Tauhi ʻa e ʻOtuá ʻi he ‘Loto mo e Laumalie Taha’

ʻOKU fakatahataha takatakai ʻa e kau Siú mo e kau ului ki he lotu faka-Siú ʻi he kau ākonga ʻa Sīsū Kalaisí. Ko e kātoanga ia ʻo e Penitekosí, pea ko e kau ʻaʻahi ko ení kuo nau haʻu ki Selusalema mei he feituʻu mamaʻo hangē ko Lomá ʻi he hihifó mo Pātia ʻi he hahaké. ʻOku fanongoa ʻa e ngaahi lea kehekehe ʻi he fuʻu kakai ko ení. Neongo ia, ko e kau ākonga ʻa Sīsū ʻoku talanoa kia kinautolú ko e kau Kāleli. ʻOku ʻeke ʻe he niʻihi ʻo e kau ʻaʻahi puputuʻú: “ʻOku fakafēfē ai ʻetau fanongo ni ki heʻetau lea totonu naʻa tau taki taha tutupu ai?”—Ng. 2:8.

ʻOku tuʻu hake ʻa e ʻapositolo ko Pitá ʻo fakamatalaʻi  ʻa e makatuʻunga ʻo e mana ʻoku nau sio tonu aí. ʻOku tali leva ʻe he fuʻu kakaí. ʻOku papitaiso ʻa e faʻahinga foʻou ʻe laui afe! (Ng. 2:41) Neongo ʻoku tupu vave ʻa e fakatahaʻangá, ʻoku kei fāʻūtaha ai pē. “Nae loto mo laumalie taha be akinautolu kotoabe nae tui,” ko e lau ia ʻa e tokotaha-tohi Tohi Tapu ko Luké.—Ng. 4:32, PM.

Ko e laui afe naʻe papitaiso ʻi he ʻaho ʻo e Penitekosi ʻi he 33 T.S. naʻa nau loto ke nofo fuoloa ange ʻi Selusalema koeʻuhi ke nau ako lahi ange ai ʻo fekauʻaki mo ʻenau tui foʻoú. Ka naʻe ʻikai te nau tokateu mai ki ha nofo lōloa. Ko ia ai, naʻe fai ha tātānaki paʻanga fakataimi. Ko e kau tui ʻe niʻihi naʻa nau fakatau loto-lelei atu ʻenau ngaahi koloá pea ʻave ʻa e paʻanga ne maʻu mei aí ki he kau ʻapositoló ke tufa ki he faʻahinga naʻe masivá. (Ng. 2:42-47) Ko ha laumālie lelei moʻoni ē ʻo e ʻofa mo e nima-homó!

Ko e kau Kalisitiane moʻoní kuo nau maʻu maʻu pē ha laumālie ʻofa mo nima-homo pehē. ʻI he ʻahó ni, ʻoku hokohoko atu ʻa e fakatahaʻanga Kalisitiané ʻi he tauhi fāʻūtaha kia Sihová ʻi he ‘loto mo e laumalie taha.’ ʻOku foaki loto-lelei ʻe he kau Kalisitiane tāutaha ʻa honau taimí, iví mo e paʻangá ki hono malangaʻi ʻa e ongoongo leleí pea pouaki ʻa e ngaahi meʻa ʻo e Puleʻanga ʻo e ʻOtuá.—Sio ki he puha  “Ngaahi Founga ʻOku Fili Ai ʻa e Niʻihi ke Fai ha Foakí.”

[Puha ʻi he peesi 6, 7]

 NGAAHI FOUNGA ʻOKU FILI AI ʻA E NIʻIHI KE FAI HA FOAKÍ

NGAAHI MEʻAʻOFA KI HE NGĀUE ʻI MĀMANI LAHÍ

ʻOku tuku mavahe, pe vaheʻi ʻe he tokolahi ha paʻanga, ʻa ia ʻoku nau tuku ki he ngaahi puha meʻaʻofa kuo leipolo ko e “Ngaahi Meʻaʻofa ki he Ngāue ʻi Māmani Lahí—Mātiu 24:14.”

ʻI he māhina taki taha, ʻoku ʻoatu ai ʻe he ngaahi fakatahaʻangá ʻa e paʻanga ko ení ki he ʻōfisi vaʻa ʻo e Kau Fakamoʻoni ʻa Sihova ʻa ia ʻokú ne tokangaʻi ʻa honau ngaahi fonuá taki taha. Ko e ngaahi tokoni paʻanga loto-fiefoakí ʻe lava ke toe ʻoatu fakahangatonu ia ki he ʻŌfisi Tauhi Paʻangá, Watchtower Bible and Tract Society of New Zealand, PO Box 75142, Manurewa, Manukau 2243. ʻE lava foki ke tokoni nai ʻaki ʻa e ngaahi siueli pe ngaahi koloa mahuʻinga kehé. Ko ha tohi nounou ʻo fakamatalaʻi ai ko e ngaahi meʻa peheé ko ha meʻaʻofa fakahangatonu ia ʻoku totonu ke ʻave fakataha mo e ngaahi tokoni ko ení.

FOKOTUʻUTUʻU ʻO E TOKONI ʻOFÁ

ʻE lava ke meʻaʻofaʻaki ha paʻanga ʻi he malumalu ʻo ha fokotuʻutuʻu makehe ʻa ia, ʻoku totonu ai ki he tokotaha-foakí ke ne maʻu ha fiemaʻu fakafoʻituitui, ʻe lava ʻo fai ai ha tokoni fakapaʻanga kiate ia. Ki ha fakamatala lahi ange, kātaki ʻo fetuʻutaki ki he ʻŌfisi Tauhi Paʻangá ʻi he tuʻasila kuo hiki ʻi ʻolungá.

FOAKI ʻOSI PALANI

Tānaki atu ki he ngaahi meʻaʻofa paʻanga fakahangatonú mo e ngaahi tokoni ʻofa ʻo e paʻangá, ʻoku ʻi ai ʻa e ngaahi founga kehe ʻo e foakí ke ʻaonga ki he ngāue ʻo e Puleʻangá ʻi māmani lahí. ʻOku kau ki heni ʻa e:

Maluʻi: ʻE lava ke tohi-tuku nai ki he Sōsaieti Taua Leʻó ha tohi fakamoʻoni maluʻi moʻui/fokotuʻutuʻu ʻo ha vāhenga mālōlō.

Ngaahi ʻInasi mo e Ngaahi Pōnite: ʻE foaki atu nai ʻa e ngaahi ʻinasi mo e ngaahi pōnite ki he Sōsaieti Taua Leʻó ko ha meʻaʻofa fakahangatonu.

Kelekele: ʻE lava nai ke foaki ha konga kelekele ʻe ala fakatau ki he Sōsaieti Taua Leʻó ʻi hano fai ha meʻaʻofa fakahangatonu pe ʻi hano tauhi ha kelekele ʻo e tokotaha-foakí, ʻa ia ʻe lava ke hokohoko atu ʻene nofo aí ʻi heʻene kei moʻuí. Fetuʻutaki ki he ʻōfisi vaʻá ki muʻa ke ʻoatu ha kelekelé.

Ngaahi Tohi-Tuku mo e Ngaahi Talāsiti: ʻE tohi-tuku nai ha koloa pe paʻanga ki he Sōsaieti Taua Leʻó ʻo fakafou ʻi ha tohi-tuku fakahoko fakalao, pe ʻe ʻai nai ʻa e hingoa ʻo e Sōsaieti Taua Leʻó ke tohi-tuku ki ai ha aleapau ʻo ha talāsiti.

Ke maʻu ha tokoni ki hono fokotuʻutuʻu ha foaki ʻosi palani ke ʻaonga ki he ngāue ʻi māmani lahi ʻa e Kau Fakamoʻoni ʻa Sihová kātaki ʻo fetuʻutaki ki he ʻōfisi Tauhi Paʻangá ʻi ha faitohi pe ʻi he telefoní, ʻi he tuʻasila ʻi laló.

ʻŌfisi Tauhi Paʻanga

Watchtower Bible and Tract Society of New Zealand

PO Box 75142

Manurewa, Manukau 2243

Telefoni: (09) 267-2227