniʻoní?

¹⁴ ʻI heʻetau ngaahi fakataha-lahi fakavahaʻapuleʻangá, ʻoku fiefia ai ʻa e kau fakafofonga mei he ngaahi puipuituʻa kehekehe ʻi he feohi māfana faka-Kalisitiané. Ko e ngaahi tuʻunga peheé ʻoku fakamamafaʻi ai ha tafaʻaki ʻo e melino kuo maʻu ʻe he kakai ʻa e ʻOtuá he ʻaho ní—ko ʻetau fāʻūtaha ʻi māmani lahí. Ko e kau mamatá ʻoku nau faʻa ofo ʻi heʻenau sio ki he kakai ʻa ia naʻa nau ʻamanekina te nau fetāufehiʻaʻaki ʻia kinautolú ʻoku nau “ahiahi lahi ke tauhi ae feofoofani oe Laumalie i he noo [‘haʻi fāʻūtaha,’ NW] oe melino.” (Ef. 4:3, PM) Ko e fāʻūtaha ko ení ʻoku taau moʻoni ke fakatokangaʻi ʻi he vakai atu ki he meʻa naʻe pau ke ikuʻi ʻe he tokolahi.

15, 16. (a) Ko e hā ʻa e puipuituʻa ʻo Pitá, pea naʻe anga-fēfē ʻa e hoko ia ko ha pole kiate iá? (e) Naʻe anga-fēfē hono tokoniʻi ʻe Sihova ʻa Pita ke feʻunuʻaki ʻene fakakaukaú?

¹⁵ Ko hono fakafāʻūtahaʻi ʻa e kakai ʻoku nau kau ki he ngaahi puipuituʻa kehekehé ko ha pole ia. Ke tokoniʻi kitautolu ke tau maʻu ʻa e fakamaama ki he meʻa kuo pau ke ikuʻi ke lavaʻi ai ʻa e fāʻūtaha peheé, tau fakakaukau angé ki ha fakatātā ʻi he ʻuluaki senitulí, ko e ʻapositolo ko Pitá. Ko ʻene fakakaukau ki he kau Siu taʻekamú naʻe lava ke ʻiloʻi ia ʻi heʻene lea: “ʻOku mou lāuʻilo, ko e  meʻa ia ʻoku tapuhā ki he tangata Siu, ke fafale ki ha toko taha ʻi ha faʻahinga kehe, pē ʻuhi ki ai: pehē foki mo au, ka ne taeʻoua ʻa e ʻOtua, ʻene hinoiʻi au ke ʻoua naʻa ku lau ha tangata ʻe taha ʻoku ne taʻetāu pe taʻemaʻa.” (Ng. 10:24-29; 11:1-3) Makatuʻunga ʻi ha fakakaukau naʻe angamaheniʻaki ʻi he taimi ko iá, ʻoku hā mahino naʻe tupu hake ʻa Pita ʻo tui naʻe fakafatongiaʻi ia ʻe he Laó ke ne ʻofa pē ki he kaungā Siú. Naʻe hā ngali mātuʻaki angamaheniʻaki ke ne vakai ki he kau Senitailé ko e ngaahi fili kinautolu ke fehiʻanekinaʻi. *

¹⁶ Sioloto atu pē ki he faingataʻaʻia kuo pau naʻe ongoʻi ʻe Pita ʻi heʻene hū ki he ʻapi ʻo Koliniusí. ʻE faifai ange pea lava ke hoko ha tangata ʻa ia naʻá ne maʻu ʻa e ngaahi fakakaukau ʻikai lelei ki muʻa fekauʻaki mo e kau Senitailé ʻo ‘fakahokohoko lelei fakataha’ mo kinautolu ʻi he ‘haʻi fāʻūtaha oe melinó’? (Ef. 4:3, 16, PM) ʻIo, he ʻi ha ngaahi ʻaho ki muʻa pē ai, naʻe fakaava ai ʻe he laumālie ʻo e ʻOtuá ʻa e loto ʻo Pitá, ʻo ʻai ke ne malava ʻo kamata ke feʻunuʻaki ʻene fakakaukaú pea ikuʻi ʻa ʻene tomuʻa fehiʻá. Fakafou ʻi ha vīsone, naʻe ʻai ai ʻe Sihova ke maʻalaʻala kiate ia ko e vakai ʻa e ʻOtuá ki he kakaí ʻoku ʻikai fakapapauʻi ia ʻaki ʻa e matakalí pe ko e fonuá. (Ng. 10:10-15) Ko ia naʻe lava ai ke tala ʻe Pita kia Koliniusi: “Ta ko ʻene toki mahino mai e kiate au, ʻoku ʻikai ke filifilimanako ʻa e ʻOtua: ka neongo pē ko e fēʻia ʻa e kakai, ka ʻilonga ʻa ia ʻoku ʻapasia kiate ia, pea ngāue fai ki he totonu, ʻoku ngofua ke ne aʻu mai kiate ia.” (Ng. 10:34, 35) Naʻe liliu ʻa Pita, pea naʻá ne hoko ʻo fāʻūtaha moʻoni mo e ‘haʻohaʻonga fakakātoa ʻo e fanga tokouá.’—1 Pita 2:17, NW.

17. ʻOku anga-fēfē fakaofo ʻa e fāʻūtaha ʻoku maʻu ʻe he kakai ʻa e ʻOtuá?

¹⁷ Ko e hokosia ʻa Pitá ʻoku tokoniʻi ai kitautolu ke tau mahinoʻi ʻa e liliu fakaofo ʻa ia ʻoku hoko ʻi he lotolotonga ʻo e kakai ʻa e ʻOtuá he ʻaho ní. (Lau ʻa e Aisea 2:3, 4.) Ko e kakai ʻe laui miliona “mei he puleʻanga kotoa pē, mo e ngaahi matakali, mo e ngaahi faʻahinga, mo e ngaahi lea” kuo feʻunuʻaki ʻenau fakakaukaú ke muimui ki he “finangalo ʻo e ʻOtua, ʻa e meʻa ʻoku lelei, ʻa e meʻa te ne hōifua ai, ʻa e meʻa ʻoku haohaoa.” (Fkh. 7:9; Loma 12:2) Ko e tokolahi ʻo e faʻahingá ni naʻe tākiekina kinautolu ʻi ha taimi ʻe he fetāufehiʻaʻakí, fakafilí mo e fakafaʻafaʻahi ʻa e māmani ʻo Sētané. Kae fakafou ʻi hano ako ʻo e Folofola ʻa e ʻOtuá mo e tokoni ʻa e laumālie māʻoniʻoní, kuo nau ako ai ke “tuli ki he gaahi mea fakamelino.” (Loma 14:19, PM) Ko e fāʻūtaha ʻoku hoko aí ʻoku ʻoatu ai ʻa e fakahīkihiki ki he ʻOtuá.

18, 19. (a) ʻE lava fēfē ke tau tokoni taki taha ki he melino mo e fāʻūtaha ʻa e fakatahaʻangá? (e) Ko e hā te tau lāulea ki ai ʻi he kupu hoko maí?

¹⁸ ʻE lava fēfē ke tau taki taha tokoni ki he melino mo e fāʻūtaha ʻoku maʻu ʻi he lotolotonga ʻo e kakai ʻa e ʻOtuá? Ko e ngaahi fakatahaʻanga lahi ʻoku kau ki ai ʻa e faʻahinga kuo nau hiki mai mei ha fonua muli. Ko e niʻihi ʻoku ʻi ai nai ʻenau ngaahi anga fakafonua kehe pe ʻoku ʻikai nai ke nau poto lelei ʻi heʻetau leá. ʻOku tau feinga ke maheni mo kinautolu? Ko e ʻalunga eni ʻoku fakaongoongoleleiʻi mai ʻe he Folofola ʻa e ʻOtuá. ʻI he tohi ki he fakatahaʻanga ʻi Lomá, ʻa ia naʻe kau ki ai fakatouʻosi ʻa e kau tui Siu mo e Senitaile, naʻe fakahaaʻi ʻe Paula: ‘Mou fefakakauʻaki kimoutolu, ʻo hange foki kuo fakakau mai kitautolu ʻe Kalaisí, koeʻuhi ke ongoongolelei ai ʻa e ʻOtuá.’ (Loma 15:7) ʻOku ʻi ai ha taha ʻi hoʻo fakatahaʻangá ʻa ia ʻe lava ke ke feinga ke maheni lelei ange mo ia?

¹⁹ Ko e hā ha meʻa kehe ʻe lava ke tau fai ke fakaʻatā ai ʻa e laumālie māʻoniʻoní ke ngāue ʻi heʻetau moʻuí? Ko e kupu hoko maí ʻe vakai ai ki he fehuʻi ko ení ʻi heʻetau lāulea ki he toenga ʻo e ngaahi tafaʻaki ʻo e fua ʻo e laumālié.

[Footnotes]

ʻE Fēfē Haʻo Tali?

• ʻE lava fēfē ke tau fakahāhā ʻa e ʻofa feilaulauʻi-kita ki hotau fanga tokouá?

• Ko e hā ʻoku mahuʻinga ai ke tau fakahoko ʻetau ngāue ki he ʻOtuá ʻi he fiefiá?

• ʻE lava fēfē ke tau tokoni ki he melino mo e fāʻūtaha ʻa e fakatahaʻangá?

[Fehuʻi ki he Ako]

[Puha ʻi he peesi 21]

“Ko e Kau Kalisitiane Moʻoní Eni”

Ko e tohi Between Resistance and Martyrdom—Jehovah’s Witnesses in the Third Reich ʻoku lave ai ki he fakamatala ʻa ha pōpula ko ha talavou Siu, ʻa ia ʻokú ne fakamatala ai ki heʻene ʻuluaki fetaulaki mo e Kau Fakamoʻoni ʻa Sihová hili ʻene tūʻuta ʻi he kemi fakamamahi Neuengamme.

“ʻI heʻemau aʻu pē ʻa kimautolu kau Siu mei Dachau ki he kemí, naʻe kamata ke fufū ʻe he kau Siu kehé ʻa e meʻa kotoa pē naʻa nau maʻú ke ʻoua naʻa nau vahevahe mai kia kimautolu. . . . ʻI tuʻa ʻi he [kemi fakamamahí], naʻa mau fetokoniʻaki ai. Ka ʻi heni, ʻi ha tuʻunga ʻo e moʻuí mo e maté, ko e ʻuluaki tokanga ʻa e tokotaha kotoa pē ke fakahaofi ia tonu, ʻo ngalo ʻa e niʻihi kehé. Kae sioloto atu ki he meʻa naʻe fai ʻe he Kau Ako Tohi Tapú. ʻI he taimi ko iá, naʻe pau ke nau ngāue mālohi ʻaupito, ʻi hono fakaleleiʻi ʻa e ngaahi paipa vaí. Naʻe momoko ʻaupito pea naʻa nau tuʻu he ʻahó kotoa ʻi he vai momoko teiló. Naʻe ʻikai mahinoʻi ʻe ha taha ʻa e founga naʻa nau lava ai ke kātekina ení. Naʻa nau pehē ʻoku ʻoange ʻe Sihova kia kinautolu ʻa e mālohi. Naʻa nau fiemaʻu vavale ʻenau maá, ʻo hangē pē ko kimautolú, koeʻuhí naʻa nau fiekaia. Ka ko e hā e meʻa naʻa nau faí? Naʻa nau tānaki ʻa e mā kotoa naʻa nau maʻú, ʻo vaeua ia maʻanautolu, pea ko e vaeua ʻe tahá naʻa nau foaki ia ki honau kaungātui naʻa nau toki aʻu mai mei Dachau. Pea naʻa nau talitali lelei kinautolu mo ʻuma kia kinautolu. Ki muʻa ke nau kaí, naʻa nau lotu. Hili iá, naʻa nau fiemālie kotoa mo fiefia. Naʻa nau pehē ʻoku ʻikai te nau kei fiekaia. Sio ange, ko e taimi ia naʻá ku fakakaukau ai: Ko e kau Kalisitiane moʻoní eni.”

[Fakatātā ʻi he peesi 19]

ʻOkú ke fakatau mai ʻa e taimi ʻi he ʻaho taki taha mei he ngaahi ngāue kehé ke ʻunuʻunu ofi ai kia Sihova?