Ngaahi Fehuʻi mei he Kau Lautohí

Ko e hā ʻoku pehē ai ʻe he New World Translation ʻi he Teutalonome 31:2 ko Mōsesé naʻe “ʻikai ʻaupito fakaʻatā ke ne hū ki tuʻa mo hū ki loto” ʻi he tuʻunga ko e taki ʻo ʻIsilelí, lolotonga ia ʻoku fakahaaʻi ʻe he ngaahi liliu kehé naʻe ʻikai te ne kei malava ke fai pehē?

Neongo ko e foʻi lea faka-Hepelū ʻoku fehuʻiá ʻe lava ke liliu ia ʻi ha founga pē, ko e fakalea ʻi he ngaahi liliu faka-Pilitānia ʻe niʻihi ʻo e Tohi Tapú ʻoku fakahaaʻi ai ʻi he ofi ke ngata ʻa ʻene moʻuí, naʻe vaivai ʻa Mōsese, ʻo ʻikai ke ne malava fakaesino ʻo fakahoko ʻa e ngaahi fatongia fakaetakí. Ko e fakatātaá, ʻoku hiki ʻe he New English Bible ʻa e lea ʻa Mōsesé ʻo pehē: “ʻOku ou taʻu teau uofulu he taimí ni, pea ʻoku ʻikai te u kei lava ʻo ngaue fiemālie holo.” ʻI he tuʻunga meimei tatau, ʻoku pehē ʻe he New American Bible: “ʻOku . . . ʻikai te u kei malava ke ngaue tauʻatāina holo.”

Kae kehe, ʻoku fakahaaʻi ʻi he Teutalonome 34:​7, neongo naʻe aʻuaʻu ʻa e ngaahi taʻu ʻo Mōsesé, naʻe ʻikai te ne ngāvaivai. ʻOku pehē ai: “Kuo teau ma uofulu taʻu ʻa Mosese ʻi heʻene pekia, kuo ʻikai nenefu hono mata, pe taumatala hono ivi.” Ko ia ai, naʻe malava fakaesino ʻa Mōsese ke ne taki ʻa e puleʻangá, ka naʻe ʻikai ko e finangalo ia ʻo Sihová ke ne hokohoko atu ʻi hono fai iá. ʻOku hā mahino eni mei he meʻa naʻe hoko atu ʻa Mōsese ʻo leaʻakí: “Kuo folofola kiate au ʻe he ʻEiki, ʻE ʻikai te ke aʻa ʻi Sioatani na.” ʻOku hā mahino, naʻe toe folofolaʻaki ai ʻe Sihova ʻa e meʻa naʻá ne tuʻutuʻuni ʻi he vai ko Mēlipá.​—Nomipa 20:​9-​12.

Naʻe moʻui fuoloa ʻa Mōsese ʻo taau ke fakatokangaʻi, ʻa ia ʻe lava ke vahevahe ki he vahaʻa taimi ʻe tolu. Naʻá ne nofo ʻo feʻunga mo e taʻu ʻe 40 ʻi ʻIsipite, ʻa ia ‘naʻe akoʻi ai ia ʻi he faʻahinga poto kotoa ʻo e kakai Isipité, pea naʻe kaukaua ʻene ngaahi leá mo ʻene ngaahi ngaué.’ (Ngāue 7:​20-22) Naʻá ne nofo ʻi ha toe taʻu ʻe 40 ʻi Mitiani. Naʻá ne fakatupulekina ai ʻa e ngaahi ʻulungāanga fakalaumālie naʻe fiemaʻu ke tatakiʻaki ʻa e kakai ʻa Sihová. Fakaʻosí, naʻe tataki mo puleʻi ʻe Mōsese ʻo feʻunga mo e taʻu ʻe 40 ʻa e kau ʻIsilelí. Neongo ia, ʻi he taimi ko ení naʻe fili ai ʻe Sihova ʻa Siosiua ʻo ʻikai ko Mōsese, ke ne tataki ʻa e puleʻangá ʻi he Vaitafe Sioataní ki he Fonua ʻo e Talaʻofá.​—Teutalonome 31:3.

Ko ia ai, ʻoku maʻu ʻi he New World Translation ʻa e ʻuhinga totonu ʻo e Teutalonome 31:2. Naʻe ʻikai ke kei hokohoko atu ʻa Mōsese ʻi hono tuʻunga ko e taki ʻo ʻIsilelí, ʻo ʻikai koeʻuhí ko ha taʻemalava fakaesino, ka koeʻuhí he naʻe ʻikai fakaʻatā ia ʻe Sihova ke ne fai ʻa e meʻa ko iá.