ʻOku Moʻui ʻa e Folofola ʻa Sihová

Ngaahi Meʻa Mahuʻinga mei he Tohi kia Taitusi, Filimone pea ki he Kau Hepeluú

ʻI HA taimi hili hono tukuange ia mei hono ʻuluaki tukupōpula ʻi Loma ʻi he 61 T.S., ʻoku ʻaʻahi ai ʻa e ʻapositolo ko Paulá ki he motu ko Kēlití. ʻI he lāuʻilo ki he tuʻunga fakalaumālie ʻo e ngaahi fakatahaʻanga ʻi aí, ʻokú ne tuku ke nofo ai ʻa Taitusi ʻo fakaivimālohiʻi kinautolu. Ki mui ai, ngalingali ʻi Masitōnia, ʻoku tohi mai mei ai ʻa Paula kia Taitusi ʻi hono tuʻunga ko e ʻapositoló ke fakahinohino ia ki hono ngaahi fatongiá pea ke fakahaaʻi kuó ne fakamafaiʻi ia ke fai ʻene ngāué.

Ki muʻa atu, ʻi he taimi nounou pē ki muʻa ke tuku ange ia mei pilīsone ʻi he 61 T.S., naʻe tohi ai ʻe Paula ha tohi kia Filimone, ko ha tokoua Kalisitiane naʻe nofo ʻi Kolose. Ko ha kōlenga fakafoʻituitui ia naʻe fai ki ha kaumeʻa.

ʻI he 61 T.S. nai, naʻe toe fai ai ʻe Paula ha tohi ki he kau tui Hepelū ʻi Siuteá, ʻa ia ʻoku fakahaaʻi ai ʻa e tuʻunga lelei ange ʻa e lotu faka-Kalisitiané ʻi he fokotuʻutuʻu faka-Siú. Ko e kotoa ʻo e ngaahi tohi ko ia ʻe tolú ʻoku ʻi ai ʻa e akonaki mahuʻinga ai kiate kitautolu.—Hep. 4:12.

NOFOʻAKI MOʻUI LELEI FAKALAUMĀLIE

(Tai. 1:1–3:15)

Hili hono ʻoange ʻa e fakahinohino ki hono “fakanofo ae kau mātua i he kolo kotoabe,” ʻoku ekinaki ʻa Paula kia Taitusi ke hanganaki “valoki majila akinautolu [ʻa e kau angatuʻú], ke nau haohaoa i he tui.” ʻOkú ne naʻinaʻi ki he faʻahinga kotoa ʻi he ngaahi fakatahaʻanga ʻi Kēlití “ke jiaki ae aga taefaka-Otua” kae “moui aga fakabotoboto.”—Tai. 1:5, 10-13, PM; 2:12, PM.

ʻOku ʻoatu ʻe Paula ʻa e toe akonaki lahi ange ke tokoniʻi ʻa e fanga tokoua ʻi Kēlití ke nau nofoʻaki moʻui lelei fakalaumālie. ʻOkú ne fakahinohinoʻi ʻa Taitusi ke ‘fakaʻehiʻehi mei he ʻeke meʻa launoá mo e ngaahi fakakikihi ʻi he Laó.’—Tai. 3:9.

Tali ki he Ngaahi Fehuʻi Fakatohitapú:

1:15—ʻOku lava fēfē ke “maʻa ʻa e meʻa kotoa pe kiate kinautolu ʻoku maʻa,” ka ʻoku taʻemaʻa ia “kiate kinautolu kuo ʻuli mo taʻetui”? ʻOku maʻu ʻa e talí ʻi hano mahinoʻi ʻa e meʻa naʻe ʻuhinga ki ai ʻa Paula ʻi heʻene pehē “meʻa kotoa pe.” Naʻá ne ʻuhingá, ʻo ʻikai ki he ngaahi meʻa ʻoku fakahalaki fakahangatonu ʻe he Folofola kuo tohi ʻa e ʻOtuá, ka ki he ngaahi meʻa ʻa ia ʻoku fakaʻatā ai ʻe he Tohi Tapú ʻa e ngaahi fili kehekehe mei he kau tuí. ʻI he vakai ʻa ha taha ʻoku fehoanaki ʻene fakakaukaú mo e ngaahi tuʻunga ʻa e ʻOtuá, ko e ngaahi meʻa ko iá ʻoku maʻa. ʻOku fehangahangai ia mo ha tokotaha kuo fakameleʻi ʻene fakakaukaú pea kuo ʻuliʻi ʻa hono konisēnisí. a

3:5—ʻOku anga-fēfē ʻa e ‘fakamoʻui ʻi ha palutuʻanga’ ʻa e kau Kalisitiane paní pea ‘fakafoʻou ʻe he Laumalie Maʻoniʻoní’? ʻOku nau hoko ʻo ‘fakamoʻui ʻi ha palutuʻanga’ ʻa ia kuo fufulu pe fakamaʻa ai kinautolu ʻe he ʻOtuá, ʻaki ʻa e taʻataʻa ʻo Sīsuú makatuʻunga ʻi he mahuʻinga ʻo ʻene feilaulau huhuʻí. ʻOku ‘fakafoʻou ʻe he Laumalie Maʻoniʻoní’ kinautolu, koeʻuhí ʻoku nau hoko ko ha “fakatupu foʻou” ʻi he tuʻunga ko e fānau ʻa e ʻOtuá kuo fanauʻi ʻe he laumālié.—2 Kol. 5:17.

Ngaahi Lēsoni kia Kitautolu:

1:10-13; 2:15. Ko e kau ʻovasia Kalisitiané kuo pau ke nau fakahāhā ʻa e loto-toʻa ʻi hono fakatonutonu ha faihala ʻi he fakatahaʻangá.

2:3-5 (PM). Hangē pē ko ia ʻi he ʻuluaki senitulí, ko e fanga tuofāfine Kalisitiane matuʻotuʻa ʻi he ʻaho ní ʻoku fiemaʻu ke nau “ulugaaga fakamaonioni, ke oua naa koe kau fakakovi, be tokaga lahi ki he uaine, ka koe kau akonaki oe mea lelei.” ʻI he founga ko iá, ʻe lava ke nau ola lelei ai ʻi hono fakahinohinoʻi fakafoʻituitui ʻa e “kau fine mui” ʻi he fakatahaʻangá.

3:8, 14. Ko ʻetau “tokanga ke nofo ki he ngaahi ngaue lelei” ʻoku “lelei mo ʻaonga” koeʻuhí ʻokú ne tokoniʻi ai kitautolu ke tau fua lahi ʻi he ngāue ʻa e ʻOtuá pea tauhi ai kitautolu ke tau makehe mei he māmani fulikivanú.

 EKINAKI ʻO “TUʻUNGA ʻI HE ʻOFA”

(Filim. 1-25)

ʻOku fakaongoongoleleiʻi ʻa Filimone ʻi heʻene hoko ko e faʻifaʻitakiʻanga ʻi he “fai ʻofa mo e tui.” ʻI heʻene hoko ko ia ko ha matavai ʻo e fakaivifoʻou ki hono ngaahi kaungā Kalisitiané kuo ʻoange ai kia Paula ʻa e ‘fiefia mo e fiemalie lahi.’—Filim. 4, 5, 7.

ʻI he fokotuʻu ʻa e faʻifaʻitakiʻanga ki he kotoa ʻo e kau ʻovasiá, naʻe fakaleleiʻi ʻe Paula ʻa e tuʻunga pelepelengesi naʻe ʻi ai ʻa ʻOnesemá ʻo ʻikai ʻaki hano ʻoatu ha tuʻutuʻuni, kae fai ia ʻaki ʻa e ekinaki ʻo “tuʻunga ʻi he ʻofa.” ʻOkú ne tala kia Filimone: “Kuo u tohi atu ʻi heʻeku falala te ke talangofua mai, heʻeku ʻilo ʻe hulu atu hoʻo fai ʻi he meʻa kuo u tala.”—Filim. 8, 9, 21.

Tali ki he Ngaahi Fehuʻi Fakatohitapú:

10, 11, 18—Naʻe anga-fēfē ʻa e hoko ʻa ʻOnesema naʻe “ʻikai ʻaonga” ki muʻá ʻo “ʻaonga”? Ko ʻOnesemá ko ha pōpula taʻefiengāue ia naʻe hola mei he ʻapi ʻo Filimoné ʻi Kolose ʻo ne ʻalu ki Loma. ʻOku ngalingali pē naʻe toe kaihaʻa ʻa ʻOnesema mei hono ʻeikí ke fakapaʻangaʻaki ʻa ʻene fononga kilomita ʻe 1,400. Ko e moʻoni, naʻá ne hoko ai ʻo ʻikai ʻaonga kia Filimone. Neongo ia, ʻi Loma, naʻe tokoniʻi ai ʻe Paula ʻa ʻOnesema ke ne hoko ko ha Kalisitiane. ʻI heʻene hoko he taimi ko ʻení ko ha tokoua fakalaumālié, ko e pōpula naʻe “ʻikai ʻaonga” ki muʻa ko ʻení kuó ne hoko ʻo “ʻaonga.”

15, 16—Ko e hā naʻe ʻikai kole ai ʻa Paula kia Filimone ke ne fakatauʻatāinaʻi ʻa ʻOnesemá? Naʻe loto ʻa Paula ke tāfataha pē ki he fekau naʻe ʻoange kiate ia ke “malangaʻaki ʻa e Puleʻanga ʻo e ʻOtua, ʻo ne akoʻaki ʻa e ngaahi meʻa ʻoku kau ki he ʻEiki ko Sīsū Kalaisi.” Ko ia ai, naʻá ne fili ke ʻoua te ne kau ʻi he ngaahi ʻīsiu fakasōsialé, ʻo hangē ko e ngaahi meʻa ʻoku kaunga ki he tuʻunga ʻo e pōpulá.—Ng. 28:31.

Ngaahi Lēsoni kia Kitautolu:

2. Naʻe ʻai ʻe Filimone ke ʻatā ʻa hono ʻapí ki he ngaahi fakataha faka-Kalisitiané. Ko ha monū ia ke fai ha fakataha ki he ngāue fakamalangá ʻi hotau ʻapí.—Loma 16:5; Kol. 4:15.

4-7. ʻOku totonu ke tau tamuʻomuʻa ʻi hono fakaongoongoleleiʻi ʻa e ngaahi kaungātui ʻoku nau alafaʻifaʻitakiʻanga ʻi he tuí mo e ʻofá.

15, 16. Ko e ngaahi meʻa fakamamahi ʻi he moʻuí ʻoku ʻikai totonu ke fakaʻatā ia ke ne ʻai kitautolu ke tau loto-moʻua tōtuʻa. Ko e meʻa ʻe hoko ʻamui angé ʻe lava ke hoko ia ʻo lelei, ʻo hangē ko ia ko e tuʻunga ʻo ʻOnesemá.

21. Naʻe ʻamanekina ʻe Paula ʻe fakamolemoleʻi ʻe Filimone ʻa ʻOnesema. ʻOku pehē pē ʻa e ʻamanekina mai ke tau fakamolemoleʻi ha tokoua kuó ne fai mai nai ha kovi.—Mt. 6:14.

“TUIAKI ATU KI HE HAOHAOA” PE MATUʻOTUʻÁ

(Hep. 1:1–13:25)

Ke fakamoʻoniʻi ʻoku māʻolunga ange ʻa e tui ki he feilaulau ʻa Sīsuú ʻi he ngaahi ngāue ʻa e Laó, ʻoku fakamamafaʻi ʻe Paula ʻa e tuʻunga tuʻu-ki-muʻa ʻo e Tokotaha naʻá ne fokotuʻu ʻa e lotu faka-Kalisitiané, ʻa hono tuʻunga-taulaʻeikí, ko ʻene feilaulaú pea mo e fuakava foʻoú. (Hep. 3:1-3; 7:1-3, 22; 8:6; 9:11-14, 25, 26) Ko e ʻilo fekauʻaki mo e meʻá ni, ko e moʻoni ʻoku pau pē naʻá ne tokoniʻi ʻa e kau Kalisitiane Hepeluú ke nau fekuki mo e fakatanga ne nau tofanga ai ʻi he nima ʻo e kau Siú. ʻOku ekinaki ʻa Paula ki hono ngaahi kaungātui Hepeluú ke nau “tuiaki atu ki he haohaoa” pe matuʻotuʻá.—Hep. 6:1.

ʻOku mahuʻinga fēfē ʻa e tuí ʻi he fokotuʻutuʻu faka-Kalisitiané? “ʻO ka taʻekau ʻa e tui, ʻoku ʻikai momoʻi lava haʻate fakahōifua [ki he ʻOtuá],” ko e tohi ia ʻa Paulá. ʻOkú ne fakalototoʻaʻi ʻa e kau Hepeluú: “Tau kitaki atu ʻetau lele he fakapuepue kuo tala humaki mai kiate kitautolu,” ʻo fai ia ʻi he tui.—Hep. 11:6; 12:1.

Tali ki he Ngaahi Fehuʻi Fakatohitapú:

2:14, 15—ʻOku ʻuhinga ʻa e maʻu ʻe Sētane ʻa e “malohi ʻo e mate” te ne lava ke fakatupunga ha mate mutukia ʻo ha faʻahinga taha pē te ne loto ki ai? ʻIkai, ʻoku ʻikai ke ʻuhinga pehē ia. Kae kehe, mei he kamataʻanga ʻo e ʻalunga fulikivanu ʻo Sētane ʻi ʻĪtení, kuo fakatupunga ai ʻe heʻene ngaahi loí ʻa e maté koeʻuhí naʻe angahala ʻa ʻĀtama peá ne tuku mai ai ʻa e angahalá mo e maté ki he fāmili ʻo e faʻahinga ʻo e tangatá. (Loma 5:12) ʻIkai ko ia pē, ko e kau fakafofonga ʻo Sētane ʻi he māmaní kuo nau fakatangaʻi ʻa e kau sevāniti ʻa e ʻOtuá ʻo aʻu ki he tuʻunga ʻo e maté, pea aʻu ki heʻenau fai pehē kia Sīsū. Ka ʻoku ʻikai ʻuhinga ia aí ʻoku maʻu ʻe Sētane ha mālohi taʻefakangatangata ke tāmateʻi ha faʻahinga taha pē ʻokú ne loto ki ai.  Kapau naʻe pehē, ʻoku ʻikai ha veiveiua naʻe mei fuoloa pē haʻane fakaʻauha ʻosi atu ʻa e kau lotu ʻa Sihová. ʻOku maluʻi ʻe Sihova ʻa ʻene kakaí ʻi he tuʻunga ko ha kulupu pea ʻoku ʻikai te ne fakaʻatā ʻa Sētane ke ne fakaʻauhamālie kinautolu. Neongo kapau ʻoku fakangofua ʻe he ʻOtuá ke mate ha niʻihi ʻo kitautolu tupu mei he ngaahi ʻoho ʻa Sētané, ʻoku lava ke tau falala pau ʻe toʻo atu ʻe he ʻOtuá ha maumau pē ʻoku hoko mai kiate kitautolu.

4:9-11—ʻOku anga-fēfē ʻetau “hu ki he mālōlōʻanga” ʻo e ʻOtuá? ʻI he ngataʻanga ʻo e ʻaho hono ono ʻo e fakatupú, naʻe mālōlō ai ʻa e ʻOtuá mei heʻene ngāue fakaefakatupú, ʻo ne falala pau ko ʻene taumuʻa maʻá e foʻi māmaní mo e faʻahinga ʻo e tangatá ʻe fakahoko ia. (Sen. 1:28; 2:2, 3) ʻOku tau “hu ki he mālōlōʻanga ko ia” ʻaki hono siʻaki ʻa e ngaahi ngāue fakatonuhiaʻi-kitá pea tali ʻa e tokonaki ʻa e ʻOtuá ki hotau fakamoʻuí. ʻI heʻetau ngāueʻi ʻa e tui kia Sihová pea muimui talangofua ki hono ʻAló kae ʻikai tuli ki he ngaahi ngāue siokitá, ʻoku tau maʻu ai ʻa e ngaahi tāpuaki fakaivifoʻou mo nonga ʻi he ʻaho kotoa pē.—Mt. 11:28-30.

9:16 (PM)—Ko hai ia ʻa ia “oku ne fakamooni ae fuakava” ʻo e fuakava foʻoú? Ko Sihova ʻa e Tokotaha-Ngaohi ʻo e fuakava foʻoú, lolotonga ia ko Sīsū “oku ne fakamooni ae fuakava.” Ko Sīsū ʻa e Fakalaloa ʻo e fuakava ko iá, pea ʻi heʻene pekiá naʻá ne tokonaki mai ai ʻa e feilaulau naʻe fiemaʻu ke fakapapauʻiʻaki ʻa e fuakavá.—Luke 22:20; Hep. 9:15.

11:10, 13-16—Ko e hā ʻa e “kolo” naʻe tatali ki ai ʻa ʻĒpalahamé? Naʻe ʻikai ko ha kolo moʻoni ʻeni ka ko ha kolo fakaefakatātā. Naʻe tatali ʻa ʻĒpalahame ki he “Selusalema fakalangi,” ʻa ia ʻoku faʻuʻaki ʻa Kalaisi Sīsū mo hono kaungāpule ʻe toko 144,000. Ko e ngaahi kaungāpule ko ʻení ʻi honau lāngilangi fakalangí ʻoku toe ui kinautolu ko e “kolo tapu, ʻa Selusalema Foʻou.” (Hep. 12:22; Fkh. 14:1; 21:2) Naʻe ʻamanaki atu ʻa ʻĒpalahame ki he moʻui ʻi he malumalu ʻo e pule ʻa e Puleʻanga ʻo e ʻOtuá.

12:2 (PM)—Ko e hā ʻa e “fiefia nae tuku i hono ao [Sīsū]” ʻa ia naʻá ne hoko ai ʻo “kataki ae bekia i he akau”? Ko e fiefia ia ʻi he sio ki he meʻa ʻe fakahoko ʻe heʻene ngāue fakafaifekaú—ʻo kau ai ʻa e fakamāʻoniʻoniʻi ʻo e huafa ʻo Sihová, ko e fakatonuhiaʻi ʻo e tuʻunga-hau ʻo e ʻOtuá mo hono huhuʻi ʻo e fāmili ʻo e tangatá mei he maté. Naʻe toe hanga atu ʻa Sīsū ki he pale ʻo e pule ko e Tuʻi mo e ngāue ko e Taulaʻeiki Lahi ki he lelei ʻa e faʻahinga ʻo e tangatá.

13:20—Ko e hā ʻoku fakamatalaʻi ai ʻo pehē ʻoku “taʻengata” ʻa e fuakava foʻoú? ʻI he ʻuhinga ʻe tolu: (1) Heʻikai ʻaupito ke toe fetongi ia, (2) ko hono ngaahi olá ʻe tuʻuloa, pea (3) ko e “fanga sipi kehe” ʻe hokohoko atu ʻenau maʻu ʻaonga mei he fokotuʻutuʻu ʻo e fuakava foʻoú ʻi he hili ʻa ʻĀmaketoné.—Sione 10:16.

Ngaahi Lēsoni kia Kitautolu:

5:14. ʻOku totonu ke tau hoko ko e kau ako tōtōivi ʻo e Folofola ʻa e ʻOtuá, ʻa e Tohi Tapú, pea ngāueʻaki ʻa e meʻa ʻoku tau ako mei aí. ʻOku ʻikai ha toe founga kehe ia ke ‘akoʻi ai hotau ngaahi ongoʻangá ke sivi ʻa e leleí mo e koví.’—1 Kol. 2:10.

6:17-19. Ko hono ʻai ʻetau ʻamanakí ke makatuʻunga fefeka ʻi he talaʻofa ʻa e ʻOtuá mo ʻene fuakavá ʻe tokoniʻi ai kitautolu ke ʻoua te tau afe mei he ʻaʻeva ʻi he hala ʻo e moʻoní.

12:3, 4. ʻI he ʻikai ‘mafasia he poʻepoʻea hotau laumalié’ koeʻuhi ko e fanga kiʻi ʻahiʻahi pe fakafepaki ʻoku tau fetaulaki nai mo iá, ʻoku totonu ke tau fakalakalaka ki he tuʻunga matuʻotuʻá pea fakaleleiʻi ʻetau malava ke kātakiʻi ʻa e ngaahi ʻahiʻahí. ʻOku totonu ke tau fakapapauʻi ke talitekeʻi ʻo aʻu ki he “toto,” ʻa ia ko e aʻu ki he tuʻunga ʻo e maté.—Heb. 10:36-39.

12:13-15. ʻOku ʻikai totonu ke tau fakaʻatā ha “aka kona,” pe ko ha taha pē ʻi he fakatahaʻangá ʻa ia ʻokú ne fakaangaʻi ʻa e founga ʻo hono fai ʻo e ngaahi meʻá, ke ne taʻofi kitautolu mei he ‘tofa ʻaki hotau topuvaʻé ha ngaahi ʻalunga totonú.’

12:26-28. Ko e “ngaahi meʻa kuo ngaohi” ʻe he nimá ʻo ʻikai ko e ʻOtuá—ʻa e kātoa ʻo e fokotuʻutuʻu lolotongá, naʻa mo e “langi” fulikivanú—ʻe luluʻi ia ʻo ʻauha. ʻI heʻene hoko ʻa e meʻa ko iá, ko e “ngaahi meʻa mataʻelūlūʻi” pē, ʻa ia ko e Puleʻangá mo hono kau poupoú ʻe kei toé. He mātuʻaki mahuʻinga moʻoni ē ke tau fanongonongo faivelenga ʻa e Puleʻangá pea moʻui ʻo fakatatau ki heʻene ngaahi tefitoʻi moʻoní!

13:7, 17. Ko e hanganaki tokangataha ki he ekinaki ko eni ke tuitala mo fakamoʻulaloa ki he kau ʻovasia ʻi he ngaahi fakatahaʻangá ʻe tokoniʻi ai kitautolu ke tau fakahāhā ha laumālie ʻo e ngāue fāitaha.

[Fakamatala ʻi lalo]