Ngaahi Meʻa Kuo Pau Ke Tau Hola mei Ai
Ngaahi Meʻa Kuo Pau Ke Tau Hola mei Ai
“ʻA e hakoʻi ngata-fekai, ko hai ne faleʻi kimoutolu ke hola mei he houhau ʻoku tuʻunuku mai?”—MT. 3:7.
1. Ko e hā ha ngaahi fakatātā Fakatohitapu ʻe niʻihi ʻo e holá?
KO E HĀ ʻokú ke fakakaukau ki ai ʻi he taimi ʻokú ke fanongo ai ki he foʻi lea “hola”? ʻE fakakaukau atu nai ʻa e niʻihi ki he talavou matātangata ko Siosifá ʻi heʻene hola mei he feinga ʻa e uaifi ʻo Pōtifá ke na fai ʻa e ʻulungāanga taʻetāú. (Sen. 39:7-12) ʻE fakakaukau nai ʻa e niʻihi ia ki he kau Kalisitiane naʻa nau hola mei Selusalema ʻi he taʻu 66 T.S., ʻi heʻenau talangofua ki he fakatokanga ʻa Sīsuú: “ʻO ka mou ka vakai ki he kapui ʻo Selusalema ʻe he ngaahi matatau, . . . Pea ke toki hola ki he moʻunga ʻa kinautolu ʻoku ʻi Siutea; pea ko kinautolu ʻoku ʻi loto kolo ke hiki mei ai.”—Luke 21:20, 21.
2, 3. (a) Ko e hā ʻa e ʻuhinga moʻoni ʻo hono fakaangaʻi ʻe Sione Papitaiso ʻa e kau taki lotú? (e) Naʻe anga-fēfē hono ʻai ʻe Sīsū ke toe mālohi ʻa e fakatokanga naʻe fai ʻe Sioné?
2 Ko e ongo fakatātā naʻe lave ki ai ʻi ʻolungá naʻe kau ki ai ʻa e holá ʻi ha tuʻunga moʻoni. ʻI he ʻahó ni, ʻoku ʻi ai ha fiemaʻu fakavavevave ki he kau Kalisitiane moʻoní ʻi he meimei fonua kotoa pē takatakai ʻi he foʻi kolopé, ke nau hola ʻi ha founga fakaefakatātā. Naʻe ngāueʻaki ʻe Sione Papitaiso ʻa e foʻi lea “hola” ʻi he ʻuhinga pehē. Naʻe kau ʻi he faʻahinga naʻe omi ke sio kia Sioné ʻa e kau taki lotu Siu fie māʻoniʻoni ʻa ia naʻa nau ongoʻi naʻe ʻikai ha fiemaʻu ia ke nau fakatomala. Naʻa nau siolalo ki he kakai lāuvale ʻa ia naʻa nau papitaiso ke fakahaaʻiʻaki ʻenau fakatomalá. Naʻe fakaeʻa taʻemanavahē ʻe Sione ʻa e kau taki mālualoi ko iá: “ʻA e hakoʻi ngata-fekai, ko hai ne faleʻi kimoutolu ke hola mei he houhau ʻoku tuʻunuku mai? Kapau ko ia, pea mou fua ʻo tāu mo ha fakatomala.”—Mt. 3:7, 8.
3 Naʻe ʻikai lau ʻa Sione ia ʻo fekauʻaki mo ha hola fakaesino. Naʻá ne fakatokanga ʻo fekauʻaki mo ha fakamaau naʻe tuʻunuku mai, ko ha ʻaho ʻo e houhau; pea naʻá ne fakatokanga ki he kau taki lotú ʻo kapau ʻoku nau fiemaʻu ke hao lolotonga ʻa e ʻaho ko iá, ʻe fiemaʻu ke nau fakatupu ʻa e fua ʻoku fakamoʻoniʻi ai ʻenau fakatomalá. Ki mui ai, naʻe fakahalaiaʻi taʻemanavahē ʻe Sīsū ʻa e kau taki lotú—ko ʻenau fakakaukau fakapoó naʻe fakahaaʻi ai ko ʻenau tamai moʻoní ko e Tēvoló. (Sione 8:44) ʻI hono ʻai ke toe mālohi ʻa e fakatokanga ki muʻa ʻa Sioné, naʻe ui kinautolu ʻe Sīsū ko e “hakoʻi ngata-fekai” pea naʻá ne ʻeke: “Te mou hao fefē mei he fakamāu Kihena?” (Mt. 23:33) Ko e hā naʻe ʻuhinga ki ai ʻa Sīsū ʻi heʻene lave ki “Kihena”?
4. Naʻe ʻuhinga ʻa Sīsū ki he hā ʻi heʻene fakatokanga fekauʻaki mo “Kihena”?
4 Ko Kīhená ko ha teleʻa ia ʻi he tuʻa ʻā ʻo Selusalemá ʻa ia naʻe tutu ai ʻa e vevé mo e ngaahi ʻangaʻanga ʻo e fanga monumanu naʻe maté. Naʻe ngāueʻaki ʻe Sīsū ʻa Kīhena ko ha fakatātā ʻo e mate taʻengata. (Sio ki he peesi 27.) Ko ʻene fehuʻi fekauʻaki mo e hao mei Kīhená naʻe fakahaaʻi ai ko e kau taki lotu ko iá ʻi he tuʻunga ko ha kulupú, naʻa nau tuha mo e fakaʻauha taʻengata.—Mt. 5:22, 29.
5. ʻI he hisitōliá, naʻe anga-fēfē ʻa e hoko ʻa e meʻa naʻe fakatokanga ʻa Sione mo Sīsū fekauʻaki mo iá?
5 Naʻe fakalahi ʻe he kau taki Siú ʻenau angahalá ʻi heʻenau fakatangaʻi ʻa Sīsū mo hono kau muimuí. Ki mui ai, hangē ko ia naʻe fakatokanga ki ai ʻa Sione mo Sīsuú, naʻe hoko mai ʻa e ʻaho ʻo e houhau ʻa e ʻOtuá. ʻI he tuʻunga ko iá, ko e “houhau ʻoku tuʻunuku mai” naʻe fakatefito pē ia ʻi ha feituʻu pē ʻe taha, ko Selusalema mo Siutea, ko ia ne mei lava pē ke fai moʻoni ha hola. Naʻe hoko mai ʻa e houhaú ia ʻi he taimi naʻe fakaʻauha ai ʻa Selusalema mo hono temipalé ʻe he kau tau Lomá ʻi he 70 T.S. Ko e “mamahi” ko iá naʻe lahi ange ia ʻi ha meʻa pē naʻe hokosia ki muʻa ʻe Selusalema. Naʻe tāmateʻi ai ʻa e tokolahi pe taki pōpula. Naʻe tuhu ʻa e meʻá ni ki ha fakaʻauha lahi ange ʻoku tatali mai ki he kau Kalisitiane lau pē tokolahi mo e faʻahinga ʻi he ngaahi lotu kehé.—Mt. 24:21.
Ko ha Houhau he Kahaʻú ke Hola mei Ai
6. Ko e hā naʻe kamata ke tupu hake ʻi he muʻaki fakatahaʻanga Kalisitiané?
6 Ko e niʻihi ʻi he lotolotonga ʻo e muʻaki kau Kalisitiané naʻa nau tafoki mei he moʻoní pea maʻu ʻa honau kau muimui. (Ng. 20:29, 30) Lolotonga ʻa e moʻui ʻa e kau ʻapositolo ʻa Sīsuú, naʻa nau ngāue ai ko ha “pukepuke” ʻo e tafoki ko ia mei he moʻoní, ka ʻi he hili ʻenau maté, naʻe tupu hake ai ʻa e ngaahi lotu loi mavahe faka-Kalisitiane lahi. ʻI he ʻahó ni, ʻoku laui ngeau ʻa e ngaahi lotu fepakipaki ʻi he Puleʻanga-Haʻa-Kalisitiané. Naʻe fakahaaʻi ʻe he Tohi Tapú ʻa e mahiki hake ʻa e haʻa faifekau ʻo e Puleʻanga-Haʻa-Kalisitiané, ʻo fakamatalaʻi kinautolu fakakātoa ko e “tangata ko Malakilao” pea “ko e fanautama ʻa Mala . . . ʻa ia ʻe tamateʻi ʻe he ʻEiki ko Sisu . . . pea fakaʻauha ʻaki ʻa e fotuaki o ʻene hoko mai.”—2 Tes. 2:3, 6-8.
7. Ko e hā ʻoku feʻungamālie ai mo e haʻa faifekau ʻo e Puleʻanga-Haʻa-Kalisitiané ʻa e kupuʻi lea “fanautama ʻa Mala”?
7 Ko e haʻa faifekau ʻo e Puleʻanga-Haʻa-Kalisitiané ʻoku nau malaki lao ʻi heʻenau takihalaʻi ʻa e laui miliona ʻaki ʻenau pouaki ʻa e ngaahi akonaki, ngaahi ʻaho mālōlō mo e tōʻonga ʻoku kehe mei he lau ʻa e Tohi Tapú. ʻI he hangē ko e kau taki lotu naʻe fakahalaiaʻi ʻe Sīsuú, ko e kau lotu ʻi onopooni ʻa ia ko e konga kinautolu ʻo e “fanautama ʻa Mala” ʻoku nau hanga atu ki he fakaʻauha ʻo ʻikai ha ʻamanaki ki ha toetuʻu. (2 Tes. 1:6-9) Kae kehe, ko e hā ʻoku fakatatali ki he kakai kuo takihalaʻi ʻe he haʻa faifekau ʻo e Puleʻanga-Haʻa-Kalisitiané mo e kau faifekau ʻo e ngaahi faʻahinga kehe ʻo e lotu loí? Ke tali ʻa e fehuʻi ko iá, tau lāulea angé ki he ngaahi meʻa naʻe hoko hili ʻa e fakaʻauha ki muʻa ʻo Selusalema ʻi he 607 K.M.
“Hola mei he Lotolotonga ʻo Papilone”
8, 9. (a) Ko e hā ʻa e pōpoaki fakaekikite naʻe fai ʻe Selemaia ki he kau Siu naʻe nofo pōpula ʻi Pāpiloné? (e) Hili hono ikunaʻi ʻo Pāpilone ʻe he kau Mītiá mo e kau Pēsiá, ko e hā ʻa e faʻahinga hola naʻe malava ke hoko aí?
8 Ko e palōfita ko Selemaiá naʻá ne tomuʻa tala ʻa e fakaʻauha ʻo Selusalema naʻe hoko ʻi he 607 K.M. Naʻá ne pehē ko e kakai ʻa e ʻOtuá ʻe taki pōpula kinautolu ka te nau toe foki ki honau fonua tupuʻangá hili ʻa e “fitungofuluʻi taʻu.” (Sel. 29:4, 10) Ki he kau Siu naʻe nofo pōpula ʻi Pāpiloné, naʻe fai ʻe Selemaia ha pōpoaki mahuʻinga; naʻe pau ke nau nofo taʻeʻuliʻi mei he lotu loi naʻe lotolotoi ʻi Pāpiloné. Ko ia naʻa nau mateuteu ai ke foki ki Selusalema pea toe fakafoki ʻa e lotu maʻá ʻi he aʻu ki he taimi naʻe kotofá. Naʻe hoko vave eni hili hono ikunaʻi ʻe he kau Mītiá mo e Pēsiá ʻa Pāpilone ʻi he 539 K.M. Naʻe tuku atu ʻe Tuʻi Kōlesi II ʻo Pēsiá ha tuʻutuʻuni ki he kau Siú ke nau foki ʻo toe langa ʻi Selusalema ʻa e temipale ʻo Sihová.—Esela 1:1-4.
9 Naʻe puke ʻe he laui afe ʻo e kau Siú ʻa e faingamālie ko ení pea nau foki. (Esela 2:64-67) ʻI heʻenau fai peheé, naʻa nau fakahoko ai ʻa e fekau fakaekikite ʻa Selemaiá ʻa ia ʻi honau tuʻungá naʻe kau ki ai ʻa e holá ʻi he ʻuhinga ʻe taha, ko e mavahe ki ha feituʻu ʻe taha. (Lau ʻa e Selemaia 51:6, 45, 50.) Naʻe ʻikai fakaʻatā ʻi he ngaahi tuʻungá ʻa e kau Siú kotoa ke nau fai ʻa e fononga lōloa ʻo foki ki Selusalema mo Siutá. Ko e faʻahinga naʻa nau nofo pē ʻi Pāpiloné, hangē ko e palōfita taʻumotuʻa ko Tanielá, naʻe lava ke nau maʻu ʻa e tāpuaki ʻa e ʻOtuá ʻo kapau te nau poupou ʻaufuatō ki he lotu maʻa naʻe senitā ʻi Selusalemá pea nofoʻaki mavahe ai pē mei he lotu loi faka-Pāpiloné.
10. Ko e hā ʻa e “gaahi fakalielia” ko e tupu mei “Babilone koe Lahi”?
10 ʻI he ʻahó ni, ʻoku kau ʻa e faʻahinga ʻe laui piliona ʻo e tangatá ʻi he ngaahi lotu loi kehekehe ʻa ia ʻoku lava ke fakatotoloʻi ko e tupu mei Pāpilone ʻo e kuonga muʻá. (Sen. 11:6-9) ʻI he fakakātoá, ko e ngaahi lotu ko iá ʻoku fakamatalaʻi ia ko “Babilone koe Lahi, koe faʻe ae kau feauaki moe gaahi fakalielia oe mamani.” (Fkh. 17:5, PM) ʻOku ʻi ai ha hisitōlia motuʻa ʻo e lotu loí ʻi heʻene poupouʻi ʻa e kau taki fakapolitikale ʻo e māmani ko ení. ʻOku kau ʻi he “gaahi fakalielia” ʻa ia ko e tupu mei aí ʻa e ngaahi tau lahi kuo iku ai ki he “mate tamateʻi ʻi mamani” ʻa e laui teau miliona. (Fkh. 18:24) Ko e toe “gaahi fakalielia” kehé ʻoku kau ai ʻa e pāʻusiʻi ʻo e fānaú mo e faʻahinga kehe ʻo e fehokotaki fakasino taʻetaau ʻoku fai ʻe he haʻa faifekaú kae kei tali pē kinautolu ʻe he kau maʻu mafai ʻo e siasí. ʻOku ʻi ai ha ofo ʻi he vavé ni ke toʻo ʻosi atu ʻe he ʻOtua ko Sihová ʻa e lotu loí mei he māmaní?—Fkh. 18:8.
11. Kae ʻoua ke fakaʻauha ʻa Pāpilone ko e Lahi, ko e hā ʻa e fatongia ʻo e kau Kalisitiane moʻoní?
11 Ko e kau Kalisitiane moʻoni, ʻa ia ʻoku nau ʻiloʻi ení, ʻoku ʻi ai honau fatongia ke fakatokanga ki he ngaahi mēmipa ʻo Pāpilone ko e Lahí. Ko e founga ʻe taha ʻoku nau fai ai iá ko hono tufa ʻo e ngaahi Tohi Tapu mo e ʻū tohi felāveʻi mo e Tohi Tapú kuo pulusi ʻe he “tamaioeiki agatonu mo boto,” ʻa ia kuo fakanofo ʻe Sīsū ke ne ʻomai ʻa e “mea kai [fakalaumālié] i hono taimi totonu.” (Mt. 24:45, PM) ʻI he taimi ʻoku fakahāhā ai ʻe he faʻahinga tāutaha ha mahuʻingaʻia ʻi he pōpoaki ʻa e Tohi Tapú, ʻoku fai ʻa e ngaahi fokotuʻutuʻu ke tokoniʻi kinautolu fakafou ʻi ha ako Tohi Tapu. Fakatauange, te nau sio ki he fiemaʻu ke “hola mei he lotolotonga ʻo Papilone” ki muʻa ke fuʻu tōmui.—Fkh. 18:4.
Hola mei he Tauhi ʻAitolí
12. ʻOku anga-fēfē ʻa e vakai ʻa e ʻOtuá ki he lotu ki he ngaahi ʻīmisí mo e ʻaitolí?
12 Ko e tōʻonga fakalielia ʻe taha ʻoku failahia ʻi Pāpilone ko e Lahí ko e lotu ki he ngaahi ʻīmisí mo e ʻaitolí. ʻOku ui ia ʻe he ʻOtuá ko e “ngaahi meʻa fakalielia” mo e “ngaahi ʻaitoli kinohaʻa.” (Teu. 29:17, NW) Ko e faʻahinga kotoa ʻoku nau loto ke fakahōifuaʻi ʻa e ʻOtuá kuo pau ke nau fakaʻehiʻehi mei he tauhi ʻaitolí, ʻi he fehoanaki mo e fakamatala ʻa e ʻOtuá: “Ko Sihova au; ko hoku hingoa ia: pea ʻe ʻikai te u ʻange hoku langilangi ki ha taha, pe ko hoku ongoongo ki he ngaahi aitoli.”—Ai. 42:8.
13. Ko e hā ʻa e ngaahi founga pulipulia ʻo e tauhi ʻaitolí ʻoku fiemaʻu ke tau hola mei aí?
13 Ko e Folofola ʻa e ʻOtuá ʻoku toe fakaeʻa ai ʻa e ngaahi founga pulipulia ʻo e tauhi ʻaitolí. Ko e fakatātaá, ʻokú ne ui ʻa e mānumanú ko e “tauhi aitoli.” (Kol. 3:5) Ke mānumanu ʻoku ʻuhinga iá ko e holi ki he meʻa ʻoku tapui, hangē ko e ngaahi koloa ʻa ha taha kehe. (Eki. 20:17) Ko e ʻāngelo ko ia naʻe hoko ko Sētane ko e Tēvoló naʻá ne fakatupulekina ha holi mānumanu ke tatau mo e Fungani Māʻolungá pea ke fai ange ki ai ʻa e lotú. (Luke 4:5-7) Naʻe tataki ai ia heni ke ne angatuʻu kia Sihova pea ke ne fakataueleʻi ʻa ʻIvi ke ne mānumanu ki ha meʻa naʻe tapui ʻe he ʻOtuá. ʻI ha founga ʻe taha, naʻe toe fai ai ʻe ʻĀtama ʻa e tauhi ʻaitolí ʻaki ʻene fakaʻatā ʻene holi siokita ki he feohi mo hono uaifí ke hoko ʻo mahuʻinga ange ia ʻi he talangofua ki heʻene Tamai fakahēvani ʻofá. ʻI hono kehé, ko e faʻahinga kotoa ʻoku nau loto ke hola ʻi he ʻaho ʻo e houhau ʻa e ʻOtuá kuo pau ke nau ʻoange kiate ia ʻa e līʻoa maʻataʻatā pea talitekeʻi hā faʻahinga mānumanu pē.
“Hola Pe mei he Fai Feʻauaki”
14-16. (a) Ko e hā naʻe hoko ai ʻa Siosifa ko ha faʻifaʻitakiʻanga lelei ʻi he tuʻunga fakaeʻulungāangá? (e) Ko e hā ʻoku totonu ke tau faí kapau ʻoku tau hokosia ha holi fakaefehokotaki fakasino taʻemaʻa? (f) ʻE lava fēfē ke tau lavameʻa ʻi he hola mei he feʻauakí?
14 Lau ʻa e 1 Kolinito 6:18. ʻI he taimi naʻe feinga ai ʻa e uaifi ʻo Pōtifá ke fakataueleʻi ʻa Siosifá, naʻá ne hola moʻoni meiate ia. Ko ha faʻifaʻitakiʻanga lelei moʻoni ia naʻá ne fokotuʻu ki he kau Kalisitiané, fakatouʻosi ʻa e faʻahinga teʻeki malí mo e faʻahinga ʻosi mali! ʻOku hā mahino, naʻe fakafuo ʻa e konisēnisi ʻo Siosifá ʻe he ngaahi meʻa naʻe hoko ki muʻa naʻe hā mei ai ʻa e anga ʻo e fakakaukau ʻa e ʻOtuá. Kapau ʻoku tau loto ke talangofua ki he fekau ke “hola pe mei he fai feʻauaki,” te tau fakaʻehiʻehi leva mei he ngaahi meʻa te ne langaʻi nai ʻa e holi fakaefehokotaki fakasino ki ha taha kehe mei hotau hoá. ʻOku tala mai kiate kitautolu: “Mou ʻai ke mate leva homou ngaahi kupu . . . ko e feʻauaki, angaʻuli, havala, holi pango; kaeʻumaʻā ʻa e manumanu, ʻa ia ko e tauhi aitoli tofu pe ia: he ko e ngaahi meʻa ko ia ʻoku hoko mei ai ʻa e houhau ʻa e ʻOtua.”—Kol. 3:5, 6.
15 Fakatokangaʻi ʻe ‘hoko mai ʻa e houhau ʻa e ʻOtuá.’ Ko e tokolahi ʻi he māmaní ʻoku nau fakatupulekina ʻa e ngaahi holi taʻetotonu fakaefehokotaki fakasino pea nau tukulolo ki ai. Ko ia ai, ko kitautolu Kalisitiané ʻoku fiemaʻu ke tau lotu ʻo kole ʻa e tokoni ʻa e ʻOtuá mo hono laumālie māʻoniʻoní koeʻuhi ke ʻoua ʻe puleʻi kitautolu ʻe he ngaahi holi fakaefehokotaki fakasino taʻemaʻá. Tānaki atu ki ai, ko hono ako ʻo e Tohi Tapú, maʻu ʻa e ngaahi fakataha faka-Kalisitiané pea vahevahe atu ʻa e ongoongo leleí ki hotau ngaahi kaungāʻapí ʻe tokoniʻi ai kitautolu ke tau “fou ʻi he Laumalie.” Ko ia “ʻe ʻikai ai te [tau] momoʻi fakaai ʻa e holi ʻa Kakano.”—Kal. 5:16.
16 Ko e moʻoni, kapau ʻoku tau sio ʻi he fakatātā fakalieliá, heʻikai ai ke tau “fou ʻi he Laumalie.” ʻI he tuʻunga meimei tatau, ko e Kalisitiane kotoa pē ʻoku fiemaʻu ke ne maluʻi ia mei he lautohi, sio, pe fanongo ki he meʻa ʻoku langaʻi ai ʻa e holi ki he fehokotaki fakasinó. ʻI he tuʻunga meimei tatau, ʻoku hala ki he kakai “maonioni” ʻa e ʻOtuá ke nau maʻu ha fiefia ʻi he fakakata fekauʻaki mo e ngaahi meʻa peheé pe fetalanoaʻaki ki ai ʻi honau haʻohaʻongá. (Ef. 5:3, 4 [Ef 5:1-3], PM) Ko ia ʻoku tau fakahāhā ai ki heʻetau Tamai ʻofá ʻoku tau loto moʻoni ke hao ʻi heʻene houhau ʻoku tuʻunuku maí pea moʻui ʻi he māmani foʻou māʻoniʻoní.
Hola mei he “ʻOfa ki he Paʻanga”
17, 18. Ko e hā kuo pau ai ke tau hola mei he “ʻofa ki he paʻanga”?
17 ʻI heʻene ʻuluaki tohi kia Tīmoté, naʻe fakamamafaʻi ai ʻe Paula ʻa e ngaahi tefitoʻi moʻoni ʻoku totonu ke ngāueʻaki ʻe he kau tamaioʻeiki Kalisitiané, ʻa ia ko e niʻihi ai naʻa nau ʻamanekina nai ha ngaahi lelei fakamatelie koeʻuhi ko honau kau pulé ko e kau Kalisitiane. Naʻe feinga nai ʻa e niʻihi ke ngāueʻaki ʻa e meʻa naʻe māʻoniʻoní ke maʻu ai ha tupu ʻi he siokita. Naʻe fakatokanga ʻa Paula fekauʻaki mo e “mahalo ko e lotu moʻoni [pe anga-līʻoa fakaʻotuá] ko e meʻa fakatupu koloa” fakamatelie. Ko e tupuʻanga nai ʻo e palopalemá “ko e ʻofa ki he paʻanga,” ʻa ia ʻoku lava ke ʻi ai ʻene uesia kovi ki ha taha pē, koloaʻia pe masiva.—1 Tim. 6:1, 2, 5, 9, 10.
18 ʻE lava ke ke fakakaukau ki ha ngaahi fakatātā mei he Tohi Tapú ʻo e faʻahinga tāutaha ʻa ia ko honau vahaʻangatae mo e ʻOtuá naʻe maumauʻi ʻe he “ʻofa ki he paʻanga” pe ko e ʻofa ki he ngaahi meʻa ʻoku ʻikai fiemaʻu ʻa ia ʻoku lava ke fakatau mai ʻaki ʻa e paʻangá? (Sios. 7:11, 21; 2 Tuʻi 5:20, 25-27) Naʻe ekinaki ʻa Paula kia Tīmote: “Ko koe, ae tagata oe Otua, buna [pe hola] mei he gaahi mea ni; bea ke tuli ki he maonioni, moe aga faka-Otua, moe tui, moe ofa, moe faa kataki, moe agavaivai.” (1 Tim. 6:11, PM) Ko e tokanga ki he faleʻi ko iá ʻoku mātuʻaki mahuʻinga ia ki he faʻahinga kotoa ʻoku nau loto ke hao ʻi he ʻaho ʻo e houhau ʻoku tuʻunuku maí.
“Ko e Ngaahi Holi Fakatalavou Ke Ke Hola mei Ai”
19. ʻOku fiemaʻu ʻe he kau talavou kotoa pē ʻa e hā?
19 Lau ʻa e Palovepi 22:15. Ko e vale ʻi he loto ʻo ha talavou ʻe lavangofua ke ne fakaheeʻi ia. Ko e meʻa ʻa ia ʻe lava ke tokoni ki hono fakafepakiʻi ení ko e akonaki makatuʻunga ʻi he Tohi Tapú. Ko e kau talavou Kalisitiane tokolahi ʻa ia ko ʻenau ngaahi mātuʻá ʻoku ʻikai te nau tui tatau mo kinautolú ʻoku nau feinga ke maʻu pea ngāueʻaki ʻa e ngaahi tefitoʻi moʻoni ʻoku fokotuʻu mai ʻi he Tohi Tapú. ʻOku maʻu ʻaonga ʻa e niʻihi kehé mei he faleʻi fakapotopoto ʻa e faʻahinga matuʻotuʻa fakalaumālie ʻi he fakatahaʻangá. Tatau ai pē pe ko hai ʻokú ne fai ʻa e akonaki makatuʻunga ʻi he Tohi Tapú, ko e talangofua ki aí ʻoku lava ke taki atu ia ki he fiefia fakatouʻosi ʻi he taimí ni pea pehē ki he kahaʻú.—Hep. 12:8-11.
20. ʻOku lava fēfē ke maʻu ʻe he kau talavoú ʻa e tokoni ke hola ai mei he ngaahi holi fehālaakí?
20 Lau ʻa e 2 Timote 2:20-22. Ko e loto ʻo e kau talavou tokolahi ʻa ia ʻoku ʻikai te nau maʻu ha akonaki ʻaongá kuo maʻukovia ia ʻe he ngaahi founga fakavalevale, hangē ko e laumālie feʻauʻauhí, mānumanu, feʻauaki, ko e ʻofa ki he paʻangá, mo e tuli ki he mālié. ʻOku tapua mei he ngaahi meʻá ni ʻa e “ngaahi holi fakatalavou,” ʻa ia ʻoku ekinaki mai ʻa e Tohi Tapú ke tau hola mei aí. Ko e holá ʻoku fiemaʻu ai ki ha talavou Kalisitiane ke ne maluʻi ia mei he ngaahi tākiekina fakatupu maumaú, ʻi ha feituʻu pē nai ʻe ʻasi ai. ʻOku ʻaonga tautefito ʻa e faleʻi fakaʻotua ke tuli ki he ngaahi ʻulungāanga fakaʻotuá fakataha “mo e kakai ʻoku lotu ki he ʻEiki mei he loto maʻa.”
21. Ko e hā ʻa e talaʻofa fakaofo naʻe fai ʻe Sīsū Kalaisi fekauʻaki mo hono kau muimui hangē ha sipí?
21 Pe ʻoku tau iiki pe lalahi, ko e fakafisi ke fanongo ki he kakai ʻoku nau feinga ke takihalaʻi kitautolú ʻoku fakahaaʻi ai ʻoku tau loto ke lau kitautolu ʻi he kau muimui hangē ha sipi ʻo Sīsuú ʻa ia ʻoku nau “hola [mei he] . . . leʻo ʻo e kehe.” (Sione 10:5) Kae kehe, ko e hola ʻo hao ʻi he ʻaho ʻo e houhau ʻa e ʻOtuá, ʻoku fiemaʻu ki ai ʻa e meʻa lahi ange meiate kiate kitautolu ʻi he hola pē mei he ngaahi meʻa fakatupu maumaú. Kuo pau ke tau toe tuli ki he ngaahi ʻulungāanga ʻa ia ʻoku leleí. Ko e kupu hokó ʻe lāulea ai ki he fitu ʻo e ngaahi ʻulungāanga ko ení. ʻOku tau maʻu ʻa e ʻuhinga lelei ke toe sio lahi ange ai ki he meʻá ni, he ʻoku ʻomai ʻe Sīsū ʻa e talaʻofa fakafiefia ko ení: “ʻOku ou ʻatu [ki heʻeku fanga sipí] ʻa e moʻui taʻengata; pea ʻe ʻikai ʻaupito te nau ʻauha ʻo lauikuonga, pea ʻe ʻikai hamusi kinautolu ʻe ha taha mei hoku nima.”—Sione 10:27, 28.
[ʻE Fēfē Haʻo Tali?]
• Ko e hā ʻa e fakatokanga naʻe fai ʻe Sīsū ki he kau taki lotú?
• Ko e hā ʻa e tuʻunga fakatuʻutāmaki ʻoku fehangahangai mo e laui miliona he ʻaho ní?
• Ko e hā ʻa e ngaahi founga pulipulia ʻo e tauhi ʻaitolí kuo pau ke tau hola mei aí?
[Fehuʻi ki he Ako]
[Fakatātā ʻi he peesi 9]
Ko e hā ʻokú ke fakakaukau ki ai ʻi he taimi ʻokú ke fanongo ai ki he foʻi lea “hola”?