Fakakaukau Lelei ki he Meʻa ʻOkú Ke ʻAmanekiná, pea Fiefia

“ʻOKU ʻikai pē ke u lava ia ʻe au!” Ko e tuʻo fiha ʻaki ʻeni hoʻo leaʻaki ʻa e meʻa ko iá koeʻuhi ko e ʻikai malava ke ke fakahoko ha meʻa naʻá ke ʻosi fokotuʻutuʻu ke fai? ʻE fakahāhā nai ʻe ha faʻē Kalisitiane taʻu siʻi ʻa e ongo ko iá koeʻuhi ko ʻene ongoʻi taulōfuʻu ʻi he tokangaekina hokohoko ʻoku fiemaʻu ke fai ki heʻene kiʻi tama toki fāʻeleʻí peá ne ongoʻi feifeitamaki ʻo ʻikai lava ai ke ne tokanga lahi ange ki he ngaahi meʻa fakalaumālié. ʻE ongoʻi taʻefeʻunga nai ha Kalisitiane kehe ia koeʻuhi ko e anga hono ʻohake iá peá ne fakakaukau ai ʻe ʻikai pē feʻunga ʻa e meʻa ia ʻokú ne fai ʻi he fakatahaʻangá. ʻE ongoʻi loto-mamahi nai ha Fakamoʻoni taʻumotuʻa koeʻuhi ko e ʻikai malava ke ne kau kakato ʻi he ngaahi ngāue faka-Kalisitiane naʻá ne fiefia ai ʻi he taimi naʻá ne kei ivi lahi ange ai mo ngaungaué. “Ko ha malanga ʻoku fakalototoʻaʻi ai ʻa e ngāue tāimuʻá ʻoku faʻa feʻunga pē ia ke ne ʻai au ke u tangi,” ko e fakamatala ia ʻa Christiane, ʻa ia ʻoku ʻikai malava ke ne fai ʻa e lahi ʻo e meʻa ʻokú ne loto ke fai ʻi he ngāue ʻa Sihová koeʻuhi ko e tuʻunga ʻo hono fāmilí.

ʻE lava fēfē ke tau fekuki mo e ngaahi ongoʻi peheé? Kuo anga-fēfē ʻa e malava ke fakatupulekina ʻe he kau Kalisitiane ʻe niʻihi ha vakai totonu ki honau ngaahi tuʻungá? Ko e hā ʻa e ngaahi ʻaonga ʻo hono ʻai ke mafamafatatau ʻa e ngaahi meʻa ʻoku ʻamanekiná?

Fakakaukau Lelei

ʻOku ʻomi ʻe Paula kiate kitautolu ha kī ki hono tauhi maʻu ʻetau fiefiá ʻi heʻene pehē: “Fiefia maʻu pē ʻi he ʻEikí. Te u toe tala atu, Fiefia! Tuku ke ʻilo ʻe he kakai kotoa pē hoʻomou fakakaukau leleí.” (Fili. 4:4, 5, NW) Ke aʻusia ʻa e fiefia mo e fiemālie ʻi heʻetau ngāue ki he ʻOtuá, ʻoku fiemaʻu ke tau fakakaukau lelei ki he meʻa ʻoku tau ʻamanekiná ʻo fakatatau ki heʻetau ngaahi malavá mo hotau tuʻungá tonu. Kapau te tau feinga ke lavaʻi ha ngaahi taumuʻa faingataʻa ʻo tatau ai pē pe ko e hā, ʻoku tau tuku atu ai kitautolu ki he loto-hohaʻa lahi moʻoni. ʻI he tafaʻaki ʻe tahá, ʻoku totonu ke tau tokanga ke ʻoua te tau fuʻu fakafiefiemālie, ʻo ngāueʻaki ʻa hotau ngaahi ngataʻanga kuo tau ʻiloʻí ko ha kalofanga ia ke tau holo ange ai ʻi he tuʻunga ʻoku fiemaʻu ki he ngāue fakafaifekau faka-Kalisitiané.

Tatau ai pē pe ko e hā hotau tuʻungá, ʻoku fiemaʻu ʻe Sihova ke ʻoange kiate ia hotau lelei tahá—ʻa ʻetau ngāue loto-ʻaufuatoó mo hotau kotoá. (Kol. 3:23, 24) Kapau naʻe ʻikai ke tau ʻave kia Sihova ʻetau lelei tahá, ko e ʻikai ia ke tau moʻui ʻo fakatatau ki he fakatapui naʻa tau fai kiate iá. (Loma 12:1) ʻIkai ko ia pē, te tau toʻo ai meiate kitautolu ʻa e fiemālie lahi, fiefia moʻoni, mo e ngaahi tāpuaki fakakoloa kehe ʻoku maʻu mei he ngāue loto-ʻaufuatoó.—Pal. 10:22.

Ko e foʻi lea naʻe liliu ki he “fakakaukau leleí” ʻi he Tohi Tapú ʻoku maʻu ai ʻa e fakakaukau ʻo e fakaʻatuʻí. ʻOku ʻuhinga fakafoʻi lea ia ki he “ʻulutukua.” (Sem. 3:17) ʻOku toe ʻomi ʻe he foʻi leá ʻa e fakakaukau ʻo e ʻikai ke fuʻu fefeka. Ko ia ai, kapau ʻoku tau fakakaukau lelei, te tau malava ai ke fai ha vakai mafamafatatau ki hotau ngaahi tuʻungá. ʻOku faingataʻa ke fai pehē? ʻOku faingataʻa ia ki he niʻihi, neongo te nau malava nai ke vakai anga-fakaʻatuʻi ki he niʻihi kehé. Ko e fakatātaá, kapau ʻoku hā mai ha ngaahi fakaʻilonga ʻo e ongoongosiá ʻi ha kaungāmeʻa ofi koeʻuhí ko e fuʻu lahi ʻo ʻene ngāué, ʻikai te tau feinga ke tokoniʻi ia ke ne sio  ki he fakapotopoto ʻo hono fai ha ngaahi feʻunuʻaki ʻi heʻene moʻuí? ʻI he tuʻunga meimei tatau, ʻoku fiemaʻu ke tau ako ke ʻiloʻi ʻa e ngaahi fakaʻilonga ʻe tala mai nai ai ʻoku tau fai ʻe kitautolu ʻa e ngaahi meʻa ʻoku mahulu atu ia ʻi heʻetau malavá.—Pal. 11:17.

Ke fai ha vakai fakalelei ki hotau ngaahi ngataʻangá ʻe lava ke faingataʻa ange ia kapau naʻe ʻohake kitautolu ʻe ha ongo mātuʻa naʻe tōtuʻa ʻa e meʻa ne na kounaʻí. Kuo ongoʻi ʻe he niʻihi lolotonga ʻenau kei siʻí naʻe pau maʻu pē kiate kinautolu ke nau fai ha meʻa lahi ange pe hoko ʻo lelei ange kae toki maʻu ai ʻa e ʻofa ʻenau mātuʻá. Kapau ko e meʻa ia naʻe hoko kiate kitautolú, ʻoku tau maʻu nai ʻa e fakakaukau hala fekauʻaki mo e vakai mai ʻa Sihova kiate kitautolú. ʻOku ʻofa ʻa Sihova ʻiate kitautolu fakatuʻunga ʻi he founga loto-ʻaufuatō ʻoku tau fakahoko ai ʻetau ngāue kiate iá. ʻOku fakapapauʻi mai ʻe he Folofola ʻa e ʻOtuá kiate kitautolu ko Sihová ʻokú ne “ʻilo ʻe ia hota anga; ʻoku ne manatu ai pe ko e efu pe kitaua.” (Sāme 103:14) ʻOkú ne ʻafioʻi hotau ngaahi ngataʻangá pea ʻokú ne ʻofa ʻiate kitautolu ʻi he taimi ʻoku tau tauhi faivelenga ai kiate ia neongo ʻa e ngaahi ngataʻanga ko iá. Ko hono manatuʻi ʻoku ʻikai ko ha pule-ngāue anga-fefeka ʻa hotau ʻOtuá, te ne tokoniʻi ai kitautolu ke tau fakanānā ʻi he meʻa ʻoku tau ʻamanekina meiate kitautolú, ʻo ʻiloʻi ʻa hotau ngaahi ngataʻangá.—Mai. 6:8.

Neongo ia, ʻoku ongoʻi ʻe he niʻihi ia ʻoku faingataʻa ke fakatupulekina ha fakakaukau mafamafatatau pehē. Kapau ko e meʻa ia ʻoku hoko moʻoni kiate koé, ko e hā ʻoku ʻikai ke ke kumi tokoni ai ki ha Kalisitiane taukei ʻokú ne ʻiloʻi lelei koé? (Pal. 27:9) Ko e fakatātaá, ʻokú ke loto ke hoko ko ha tāimuʻa tuʻumaʻu? Ko ha taumuʻa lelei ʻaupito ia! ʻOku faingataʻa kiate koe ke ke lavaʻi ia? Mahalo ʻoku fiemaʻu ʻa e tokoni kiate koe ke fakafaingofuaʻi hoʻo moʻuí. Pe ʻe tala atu nai ʻe ho kaungāmeʻa falalaʻanga Kalisitiané pe ʻoku lelei ke tāimuʻa tuʻumaʻu ʻi he taimí ni ʻo fakatatau ki he lahi ʻo ho ngaahi fatongia fakafāmilí. ʻE lava ke ne tokoniʻi koe ke ke sio pe ʻe malava ke ke lavaʻi moʻoni ʻa e ngaahi ngāue lahi ange ʻokú ke loto ke faí pe ko e feʻunuʻaki ʻe ʻai nai ai ke ke malava ke fai ha meʻa lahi angé. ʻOku toe ʻi ha tuʻunga lelei foki ha husepāniti ke ne tokoniʻi hono uaifí ke kumi ki ha founga ʻoku feʻunga mo ʻene ngaahi malavá. Hangē ko ʻení, ʻe lava ke ne fokotuʻu ange ki he uaifí ke ne kiʻi mālōlō ki muʻa ke kamata ha māhina foʻou ʻa ia ʻoku lahi ange ai ʻa e ngāué. ʻE ʻai nai ai ʻe he meʻá ni ke ne tātānaki ivi pea tokoniʻi ia ke ne kei maʻu ai pē ʻa e fiefia ʻi he ngāue fakafaifekaú.

Fakasio ki he Ngaahi Meʻa ʻe Lava Ke Ke Faí

Ko e hoholo ke motuʻá pe mahamahakí ʻe lava ke ne fakangatangata ʻa e meʻa ʻe lava ke tau fai ʻi he ngāue ʻa Sihová. Kapau ko ha mātuʻa koe, te ke ongoʻi nai ʻoku siʻi ʻa hoʻo maʻu ʻaonga mei he ako fakafoʻituituí pe ngaahi fakataha faka-Kalisitiané koeʻuhi ko hoʻo fakamoleki ʻa e taimi mo e ivi lahi ʻi he fānau īkí. Kae kehe, ʻikai ko e tokangataha ki ho ngaahi ngataʻangá ʻe lava ʻi he taimi ʻe niʻihi ke ne taʻofi ai koe mei he sio ki he meʻa ʻoku kei malava ke ke faí?

ʻI he taʻu ʻe laui afe kuohilí, naʻe fakahāhā ai ʻe ha tokotaha Līvai ha holi ki ha meʻa naʻe taʻemalava ke ne fakalato. Naʻá ne maʻu ʻa e monū ke ngāue ʻi he temipalé he uike ʻe ua ʻi he taʻu kotoa pē. Kae kehe, naʻá ne fakahāhā ʻa e holi ʻoku taau ke fakaongoongolelei  ke nofo tuʻuloa ʻo ofi ki he ʻōlitá. (Sāme 84:1-3) Ko e hā naʻá ne tokoniʻi ʻa e tangata faitōnunga ko ʻení ke ne fiemālié? Naʻá ne ʻiloʻi naʻa mo e ʻaho ʻe taha ʻi he loto-ʻā ʻo e temipalé ko ha monū laulōtaha ia. (Sāme 84:4, 5, 10) ʻI he tuʻunga meimei tatau, ʻi he ʻikai ke nōfoʻi ki hotau ngaahi ngataʻangá, ʻoku totonu ke tau feinga ke ʻiloʻi pea houngaʻia ʻi he ngaahi meʻa ʻoku lava ke tau faí.

Ko e fakatātaá, vakai angé kia Nerlande, ko ha tuofefine Kalisitiane ʻi Kānata. ʻOkú ne ʻalu saliote pē pea ʻokú ne ongoʻi fakangatangata ʻaupito ʻi he meʻa ʻoku lava ke ne fai ʻi he ngāue fakafaifekaú. Kae kehe, naʻe liliu ʻa e anga ʻene fakakaukaú ʻi heʻene vakai ki ha falekoloa naʻe nofo ofi ki ai ko hono feituʻu ngāue fakamalanga ia ʻaʻaná. ʻOkú ne fakamatala: “ʻOku ou taʻutu pē ʻi hoku salioté ʻo ofi ki ha sea ʻi he falekoloá. ʻOku ou maʻu ʻa e fiefia ʻi he faifakamoʻoni ki he kakai ʻoku nau omi ʻo taʻutu hifo ke kiʻi mālōloó.” Ko e kau ʻi he tafaʻaki mahuʻinga ko ʻeni ʻo e ngāue fakafaifekaú ʻoku ʻoange ai kia Nerlande ʻa e fiemālie lahi.

Fai ha Ngaahi Feʻunuʻaki ʻo ka Fiemaʻu

ʻE lava ke folau ha vaka lā ʻi he vave tahá ʻi hono puhi ʻe he havilí ʻa e laá. Kae kehe, ʻi he taimi ʻoku fetaulaki ai ʻa e kauvaka he foheʻulí pea mo ha afā lahi, ʻoku pau leva ke ne feʻunuʻaki ʻa e laá. ʻOku ʻikai ke ne puleʻi ʻe ia ʻa e afaá, ka ʻi hono fai ʻa e ngaahi feʻunuʻakí, ʻe kei lava ai ke ne mapuleʻi ʻa hono vaká. ʻI he tuʻunga meimei tatau, ʻoku faʻa ʻikai lava ke tau puleʻi ʻa e ngaahi tuʻunga faingataʻa hangē ha afaá ʻa ia ʻoku tau fetaulaki mo ia ʻi he moʻuí. Ka ʻe lava ke tau kei puleʻi ʻetau moʻuí ʻo aʻu ki he tuʻunga ʻoku ala lavá ʻaki hono feʻunuʻaki ʻa e anga ʻo ʻetau ngāueʻaki ʻa e tuʻunga fakaesinó, fakaefakakaukau mo e fakaeongó. ʻI heʻetau fakakaukau ki hotau ngaahi tuʻunga foʻoú, ʻe tokoniʻi ai kitautolu ke kei tauhi maʻu ʻa ʻetau fiemālie mo e fiefia ʻi he ngāue ʻa e ʻOtuá.—Pal. 11:2.

Fakakaukau atu ki ha ngaahi fakatātā. Kapau ʻoku fakangatangata pē hotau iví, te tau ʻilo nai ʻoku lelei ke fakaʻehiʻehi mei he ngaahi ngāue fakaongosiá ʻi he lolotonga ʻa e ʻahó koeʻuhí ka tau maʻu ʻa e mālohi ke maʻu ha fakataha faka-Kalisitiane ʻi he efiafí. ʻE ʻai kitautolu ʻe he meʻá ni ke tau maʻu ʻaonga kakato mei he feohi mo hotau ngaahi kaungā Kalisitiané. Pe ko ha faʻē ʻoku ʻikai malava ke ne kau ʻi he ngāue fakafaifekau fale ki he falé koeʻuhi ʻoku puke haʻane kiʻi tama, te ne sio nai ʻe lelei ke fakaafeʻi ha tuofefine Kalisitiane ki hono ʻapí ke kau fakataha mo ia ʻi he faifakamoʻoni ʻi he telefoní lolotonga ʻa e mohe ʻa e kiʻi tamá.

Fēfē kapau ko ho ngaahi tuʻungá ʻoku ʻikai te ne fakaʻatā koe ke tomuʻa ako ʻa e meʻa kotoa pē ʻe lāulea ki ai ʻi he ngaahi fakataha ʻa e fakatahaʻangá? ʻE lava ke ke fakapapauʻi ʻa e lahi ʻo e meʻa ʻoku lava ke ke teuteú pea fai ia ʻi he lelei taha ʻe ala lavá. ʻI hono feʻunuʻaki ʻa ʻetau ngaahi taumuʻa ʻoku  fakavavevavé, ʻe lava ai ke tau longomoʻui mo fiefia ai pē.

Ko hono feʻunuʻaki ʻetau ngaahi taumuʻá ʻe fiemaʻu nai ki ai ʻa e loto-fakapapauʻi mo e feinga. Ko Serge mo Agnès, ko ha ongo meʻa ʻi Falanisē, naʻe pau ke na fai ha ngaahi liliu lahi ʻi heʻena ngaahi palaní. “ʻI heʻema ʻiloʻi ʻoku feitama ʻa Agnès, ne mole ai ʻema fakaʻamu ke hoko ko ha ongo misinalé,” ko e fakamatala ia ʻa Serge. ʻOkú ne hoko he taimí ni ko ha tamai ʻo ha ongo tamaiki fefine longomoʻui pea ʻokú ne fakamatala ki he anga ʻo ʻena fokotuʻu ha taumuʻa foʻou ʻi he tuʻunga ko e ongo meʻa malí. ʻOkú ne pehē: “ʻI he ʻikai malava ke ma ngāue ʻi ha fonua mulí, ne ma fakapapauʻi ai ke ma hoko ko e ‘ongo misinale’ ʻi homa fonuá pē. Naʻá ma kau leva ki ha kulupu lea muli.” Naʻá na maʻu ʻaonga mei hono fokotuʻu ʻa e taumuʻa foʻou ko ʻení? ʻOku fakamatala ʻa Serge: “ʻOkú ma ongoʻi ʻokú ma ʻaonga ʻaupito ki he fakatahaʻangá.”

Ko Odile, ko ha tuofefine Kalisitiane ʻi Falanisē ʻokú ne taʻu 70 tupu pea ʻokú ne fokoutua ʻi he langa tuí, ʻoku ʻikai lava ke ne tuʻu fuoloa. Naʻá ne loto-siʻi naʻa taʻofi ia ʻe hono ngaahi palopalema fakasinó mei heʻene kau ʻi he ngāue fakafaifekau fale ki he falé. Kae kehe, naʻe ʻikai te ne foʻi leva. Naʻá ne feʻunuʻaki ʻene ngaahi ngāué ʻaki ʻene faifakamoʻoni ʻi he telefoní. ʻOkú ne pehē: “ʻOku faingofua ange mo fakafiefia ange ia ʻi he meʻa naʻá ku fakakaukau ki aí!” Ko e founga ko ʻeni ʻo e malangá kuó ne toe ʻoange ai kiate ia ʻa e fakaueʻiloto ki he ngāue fakafaifekaú.

ʻOmi ʻe he Taumuʻa ne Fakakaukauʻi Leleí ʻa e Tāpuaki

Ko hono fakatupulekina ha vakai fakalelei ki he meʻa ʻe lava ke tau faí te ne ʻai ai ke tau hao mei he lahi ʻo e ongoʻi feifeitamakí. ʻI hono fokotuʻu ha ngaahi taumuʻa mafamafatataú, ʻoku tau maʻu ai ʻa e ongoʻi lavameʻa neongo hotau ngaahi ngataʻangá. ʻOku tau fiefia leva ai ʻi he meʻa ʻoku lava ke tau fakahokó, neongo kapau ʻoku siʻisiʻi pē.—Kal. 6:4.

ʻI heʻetau fakatupulekina ʻa e mafamafatataú ʻi he meʻa ʻoku tau ʻamanekina meiate kitautolú, te tau hoko ai ʻo anga-fakaʻatuʻi ange ki he ngaahi kaungā Kalisitiané. ʻI he ʻiloʻi honau ngaahi ngataʻangá, te tau hoko ai ʻo houngaʻia maʻu pē ʻi he meʻa ʻoku nau fai maʻa kitautolú. ʻI hono fakahāhā ʻa e houngaʻia ʻi ha faʻahinga tokoni pē kuo fai mai, ʻoku tau tokoni ai ki he laumālie ʻo e fāitaha mo e femahinoʻaki. (1 Pita 3:8) Manatuʻi, ʻi hono tuʻunga ko ha Tamai ʻofá, ʻoku ʻikai ʻaupito ke kole mai ʻa Sihova ia ki ha meʻa lahi ange ʻi he meʻa ʻe lava ke tau foakí. Pea ʻi he mafamafatatau ʻi he meʻa ʻoku tau ʻamanekiná ʻo fokotuʻu ha ngaahi taumuʻa ʻoku lava ke aʻusiá, ʻe ʻomi ai kiate kitautolu ʻe he ngaahi ngāue fakalaumālié ʻa e fiemālie mo e fiefia lahi ange!

[Fakamatala ʻi he peesi 29]

Ke aʻusia ʻa e fiefia mo e fiemālie ʻi heʻetau ngāue ki he ʻOtuá, ʻoku fiemaʻu ke tau fakakaukau lelei ki he meʻa ʻoku tau ʻamanekiná ʻo fakatatau ki heʻetau ngaahi malavá pea mo hotau tuʻungá tonu

[Fakatātā ʻi he peesi 30]

ʻOku maʻu ʻe Nerlande ʻa e fiefia ʻi he meʻa ʻoku lava ke ne fai ʻi he ngāue fakafaifekaú

[Fakatātā ʻi he peesi 31]

Ako ke “feʻunuʻaki ʻa e laá”

[Maʻuʻanga]

© Wave Royalty Free/age fotostock

[Fakatātā ʻi he peesi 32]

Kuo maʻu ʻaonga ʻa Serge mo Agnès mei hono fokotuʻu ha ngaahi taumuʻa foʻoú