ʻOku Moʻui ʻa e Folofola ʻa Sihová

Ngaahi Meʻa Mahuʻinga mei he Tohi Lomá

ʻI HE 56 T.S. nai, lolotonga ʻene fononga fakamisinale hono tolú, ʻoku aʻu atu ai ʻa Paula ki he kolo ko Kolinitoó. Naʻá ne lāuʻilo foki ki he ngaahi faikehekehe ʻi he fakakaukau ʻi he vahaʻa ʻo e kakai Siú mo e kau Kalisitiane Senitaile ʻi Lomá. ʻI heʻene fakaʻamua ke ʻomai kinautolu ke nau fāʻūtaha kakato ʻia Kalaisí, naʻe fai ai ʻe Paula ha tohi kiate kinautolu.

ʻI he tohi ko ia ki he kakai Lomá, ʻoku fakamatalaʻi ai ʻe Paula ʻa e anga hono fakatonuhiaʻi ʻa e faʻahinga ʻo e tangatá mo e founga ʻoku totonu ke nau taki taha moʻui aí. ʻOku fakaleleiʻi ʻe he tohí ʻetau ʻilo ki he ʻOtuá mo ʻene Folofolá, ʻo fakamamafaʻi ʻa e ʻofa maʻataʻatā ʻa e ʻOtuá, mo hakeakiʻi ʻa e ngafa ʻo Kalaisi ʻi hotau fakahaofí.—Hep. 4:12.

FAKATONUHIAʻI—ANGA FĒFĒ?

(Loma 1:1–11:36)

ʻOku tohi ʻe Paula: “Kuo fai angahala kotoa pe, pea ʻoku ʻikai te nau aʻusia ʻa e hōifua ʻa e ʻOtua; ka nau maʻu foaki pe ʻa e fakatonuhia ʻi heʻene ʻofa pe aʻana, ko e meʻa ʻi he totongi huhuʻi ʻa ia kuo ʻia Kalaisi Sisu.” ʻOku toe pehē ʻe Paula: “ʻOku fakatonuhia ha tangata ʻaki ʻa e tui, ʻataʻatā mei he ngaahi ngaue fakalao.” (Loma 3:23, 24, 28) Fakafou ʻi he tui ki he “foʻi faitotonu” ʻe taha, ʻe lava ke “fakatonuhia” fakatouʻosi ai ʻa e kau Kalisitiane paní mo e ngaahi mēmipa ʻo e “fuʻu kakai lahi” ʻo e “fanga sipi kehe”—ʻa ia ko e kau Kalisitiane paní te nau moʻui ʻi hēvani ko e ngaahi kaungāʻea fakataha mo Kalaisi pea ko e fuʻu kakai lahí leva ʻi he tuʻunga ko e ngaahi takanga ʻo e ʻOtuá, mo ha ʻamanaki ke hao moʻui ʻi he “mamahi lahi.”—Loma 5:18; Fkh. 7:9, 14; Sione 10:16; Sem. 2:21-24; Mt. 25:46.

ʻOku fehuʻi ʻe Paula: “ʻOku ngofua ke tau fai angahala koā, koeʻuhi ʻoku ʻikai te tau nofo kia Lao ka kia Kelesi [pe ʻofa maʻataʻatā]?” ʻOkú ne tali: “Mole ke mamaʻo!” ʻOku fakamatala ʻa Paula: “Ko e kau tamaioʻeiki ʻa Angahala ʻo iku ki he mate, pe ko e kau tamaioʻeiki ʻa Faitalangofua ʻo iku ki he maʻoniʻoni.” (Loma 6:15, 16) ʻOkú ne pehē: “Kapau te mou fai ʻaki ʻa e laumalie, ʻo ʻai ke mate ʻa e feinga kovi ʻa e sino, te mou moʻui.”—Loma 8:13.

Tali ki he Ngaahi Fehuʻi Fakatohitapú:

1:24-32—ʻOku ʻuhinga ʻa e ngaahi ʻulungāanga ololalo naʻe fakamatalaʻi hení ki he kakai Siú pe ko e Senitailé? Neongo ʻe feʻungamālie ʻa e fakamatalá ki ha taha pē he ongo kulupú, naʻe tautefito ʻa e ʻuhinga ia ʻa Paulá ki he kakai ʻIsileli kuo laui senituli ʻenau tafoki mei he moʻoní. Neongo naʻa nau ʻiloʻi ʻa e tuʻutuʻuni māʻoniʻoni ʻa e ʻOtuá, naʻe “ʻikai te nau loto ke puke maʻu ʻenau ʻilo kiate ia.” Ko ia naʻa nau tuha ai ke valokiʻi.

3:24, 25—ʻE lava fēfē ke ʻufiʻufi ʻe he “totongi huhuʻi ʻa ia kuo ʻia Kalaisi Sisu” ʻa e “ngaahi angahala langaimuʻa” ki muʻa ke totongi ʻa e huhuʻí? Ko e ʻuluaki kikite faka-mīsaiá, ʻa ia naʻe hiki ʻia Senesi 3:15, ne fakahoko ia ʻi he 33 T.S. ʻi he taimi naʻe tāmateʻi ai ʻa Sīsū ʻi he ʻakau fakamamahí. (Kal. 3:13, 16) Kae kehe, ʻi he mōmeniti naʻe folofolaʻaki ai ʻe Sihova ʻa e kikite ko iá, kuo ʻosi totongi ʻa e huhuʻí ia ʻi he anga ʻo ʻene vakaí, he ʻoku ʻikai lava ʻe ha meʻa ʻo taʻofi ʻa e ʻOtuá mei heʻene fakahoko e meʻa ʻokú ne fakataumuʻa ke faí. Ko ia makatuʻunga ʻi he feilaulau ʻa Sīsū Kalaisi naʻe toki hoko ki muí, ʻe lava ai ke fakamolemoleʻi ʻe Sihova ʻa e ngaahi angahala ʻa e hako ʻo ʻĀtamá ʻa ia naʻe ngāueʻi ʻenau tuí ki he talaʻofa ko iá. ʻOku malava ʻi he huhuʻí ke toe fokotuʻu mai ʻa e faʻahinga ko ia ki muʻa ʻi he taimi ʻo e Kalisitiané.—Ng. 24:15.

6:3-5 (PM)—Ko e hā hono ʻuhinga ʻo e papitaiso kia Sīsū Kalaisi mo e papitaiso ki heʻene pekia? ʻI hono pani ʻe Sihova ʻa e kau muimui ʻo Kalaisí ʻaki ʻa e laumālie māʻoniʻoní, ʻoku nau fāʻūtaha ai mo Sīsū pea hoko ko e ngaahi mēmipa ʻo e fakatahaʻangá ʻa ia ko e sino ia ʻo Kalaisí, pea ko ia ʻa e ʻulú. (1 Kol. 12:12, 13, 27; Kol. 1:18) Ko ʻenau papitaiso eni kia Kalaisi Sīsuú. ʻOku toe “babitaiso ki he ene bekia [ʻa Kalaisí]” ʻa e kau Kalisitiane paní ʻi heʻenau moʻui ʻi ha moʻui feilaulau pea siʻaki ha toe ʻamanaki pē ki he moʻui taʻengata ʻi he māmaní. Ko ia ai, ko ʻenau maté, ko ha mate fakaefeilaulau, ʻo hangē ko e pekia ko ia ʻa Sīsuú,  neongo ʻoku ʻikai ke ʻi ai ha mahuʻinga fakaehuhuʻi ʻo ʻenau maté. ʻOku kakato ʻa e papitaiso ko ia ki he pekia ʻa Kalaisí ʻi he taimi ʻoku nau mate ai pea toetuʻu ki he moʻui ʻi hēvaní.

7:8-11 (NW)—Naʻe anga-fēfē hono ‘maʻu ʻe he angahalá ʻa e tākiekina fakafou ʻi he tuʻutuʻuní’? Naʻe tokoniʻi ʻe he Laó ʻa e kakaí ke nau ʻiloʻi ʻa e tuʻunga pe lahi kakato ʻo e angahalá, ʻo ne ʻai kinautolu ke nau lāuʻilo lahi ange ki heʻenau hoko ko e kau angahalá. Ko hono ikuʻangá, naʻa nau vakai kiate kinautolu ko e kau angahala ʻi he tuʻunga lahi ange, pea ʻilo ai ʻe he kakai tokolahi ange ko e kau angahala kinautolu. ʻE lava leva ai ke tau pehē naʻe maʻu ʻe he angahalá ʻa e tākiekina fakafou ʻi he Laó.

Ngaahi Lēsoni kia Kitautolu:

1:14, 15. ʻOku ʻi ai ʻa e ngaahi ʻuhinga lahi ke tau fanongonongo faivelenga ai ʻa e ongoongo leleí. Ko e taha he ko e kau moʻua kitautolu ki he kakai kuo fakatauʻaki ʻa e taʻataʻa ʻo Sīsuú pea ko hotau fatongia ia ke tokoniʻi fakalaumālie kinautolu.

1:18-20. Ko e kakai fakaʻotuamate mo angahalá ʻoku “ʻikai ai hanau haoʻanga,” he ko e ngaahi ʻulungāanga taʻehāmai ʻo e ʻOtuá ʻoku hā mahino ia ʻi he fakatupú.

2:28; 3:1, 2; 7:6, 7. ʻOku toe fakaleleiʻi ʻe Paula ʻa e ngaahi fakamatala ʻa ia naʻe hā ngali fakatupu ʻita ki he kakai Siú ʻaki ha ngaahi fakamatala fakaoloolo. ʻOku ʻomai ʻe he meʻá ni ha faʻifaʻitakiʻanga kiate kitautolu ʻi he lāulea ki he ngaahi tuʻunga-lea ʻoku pelepelengesí ke fai ia ʻi he fakapotopoto mo e pōtoʻi.

3:4. ʻI he taimi ʻoku fepaki ai ʻa e lau ʻa e tangatá mo e meʻa ʻoku folofolaʻaki ʻe he ʻOtuá ʻi heʻene Folofolá, ʻoku “tau tuku muʻa ʻoku moʻoni pe ʻa e ʻOtua” ʻaki ʻetau falala ki he pōpoaki ʻi he Tohi Tapú pea ngāue ʻo fehoanaki mo hono finangaló. ʻI hoʻo kau faivelenga ʻi he ngāue fakamalanga ʻo e Puleʻangá mo e ngaohi-ākongá, ʻe lava ke tau tokoniʻi ai ʻa e niʻihi kehé ke nau ʻiloʻi ʻoku moʻoni ʻa e ʻOtuá.

4:9-12. Ko e tui ʻa ʻĒpalahamé naʻe lau ai ia ʻokú ne māʻoniʻoni fuoloa ia ki muʻa peá ne toki kamu ʻi hono taʻu 99. (Sen. 12:4; 15:6; 16:3; 17:1, 9, 10) ʻI he founga mālohi ko iá, naʻe fakahaaʻi ai ʻe he ʻOtuá ʻa e meʻa ʻoku malava ke hoko ai ʻo māʻoniʻoni kiate iá.

4:18. Ko e ʻamanakí ko ha konga tefito ia ʻo e tuí. Ko ʻetau tuí ʻoku fakatefito ia ʻi heʻetau ʻamanakí.—Hep. 11:1.

5:18, 19. ʻI hono fakahaaʻi totonu ʻa e anga ʻo e meimei tatau ʻa Sīsū mo ʻĀtamá, ʻoku fakamatalaʻi nounou ai ʻe Paula ʻa e founga ʻe lava ai ʻe ha tangata pē taha ke “tuku ʻene moʻui ke huhuʻiʻaki ha tokolahi.” (Mt. 20:28) Ko e fakaʻuhinga totonú pea mo e nounou feʻungá ʻa e ongo founga fakafaiako lelei ʻaupito ke tau faʻifaʻitaki ki ai.—1 Kol. 4:17.

7:23. Ko e ngaahi kupu ko ia hotau sinó hangē ko hotau nimá, vaʻé, mo e ʻeleló ʻe lava ke nau ‘takipopula kitautolu ki he lao angahalaʻiá,’ ko ia ai ʻoku totonu ke tau maluʻi kitautolu mei hono ngāuehalaʻakí.

8:26, 27. ʻI he taimi ʻoku tau fehangahangai ai mo e ngaahi tuʻunga ʻoku fuʻu fakapuputuʻu ʻo ʻikai ai ke tau ʻilo pē ko e hā ke lotu ki aí, “ko e Laumalie ʻoku ne hufekina ʻe ia ʻa kitaua.” Pea ko Sihova leva, ko e “Tali lotu,” ʻokú ne tali ʻa e ngaahi lotu feʻungamālie naʻe hiki ʻi heʻene Folofolá ʻa ia ʻoku tau faí.—Sāme 65:2.

8:38, 39. ʻE ʻikai lava ʻe he ngaahi fakatamakí, ngaahi meʻamoʻui laumālie fulikivanú, mo e ngaahi founga pule ʻa e tangatá ke ne taʻofi ʻa e ʻofa mai ʻa Sihova kiate kitautolú; pea ʻoku ʻikai totonu ke nau taʻofi ʻetau ʻofa kiate iá.

9:22-28; 11:1, 5, 17-26. Ko e ngaahi kikite fekauʻaki mo hono toe fakafoʻou ʻo ʻIsilelí ʻoku fakahoko ia ʻe he fakatahaʻanga ʻo e kau Kalisitiane paní, ʻa ia ko honau ngaahi mēmipá naʻe fakaului ʻo “ʻikai mei he Siu pe, ka mei he Senitaile foki.”

10:10, 13, 14. ʻI he ʻofa ki he ʻOtuá pea pehē ki hotau kaungā faʻahinga ʻo e tangatá, ʻe lava ke ueʻi ai kitautolu ʻe he tui mālohi kia Sihova mo ʻene ngaahi talaʻofá ke tau kau faivelenga ʻi he ngāue fakafaifekau faka-Kalisitiané.

11:16-24, 33. He meʻa mafamafatatau lelei moʻoni ko e “angalelei mo e fai masila ʻa e ʻOtua”! ʻIo, “Ko Makatuʻu ia—ʻoku haohaoa ʻene ngaue; Ko ʻene ngaahi founga kotoa ʻoku fakakonisitutone.”—Teu. 32:4.

MOʻUI ʻO FEHOANAKI MO E FAKATONUHIAʻÍ

(Loma 12:1–16:27)

“Ko ia ʻoku ou enginaki atu, kainga, ʻi he funga ʻo e ngaahi fai manavaʻofa ʻa e ʻOtua,” ko e lau ia ʻa Paulá, “ke mou ʻatu ʻa e ngaahi sino ʻomoutolu ko e feilaulau, ke moʻui, ke tapu ki he ʻOtua, ke fakahōifua kiate ia.” (Loma 12:1) “Ko ia,” pe ʻi he fakakaukau ki he moʻoniʻi meʻa ko e kau Kalisitiané ʻoku  fakatonuhiaʻi koeʻuhí ko ʻenau tuí, ko e meʻa naʻe hoko atu ki ai ʻa Paulá ʻoku totonu ke ueʻi ai ʻa ʻenau fakakaukau kiate kinautolú, niʻihi kehé, pea pehē ki he ngaahi mafai fakaepuleʻangá.

“Ko ʻeku lea ʻeni kiate kimoutolu tāutaha, . . . ke ʻoua naʻa hulu atu ʻene fakakaukau kiate ia ʻi he meʻa ʻoku totonu,” ko e tohi ia ʻa Paulá. “Ke taʻeloi hoʻomou ʻofa,” ko ʻene ekinakí ia. (Loma 12:3, 9) “Ke anganofo ʻa e tangata kotoa pe ki he ngaahi pule ʻoku maʻolunga.” (Loma 13:1) ʻI he ngaahi meʻa fekauʻaki mo e konisēnisí, ʻokú ne fakalototoʻaʻi ai ʻa e kau Kalisitiané ‘ke oua naa nau kei fefakamāuaki akinautolu.’—Loma 14:13, PM.

Tali ki he Ngaahi Fehuʻi Fakatohitapú:

12:20—ʻOku anga-fēfē haʻatau “fokotuʻu ai ʻa e ngaahi malalaʻi afi” ki he ʻulu ʻo e ngaahi filí? ʻI he taimi ʻo e Tohi Tapú, naʻe tuku ʻa e makamaka ʻoku maʻu mei ai ʻa e mētalé ki ha fōnise pea naʻe folahi ha ngaahi malala ʻo ʻikai ʻi lalo pē ʻi he makamaká kae toe pehē foki ki ʻolunga. Ko e fakalalahi ʻa e mafana ʻi ʻolungá naʻá ne ʻai ʻo ʻo vaia ai ʻa e mētalé ʻo mavahe mei he fanga kiʻi ʻuli kehe ʻi he makamaká. ʻI he founga meimei tatau, ʻoku tau fokotuʻu ʻa e ngaahi malalaʻi afi ki he ʻulu ʻo ha fili ʻi hono fai kiate ia ha ngaahi ngāue anga-ʻofa koeʻuhi ʻe vaia ai ʻa hono loto-fefeká pea tohoaki hake ai hono ngaahi ʻulungāanga lelei angé.

12:21—ʻE anga-fēfē haʻatau “ikuna ʻa e kovi ʻaki ʻa e lelei”? Ko e founga ʻe taha ʻoku tau fai ai ení ko e pīkitai taʻemanavahē ki heʻetau ngāue kuo ʻomai mei he ʻOtuá ʻa ia ko hono malangaʻi ʻa e ongoongo lelei ʻo e Puleʻangá kae ʻoua kuo hōifua ki ai ʻa Sihová.—Mk. 13:10.

13:1 (NW)—ʻI he founga fē “kuo fokotuʻu [ai ʻa e ngaahi mafai māʻolungá] ʻi honau ngaahi tuʻunga fakafelāveʻiʻakí ʻe he ʻOtuá”? Ko e ngaahi mafai fakapuleʻangá kuo “fokotuʻu kinautolu ʻi honau ngaahi tuʻunga fakafelāveʻiʻakí ʻe he ʻOtuá” ʻi he ʻuhinga ʻoku nau pulé ʻi hono fakangofua ʻe he ʻOtuá, pea ʻi he ngaahi tuʻunga ʻe niʻihi ko ʻenau tuʻunga-pulé naʻe ʻosi tomuʻa ʻafioʻi pē ia ʻe he ʻOtuá. ʻOku hā mahino ʻa e meʻá ni ʻi hono muʻaki tala ʻe he Tohi Tapu ha kau pule ʻe niʻihi.

Ngaahi Lēsoni kia Kitautolu:

12:17, 19. Ke faisāuni ki he koví ko ʻetau fai ia ʻa e meʻa ko Sihova pē ʻoku ʻaʻana ʻa e totonu ki aí. He ʻafungi ē ko kitautolu ʻi hono ‘totongi ʻa e koví ʻaki ʻa e kovi’!

14:14, 15. ʻOku totonu ke ʻoua te tau fakamamahiʻi hotau tokouá pe fakatūkiaʻi ia ʻi ha meʻakai pe inu ʻoku tau foaki kiate ia.

14:17. Ko hoʻo maʻu ha vahaʻangatae lelei mo e ʻOtuá ʻoku ʻikai ke makatuʻunga tefito ia ʻi he meʻa ʻokú te kaí pe inú pe ko e meʻa ʻokú te fakaʻehiʻehi mei hono kaí pe ko hono inú. Ka, ʻoku ʻoku felāveʻi ia mo e māʻoniʻoní, melinó, mo e fiefiá.

15:7. ʻOku totonu ke tau talitali lelei taʻefilifilimānako ki he fakatahaʻangá ʻa e kau fekumi loto-moʻoni kotoa ki he moʻoní pea fanongonongo ʻa e pōpoaki ʻo e Puleʻangá kia kinautolu kotoa ʻoku tau fetaulaki mo iá.

[Fakatātā ʻi he peesi 31]

ʻE lava ke ngāue ʻa e huhuʻí ki he ngaahi angahala naʻe fai ki muʻa ia he taimi naʻe toki totongi aí?