Maʻu ʻa e Fiefia ʻi Hoʻo Nofo Malí

“Ko e poto pe ʻoku langa ai ha fale; pea ko e fai fakapotopoto ʻa ia ʻoku tuʻumaʻu ai.”​—PAL. 24:3.

 1. Naʻe anga-fēfē hono fakahāhā ʻe he ʻOtuá ʻa e potó ʻi he fekauʻaki mo e ʻuluaki tangatá?

 KO ʻETAU Tamai fakahēvani potó ʻokú ne ʻafioʻi ʻa e meʻa ʻoku lelei kiate kitautolú. Ko e fakatātaá, naʻe ʻafioʻi ʻe he ʻOtuá ke lavaʻi ʻa ʻEne taumuʻá, naʻe “ʻikai lelei ki he tangata ke toko taha” pē ʻi he ngoue ko ʻĪtení. Ko ha konga tefito ʻo e taumuʻa ko iá ke maʻu fānau ʻa e kakai malí pea “fakafonu ʻa mamani.”​—Sen. 1:28; 2:18.

 2. Ko e hā ʻa e fokotuʻutuʻu naʻe fai ʻe Sihova ke lelei ki he faʻahinga ʻo e tangatá?

² Naʻe folofola ʻa Sihova: “Kau ngaohi maʻana ha tokoni ke ʻao mo ia” pe fakakakato ia. Naʻe ʻai leva ʻe he ʻOtuá ke mohe maʻu ʻa e ʻuluaki tangatá, pea naʻá Ne toʻo mei hono sino haohaoá ha hui vakavaka ʻo ne faʻuʻaki ia ha fefine. ʻI hono ʻomi ʻe Sihova ʻa e fefine haohaoa ko eni ko ʻIví kia ʻĀtamá, naʻe pehē ʻe he tangatá: “Ko e fai ko eni ko e hui mei hoto hui, mo e kakano mei hoto kakano: ʻe fakahingoa eni ko e Fefine, koeʻuhi naʻe toʻo ia mei he Tangata.” Naʻe hoko moʻoni ʻa ʻIvi ko ha fakakakato ʻo ʻĀtama. Te na taki taha fakahāhā ʻa e anga mo e ʻulungāanga makehe, neongo ia naʻá na fakatou haohaoa pea naʻe ngaohi kinaua ʻi he ʻīmisi ʻo e ʻOtuá. Naʻe fokotuʻutuʻu ai ʻe Sihova ʻa e ʻuluaki nofo malí. Naʻe tali lelei ʻe ʻĀtama mo ʻIvi ʻa e fokotuʻutuʻu fakaʻotua ko ení ʻa ia ʻe tokonaki fakatouʻosi mai ai ʻa e tokoni mo e poupou.​—Sen. 1:27; 2:21-23.

 3. ʻOku anga-fēfē ʻa e vakai ʻa e tokolahi ki he meʻaʻofa ko e nofo malí, ʻo taki atu ai ki he ngaahi fehuʻi ko e hā?

³ Ko e meʻa fakamamahí, he ʻoku mafola ʻi he māmaní he ʻahó ni ha laumālie angatuʻu. Ko e ngaahi palopalema ʻokú ne fakatupungá ʻoku ʻikai tupu ia mei he ʻOtuá. ʻOku taʻetokaʻi ʻe he tokolahi ʻa e meʻaʻofa ʻa e ʻOtuá ko e nofo malí, ʻo vakai ki ai kuo ʻosi hono taimí, ko ha tupuʻanga ia ʻo e  ongoʻi feifeitamaki pe taʻefeongoongoi. ʻI he lotolotonga ʻo e tokolahi ʻoku malí, ʻoku failahia ai ʻa e veté. ʻOku ʻikai nai fakahāhā ki he fānaú ʻa e ʻofa fakanatulá pea ngāueʻaki nai ai kinautolu ko ha mounu ʻi he fekīhiaki ʻa e ongo meʻa malí. ʻOku fakafisi ʻa e ngaahi mātuʻa tokolahi ke ʻulutukua, naʻa mo hono fai koeʻuhi ke ʻi ai ha melino mo ha fāʻūtahá. (2 Tim. 3:3) ʻE lava fēfē leva ke tauhi maʻu ʻa e fiefia ʻi he nofo malí ʻi he ngaahi taimi faingataʻa ko ení? Ko e hā e kaunga ʻa e ʻulutukuá ki hono talitekeʻi lavameʻa ha movete ʻi he nofo malí? Ko e hā ʻe lava ke tau ako mei he ngaahi faʻifaʻitakiʻanga ʻi onopooni ʻa e faʻahinga kuo nau tauhi maʻu ʻa e fiefia ʻi heʻenau nofo malí?

ʻUlutukua ki he Tataki ʻa Sihová

 4. (a) Ko e hā ʻa e tataki naʻe fai ʻe Paula fekauʻaki mo e nofo malí? (e) ʻOku anga-fēfē ʻa e muimui ʻa e kau Kalisitiane talangofuá ki he tataki ʻa Paulá?

⁴ Ko e ʻapositolo Kalisitiane ko Paulá naʻá ne fai ʻa e tataki fakamānavaʻi ki he kau uitoú ʻo pehē kapau ʻoku nau fili ke toe mali, ʻoku totonu ke nau fai ia “i he Eiki be.” (1 Kol. 7:39, PM) Naʻe ʻikai ko ha fakakaukau foʻou eni ki he kau Kalisitiane naʻe ʻi ai honau puipuituʻa faka-Siú. Ko e Lao ʻa e ʻOtuá ki ʻIsilelí naʻe fakahinohino mahino ai ke ʻoua te nau “femaliʻaki” mo ha taha pē mei he ngaahi puleʻanga pangani takatakaí. Naʻe tānaki mai ʻe Sihova ha fakamatala ʻoku fakamamafaʻi ai ʻa e fakatuʻutāmaki ʻo hono taʻetokaʻi ʻa e tuʻunga fakaʻotuá. “He [ko ha taha ʻikai ko ha ʻIsileli] te ne fakaafe ho foha mei he muimui kiate au ke nau tauhi ʻotua kehe: pea ʻe langaʻi ai ʻa e houhau ʻa Sihova kiate kimoutolu, ʻo ke ʻauha vave ai.” (Teu. 7:3, 4) Ko e hā ʻoku ʻamanekina ʻe Sihova ʻe fai ʻe heʻene kau sevāniti ʻi onopōní ʻi he fekauʻaki mo e meʻá ni? ʻOku hā mahino, ko ha sevāniti ʻa e ʻOtuá ʻoku totonu ke ne fili ko ha hoa mali ʻa e toko taha ʻa ia ʻoku “i he Eiki,” ko ha kaungālotu ʻosi fakatapui mo papitaiso. Ko e ʻulutukua ki he tataki ʻa Sihova fekauʻaki mo e fili ko ení ʻa e ʻalunga fakapotopotó.

 5. ʻOku anga-fēfē ʻa e vakai ʻa Sihova mo e kau Kalisitiane malí ki he fuakava malí?

⁵ Ko e fuakava malí ʻoku toputapu ia ʻi he vakai mai ʻa e ʻOtuá. ʻI he lave ki he ʻuluaki nofo malí, ko e ʻAlo tonu ʻo e ʻOtuá, ʻa Sīsū, naʻá ne pehē: “Ko e meʻa kuo fakahoko ʻe he ʻOtua, ke ʻoua naʻa fakamavae ʻe ha tangata.” (Mt. 19:6) ʻOku fakamanatu mai ʻe he tokotaha-tohi-sāmé ʻa e mafatukituki ʻo e fuakavá: “Atu ae fakafetai ki he Otua; mo ke fai hoo gaahi fuakava ki he Fugani Maoluga.” (Sāme 50:14, PM) Neongo ʻoku lava ke hokosia ʻe he ongo meʻa malí ʻa e fiefia lahi, ko e fuakava ʻoku fefaiʻaki ʻi he ʻaho malí ʻoku mafatukituki pea ʻoku haʻu ai mo e fatongia.​—Teu. 23:21.

 6. Ko e hā ʻoku lava ke tau ako mei he faʻifaʻitakiʻanga ʻa Sēfitá?

⁶ Fakakaukau angé ki he tuʻunga ʻo Sēfitá, ʻa ia naʻe ngāue ko e fakamaau ʻi ʻIsileli ʻi he senituli hono 12 K.M. Naʻá ne fai ʻa e fuakavá ni kia Sihova: “Kapau te ke tuku moʻoni ʻa haʻa Amoni ki hoku nima, pea ka pehe, pea ʻilonga ʻa ia ʻe fuofua haʻu mei he matapa ʻo hoku fale ke fakafetaulaki kiate au ʻi heʻeku foki tuʻumalie mai mei haʻa Amoni, ʻe ʻa Sihova ia; pea te u ʻatu ia ko e feilaulau-moifua.” ʻI heʻene sio atu ko hono ʻofefiné, ʻa hono ʻofefine pē ʻe tahá, naʻe hū mai ke fakafetaulaki kiate ia ʻi heʻene foki ki hono ʻapí ʻi Misipaá, naʻe feinga ʻa Sēfita ke fakafoki ʻa ʻene fuakavá? ʻIkai. Naʻá ne pehē: “Kuo u faʻai hoku pokoʻi ngutu ni ki he ʻOtua, pea ʻe ʻikai te u lava ke foki.” (Fkm. 11:30, 31, 35) Naʻe fai ʻa Sēfita ki heʻene palōmesi kia Sihová, neongo naʻe ʻuhinga ení heʻikai hano hako ke fakatolonga ai ʻa hono hingoá. Ko e fuakava ʻa Sēfitá naʻe kehe ia mei he fuakava malí, ka ko ʻene fai ki aí ʻoku hoko ia ko ha faʻifaʻitakiʻanga lelei ki he ngaahi husepāniti mo e uaifi Kalisitiané ʻi he fekauʻaki mo ʻenau fuakavá.

Ko e Hā ʻOkú Ne ʻAi ke Lavameʻa ha Nofo Mali?

 7. Ko e hā ʻa e ngaahi feʻunuʻaki ʻoku fiemaʻu ke fai ʻe he kau mali foʻoú?

⁷ ʻOku manatu ʻofa ʻa e ngaahi hoa mali lahi ki he taimi ʻo ʻenau faisoó. He meʻa fakafiefia moʻoni ko e hoko ʻo feʻilongaki mo honau hoa ki he kahaʻú! Ko e lahi ange ʻa e taimi ʻoku nau fakamoleki fakatahá, ko ʻenau hoko ia ʻo toe vāofi angé. Kae tatau ai pē pe ko ʻenau malí naʻe hoko hili ha vahaʻa taimi ʻo e faisoó pe naʻe ʻosi aleaʻi pē ia, ʻi he faifai pea nau hoko ko e husepāniti mo e uaifí, naʻe mātuʻaki mahuʻinga ʻa e ngaahi feʻunuʻakí. ʻOku fakahaaʻi ʻe ha husepāniti ʻe taha: “Ko e palopalema lahi naʻá ma maʻu he kamataʻanga ʻo ʻema nofo malí ko hono ʻiloʻi kuo ʻikai te ma kei tautau toko taha. Naʻá ma ʻiloʻi ʻi ha vahaʻa taimi naʻe faingataʻa ke tauhi ʻi hono tuʻunga totonú ʻa  homa vā mo e ngaahi kaumeʻá pea mo e ngaahi mēmipa ʻi he fāmilí.” Ko e husepāniti ʻe taha, kuó ne mali he taimí ni ʻi he taʻu ʻe 30, naʻá ne ʻiloʻi ki muʻa ke ne hoko ʻo mafamafatatau ʻi heʻene nofo malí, kuo pau ke ne “fakakaukau ki he toko ua.” Ki muʻa ke ne tali ha fakaafe pe fai ha tukupā, ʻokú ne alea mo hono uaifí pea toki fai ʻa e filí, ʻo fakakaukauʻi ʻa e meʻa ʻokú na fakatou mahuʻingaʻia aí. ʻI ha tuʻunga pehē, ʻoku tokoni ʻa e ʻulutukuá.​—Pal. 13:10.

8, 9. (a) Ko e hā ʻoku mahuʻinga ai ʻa e fetuʻutaki leleí? (e) ʻI he ngaahi tafaʻaki fē ʻe tokoni ai ʻa e ngaofengofuá, pea ko e hā hono ʻuhingá?

⁸ ʻI he taimi ʻe niʻihi ʻoku fakatahaʻi ai ʻe he nofo malí ʻa e ongo meʻa ʻe toko ua mei he puipuituʻa fakafonua kehekehe. ʻOku tautefito heni ʻa e fiemaʻu ke fetuʻutaki hangatonú. ʻOku kehekehe ʻa e ngaahi founga ʻo e fetuʻutakí. Ko hono siofi ʻa e anga ʻo e talanoa ʻa ho hoa malí mo e kāingá ʻe lava ke ne tokoniʻi koe ke ke mahinoʻi lelei ange ai ho hoá. ʻI he taimi ʻe niʻihi, ʻoku ʻikai ko e meʻa ʻoku leaʻakí ka ko e anga hono leaʻakí ʻoku fakahaaʻi ai ʻa e fakakaukau ʻa e tokotahá. Pea ʻe ako nai ʻa e meʻa lahi mei he meʻa ʻoku ʻikai ke leaʻakí. (Pal. 16:24; Kol. 4:6) Ke maʻu ʻa e fiefiá ʻoku mātuʻaki mahuʻinga ʻa e ʻiloʻiló.​—Lau ʻa e Palovepi 24:3.

⁹ ʻI he fekauʻaki mo hono fili ʻa e ngaahi meʻa fakaemanakó mo e fakafiefiá, kuo ʻiloʻi ʻe he tokolahi ʻoku mahuʻinga ke ngaofengofua. Ki muʻa ʻi he malí naʻe fakamoleki nai ai ʻe ho hoá ʻa e taimi ʻi he ngaahi sipotí pe ko e ngaahi fakafiefia kehe. ʻE feʻungamālie nai he taimí ni ke fai ha feʻunuʻaki? (1 Tim. 4:8) ʻOku lava ke ʻeke ʻa e meʻa tatau fekauʻaki mo e taimi ʻoku fakamoleki ʻi he feohi mo e ngaahi kāingá. ʻOku mahinongofua ʻa e fiemaʻu ki ha ongo meʻa mali ʻa e taimi koeʻuhi ke lava ai ʻo na kau fakataha ki he meʻa fakalaumālié mo e ngaahi ngāue kehé.​—Mt. 6:33.

10. ʻE anga-fēfē ʻa e tokoni ʻa e ʻulutukuá ki he ngaahi vahaʻangatae lelei ʻi he vahaʻa ʻo e ngaahi mātuʻá mo e fānau kuo malí?

¹⁰ ʻI he mali ha tangata, ʻokú ne tukuange ai ʻene tamaí mo ʻene faʻeé, pea ʻoku lava ke leaʻaki ʻa e meʻa tatau fekauʻaki mo e fefiné. (Lau ʻa e Senesi 2:24.) Ka neongo ia, ko e tataki fakaʻotua ke fakaʻapaʻapa ki heʻete tamaí mo e faʻeé ʻoku ʻikai fakangatangata ia. Ko ia naʻa mo e hili ʻa e mali ʻa ha ongo meʻa, ʻoku ngalingali te na fakamoleki ha taimi mo ʻena ongo mātuʻá mo e kāinga ʻi he fonó. Ko e husepāniti ʻe taha, kuó ne mali ʻi he taʻu ʻe 25, ʻokú ne pehē: “ʻI he taimi ʻe niʻihi, ʻoku  faingataʻa ke ʻai ke mafamafatatau ai ʻa e ngaahi fakaʻamu mo e fiemaʻu kehekehe ʻa hoto hoá, ko e fiemaʻu ʻa ʻete ongo mātuʻá, fanga tokouá mo e tuofāfine pea mo e kāinga ʻi he fonó. ʻI hono fili ʻa e founga lelei taha ke fai ki he tuʻunga ko iá, kuó u ʻilo ʻoku tokoni lahi ʻa e Senesi 2:24. ʻOkú te moʻuaʻaki ʻa e mateaki mo e ngaahi fatongia ke fai ki he ngaahi mēmipa kehe ʻi he fāmilí, neongo ia ko e veesi ko ení naʻá ne fakahaaʻi mai kiate au ko e mateaki ki hoku hoá ʻoku muʻomuʻá.” Fakatatau ki ai, ko e ngaahi mātuʻa Kalisitiane ʻoku nau ʻulutukuá te nau tokaʻi ʻa e hoko ʻenau fānau kuo malí he taimi ko ení ʻo ʻi ha faʻunga fakafāmili ʻa ia ʻoku fakafatongia tefito ʻaki ai ʻa e husepānití ki hono tataki ʻo e fāmili ko iá.

11, 12. Ko e hā ʻoku mahuʻinga ai ʻa e ako fakafāmilí mo e lotú ki he ngaahi hoa malí?

¹¹ ʻOku fiemaʻu ha founga lelei tuʻumaʻu ʻo e ako fakafāmilí. Ko e hokosia ʻa e ngaahi fāmili Kalisitiane tokolahi ʻoku fakapapauʻi ai ʻa e moʻoniʻi meʻa ko iá. Heʻikai nai faingofua ke fokotuʻu ha ako pehē pe tauhi maʻu ia ʻi he faai atu ʻa e taimí. ʻOku fakahaaʻi ʻe ha ʻuluʻi fāmili ʻe taha: “Kapau ʻe lava ke ma foki ʻo liliu ha meʻa, te ma foki ke fakapapauʻi naʻá ma pipiki ki ha founga lelei tuʻumaʻu ʻo e ako fakafāmilí ʻi he kamata pē ʻo ʻema nofo malí.” ʻOkú ne toe pehē: “Ko ha meʻaʻofa fisifisimuʻa moʻoni ke sio ki he fiefia ʻoku fakahāhā ʻe hoku uaifí ʻi hono ueʻi ʻe ha foʻi moʻoni mahuʻinga fakalaumālie ʻokú ma maʻu ʻi heʻema akó.”

¹² Ko e lotu fakatahá ko ha toe tokoni ia ʻe taha. (Loma 12:12) ʻI he taimi ʻoku fāʻūtaha ai ʻa e husepānití mo e uaifí ʻi he lotu kia Sihová, ko hona vahaʻangatae vāofi mo e ʻOtuá ʻoku lava ke ne ʻai ke mālohi ʻa e haʻi ʻo ʻena nofo malí. (Sem. 4:8) ʻOku fakamatala ha husepāniti Kalisitiane ʻe taha: “Ko e kole fakamolemole vave ʻi he ngaahi fehālaakí pea lave ki he ngaahi hala ko iá ʻi he lotu fakatahá ko ha founga ia ʻo hono fakahāhā ʻa e mamahi moʻoni ʻi ha kiʻi meʻa siʻisiʻi ʻokú ne fakatupunga ha loto-mamahi.”​—Ef. 6:18.

ʻUlutukua ʻi he Nofo Malí

13. Ko e hā ʻa e akonaki naʻe fai ʻe Paula ki he ngaahi vahaʻangatae fekoekoeʻi ʻi he nofo malí?

¹³ Ko e kau Kalisitiane kuo malí ʻoku fiemaʻu ke nau fakaʻehiʻehi mei he ngaahi tōʻonga ʻokú ne tuku hifo ʻa e ngaahi vahaʻangatae ʻi he nofo malí, hangē ko ia ʻoku hoko lahi ʻi he māmani havala ki he fehokotaki fakasino ʻi he ʻaho ní. ʻI he kaveinga ko ení, naʻe akonaki ʻa Paula: “Ke fai ange ʻe he husepaniti ki hono uaifi ʻa e toʻonga totonu; pea pehe foki ʻa e uaifi ki hono husepaniti. ʻOku ʻikai ʻa e uaifi ke faʻiteliha ki hono sino oʻona, ka ko hono husepaniti pe: pehe foki, ʻoku ʻikai ʻa e husepaniti ke faʻiteliha ki hono sino oʻona, ka ko hono uaifi.” Naʻe hoko atu leva ʻa Paula ʻo ʻomai ʻa e fakahinohino mahino ko ení: “ʻOua te mo mavae; ngata pe nai ʻi haʻamo loto taha ke fai, ʻo fuoloa siʻi pe.” Ko e hā hono ʻuhingá? “Koeʻuhi ke mou ʻataʻatā ke fai ha lotu: pea mo toe fakataha, telia naʻa ʻahiʻahi kimoutolu ʻe Setane ʻi hoʻomou taʻefaʻakataki.” (1 Kol. 7:3-5) ʻI he lave ki he lotú, ʻoku fakahaaʻi ai ʻe Paula ʻa e ngaahi meʻa muʻomuʻa ki ha Kalisitiane. Ka naʻá ne toe ʻai ke mahino ko e Kalisitiane taki taha kuo malí ʻoku totonu ke ne ongongofua ki he ngaahi fiemaʻu fakaesino mo fakaeongo ʻa hono hoá.

14. ʻOku anga-fēfē ʻa e ngāueʻaki ʻo e ngaahi tefitoʻi moʻoni Fakatohitapú ʻi he fekauʻaki mo e ngaahi vahaʻangatae fekoekoeʻi ʻi he nofo malí?

 ¹⁴ ʻOku fiemaʻu ʻa e husepānití mo e uaifí ke na fefaitotonuʻaki pea ke na ʻiloʻi ko ha taʻetokanga ki hoto hoá ʻi he ngaahi vahaʻangatae fekoekoeʻí ʻoku lava ke iku ia ki he ngaahi palopalema. (Lau ʻa e Filipai 2:3, 4; fakafehoanaki mo e Mātiu 7:12.) Kuo fakamoʻoniʻi eni ʻi he ngaahi fāmili māvahevahe fakalotu ʻe niʻihi. Neongo kapau ʻoku hoko ha ngaahi faikehekehe, ʻoku faʻa lava ke fakaleleiʻi ʻe he Kalisitiané ʻa e ngaahi meʻá ʻi he ʻulungāanga lelei, anga-ʻofa mo e fāitaha. (Lau ʻa e 1 Pita 3:1, 2.) Ko e ʻofa kia Sihova pea ki hoto hoá, fakataha mo ha laumālie ʻulutukuá, ʻe tokoni ia ʻi he tafaʻaki ko eni ʻo e nofo malí.

15. Ko e hā ʻoku fakahoko ʻe he ʻapasiá ʻi ha nofo mali fiefia?

¹⁵ ʻI he ngaahi tafaʻaki kehé foki, ko e husepāniti anga-leleí te ne fakaʻapaʻapa ki hono uaifí. Ko e fakatātaá, te ne fakakaukauʻi ʻa ʻene ngaahi ongoʻí, naʻa mo e ʻi he fanga kiʻi meʻa īkí. Ko e husepāniti ʻe taha ʻi he taʻu ʻe 47 ʻokú ne fakahaaʻi: “ʻOku ou kei ako pē ʻi he fekauʻaki mo e meʻá ni.” ʻOku naʻinaʻi ki he ngaahi uaifi Kalisitiané ke nau ʻapasia loloto ki honau ngaahi husepānití. (Ef. 5:33) Ko e lea fakaanga fekauʻaki mo honau husepānití, ʻo fakahanga ʻa e tokangá ki heʻenau ngaahi fehālaakí ʻi he ʻao ʻo e niʻihi kehé, ʻoku ʻikai fakahaaʻi ai ha ʻapasia. ʻOku fakamanatu mai ʻe he Palovepi 14:1 (PM): “Oku laga hake hono fale e he fefine kotoabe oku boto: ka oku holoki hifo ia e he vale aki hono nima.”

ʻOua ʻe ʻUlutukua ki he Tēvoló

16. ʻE lava fēfē ke ngāueʻaki ʻe he ngaahi hoa malí ʻa e Efeso 4:26, 27 ʻi heʻenau nofo malí?

¹⁶ “ʻIta pe, kae ʻoua ʻe angahala ai: ʻoua ʻe tuku ke to ʻa e laʻa ʻoku mou kei mamahi; kaeʻumaʻā, ʻoua naʻa tuku ha ava ki he Tevolo.” (Ef. 4:26, 27) ʻI hono ngāueʻakí, ko e ngaahi leá ni ʻe lava ke ne tokoniʻi kitautolu ke tau fakaleleiʻi ai pe fakaʻehiʻehi mei he taʻefeongoongoi ʻi he nofo malí. “ʻOku ʻikai te u manatuʻi kuo faifai angé pea ʻikai te ma talanoa mo hoku husepānití ki ha taʻefelotoi ʻo tatau ai pē kapau naʻe ʻuhinga iá ʻe fakamoleki ha ngaahi houa ʻi hono fakaleleiʻi ʻa e meʻá,” ko e manatu ia ʻa ha tuofefine ʻe taha. ʻI he kamata ʻo ʻena nofo malí, ko ia mo hono husepānití naʻá na fakapapauʻi heʻikai ʻosi ʻa e ʻaho ko iá ʻoku teʻeki solova ʻena ngaahi faikehekehé. “Naʻá ma fakapapauʻi, tatau ai pē pe ko e hā ʻa e palopalemá, ke fakamolemoleʻi pea fakangaloʻi ʻo kamata foʻou ʻa e ʻaho taki taha.” Ko ia naʻá na fakafisi ai ke “tuku ha ava ki he Tevolo.”

17. Naʻa mo e taimi ʻoku ʻikai hā ngali hoamālie ai ʻa e ngaahi hoa malí, ko e hā nai ʻe tokoní?

¹⁷ Kae fēfē kapau ʻokú ke ongoʻi kuó ke mali mo ha taha ʻoku ʻikai te ke hoamālie mo ia? ʻOku ʻikai nai te ke ʻi ha vahaʻangatae ʻoku hā ngali ʻi ai ʻa e feʻofaʻakí ʻo hangē ko ia ʻoku maʻu ʻe he niʻihi kehé. Neongo ia, ko hoʻo manatuʻi ʻa e vakai ʻa e Tokotaha-Fakatupú ki he haʻi ʻo e nofo malí ʻe tokoni ia kiate koe. ʻI hono fakamānavaʻí, naʻe akonaki ʻa Paula ki he kau Kalisitiané: “Ke lauʻi lelei ʻa e mali ʻe he kakai kotoa pe; pea ke taʻeʻuliʻi ʻa e mohenga: he ko e kau feʻauaki, mo e tonoʻunoho ʻe fakamāu kinautolu ʻe he ʻOtua.” (Hep. 13:4) Pea ke ʻoua foki naʻa ngalo ʻa e ngaahi lea: “Ko e afo tuʻo tolu ʻe ʻikai motu vave.” (Koh. 4:12) ʻI he taimi ʻoku tokanga lahi fakatouʻosi ai ʻa e husepānití mo e uaifí ki hono fakamāʻoniʻoniʻi ʻa e huafa ʻo Sihová, ʻokú na vāofi ai pea na vāofi ai mo e ʻOtuá. ʻOku totonu ke na ngāue ki hono ʻai ke lavameʻa ʻena nofo malí, ʻi hono ʻiloʻi ʻe tapua lelei atu heni ʻa Sihova, ko e Tupuʻanga ʻo e nofo malí.​—1 Pita 3:11.

18. Ko e hā ʻe lava ke ke fakapapauʻi fekauʻaki mo e nofo malí?

¹⁸ ʻOku malava moʻoni ke maʻu ʻe he kau Kalisitiané ʻa e fiefia ʻi he nofo malí. Ke maʻu iá ʻoku fiemaʻu ki ai ʻa e feinga mo hono fakahāhā ʻo e ngaahi ʻulungāanga faka-Kalisitiané, ʻa ia ko e taha ai ko e ʻulutukua. ʻI he ʻahó ni, ʻi he ngaahi fakatahaʻanga ʻa e Kau Fakamoʻoni ʻa Sihova takatakai ʻi he kolopé, ʻoku ʻi ai ʻa e ngaahi hoa mali taʻefaʻalaua ʻoku nau fakamoʻoniʻi ʻe lava ke fai eni.

ʻE Fēfē Haʻo Tali?

• Ko e hā ʻoku malava ai ke maʻu ʻa e fiefia ʻi he nofo malí?

• Ko e hā ʻoku lava ke ne tokoniʻi ke lavameʻa ha nofo mali?

• Ko e hā ʻa e ngaahi ʻulungāanga ʻoku fiemaʻu ke fakatupulekina ʻe he ngaahi hoa malí?

[Fehuʻi ki he Ako]

[Fakatātā ʻi he peesi 9]

Ko e ngaahi hoa malí ʻoku nau fetuʻutaki fakapotopoto ki muʻa ke tali ha fakaafe pe fai ha alea

[Fakatātā ʻi he peesi 10]

Feinga ke fakaleleiʻi ʻa e ngaahi taʻefelotoí ʻi he ʻaho tatau, ʻo ʻoua ʻe ‘tuku ha ava ki he Tevoló’