Ko Hono Fakaeʻa ʻa e Fili ʻo Kalaisí

TE KE maluʻi fēfē koe kapau naʻá ne ʻiloʻi ʻoku mafolalahia ha mahaki fakatupu mate ʻi ho feituʻú? ʻOku ngalingali te ke ʻai ke mālohi ho sisitemi maluʻí pea fakamamaʻo mei he kakai kuo maʻu ʻe he mahakí. Kuo pau ke tau fai ʻa e meʻa tatau ʻi ha ʻuhinga fakalaumālie. ʻOku tala mai ʻe he Tohi Tapú ko e fili ʻo Kalaisí “kuo ʻi mamani.” (1 Sione 4:3) Kapau ʻoku tau loto ke hao mei he “pihiá,” kuo pau ke tau ʻiloʻi ʻa e “faʻahinga ʻoku nau fetuku holo e mahakí” pea fakaʻehiʻehi meia kinautolu. Ko e meʻa ke fakamālōʻiaʻí, ʻoku ʻomai ʻe he Tohi Tapú ʻa e fakamaama lahi ki he kaveingá.

Ko e “Fili o Kalaisi” ʻoku ʻuhingá ko e “fakafepaki (pe ʻikai ʻo) Kalaisi.” Ko ia ʻi he ʻuhinga mata lahi tahá, ʻoku ʻuhinga ʻa e foʻi leá ki he faʻahinga kotoa ʻoku nau fakafepakiʻi pe taukaveʻi loi ko Kalaisi kinautolu pe ko ʻene kau fakafofonga. Naʻe pehē ʻe Sīsū tonu: “Ko ia ʻoku ʻikai kau mo au ʻoku ne tuʻu kiate au [pe ko e fili ʻo Kalaisi]: pea ko ia ʻoku ʻikai te ne kau mo au ʻi he fakatahataha ʻoku ne fakamovetevete.”—Luke 11:23.

Ko e moʻoni, naʻe tohi ʻa Sione fekauʻaki mo e fili ʻo Kalaisí laka hake he taʻu ʻe 60 mei he pekia ʻa Sīsuú pea fokotuʻu hake ia ki hēvaní. Ko ia ai, ko e ngaahi ngāue ʻa e fili ʻo Kalaisí kuo pau ke mahinoʻi ia ʻi he founga ʻo ʻene uesia ʻa e kau muimui mateaki ʻo Sīsū ʻi he māmaní.​—Mātiu 25:​40, 45.

Ko e Fili ʻo Kalaisí ʻOku Fakafepaki ki he Kalisitiané

Naʻe fakatokanga ʻa Sīsū ki hono kau muimuí ko e māmaní fakalūkufua ʻe fehiʻa kia kinautolu. Naʻá ne pehē: “Ko e taimi ko ia te nau tukuange kimoutolu ki he fakamamahi, pea te nau tamateʻi kimoutolu: pea te mou fehiʻanekina ʻe he ngāhi kakai kehekehe, ko e meʻa ʻi he hingoa oʻoku. Pea ʻe tokolahi ha kau palofita loi ʻe tupu hake, pea te nau taki hē ha tokolahi.”—Mātiu 24:​9, 11.

Koeʻuhi ʻoku fakatangaʻi ʻa e kau ākonga ʻa Sīsuú ‘ko e meʻa ʻi hono hingoá,’ ko e kau fakatangá ʻoku hā mahino ko e fili kinautolu ʻo Kalaisi, ko e kau fakafepaki kia Kalaisi. Ko e “kau palofita loi,” ʻa ia ko e niʻihi ai naʻa nau hoko ko e  kau Kalisitiane ki muʻa, ʻoku nau ʻi he tuʻunga foki ko iá. (2 Sione 7) Ko e “gaahi fili toko lahi o Kalaisi” ko ení, ko e tohi ia ʻa Sioné, “naa nau alu atu meiate kitautolu, ka nae ikai ke nau o tautolu; he ka ne o tautolu akinautolu, behe, kuo nau nofo mau mo kitautolu.”—1 Sione 2:​18, 19, PM.

Ko e ngaahi lea fakatouʻosi ʻa Sīsū mo Sioné ʻoku fakahaaʻi mahino ai ko e fili ʻo Kalaisí ʻoku ʻikai ko ha foʻi tokotaha ka ʻoku faʻuʻaki ia ʻa e ngaahi fili tāutaha tokolahi ʻo Kalaisi. ʻIkai ngata aí, koeʻuhi ko e kau palōfita loi kinautolu, ko e taha ʻo ʻenau ngaahi taumuʻa tefitó ko e kākā fakalotú. Ko e hā ʻa e niʻihi ʻo ʻenau ngaahi foungá?

Ko Hono Fakamafola ʻa e Ngaahi Loi Fakalotu

Naʻe fakatokanga ʻa e ʻapositolo ko Paulá ki hono kaungāngāue ko Tīmoté ke ne tokanga fekauʻaki mo e ngaahi akonaki ʻa e kau tafoki mei he moʻoní, hangē ko ʻAimīnia mo Failitó, ʻa ia ko ʻena “lea te ne keina ʻo hange ha kainiloto.” Naʻe tānaki mai ʻe Paula: “Ko e ongo meʻa ne leʻeia mei he moʻoni, heʻena pehe, ko e meʻa ki he toetuʻu kuo hoko ia: pea ʻoku nau fakahinga ai ʻa e lotu [pe tui] ʻa e niʻihi.” (2 Timote 2:​16-18) ʻOku ngalingali, naʻe akoʻi ʻe ʻAimīnia mo Failito ko e toetuʻú ko ha toetuʻu fakaefakatātā pea ko e kau Kalisitiané kuo ʻosi fokotuʻu hake kinautolu ʻi ha ʻuhinga fakalaumālie. Ko e moʻoni, ko e hoko ko ha ākonga moʻoni ʻa Sīsuú ʻokú te moʻui ai ʻi he tuʻunga ʻa e ʻOtuá, ʻa ia naʻe fakahaaʻi mahino ʻe Paula. (Efeso 2:​1-5) Kae kehe, ko e akonaki ʻa ʻAimīnia mo Failitó naʻe liʻaki ai ʻa e talaʻofa ʻa Sīsū fekauʻaki mo ha toetuʻu moʻoni ʻa e kau maté ʻi he malumalu ʻo e pule ʻa e Puleʻanga ʻo e ʻOtuá.​—Sione 5:​28, 29.

Ko e ngaahi fakakaukau fekauʻaki mo ha toetuʻu fakaefakatātā ʻataʻataá naʻe fakatupulekina ia ki mui ʻe ha kulupu naʻe ui ko e kau Nositiká. ʻI he tui ko e ʻiló (gnoʹsis ʻi he faka-Kalisí) ʻe lava ke maʻu ʻi ha founga fakamisitelí, naʻe fakatahaʻi ai ʻe he kau Nositiká ʻa e lotu faka-Kalisitiane tafoki mei he moʻoní mo e filōsofia faka-Kalisí pea mo e tui fakamisiteli ʻi he Hahaké. Hangē ko ení, naʻa nau tui ko e meʻa fakaekakano kotoa pē ʻoku kovi, pea ʻi he ʻuhinga ko iá, naʻe ʻikai ke haʻu ʻa Sīsū ia ʻi he kakanó ka naʻe hā ngali pē naʻá ne maʻu ha sino  fakaetangata. Hangē ko ia kuo tau vakai ki aí, ko e meʻa tofu pē eni naʻe fakatokanga fekauʻaki mo ia ʻa e ʻapositolo ko Sioné.​—1 Sione 4:​2, 3; 2 Sione 7.

Ko e toe foʻi loi ʻe taha naʻe faʻu ʻi ha ngaahi senituli ki mui ai, ko e tokāteline ko ia ʻoku taku ko e Tolu-Tahaʻi-ʻOtua māʻoniʻoní, ʻa ia ʻoku taukaveʻi ai ko Sīsuú ko e ʻOtua Māfimafi-Aoniu pea ko e ʻAlo ia ʻo e ʻOtuá. ʻI heʻene tohi ko e Church of the First Three Centuries, ʻoku pehē ai ʻe Dr. Alvan Lamson ko e tokāteline Tolu-Tahaʻi-ʻOtuá “naʻe tupu ia ʻi ha matavai kehe ʻaupito mei he ngaahi Tohi Tapu faka-Siú mo faka-Kalisitiané; naʻe tupu hake ia, ʻo tānaki atu ki he lotu faka-Kalisitiané, fakafou ʻi he ngaahi Tamai faka-Palató.” Ko hai ʻa e ngaahi “Tamai faka-Palato” ko ení? Ko e kau faifekau tafoki mei he moʻoní kinautolu ʻa ia naʻa nau toʻoa ʻi he ngaahi akonaki ʻa e filōsefa pangani Kalisi ko Palató.

Ko e tānaki mai ʻo e Tolu-Tahaʻi-ʻOtuá ko ha ngaʻunu pōtoʻi ia ʻa e fili ʻo Kalaisí, he ko e tokāteliné ni naʻá ne ʻai ʻa e ʻOtuá ke hā ngali misiteli pea fakaʻuliʻulilātaiʻi ʻa hono vahaʻangatae mo e ʻAló. (Sione 14:28; 15:10; Kolose 1:​15) Fakakaukau atu pē, ʻe lava fēfē ke “ʻunuʻunu atu ki he ʻOtua” ha taha, hangē ko ia ʻoku fakaʻaiʻai ʻe he Tohi Tapú, kapau ko e ʻOtuá ko ha misiteli?—Semisi 4:8.

Tānaki atu ki he puputuʻú, kuo toʻo ʻe he kau liliu Tohi Tapu lahi ʻa e huafa ʻo e ʻOtuá, ʻa e Sihová, mei heʻenau ngaahi liliú, neongo ʻoku ʻasi ʻo laka hake he tuʻo 7,000 ʻi he muʻaki konga tohí! ʻOku hā mahino, ko e feinga ke liliu ʻa e Māfimafi-Aoniú ʻo ʻikai ki ha misiteli pē ka ki ha misiteli taʻehingoá ko ha ngāue taʻefakaʻapaʻapa fakaʻaufuli ia ki hotau Tokotaha-Fakatupú mo ʻene Folofola fakamānavaʻí. (Fakahā 22:​18, 19) ʻIkai ko ia pē, ko hono fetongi ʻa e huafa fakaʻotuá ʻaki ʻa e ongo hingoa fakalakanga hangē ko e ʻEiki mo e ʻOtuá ko hano maumauʻi ia ʻo e sīpinga lotu ʻa Sīsuú, ʻa ia ʻoku pehē ʻe hono konga: “Ke tapuhā [pe ʻai ke māʻoniʻoni] ho Huafa.”—Mātiu 6:9.

Talitekeʻi ʻe he Ngaahi Fili ʻo Kalaisí ʻa e Puleʻanga ʻo e ʻOtuá

Kuo hoko ʻa e ngaahi fili ʻo Kalaisí ʻo longomoʻui tautefito ʻi he lolotonga ʻa e “kuonga fakamui,” ʻa e taimi ʻoku tau lolotonga moʻui aí. (2 Timote 3:1) Ko ha taumuʻa tefito ʻa e kau kākā ko eni ʻi onopōní ke takihalaʻi ʻa e kakaí ʻi he fekauʻaki mo e ngafa ʻo Sīsū ko e Tuʻi ʻo e Puleʻanga ʻo e ʻOtuá, ko ha founga-pule fakahēvani ʻa ia kuo vavé ni ke pule mai ki he māmaní kotoa.​—Taniela 7:​13, 14; Fakahā 11:15.

Ko e fakatātaá, ʻoku malanga ʻa e kau taki lotu ʻe niʻihi ʻo pehē ko e Puleʻanga ʻo e ʻOtuá ko ha tuʻunga ia ʻi he loto ʻo e tangatá, ko ha fakakaukau ʻoku ʻikai hano makatuʻunga Fakatohitapu. (Taniela 2:​44) ʻOku taukaveʻi ʻe he niʻihi kehe ʻoku ngāue ʻa Kalaisi fakafou ʻi he ngaahi puleʻanga mo e ngaahi kautaha fakaetangata. Neongo ia, naʻe pehē ʻe Sīsū: “Ko hoku puleʻanga ʻoku ʻikai ʻo e maama ko eni.” (Fakaʻītali ʻamautolu; Sione 18:36) Ko e moʻoni, ko Sētane, ʻo ʻikai ko Kalaisi, ʻa e “eiki ʻo māmani” mo e “ʻotua ʻo e tuʻu ko eni.” (Sione 14:30; 2 Kolinito 4:4) ʻOku fakamatalaʻi ʻe he meʻá ni ʻa e ʻuhinga kuo vavé ni ai ke fakangata ʻosi ʻe Sīsū ʻa e ngaahi puleʻanga fakaetangatá kotoa peá ne hoko ko e Pule pē ʻe toko taha ki he māmaní. (Sāme 2:​2, 6-9; Fakahā 19:​11-​21) ʻOku lotu ʻa e kakaí ke hoko ʻa e meʻá ni ʻi he taimi ʻoku nau laulau ai ʻa e Lotu ʻa e ʻEikí, ʻo pehē: “Ke hoko mai ho Puleʻangá. Ke fai ho finangaló ʻi māmani.”—Mātiu 6:​10, Kōsipeli ʻe Fā.

Koeʻuhi ʻoku nau poupouʻi ʻa e ngaahi fokotuʻutuʻu fakapolitikale ʻa e māmaní, kuo fakafepakiʻi ʻe he kau taki lotu tokolahi, naʻa mo hono fakatangaʻi, ʻa e faʻahinga ʻoku nau fanongonongo ʻa e moʻoni fekauʻaki mo e Puleʻanga ʻo e ʻOtuá. Ko e meʻa fakatupu tokangá, ʻoku lave ʻa e tohi Fakahaá ki ha paʻumutu fakaefakatātā—“ko Babilone koe Lahi”—ʻa ia ʻoku “kona . . . i he toto oe kakai maonioni, moe toto oe kakai nae mate koeuhi ko Jisu.” (Fakahā 17:​4-6, PM) ʻOkú ne toe fai ʻa e paʻumutu fakalaumālie ʻi heʻene poupou ki he “ngaahi tuʻi” ʻo e māmaní, pe ko e kau pule fakapolitikalé, ke maʻu mei ai ha lelei. Ko e fefine fakaefakatātā ko ení ʻoku ʻikai ko ha toe taha ka ko e ngaahi lotu loi ʻo e māmaní. Ko ha konga lahi ia ʻo e fili ʻo Kalaisí.—Fakahā 18:​2, 3; Semisi 4:4.

Ko e Fili ʻo Kalaisí ʻOkú Ne ‘Fakaveli ʻa e Telingá’

Tuku kehe ʻa hono talitekeʻi ʻa e moʻoni Fakatohitapú, ko e kau Kalisitiane lau pē tokolahi kuo nau siʻaki ʻa e ngaahi tuʻunga Fakatohitapu ʻo e ʻulungāangá ʻi heʻenau leleiʻia ange he tuʻunga fakaeʻulungāanga manakoá. Naʻe tomuʻa tala ʻe hoko ʻa e meʻá ni ʻe he Folofola ʻa e ʻOtuá, ʻo pehē: “Koeʻuhi ʻe faifai pea hoko ha kuonga, ʻa ia ʻe ʻikai te nau [kakai ʻoku taku ʻoku nau tauhi ki he ʻOtuá] kātaki ai ʻa e tokateline haohaoa; ka te nau fokotuʻuniu  hanau kau akonaki, ʻo fakatatau ki he ngaahi holi ʻanautolu, he [fakaveli] honau telinga.” (2 Timote 4:3) Ko e kau kākā fakalotu ko ení ʻoku toe fakamatalaʻi ko e “kau abosetolo loi akinautolu, koe kau gaue fakakākā, oku nau fakakehe akinautolu ke hage koe kau abosetolo a Kalaisi.” ʻOku hoko atu ʻa e Tohi Tapú ʻo pehē: “Koe gataaga okinautolu e fakatatau ki he e nau gaahi gaue.”—2 Kolinito 11:​13-15, PM.

ʻOku kau ʻi heʻenau ngaahi ngāué ʻa e “ngaue fakalielia,” ʻa ia ko ha taʻetokanga mālohi ki he ngaahi tefitoʻi moʻoni fakaeʻulungāanga māʻolungá. (2 Pita 2:​1-3, 12-14) ʻIkai ʻoku tau sio ki he tokolahi fakautuutu ʻa e kau taki lotu mo honau kau muimui ʻoku nau ngāueʻaki—pe fakamolemoleʻi ʻi ha tuʻunga—ʻa e ngaahi tōʻonga taʻefakakalisitiané, hangē ko e faka-Sōtomá mo e fehokotaki fakasino ʻi tuʻa mei he nofo malí? Kātaki ʻo vaheʻi ha mōmeniti ke fakahoa ai ʻa e ngaahi fakakaukau mo e tōʻonga talilahia ko ení mo e meʻa ʻoku fakahaaʻi ʻe he Tohi Tapú ʻi he Livitiko 18:22; Loma 1:​26, 27; 1 Kolinito 6:​9, 10; Hepelu 13:4; mo e Siutasi 7.

“Sivi Pe ʻa e Ngaahi Laumalie”

ʻI he vakai ki he meʻa naʻe lave ki ai ki muʻá, ʻoku totonu ke tau tokanga ki he ngaahi lea ʻa e ʻapositolo ko Sioné ke ʻoua ʻe ʻainoaʻiaʻi pe fakamaʻamaʻaʻi ʻetau ngaahi tui fakalotú. “ʻOua te mou tui ki he laumalie fulipe,” ko ʻene fakatokangá ia, “ka mou sivi pe ʻa e ngaahi laumalie, pe ʻoku mei he ʻOtua ia: he ʻoku tokolahi ʻa e kau palofita loi kuo ʻalu atu ki mamani.”—1 Sione 4:1.

Fakakaukau ki he faʻifaʻitakiʻanga lelei ʻa e kakai “anga fakaʻeiʻeiki” ʻe niʻihi ʻa ia naʻa nau nofo ʻi he kolo ko Pēleá ʻi he ʻuluaki senitulí. Naʻa nau “tali loto lelei ʻaupito ʻa e folofola, ʻo nau kumi ʻi he Tohitapu ʻi he ʻaho kotoa pe ʻa e moʻoni ʻo e ngaahi meʻa ko ia [naʻe leaʻaki ʻe Paula mo Sailosí].” (Ngāue 17:​10, 11) ʻIo, lolotonga ʻenau vēkeveke ke akó, naʻe fakapapauʻi ʻe he kau Pēleá ko e meʻa naʻa nau fanongo ai mo nau talí naʻe faiaka fefeka ʻi he Tohi Tapú.

ʻI he ʻahó ni foki, ʻoku ʻikai ke tākiekina ʻa e kau Kalisitiane moʻoní ʻe he ngaahi fetōʻaki ʻi he ngaahi fakakaukau manakoá ka ʻoku nau pipiki mālohi ki he moʻoni ʻo e Tohi Tapú. Naʻe tohi ʻe he ʻapositolo ko Paulá: “Ko ʻeku lotu ʻeni; ke to e tupulekina ʻo lahi hake ʻaupito hoʻomou ʻofa, heʻene maʻu ʻa e ʻilo kanokano mo e ongoʻi ʻo e totonu [pe ʻiloʻilo] ʻi he meʻa kotoa pe.”—Fakaʻītali ʻamautolu; Filipai 1:9.

Kapau kuo teʻeki ke ke fai pehē, ʻai ko hoʻo taumuʻá ia ke maʻu ʻa e ‘ʻilo kanokano mo e ʻiloʻilo ʻi he meʻa kotoa pe’ ʻaki ʻa hono ako ʻa e meʻa ʻoku akoʻi moʻoni ʻe he Tohi Tapú. Ko e faʻahinga ʻoku nau faʻifaʻitaki ki he kau Pēleá ʻoku ʻikai kākaaʻi kinautolu ʻe he “ngaahi lea momoleʻolunga” ʻa e ngaahi fili ʻo Kalaisí. (2 Pita 2:3) ʻI hono kehé, ʻoku fakatauʻatāinaʻi kinautolu ʻe he moʻoni fakalaumālie ʻa e Kalaisi moʻoní mo hono kau muimui moʻoní.—Sione 8:​32, 36.

[Puha/Fakatātā ʻi he peesi 4]

MEʻA ʻOKU LEAʻAKI ʻE HE TOHI TAPÚ FEKAUʻAKI MO E FILI ʻO KALAISÍ

“Ae fānau jii, koe kuoga fakamui eni [hā mahino ko e ngataʻanga ʻo e vahaʻa taimi fakaʻapositoló]: bea hage ko hoo mou fanogo e haʻu ae Fili o Kalaisi, oku ai ni ae gaahi fili toko lahi o Kalaisi.”—1 Sione 2:​18, PM. 

“Kohai ia oku loi, ka ko ia oku ne fakafijiga oku ikai koe Kalaisi a Jisu? Koe fili o Kalaisi ia, aia oku ne fakafijiga i he Tamai moe Alo.”—1 Sione 2:​22, PM.

“Koe laumalie kotoabe oku ikai fakaha kuo haʻu a Jisu Kalaisi i he jino, oku ikai oe Otua ia: bea koeni ia ae Fili o Kalaisi, aia kuo mou fanogo ki ai e haʻu; bea oku lolotoga ni ene i mamani.” —1 Sione 4:​3, PM.

“Kuo alu atu ae kau kākā toko lahi ki mamani, oku ikai ke nau fakaha kuo haʻu i he jino a Jisu Kalaisi. Koe kākā eni moe fili o Kalaisi.”—2 Sione 7, PM.

[Puha/Fakatātā ʻi he peesi 5]

KO HA TOKOTAHA KĀKĀ ʻOKU LAHI ʻENE NGAAHI FOUNGÁ

Ko e kupuʻi lea “fili ʻo Kalaisí” ʻoku ngāueʻaki ia ki he faʻahinga kotoa ʻoku nau fakafisingaʻi ʻa e meʻa ʻoku leaʻaki ʻe he Tohi Tapú fekauʻaki mo Sīsū Kalaisí, faʻahinga kotoa ʻoku nau fakafepaki ki hono Puleʻangá, mo e faʻahinga kotoa ʻoku nau ngaohikoviʻi ʻa hono kau muimuí. ʻOku toe kau ai ʻa e faʻahinga tāutaha, ngaahi kautaha, mo e ngaahi puleʻanga ʻoku nau taukaveʻi loi ʻoku nau fakafofongaʻi ʻa Kalaisi pe taku taʻetotonu kia kinautolu ʻa e ngafa ʻo e Mīsaiá ʻaki ʻenau talaʻofa ʻi he ʻafungi te nau lavaʻi ʻa e meʻa ʻa ia ko Kalaisi pē taha ʻe lava ke ne faí—ʻa ia ko hono ʻomai ʻa e melino mo e malu moʻoní.

[Maʻuʻanga]

ʻAokositaine: ©SuperStock/age fotostock

[Fakatātā ʻi he peesi 7]

ʻI he hangē ko e kau Pēleá, ʻoku totonu ke tau “kumi ʻi he Tohitapu ʻi he ʻaho kotoa pe”