Tupu Fakaivifoʻou ʻi ha Motu Fakaʻofoʻofa

KO E kau ʻaʻahi ki Taiuaní ʻoku ʻikai toe veiveiua ʻa e toʻoa honau lotó ʻi he tupu lau maʻuiʻui ʻa e ʻakaú ʻo ne ʻufiʻufi ʻa e motú ʻi he kotoa ʻo e taʻú. Ko e fanga kiʻi ʻulu laise lanu mata fakaʻofoʻofá ʻoku motuʻu ia ʻo lanu koula ʻi he taimi tuʻusí. ʻOku ʻufiʻufi ʻa e ngaahi veʻe moʻungá ʻe he ngaahi vaotā tupu ʻāfaʻafa matolu. ʻI heʻene kehe mei he ngaahi kolo lalahi feʻefiʻefihí, ko e tupu toʻulu lanu mata ʻi he ngaahi ngoué mo e ʻotu moʻungá ʻoku fakaivifoʻou moʻoni. Ko hono moʻoní, ko e meʻa ia naʻá ne ueʻi ʻa e ʻuluaki tokotaha ʻIulope naʻe mamata ʻi he motú ke ne fili ʻo uiʻaki ʻa e hingoa ko e Ilha Formosa, pe ko e “Motu Fakaʻofoʻofa.”

ʻIo, ko Taiuaní ko ha motu fakaʻofoʻofa ia ka ʻoku siʻisiʻi—ʻoku kilomita pē ʻe 390 hono lōloá pea kilomita ʻe 160 nai hono fālahí ʻi he tafaʻaki ʻoku laulahi tahá. ʻOku ʻufiʻufi ʻa e konga lahi ʻo e motú ʻe he ʻotu moʻunga māʻolunga. Ko Yü Shan (Moʻunga Morrison) ʻoku māʻolunga ange ia ʻi he Moʻunga Fuji ʻo Siapaní pe ko e Moʻunga Cook ʻo Nuʻu Silá. ʻOku takatakaiʻi ʻa e ʻotu moʻunga ʻi loto-mālié ʻo hifo ai ki tahi ʻe he ngaahi matāfanga tokalelei lausiʻi, ʻoku ngaʻuta ai ʻa e kakai femoʻuekina ʻo Taiuaní, ʻa ia ʻoku laka hake he taimí ni ʻi he toko 22 miliona.

Ko ha Faʻahinga Tupu Foʻou

Kae kehe, ko ha toe faʻahinga tupu ʻe taha ʻa ia ʻoku hoko ʻo hā mahino ange ʻi Taiuani—ko e tupu fakalaumālié. ʻOku hā eni ʻi he faivelenga ʻoku fakahāhā ʻe he kakaí, ʻa e iiki mo e lalahi, ʻi heʻenau hoko pē ʻo ʻiloʻi ʻa e ʻOtua moʻoni ko Sihová. ʻOku maongo moʻoni ʻa e sio ki he tupu ʻa e tokolahi ʻo e faʻahinga ko ia ʻoku nau ngāue faivelenga ʻi hono tokoniʻi ʻa e niʻihi kehé ke nau ako ʻo fekauʻaki mo Sihova pea mo ʻene taumuʻá.

Ko e tupú ʻoku fiemaʻu ai ke ʻi ai ha fakalahi. ʻI Tīsema 1990, naʻe fakatau ai ha konga kelekele ki hano fakalahi ʻa e ʻōfisi vaʻa ʻo e Kau Fakamoʻoni ʻa Sihová. Ko e fale ki muʻá, naʻe tuʻu ʻi Taipei, ne fuʻu siʻisiʻi ia ki hono tokangaʻi ʻa e ngaahi ngāue ʻa e kau malanga ʻo e Puleʻangá ʻe toko 1,777 ʻi Taiuani ʻi he taimi ko iá. Hili ʻa e ngaahi taʻu ʻo e ngāue faivelenga naʻe fai ʻe he kau ngāue pole fakavahaʻapuleʻanga mo fakalotofonua ʻo e taʻumotuʻa kehekehe, naʻe maau ai ke ngāueʻaki ʻa e ngaahi fale foʻou fakaʻofoʻofa ʻi Hsinwu ʻi ʻAokosi 1994. ʻI he  aʻu mai ki he taimi ko iá ko e toko 2,515 naʻe kau ʻi hono fakamafola atu ʻa e ongoongo lelei mei he Folofola ʻa e ʻOtuá, ʻa e Tohi Tapú. ʻI he taimí ni, ko e laka hake ia ʻi he taʻu ʻe hongofulu ki mui ai, kuo mahulu hake ʻi he liunga uá ʻa e fika ko iá, ʻo fakalaka ia ʻi he kau malanga ʻe toko 5,500, pea ʻi he māhina kotoa pē ko e vahe fā ʻe taha nai ʻo e tokolahi ko iá ʻoku nau kau ʻi he ngāue fakaʻevangeliō taimi-kakató. ʻOku taau ke fakatokangaʻi makehe ʻa e kau talavou mo e finemui ʻoku nau hangē ko e “hahau” fakaivifoʻou ʻo e pongipongí.​—Sāme 110:3.

Tupu Fakalaumālie ʻi he Lotolotonga ʻo e Toʻutupú

Ko e tokolahi ʻo e kau malanga faivelenga ʻo e ongoongo leleí ʻoku nau fuʻu kei siʻi. Ko e niʻihi ai ko e kau ako he lautohi siʻi. Ko e fakatātaá, ʻi ha kolo ʻi he fakatokelau ʻo Taiuaní, naʻe fakaafeʻi ai ha ongo meʻa mali ko e ʻuluaki taimí ia ke na maʻu ʻa e Ako Fakafaifekau Fakateokalatí, ʻa ia ʻoku ako ai ʻa e Kau Fakamoʻoni ʻa Sihová ki he founga ke faiakoʻaki ʻa e ngaahi moʻoni Fakatohitapú. Naʻe ʻohovale ʻa e ongo meʻá ʻi he sio ki ha kiʻi tamasiʻi, ko Weijun, ʻi heʻene lau ʻa e Tohi Tapú mei he peletifōmú ʻo pōtoʻi ange ia ʻi he kakai lalahi tokolahi. Pea ʻi he ngaahi fakataha kehe naʻá na maʻú, naʻe maongo loloto kia kinaua ʻa e aʻu ʻo fai ʻa e ngaahi tali lelei ʻe he fānau ʻoku teʻeki ai te nau hū ki he akó. Naʻe fakamatala ʻa e ongo meʻá ni ki he ʻulungāanga lelei ʻa e fānau iiki ʻi he Fale Fakatahaʻangá.

Ko e hā ʻoku mātuʻaki tokanga ai ʻa e fānau iiki ko ení ki he ako Fakatohitapú ʻi he fonua tokolahi fau ko eni ʻi he lotu Putá mo e lotu Taó? Koeʻuhí kuo ngāueʻaki ʻe heʻenau ngaahi mātuʻa Kalisitiané ʻa e ngaahi tefitoʻi moʻoni Fakatohitapú pea kuo nau langa hake ha moʻui fakafāmili fiefia ʻoku fakatefito ʻi ha vahaʻangatae mo Sihova. Koeʻuhi ko e feinga ʻa e ongo mātuʻa ʻa Weijun ke ʻai ke fakafiefia ʻa e ako Tohi Tapu fakafāmilí mo e ngāue fakamalangá, ko e tokoua mo e tuofefine lahi ʻo e kiʻi tamasiʻi ko ení kuó na ʻosi hoko ko e ongo Fakamoʻoni papitaiso. ʻI he taimi naʻe fiemaʻu ai ki muí ni ke kau ʻa Weijun ʻi he ngāue fakamalanga ki he kakaí, naʻe fakahaaʻi ʻe heʻene faʻeé kuo ʻosi tufa ʻe he tamasiʻí ia ʻa e ngaahi makasini ʻi he māhina ko iá ʻo lahi ange ia ʻi he makasini fakakātoa naʻe tufa ʻe he toenga ʻo e fāmilí. ʻOku hā mahino ʻokú ne fiefia ʻi he talanoa fekauʻaki mo e moʻoní, tali ʻi he ngaahi fakatahá pea mo hono vahevahe atu ki he niʻihi kehé ʻa e meʻa kuó ne akó.

ʻI Heʻenau Tupu Haké

ʻOku fēfē ʻa e faʻahinga kei siʻi ko iá ʻi heʻenau tupu haké? Ko e tokolahi tahá ʻoku hokohoko atu ʻenau fakahaaʻi ʻa e ʻofa moʻoni kia Sihova pea ki he ngāue fakafaifekaú. Ko e fakatātaá, ko Huiping ko ha tokotaha ako. ʻI he ʻaho ʻe taha naʻe pehē ai ʻe heʻene faiakó ʻoku ʻikai ke tali ʻe he kau mēmipa ʻo ha lotu ʻe taha ʻa e totó ka naʻe ʻikai te ne ʻiloʻi pe ko e lotu fē. ʻI he mātuku ʻa e kalasí, naʻe fakamatala ange ai ʻe he finemui Kalisitiane ko ení ki heʻene faiakó ko e lotu ko iá ko e Kau Fakamoʻoni ʻa Sihová peá ne fakahaaʻi ai mo e ʻuhinga ʻoku nau fai pehē aí.

Naʻe huluʻi ʻe ha faiako ʻe taha ha foʻi vitiō fekauʻaki mo e ngaahi mahaki ʻoku fetuku holo ʻe he fehokotaki fakasinó. Naʻe lave ʻi he foʻi vitioó ki he 1 Kolinito 6:​9, ka naʻá ne taukaveʻi ʻoku ʻikai ke fakahalaʻi ʻe he Tohi Tapú ia ʻa e faka-Sōtomá. Naʻe toe malava ʻa Huiping ke fakahaaʻi ki he faiakó ʻa e anga ʻo e vakai ʻa e ʻOtuá ʻo fekauʻaki mo e tuʻunga ko iá.

ʻI he taimi naʻe teuteu ai ʻe he tokotaha ʻi heʻene kalasí ko Shuxia ha līpooti fekauʻaki mo e fakamālohi ʻi he fāmilí, naʻe ʻoange ʻe Huiping kiate ia ʻa e ʻĀ Hake! ʻo ʻEpeleli-Sune, 2002, ʻa ia ko e kaveinga ʻi he takafí ko e “Tokoni ki he Kakai Fefine ʻOku Tāʻí” peá ne fakamatalaʻi ange ʻoku lahi ai ʻa e fakamatala makatuʻunga ʻi he Tohi Tapú ʻo kau ki he fakamālohi ʻi he fāmilí. Naʻe iku ʻo hoko ʻa Shuxia ko ha tokotaha malanga teʻeki papitaiso. Ko ia mo Huiping ʻokú na vahevahe atu he taimí ni ʻa e ongoongo leleí ki he niʻihi kehé.

Ko e kau Kalisitiane tokolahi ʻi he ʻapiakó ʻoku nau ʻiloʻi ʻoku ʻikai ko ha meʻa faingofua ʻa hono ʻiloa kinautolu ko e faʻahinga ʻoku nau moʻuiʻaki ʻa e ngaahi tefitoʻi moʻoni Fakatohitapú. ʻOku tautefito eni ʻi he fanga kiʻi kolo ʻutá. Naʻe pau ke fekuki ʻa e talavou ko Zhihao mo e tenge ʻa e toʻumeʻá koeʻuhi ko ʻene tuí mo e ngāue fakamalangá. ʻOkú ne pehē: “Naʻá ku ongoʻi feifeitamaki ʻaupito ʻou loto-siʻi ʻi ha fetaulaki mo hoku kaungāakó lolotonga ʻa ʻeku kau ʻi he ngāue fakamalangá. ʻI he taimi ʻe niʻihi, naʻe hanga ai ʻe he toko hongofulu ʻo kinautolu ʻo manukiʻi au!” ʻI he ʻaho ʻe taha, naʻe vaheʻi ai ʻe he faiakó ʻa Zhihao ke ne fai  ha fakamatala fekauʻaki mo ʻene lotú ki he kalasí. “Naʻá ku fili ke kamata ʻa ʻeku malangá ʻi he Senesi vahe 1 pea toki lāulea leva ki he ngaahi fehuʻi hangē ko ení: Ko hai naʻá ne ngaohi ʻa e māmaní mo e ngaahi meʻa kotoa ʻi aí? Pea naʻe anga-fēfē ʻa e hoko mai ʻa e tangatá? Ko e tuai pē ʻeku lau mei he Tohi Tapú, naʻe kamata ke kataʻi au ʻe he niʻihi, mo nau pehē naʻá ku tui taʻeʻuhinga. Kae kehe, naʻá ku hoko atu ʻo fakaʻosi ʻeku fakamatalá. Hili iá, naʻá ku maʻu ai ʻa e faingamālie ke talanoa fakafoʻituitui mo e niʻihi ʻo hoku kaungāakó ʻo fekauʻaki mo ʻemau ngāué pea mo ʻemau tuí. ʻI heʻenau sio mai kiate au he taimí ni ʻi he ngāue fakamalangá, ʻoku ʻikai te nau kei kataʻi au!”

ʻOku hoko atu ʻa Zhihao: “Koeʻuhi ko ʻeku ongo mātuʻá ko e ongo Fakamoʻoni, ʻoku mau fetalanoaʻaki ʻi he konga tohi fakaʻahó he pongipongi kotoa pē. ʻOku mau toe ako ʻa e Tohi Tapú pea maʻu maʻu pē ʻa e ngaahi fakatahá. Ko e ʻuhinga ia ʻoku ou lava ai ke fehangahangai mo ha taha pē ʻokú ne kei loto nai ke manukiʻi au ʻi heʻeku feinga ke vahevahe ʻa e ngaahi moʻoni Fakatohitapu fakaivifoʻoú ki he niʻihi kehé.”

Ko Tingmei ko ha tokotaha ako ia ʻi ha akoʻanga fakatekinikale ki he tamaiki fefiné. ʻI he taimi ʻe taha naʻe fakaafeʻi ai ia ke ne ʻalu ʻi ha kaitunu mo e niʻihi ʻo hono ngaahi kaungāakó fakataha mo e tamaiki tangata mei he ʻapiako ki he tamaiki tangatá. Naʻe lava ke ne sio ki he fakatuʻutāmaki fakaeʻulungāanga ʻi he feohi peheé peá ne fili ai ke ʻoua ʻe ʻalu. Naʻe fakaafeʻi ia ʻi he taimi lahi, neongo naʻá ne vahevahe ki hono ngaahi kaungāakó ʻa e fakamatala lelei mei he tohi Ngaahi Fehuʻi ʻOku ʻEke ʻe he Toʻutupú—Tali ʻOku ʻAongá. a Naʻe manukiʻi ia ʻe he tamaiki fefiné, ʻo pehē ange naʻá ne ʻolokuonga. Kae kehe, ko e fakapotopoto ʻo e muimui ki he ngaahi tefitoʻi moʻoni Fakatohitapú naʻe vave ʻene hā mahinó ʻi he taimi naʻe feitama ai ʻa e taha ʻo e tamaiki fefiné peá ne fakatōtamá. ʻOku pehē ʻe Tingmei: “Ko e fai ki he fakahinohino ʻa Sihová kuó ne ʻomai kiate au ha konisēnisi maʻa. Ko hono olá, ʻoku ou maʻu ha fiefia ʻi loto mo ha ongoʻi fiemālie lahi.”

Ikuʻi ʻa e Ngaahi Fakafaingataʻaʻiaʻanga ki he Tupú

Ko e taha ʻo e ngaahi kaumeʻa ofi ʻo Tingmei ko Ruiwen. ʻI heʻene kei siʻí, naʻe ongoʻi ai ʻe Ruiwen ko e ʻalu ki he ngaahi fakataha faka-Kalisitiané mo e kau ʻi he ngāue fakamalangá ko ha ngāue fakaongosia pē. Kae kehe, ʻi he sio ki he faikehekehe ʻi he ʻofa moʻoni ʻa e faʻahinga ko ia ʻi heʻene fakatahaʻangá pea mo e kaumeʻa momole-ʻolunga ʻa hono ngaahi kaungāakó, naʻá ne tuipau ai naʻe fiemaʻu ke ne fai ha ngaahi liliu ʻi heʻene moʻuí. Naʻe kamata ke malanga ʻa Ruiwen ki hono ngaahi kaungāakó pea naʻe vave ʻene ʻiloʻi lelei ange ai ʻa e meʻa ʻoku totonu ke ne faí. Naʻá ne kamata ngāue ko ha tāimuʻa tokoni, ʻo fakamoleki ʻa e houa laka hake he 50 he māhina ʻi he ngāue fakafaifekaú. Naʻe kamata leva ke ne tāimuʻa tuʻumaʻu,  ʻo fakamoleki ʻa e houa laka hake he 70 he māhina ʻi he ngāué. ʻOku pehē ʻe Ruiwen: “ʻOku faingataʻa kiate au ke maʻu ha lea ke fakamatalaʻiʻaki ʻa ʻeku houngaʻia kia Sihová. Naʻe ʻikai ʻaupito mole ʻene ʻamanakí meiate au. Neongo naʻá ku fai ʻa e ngaahi meʻa naʻe fakalotomamahiʻi ai ia, naʻá ne kei ʻofa pē ʻiate au. Ko ʻeku faʻeé mo e niʻihi kehe ʻi he fakatahaʻangá naʻa nau fakahaaʻi ʻa e tōʻonga ʻofa tatau. ʻI heʻeku fai he taimí ni ʻa e ngaahi ako Tohi Tapu ʻe nima, ʻoku ou ongoʻi ai ʻoku ou kau ʻi he ngāue fakafiemālie lahi tahá.”

ʻI he akoʻanga māʻolunga ʻe taha ʻi he kolo ʻutá, naʻe vaheʻi ai ha ongo tamaiki Fakamoʻoni ke na fakafofongaʻi ʻa e ʻapiakó ʻi ha feʻauhi ʻo e ngaahi faiva fakafonua. ʻI heʻena ʻilo fekauʻaki mo e natula ʻo e feʻauhí, naʻe ongoʻi ʻe he ongo talavou Fakamoʻoní ko e kau aí ʻe lavea ai ʻa hona konisēnisi faka-Kalisitiané. ʻI heʻena feinga ke fakamatalaʻi ʻena fakakaukaú pea kole ke fakaʻatā kinaua mei aí, naʻe ʻikai ke tali ʻena kolé. ʻI hono kehé, naʻe tala ange ʻe he kau faiakó kuo pau ke na ō koeʻuhí he naʻe vaheʻi kinaua ki ai. ʻI he taʻeloto ke fakangaloku ʻena tuí, naʻe fetuʻutaki ʻa e ongo talavoú ʻi he komipiutá ki he Uepisaiti ʻa e potungāue akó ʻo ʻave ai ha tohi naʻe fakamatalaʻi ai ʻena palopalemá. Neongo naʻe ʻikai ke tali fakafoʻituitui mai ʻa e tohi ʻa e ongo talavoú, naʻe vave ʻa e maʻu ʻe he ʻapiakó ha fakahinohino ke ʻoua ʻe fakamālohiʻi ha taha pē ke kau ʻi ha feʻauhi pehē. He fiefia moʻoni ko e ongo talavoú ni ʻi he sio ko e ako Fakatohitapu naʻá na maʻú naʻe ʻikai ngata pē ʻi heʻene fakafuo ʻa hona konisēnisí ka ʻoku toe ʻoange ai kia kinaua ʻa e mālohi ke na tuʻu ki he meʻa ʻoku totonú!

Naʻa mo e faʻahinga ʻoku ʻi ai ʻenau ngaahi fakangatangata fakaesinó ʻoku nau fiefia lahi ʻi hono vahevahe atu ʻenau ʻamanaki Fakatohitapú ki he niʻihi kehé. Ko Minyu naʻá ne mamatea talu mei hono fāʻeleʻí. ʻI he ʻikai malava ke ne ngāueʻaki ʻa hono ongo nimá, ʻokú ne huke ʻa e ngaahi peesi ʻo e Tohi Tapú ʻaki ʻa hono ʻeleló ʻo maʻu ai ʻa e konga tohi ʻokú ne loto ke laú. Lolotonga ʻa ʻene malanga ʻi he konga he Ako Fakafaifekau Fakateokalatí ʻi he Fale Fakatahaʻangá, ʻokú ne tokoto ai ʻi ha sofa māʻulalo pea tangutu ʻa hono tokoní ʻi ha kiʻi sea māʻulalo mo pukepuke kiate ia ʻa e maiká. He fakalotomāfana moʻoni ke sio ki he feinga ʻoku fai ʻe Minyu ʻi hono teuteu ʻa e ngaahi konga ko ení!

ʻI he taimi naʻe loto ai ʻa Minyu ke hoko ko ha tokotaha malanga ʻo e Puleʻangá, naʻe ako ai ʻa e fanga tuofāfine ʻe niʻihi ʻi he fakatahaʻangá ki he founga ke fai ai ʻa e fakamoʻoni ʻi he telefoní koeʻuhi ke tokoniʻi ia. ʻOkú ne lomi ʻa e fiká ʻaki hono ʻeleló lolotonga ia ʻoku tokoni ʻa e fanga tuofāfiné kiate ia ʻi hono tauhi ha lēkooti ʻo ʻene ngaahi telefoní. ʻOkú ne fiefia lahi ʻaupito ʻi he ngāué ʻo ne hoko ai ko ha tāimuʻa tokoni, ʻo talanoa ʻi he telefoní ki he niʻihi kehé ʻo fekauʻaki mo e Puleʻanga ʻo e ʻOtuá ʻi he houa ʻe 50 ki he 60 he māhina taki taha. Kuó ne maʻu ʻa e niʻihi ʻoku nau tali ʻa e ʻū tohi Fakatohitapú pea fakaʻatā ia ke ne fai ha ngaahi toe ʻaʻahi. ʻOkú ne fai he taimí ni ʻa e ako Tohi Tapu ʻe tolu mo e faʻahinga tāutaha ʻa ia naʻá ne fetuʻutaki mo kinautolu ʻi he foungá ni.

ʻIo, ʻi he hangē ko e hahau fakaivifoʻoú, ko e kau talavou—mo e finemui—ʻi he fakatahaʻanga ʻe 78 ʻo e Kau Fakamoʻoni ʻa Sihova ʻi Taiuaní ʻoku nau loto-lelei mo faivelenga ʻi hono ʻoatu ʻa e ongoongo lelei fakatupu moʻui ʻo e Puleʻangá ki he laui miliona ʻoku ngaʻuta ʻi he motu nofoʻi tokolahi ko ení. Ko e konga siʻi pē eni ʻo hono fakahoko ʻi māmani lahi ʻa e kikite Fakatohitapu ko ení: “ʻI he ʻaho ʻoku ke fakate tau, ʻe tali ko au ʻe he kakai na; te nau tuʻu mai ʻi he ngaahi teunga tapuha: hange ko e fanauʻi ʻe he pongipongi ʻa e hahau, ʻe pehe ʻa e haʻu kiate koe hoʻo kau talavou.” (Sāme 110:3) Ko ha matavai ʻo e fakalototoʻa moʻoni ʻa e kau talavoú ni ki he faʻahinga taʻumotuʻa ʻi he lotolotonga ʻo honau ngaahi kaungāngāué, pea hiliō ai, ko ha tupuʻanga ʻo e fiefia ē ka ko kinautolu ki heʻenau Tamai fakahēvaní, ʻa Sihova ko e ʻOtuá!​—Palovepi 27:11.

[Fakamatala ʻi lalo]

[Puha/Fakatātā ʻi he peesi 10]

FIEMAʻU ʻA E NGAAHI FALE FAKATAHAʻANGA LAHI ANGE

ʻI he tupu ʻi Taiuaní, kuo hoko ai ko ha pole lahi ʻa e fiemaʻu ʻo ha ngaahi Fale Fakatahaʻanga lahi ange. Ko e hā hono ʻuhingá? Koeʻuhí tuku kehe ʻa e ngaahi feituʻu ʻuta ʻe niʻihi, ʻoku ʻikai meimei ʻi ai ha kelekele feʻunga ki hono langa ʻo e ngaahi Fale Fakatahaʻangá. ʻIkai ko ia pē, ʻoku mamafa ʻaupito ʻa e totongi ʻo e kelekelé pea ʻoku fefeka ʻa e ngaahi lao ki hono vahevahé. ʻI he fanga kiʻi kolo mo e ngaahi fuʻu kolo lalahi angé, ko e toe meʻa pē ʻe tahá ko hono fakatau mai ʻa e ngaahi fale naʻe langa ki he ʻōfisí ʻo fulihi ko ha ngaahi Fale Fakatahaʻanga. Naʻa mo ia, ko e lahi taha ʻo e ngaahi ʻōfisí ʻoku fuʻu māʻulalo ʻa hono ʻaofí, mamafa ʻa e totongi ki hono tokangaʻí, fakangatangata ʻa e hū ki aí, pe ko e ngaahi meʻa kehe ʻoku ʻai ai ke taʻefeʻunga ki hono ngāueʻaki ko e ngaahi Fale Fakatahaʻanga.

Neongo ia, ʻi he ngaahi taʻu ki mui ní, kuo malava ai ʻa e Kau Fakamoʻoni ʻa Sihova ʻi Taiuaní ke maʻu ha ngaahi Fale Fakatahaʻanga foʻou. Ko e kumi ki he kelekele foʻoú ʻoku kei hokohoko atu pē ʻi he fakahaaʻi ʻe he Kau Fakamoʻoní ʻenau loto-lelei ke fua ʻa e fakamole fakapaʻangá pea pehē ki hono fakahoko ʻa e ngaahi pōtoʻi fakaelanga ʻoku fiemaʻú.