Ngāue Fakafaifekau Fale-ki-he-Falé—Ko e Hā ʻOku Mahuʻinga Ai he Taimi Ní?

“Nae ikai tuku e nau ako moe nau malaga aki a Jisu Kalaisi, i he aho kotoabe, i he fale lotu lahi, bea moe fale kotoabe.”—NG. 5:42, PM.

1, 2. (a) Ko e hā ʻa e founga ʻo e malangá ʻoku ʻiloa ai ʻa e Kau Fakamoʻoni ʻa Sihová? (e) Ko e hā te tau lāulea ki ai ʻi he kupu ko ení?

 KO HA meʻa anga-maheni ia ʻoku mātā ʻi he meimei fonua kotoa pē ʻi he māmaní. Ko e fakaofiofi atu ha ongo meʻa teunga maau ʻe toko ua ki ha fale ʻo feinga ke vahevahe mo e tokotaha-ʻapí ha pōpoaki nounou mei he Tohi Tapú fekauʻaki mo e Puleʻanga ʻo e ʻOtuá. Kapau ʻokú ne fakahaaʻi ha mahuʻingaʻia ʻi he pōpoakí, te na fakaʻaliʻali nai ha tohi makatuʻunga he Tohi Tapú ʻo tuʻuaki ha ako Tohi Tapu taʻetotongi ʻi ʻapi. ʻOkú na hoko atu leva ki he fale hoko maí. Kapau ʻokú ke kau ʻi he ngāué ni, ngalingali ʻokú ke ʻiloʻi ʻoku faʻa fakatokangaʻi ʻe he kakaí ko e taha koe ʻo e Kau Fakamoʻoni ʻa Sihová naʻa mo e ki muʻa ke ke kamata leá. Ko e moʻoni, ko e ngāue fakafaifekau fale-ki-he-falé kuo hoko ia ko hotau fakaʻilonga.

² ʻOku tau ngāueʻaki ʻa e founga kehekehe ke fakahoko ʻaki ʻa e fekau naʻe ʻomai ʻe Sīsū ke malanga mo e ngaohi ākongá. (Mt. 28:19, 20) ʻOku tau faifakamoʻoni ʻi he ngaahi māketí, tuliki halá pea ʻi he ngaahi feituʻu kehe ʻoku ʻi ai ʻa e kakaí. (Ng. 17:17) ʻOku tau fetuʻutaki ki he tokolahi ʻi he telefoní pea ʻi he faitohi. ʻOku tau vahevahe ʻa e ngaahi moʻoni Fakatohitapú ki he faʻahinga ʻoku tau fetaulaki mo ia lolotonga ʻetau ngaahi ngāue fakaʻahó. ʻOku tau maʻu foki ha Uepisaiti fakaʻofisiale, ʻa ia ʻoku ʻai ai ke tau lava ʻo maʻu ʻa e fakamatala makatuʻunga he Tohi Tapú ʻi he ngaahi lea laka hake he 300. a Ko e ngaahi foungá ni kotoa ʻoku maʻu ai ʻa e ngaahi ola lelei. Neongo ia, ʻi he ngaahi feituʻu lahi tahá, ko ʻetau founga tefito ki hono fakamafola ʻa e ongoongo leleí ʻoku mei he malanga fale ki he falé. Ko e hā ʻa e makatuʻunga ʻo e founga malanga ko ení? Naʻe anga-fēfē ʻa e hoko ʻo ngāueʻaki lahi ia ʻe he kakai ʻa e ʻOtuá ʻi onopōní? Pea ko e hā ʻoku mahuʻinga ai he taimi ní?

Founga Fakaʻapositoló

 3. Ko e hā ʻa e ngaahi fakahinohino fekauʻaki mo e malangá naʻe ʻoange ʻe Sīsū ki he kau ʻapositoló, pea ko e hā ʻoku fakahaaʻi ʻe he meʻá ni fekauʻaki mo e founga naʻe fiemaʻu ke nau malanga aí?

³ Ko e founga ʻo e malanga fale ki he falé ʻoku makatuʻunga ia ʻi he Tohi Tapú. ʻI hono fekauʻi atu ʻe Sīsū ʻa e kau ʻapositoló ke nau malangá, naʻá ne fakahinohino kiate kinautolu: “ka mou ka aʻu ki ha kolo, pe ha vilisi, ʻeke pe ko hai ha taha ʻoku tāu.” ʻE anga-fēfē ʻenau fekumi ki he faʻahinga tāú? Naʻe tala ange ʻe Sīsū ke nau ō ki he ngaahi ʻapi ʻo e kakaí, ʻo ne pehē: “Pea ʻi hoʻomou hū ki he fale, tapuakiʻi ia. Pea kapau ʻoku tāu moʻoni ʻa e fale, ʻe toka ai hoʻomou tāpuaki.” Te nau ʻaʻahi pē ʻo ʻikai tomuʻa fakaafeʻi mai? Fakatokangaʻi ange ʻa e toe ngaahi lea ʻa Sīsuú: “ʻIlonga ʻa ia ʻe ʻikai te ne tali kimoutolu, pe maʻu hoʻomou ngāhi lea, pea ka mou ka hū mai mei he fale ko ia, pe ko e kolo, mou tūtūʻi hono efu mei homou vaʻe.” (Mt. 10:11-14) Ko e ngaahi fakahinohinó ni ʻoku fakamahinoʻi ai ko e kau ʻapositoló, ʻi heʻenau “ʻalu atu ʻi he vilisi taki taha, ʻo nau tala ʻa e ongoongolelei,” naʻe fiemaʻu ke nau tamuʻomuʻa ʻi he ʻaʻahi ki he kakaí ʻi honau ngaahi ʻapí.—Luke 9:6.

 4. Ko fē ʻoku lave hangatonu ki ai ʻi he Tohi Tapú fekauʻaki mo e malanga fale-ki-he-falé?

⁴ ʻOku fakahaaʻi hangatonu ʻe he Tohi Tapú naʻe malanga ʻa e kau ʻapositoló mei he fale ki he fale. Ko e fakatātaá, ʻoku pehē ʻe he Ngāue 5:42 (PM) ʻo fekauʻaki mo kinautolu: “Nae ikai tuku e nau ako moe nau malaga aki a Jisu Kalaisi, i he  aho kotoabe, i he fale lotu lahi, bea moe fale kotoabe.” ʻI he taʻu nai ʻe 20 ki mui aí, naʻe fakamanatu ai ʻe he ʻapositolo ko Paulá ki he kau tangata taʻumotuʻa ʻo e fakatahaʻanga ʻi ʻEfesoó: “Naʻe ʻikai te u taetae ha meʻa, kau fakahā pe mo akoʻaki kiate kimoutolu ʻi he ʻao ʻo e kakai, pea ʻi he fale taki taha.” Naʻe ʻaʻahi ʻa Paula ki he kau mātuʻa ko iá ki muʻa ke nau hoko ko e kau tuí? ʻOku hā mahino naʻe pehē, he naʻá ne akoʻi kiate kinautolu, fakataha mo e ngaahi meʻa kehe, “ʻa e fakatomala ʻo tafoki ki he ʻOtua, mo e tui pikitai ki hotau ʻEiki ko Sīsū.” (Ng. 20:20, 21) ʻI he fakamatala ki he Ngāue 20:20, ʻoku pehē ʻi he Word Pictures in the New Testament ʻa Robertson: “ʻOku taau ke fakatokangaʻi ko e tokotaha lahi taha ko eni ʻi he kau malangá naʻá ne malanga mei he fale ki he fale.”

Ko ha Kau Tau Heʻe ʻi Onopooni

 5. ʻOku anga-fēfē hono fakatātaaʻi ʻo e ngāue fakamalangá ʻi he kikite ʻa Sioelí?

⁵ Ko e faifakamoʻoni naʻe fai ʻi he ʻuluaki senitulí ko ha tomuʻa fakaʻali pē ia ʻo ha ngāue lahi ange ʻe fai ʻi hotau ʻahó ni. Naʻe fakatatau ʻe he palōfita ko Sioelí ʻa e ngāue fakamalanga ʻa e kau Kalisitiane paní ki ha mala ʻo e faifakaʻauha ʻe ha fanga ʻinisēkite, ʻo kau ai ʻa e fanga heʻe. (Sioeli 1:4) ʻI he ngaʻunu hangē ha kau taú, ʻoku ikuʻi ʻe he fanga heʻé ʻa e ngaahi fakafaingataʻaʻiaʻangá, hū ki he ngaahi falé, pea keina ʻa e meʻa kotoa pē ʻi honau halá. (Lau ʻa e Sioeli 2:2, 7-9.) Ko ha fakamatala maeʻeeʻa moʻoni ē ʻo e kītaki mo e fakaʻāuliliki ʻa e kakai ʻa e ʻOtuá ʻi hono fakahoko ʻa e ngāue fakamoʻoni ʻi onopōní! ʻOku muʻomuʻa taha ʻi he ngaahi founga ʻoku ngāueʻaki ʻe he kau Kalisitiane paní mo honau takanga ko e “fanga sipi kehe” ʻi hono fakahoko ʻa e fakatātā fakaekikite ko eni ko e ngāue fakafaifekau fale-ki-he-falé. (Sione 10:16) Naʻe anga-fēfē ʻetau ohi ʻe kitautolu Kau Fakamoʻoni ʻa Sihová ʻa e founga fakaʻapositolo ko ia ʻo e malangá?

 6. ʻI he 1922, ko e hā ʻa e fakalototoʻa naʻe fai ki he faifakamoʻoni fale ki he falé, ka naʻe anga-fēfē ʻa e tali ʻa e niʻihi?

⁶ Mei he 1919 ʻo faai mai ai, kuo fakamamafaʻi ai ʻa e fatongia ʻo e Kalisitiane taki taha ke kau fakafoʻituitui ki he faifakamoʻoní. Ko e fakatātaá, ko ha kupu naʻe fakakaveinga ko e “Fiemaʻu ʻa e Ngāué” ʻi he Watch Tower ʻo ʻAokosi 15, 1922, naʻe fakamanatu ai ki he kau Kalisitiane paní ʻa e mahuʻinga ʻo e “ʻave longomoʻui ʻa e pōpoaki kuo pulusí ki he kakaí pea talanoa mo kinautolu ʻi honau ngaahi matapaá, ʻo fai ʻa e fakamoʻoni ʻoku ofi ʻa e puleʻanga ʻo hēvaní.” Naʻe ʻomai ʻa e ngaahi tuʻuaki fakaikiiki ʻi he Bulletin (ko ʻEtau  Ngāue Fakafaifekau ʻo e Puleʻangá he taimí ni). Kae kehe, ko e tokolahi moʻoni ʻo e faʻahinga naʻa nau malanga fale ki he falé naʻe tokosiʻi ʻi he ʻuluaki taimí. Naʻe fakatoupīkoi ʻa e niʻihi. Naʻa nau langaʻi hake ʻa e ngaahi fakafepaki kehekehe, ka ko e palopalema tefitó ko e ongoʻi ʻe he niʻihi ʻoku mole honau ngeiá ʻi he malanga fale ki he falé. ʻI he fakautuutu ʻa e fakamamafaʻi ʻo e ngāue fakamalangá, ko e tokolahi ʻo e faʻahinga ko iá naʻe faifai pē ʻo nau holomui mei he feohi mo e kautaha ʻa Sihová.

 7. ʻI he 1950 tupú, ko e hā ʻa e fiemaʻu naʻe hoko ʻo hā mahinó?

⁷ ʻI he laui hongofuluʻi taʻu hoko atu aí, naʻe fakautuutu ʻa hono fai ʻo e ngāue fakamalangá. Kae kehe, naʻe hoko ʻo hā mahino, naʻe fiemaʻu ʻa e akoʻi fakafoʻituitui lahi ange ki he ngāue fakafaifekau fale-ki-he-falé. Ko e fakatātaá ko e tuʻunga ʻi ʻAmeliká. Lolotonga ʻa e konga ki muʻa ʻo e 1950, ko e peseti ʻe 28 ʻo e Kau Fakamoʻoni ʻi he fonua ko iá naʻe fakangatangata pē ʻenau fai ʻo e ngāue fakamalangá ki hono tufaki ʻo e ngaahi lauʻipepa-tuʻuaki pe tuʻu ʻi he ngaahi halá mo e ngaahi makasiní. Laka hake he peseti ʻe 40 naʻa nau tōmokosi ʻi he ngāue fakamalangá, ʻo tuku ke mahili atu ha ngaahi māhina mo e ʻikai ʻaupito fai ha fakamoʻoni. Ko e hā ʻe lava ke fai ke tokoniʻi ai ʻa e kau Kalisitiane fakatapui kotoa pē ke nau malanga fale ki he falé?

8, 9. Ko e hā ʻa e polokalama ako naʻe kamata ʻi he 1953, pea ko e hā hono ngaahi olá?

⁸ ʻI ha fakataha-lahi fakavahaʻapuleʻanga naʻe fai ʻi he Kolo Niu ʻIoké ʻi he 1953, naʻe tokangaekina makehe ai ʻa e ngāue fakafaifekau fale-ki-he-falé. Naʻe talaki ai ʻe Tokoua Nathan H. Knorr ʻoku totonu ke hoko ko e ngāue tefito ʻa e kau ʻovasia Kalisitiane kotoa pē ko hono tokoniʻi ʻa e tokotaha Fakamoʻoni kotoa pē ke hoko ko ha faifekau ngāue tuʻumaʻu ʻi he fale-ki-he-fale. Ko e “tokotaha kotoa pē” ko ʻene leá ia, “ʻoku totonu ke ne malava ke malangaʻi ʻa e ongoongo leleí mei he fale ki he fale.” Naʻe kamata ai ha polokalama ako ʻi māmani lahi ke lavaʻi ʻa e taumuʻa ko ení. Ko e faʻahinga ko ia ne teʻeki ai ke nau malanga fale ki he falé naʻe akoʻi kinautolu ki he fakalea ki he kakaí ʻi honau ngaahi matapaá, ʻo fakaʻuhinga mo kinautolu mei he Tohi Tapú, mo tali ʻenau ngaahi fehuʻí.

⁹ Naʻe tuʻu-ki-muʻa ʻa e ngaahi ola ʻo e polokalama ako ko ení. ʻI loto ʻi ha hongofuluʻi taʻu, naʻe tupulaki ai ʻa e tokolahi ʻo e kau malangá ʻi māmani lahi ʻaki ʻa e peseti ʻe 100, tupu ʻa e lahi ʻo e ngaahi toe ʻaʻahí ʻaki ʻa e peseti ʻe 126, pea ko e lahi ʻo e ngaahi ako Tohi Tapú ʻaki ʻa e peseti ʻe 150. ʻI he ʻahó ni, ko e meimei kau malanga ʻo e Puleʻangá ʻe toko fitu miliona ʻoku nau malangaʻi ʻi māmani lahi ʻa e ongoongo leleí. Ko e tupu fakaofo ko ení ko e fakamoʻoni ia ʻe taha ʻo e tāpuakiʻi ʻe Sihova ʻa e ngaahi feinga ʻa hono kakaí ʻi he ngāue fakafaifekau fale-ki-he-falé.—Ai. 60:22.

Fakaʻilongaʻi ʻa e Kakaí ke Hao

10, 11. (a) Ko e hā ʻa e vīsone naʻe ʻoange kia ʻIsikelí, hangē ko ia ʻoku lēkooti ʻi he Isikeli vahe 9? (e) ʻOku anga-fēfē hono fakahoko ʻi hotau ʻahó ni ʻa e vīsone ko iá?

¹⁰ Ko e mahuʻinga ʻo e ngāue fakafaifekau fale-ki-he-falé ʻoku lava ke hā ia ʻi ha vīsone naʻe ʻoange ki he palōfita ko ʻIsikelí. ʻI he vīsone ko iá, ʻoku sio ai ʻa ʻIsikeli ki he kau tangata ʻe toko ono ʻoku nau toʻo ʻa e ngaahi meʻatau pea pehē ki ha tangata ʻa ia ko hono toko fitú ia ʻokú ne tui ha teunga līneni ʻoku haʻi ʻi hono tafaʻakí ha vaitohi ʻa ha sekelitali. ʻOku tala ki he tangata hono fitú ke “alu atu ki he lotolotoga oe kolo” ʻo “ai ha fakailoga ki he foi laʻe oe kau tagata oku toʻe mo tagi koeuhi koe gaahi fakalielia oku fai i loto i ai.” Muimui atu ʻi he ngāue fai fakaʻilongaʻi ko iá, ʻoku fekauʻi ʻa e kau tangata ʻe toko ono mo e ngaahi meʻatau fakaʻauhá ke nau tāmateʻi ʻa e faʻahinga kotoa pē ʻoku ʻikai te nau maʻu ʻa e fakaʻilongá.—Lau ʻa e Isikeli 9:1-6, PM.

¹¹ ʻOku tau mahinoʻi ko hono fakahoko ʻo e kikite ko ení, ko e tangata ʻoku “kofu aki ae tubenu lelei” pe līnení ʻokú ne fakafofongaʻi ʻa e toenga ʻo e kau Kalisitiane pani ʻe he laumālié. Fakafou ʻi he ngāue fakamalangá mo e ngaohi-ākongá, ʻoku ʻai ai ʻe he kalasi ʻo e kau paní ʻa e fakaʻilonga fakaefakatātā ʻi he faʻahinga  ʻoku nau hoko ko e konga ʻo e “fanga sipi kehe” ʻa Kalaisí. (Sione 10:16) Ko e hā ʻa e fakaʻilongá? Ko e fakamoʻoni ia, ʻo hangē ko hano fakahāhā ʻo tekeutua ʻi honau foʻi laʻé, ko e fanga sipi ko iá ko e kau ākonga fakatapui mo papitaiso ʻa Sīsū Kalaisi pea kuo nau ʻai ʻa e tangata foʻou faka-Kalaisí. (Ef. 4:20-24) Ko e faʻahinga ko eni hangē ha sipí ʻoku nau hoko ko e takanga pē ʻe taha mo e kau Kalisitiane paní pea tokoniʻi kinautolu ʻi heʻenau ngāue mātuʻaki mahuʻinga ʻo hono fakaʻilongaʻi ʻo e toe niʻihi kehe.—Fkh. 22:17.

12. ʻOku anga-fēfē hono fakamamafaʻi ʻe he vīsone ʻa ʻIsikeli fekauʻaki mo e fakaʻilongaʻi ʻo e laʻé ʻa e mahuʻinga ʻo ʻetau kumi hokohoko ki he faʻahinga hangē ha sipí?

¹² Ko e vīsone ʻa ʻIsikelí ʻoku fakamamafaʻi ai ʻa e ʻuhinga ʻe taha ʻoku fiemaʻu fakavavevave ai ke tau hokohoko kumi ki he kakai ʻoku nau “toʻe mo tagi.” ʻOku fakatuʻunga ai e moʻui ʻa e kakaí. Kuo vavé ni ke fakaʻauha ʻe he ngaahi kongakau fakahoko tautea fakahēvani ʻa Sihová, ʻoku fakafofongaʻi ʻe he kau tangata ʻe toko ono mo ʻenau meʻataú, ʻa e faʻahinga ko ia ʻoku ʻikai te nau maʻu ʻa e fakaʻilonga fakaefakatātaá. ʻI he fekauʻaki mo e fakamaau ka hoko maí, naʻe tohi ʻe he ʻapositolo ko Paulá ʻo pehē ko e ʻEiki ko Sīsuú, fakataha mo ʻene “kau angelo” mālohí, te nau ʻomai ʻa e “sauni ki he kau taʻeʻilo ʻOtua, pea ki he kau taʻetalangofua ki he Kosipeli ʻo hotau ʻEiki ko Sisu.” (2 Tes. 1:7, 8) Fakatokangaʻi ʻe fakamāuʻi ʻa e kakaí makatuʻunga ʻi heʻenau tali ki he ongoongo leleí. Ko ia ai, ko hono fanongonongo ʻo e pōpoaki ʻa e ʻOtuá kuo pau ke hokohoko atu taʻehōloa ia ʻo aʻu ki he ngataʻangá. (Fkh. 14:6, 7) ʻOku ʻomai ʻe he meʻá ni ʻa e fatongia mafatukituki ki he kau sevāniti fakatapui kotoa pē ʻa Sihova.—Lau ʻa e Isikeli 3:17-19.

13. (a) Ko e hā ʻa e fatongia naʻe ongoʻi ʻe he ʻapositolo ko Paulá, pea ko e hā hono ʻuhingá? (e) Ko e hā ʻa e fatongia ʻokú ke ongoʻi ki he kakai ʻi ho feituʻú?

¹³ Naʻe ongoʻi ʻe he ʻapositolo ko Paulá ha fatongia fakafoʻituitui ke vahevahe atu ʻa e ongoongo leleí ki he niʻihi kehé. Naʻá ne tohi: “Ko e tangata moʻua au ki he Kalisi mo e Papeliane fakatouʻosi, ki he ʻatamai mo e taʻe ʻatamai. Pea ʻi heʻene pehe, ko e anga leva ʻo hoku loto oʻoku ke malangaʻaki ʻa e Kosipeli kiate kimoutolu foki ʻa e kakai ʻo Loma.” (Loma 1:14, 15) ʻI he houngaʻia ki he meesi kuo fakahaaʻi kiate iá, naʻe ongoʻi ʻe Paula ʻoku ueʻi mālohi ia ke ne feinga ke tokoniʻi ʻa e niʻihi kehé ke nau maʻu ʻaonga mei he ʻofa maʻataʻatā ʻa e ʻOtuá ʻo hangē tofu pē ko ʻene maʻu ʻaonga mei aí. (1 Tim. 1:12-16) Ne hangē ia naʻe ʻi ai hano moʻua ki he tokotaha taki taha naʻá ne fetaulaki mo iá, ko ha moʻua ʻe toki lava pē ke totongi ʻaki ʻene vahevahe atu ʻa e ongoongo leleí ki he tokotaha ko iá. ʻOkú ke ongoʻi ha moʻua pehē ki he kakai ʻi ho feituʻú?—Lau ʻa e Ngāue 20:26, 27.

14. Ko e hā ʻetau ʻuhinga muʻomuʻa taha ki he malanga fale ki he fale ki he kakaí?

¹⁴ Neongo ʻoku mahuʻinga ʻa e fakatolonga ʻo e moʻui ʻa e faʻahinga ʻo e tangatá, ʻoku ʻi ai ha ʻuhinga lahi mamaʻo ange ki he malanga fale ki he falé. ʻI he kikite ʻoku hiki ʻi he Malakai 1:11, ʻoku fakahaaʻi ai ʻe Sihova: “Talaatu, mei he hopoʻangalaʻa ʻo aʻu ki hono toʻanga, ʻoku fotu hoku hingoa ʻi he ngaahi puleanga, pea . . . ʻoku ʻatu ʻa e inisenisi ki hoku hingoa, mo e feilaulau maʻa: he fotu hoku hingoa ʻi he ngaahi puleʻanga.” ʻI hono fakahoko ʻo e kikite ko ení, ʻoku fakahīkihikiʻi fakahāhā ʻe he kau sevāniti fakatapui ʻa Sihová ʻa hono huafá ʻi he māmaní kotoa ʻi heʻenau fakahoko anga-fakatōkilalo ʻenau ngāue fakafaifekaú. (Sāme 109:30; Mt. 24:14) Ko hono fai “ha feilaulau fakafetaʻi” kia Sihová ʻa ʻetau ʻuhinga muʻomuʻa taha ki he malanga fale ki he fale ki he kakaí.—Hep. 13:15.

Ngaahi Meʻa Mahuʻinga ʻOku Toka mei Muʻa

15. (a) Naʻe anga-fēfē hono fakalahi ʻe he kau ʻIsilelí ʻenau ngāué ʻi heʻenau laka takai ʻi Sielikō ʻi he ʻaho hono fitú? (e) Ko e hā ʻoku fakahaaʻi ʻe he meʻá ni fekauʻaki mo e ngāue fakamalangá?

¹⁵ Ko e hā ʻa e ngaahi meʻa ʻoku kei toe ki he ngāue fakamalangá? Ko hono ʻākoloʻi ʻo Sielikō, ʻoku hiki ʻi he tohi Siosiuá, ʻoku ʻomai ai ha  fakatātā. Manatuʻi ʻi he ki muʻa pē ke fakaʻauha ʻe he ʻOtuá ʻa Sielikoó, naʻe fakahinohino ai ki he kau ʻIsilelí ke nau laka takai ʻi he koló tuʻo taha he ʻaho ʻo feʻunga mo e ʻaho ʻe ono. Kae kehe, ʻi hono ʻaho fitú, naʻe pau ke ʻi ai ha fakaʻilonga ʻo e lahi ange ʻenau ngāué. Naʻe tala ʻe Sihova kia Siosiua: “Te mou fakatakamilo ki he kolo ʻo ta tuʻo fitu, pea ʻe fai ʻe he kau taulaʻeiki ʻenau ifi talupite. Pea ʻi he ʻiloange ʻoku ifi fakatangiloloa ʻa e talupite . . . ʻe toki tukuingata ʻa e kakai ʻenau kaila, pea ʻe holo hifo ʻa e ʻa ʻiate ia.” (Sios. 6:2-5) ʻE malava ke ʻi ai ha fakalahi meimei tatau ʻo ʻetau ngāue fakamalangá. ʻOku ʻikai ha veiveiua, ʻi he aʻu ki he taimi ʻo e fakaʻauha ʻo e fokotuʻutuʻu lolotonga ʻo e ngaahi meʻá, te tau ʻosi sio ai ki he fakamoʻoni lahi taha ki he huafa mo e Puleʻanga ʻo e ʻOtuá ʻi he hisitōlia ʻo e māmani ko ení.

16, 17. (a) Ko e hā ʻe fakahoko ki muʻa ke ʻosi ʻa e “mamahi lahi”? (e) Ko e hā te tau lāulea ki ai ʻi he kupu hoko maí?

¹⁶ ʻE hoko mai nai ʻa e taimi ʻa ia ʻe hangē ai ʻa e pōpoaki ʻoku tau talakí ha “kaila” ʻi he taú. ʻI he tohi Fakahaá, ʻoku fakatāaaʻi ai ʻa e ngaahi pōpoaki fakaefakamaau mālohí ki he “ʻuhamaka lalahi, feʻunga mo e taleniti hono mamafa.” b Pea ʻoku pehē ʻi he Fakahā 16:21: “Ko hono fakamamahi ko e meʻa lahi ʻaupito.” Ko e ngafa ʻe fakahoko ʻe he ngāue fakafaifekau fale ki he falé ʻi hono fanongonongo ʻa e tumutumu ko ia ʻo e ngaahi pōpoaki fakaefakamaau ʻa e ʻOtuá ʻoku teʻeki ai ke tau ʻiloʻi. Ka ʻoku lava ke tau fakapapauʻi ki muʻa ke ʻosi ʻa e “mamahi lahi,” ko e huafa ʻo Sihová ʻe ʻai ke ʻiloa ia ʻi he tuʻunga ne ʻikai ʻaupito ke ʻi ai ki muʻa ʻi he hisitōlia ʻo e faʻahinga ʻo e tangatá.—Fkh. 7:14; Isi. 38:23.

¹⁷ ʻI heʻetau tatali ki he ngaahi meʻa mahuʻinga ʻoku toka mei muʻá, ʻofa ke tau hokohoko atu faivelenga ʻi hono talaki ʻa e ongoongo lelei ʻo e Puleʻangá. ʻI hono fakahoko ʻo e ngāue ko iá, ko e hā ʻa e ngaahi pole te tau fehangahangai mo ia ʻi he ngāue fakafaifekau fale-ki-he-falé, pea ʻe lava fēfē ke tau lavaʻi ʻa e ngaahi pole ko iá? ʻE lāulea ʻi he kupu hoko maí ki he fehuʻi ko iá.

[Fakamatala ʻi lalo]

ʻE Fēfē Haʻo Tali?

• Ko e hā ʻa e makatuʻunga Fakatohitapu ki he malanga fale ki he falé?

• Naʻe anga-fēfē hono fai ʻa e fakamamafa ʻi onopooni ki he ngāue fakafaifekau fale-ki-he-falé?

• Ko e hā ko ha fatongia ai ʻo e kau sevāniti fakatapui ʻa Sihová ke malangá?

• Ko e hā e ngaahi meʻa mahuʻinga ʻoku toka mei muʻá?

[Fehuʻi ki he Ako]

[Fakatātā ʻi he peesi 4]

ʻI he hangē ko e ʻapositolo ko Paulá, ʻokú ke ongoʻi ko ha fatongia ia ke malanga ki he niʻihi kehé?

[Fakatātā ʻi he peesi 5]

Tokoua Knorr, 1953