“Tupu mei ha Kiʻi Tamasiʻi Taʻu Hiva”

ʻI HA taimi pē naʻe haʻu ai ʻa e Kau Fakamoʻoni ʻa Sihová ki hono matapaá, ko Wiesława, ʻa ia ʻoku nofo ʻi he fakatonga ʻo Pōlaní, naʻá ne fakamālō ange kia kinautolu peá ne fekau leva ke nau ō. ʻI he ʻaho ʻe taha, naʻe haʻu ai ʻa e kiʻi taʻu hiva ko Samuel ki hono matapaá fakataha mo ʻene faʻeé. ʻI he taimi ko ení naʻe fili ai ʻa Wiesława ke fanongo ki he pōpoakí peá ne tali ha makasini ʻo fekauʻaki mo ha palataisi ʻi he māmaní.

Koeʻuhi naʻe ofi ʻa e Fakamanatu ʻo e pekia ʻa Sīsū Kalaisí, naʻe loto ʻa Samuel ke fakaafeʻi ʻa Wiesława ki he kātoanga makehe ko ení. Ko ia ai, ʻi heʻene ʻalu fakataha mo ʻene faʻeé, naʻe toe ʻaʻahi ai kia Wiesława ʻa e kiʻi tamasiʻí ʻi he taimi ko ení, mo ha tohi fakaafe. ʻI he sio ki he teunga lelei ʻa e kiʻi tamasiʻí naʻe kole ange ai ʻe Wiesława ke kiʻi tatali muʻa ʻi ha miniti siʻi, peá ne ʻalu ai ʻo ʻai vala. ʻI heʻene foki mai, naʻá ne fanongo kia Samuel, tali ʻa e fakaafé, peá ne ʻeke: “Te u ʻalu atu pē au pe te u ʻalu atu mo hoku husepānití?” Naʻá ne toe pehē ange: “Tatau ai pē, ʻo kapau heʻikai ʻalu atu ʻa hoku husepānití, te u ʻalu atu au. Te u ʻalu atu koeʻuhí pē ko koe, Samuel.” Naʻe fiefia ʻa Samuel ʻi heʻene fai ki heʻene leá.

Lolotonga ʻa e malanga Fakamanatú, naʻe tangutu fakataha ai ʻa Samuel mo Wiesława ʻo fakahaaʻi kiate ia ʻa e ngaahi konga Tohi Tapu naʻe fai ki ai ʻa e lāuleá. Naʻe maongo eni kiate ia. Naʻá ne fiefia ʻi he Fakamanatú pea houngaʻia ʻi hono fakamatalaʻi ʻi ha ngaahi foʻi lea faingofua ʻa e ngaahi fakakaukau lolotó. Naʻe toe ueʻi ia ʻe he talitali māfana mo e anga-lelei naʻe fai kiate ia ʻe he fakatahaʻangá. Talu mei ai mo hono fakahaaʻi ʻe Wiesława ʻa e mahuʻingaʻia lahi ange ki he ngaahi meʻa fakalaumālié pea kuo kamata ke ne feohi tuʻumaʻu mo e Kau Fakamoʻoni ʻa Sihová. Naʻá ne pehē ki muí ni: “ʻOku ou mā ʻi he ʻikai ke u fanongo ki muʻa kia kimoutolu ʻi he taimi naʻa mou haʻu ai ki hoku matapaá. Pea kuo pau ke u fakahaaʻi naʻá ku fanongo pē ki hoʻomou pōpoakí ko e tupu mei ha kiʻi tamasiʻi taʻu hiva, ko e tupu meia Samuel.”

ʻI he hangē ko Samuel ʻi Pōlaní, ʻoku fakahīkihikiʻi ʻa e ʻOtuá ʻe he kau talavou Fakamoʻoni ʻa Sihova tokolahi kehe, ʻi he leá pea ʻi heʻenau ʻulungāanga leleí. Kapau ʻokú ke kei siʻi, te ke malava ke tokoniʻi ʻa e kakai loto-moʻoní ke nau mahuʻingaʻia ʻi he ngaahi meʻa lelei fakalaumālié.